يافتاح ياعليم يارزاق يا كريم

الواحد ساعات يصحى من النوم يلاقى كلام بيزن فى راسه زى الخاطر كده وعمال بتعاد تغسل وشك معاك تشرب شاى معاك تقعد تتفرج ع الشاشه معاك ياللا انا قلت اسجله بس الا يروح فكانت هذه الكلمات 

السبت اول ديسمير 2012 يوم نزول الاحوان لتاييد مرسى

قايم من النوم وفيه كام بيت كده بيزنوا ف دماغى زن النحل فى الخليه

 -----------------------------------------

 سلقونى سلق البيضات بيضه ورا بيضه

 والبيض ماهوش مستوى والمحتوى سايل

 لجنه تسابق زمن والقصد موش ساهل

 حتى الغدا والصلا بيتم فى الأوضه

 ******

 والتانى قاعد يقول تحصينى شىء واجب

 انا باصدر القوانين دستورى لو عاجب

 واللى يقول معترض يا الف مرحب بيه

 هيه العيون تترفع برضو عن الحاجب ؟؟

 *****

 يافرحتى يالحموع ملايين ملت ميادين

 بس الولاد والدقون نازلين بيحمو الدين

 حاشيين نافوخ الجميع ان انتو ناس كفره

 وف وسطكو ناس فلول قاعدين هناك بايتين

 ******

 والمسخره فى الخيام بانجو على تحشيش

 والبيره والأحضان فى الخيمه على ودنه

 مع ان حضن الجميع فى خطبتى موجود

 بس انتو يكره بفعلكو عاوزين طابور تطفيش

 ******

 بتهددونى بجموع وهتاف حشود بتقول

 عيش شامى وعداله ...حريه وابصر ايه

 والقاضى يعصى القانون ويسك بابه عليه

 الشعب جاله الوبا ...والسحر بان معمول

 ******

 انا جبت كام عفريت وقريت عليهم ورد

 قالو تجيب دستور ...من السند او م الهند

 وترش جنبه البخور ...وتحصنه بإعلان

 تسكت جميع الجموع ...ويزول كمان العند

 *******

 وعشان كده فى السريع ..اسلق ياغريانى

 مابقاش خلاص عندنا ...اوقات تضيع تانى

 خلص وخيرهم شوف هما يختارو ايه

 دانا عفركوش صوت صداه بيرن فى ودانى

ورقة قديمه

ظللت ابحث عنها مدة طويله عند اقتراب موعد عيد مولدى ...ولم اجدها ابدا والخميس اثناء ترتيبى لبعض اوراقى المبعثرة وجدت نوتة بداخلها اوراق صفراء ومقالات من الأهرام وعناوين ....وسط هذه المعمعه وجدت نص القصيدة التى كتبها لى جدى الشيخ محمد عبد الله الجزار الاستاذ بكلية الشريعة فى الأزهر وعنوانها تحية الشعر للمولود الكريم عادل ....كنت اول اخوتى الذكور ...واعتقد ان هذا سر الحفاوة والسرور بقدومى لأنى عرفت انه قد مات لى اخوان متتاليان قبل اخوتى البنات الائى يكبرننى يقول جدى فى قصيدته

 

تهنئة الشعر بميلاد النجل الكريم عادل

سررنا بهذا الوليد الأغر :: فحييت من قادم منـــتظر

  وقـد طال شوق اليك فجئت :: لأول يوم بشهر صفر

لتسع وستين والألف بعده :: ثلاث مئين بسير القمر

 وحــــــــادى وعشرين نوفمبر:: لتسع مئين والف غبر 

وتسع سنين مع الأربعين ::لميلاد عيسى نمى واشتهر

رعى الله مـولودنا عادلا :: ووقاه شـــــــرا ووقاه ضر
وشد به ازر خمس له :: من الأخوات بطول العمر 

محمد عبد الله الجزار

مدرس  بكلية الشريعه بالأزهر
جد المولود المبارك عادل  

وفى ظهر نفس الورقة القديمة وجدت اربع ابيات كتبهم حما شقيقتى وكان استاذا للغة العربية ايضا وخريج دار العلوم بالقاهرة  وشاعرا وخطاطا يكتب الخط العربى كسلاسل الذهب وله مجلدات بخط يده تدرس فى المدارس وفى مدرسة تحسين الخطوط ..ويبدو ان الاستاذ احمد الحسينى قد قرأ بعض ازحال والدتى رحمها الله وكانت تكتب الشعر العامى واحيانا الفصيح فى مناسبات الأسرة او فرحا بقدوم احد الأبناء او نجاحه وهكذا..كتب الاستاذ احمد الحسينى فى السبعينات الأبيات التاليه تعليقا على ماسمعه من كتابات امى الشعرية

هذه امى تحملنى وعمرى اقل من عام واحد

تحية الشعر

للسيده ام عادل

لأم عادل شعر :: قد رق لفظا ومعنى
شعر جميل لطيف :: يزيده الصدق حسنا
تكاد تلمس فيه :: قلب الأمومة احنى
لا غرو ان اباها :: فى الشعر اعذب فنا

احمد الحسينى

5 \ 5\1972

***********

الرزق مكتوب .....

بسم الله الرحمن الرحيــــــــــــــم
وفى السماء رزقكم وما توعدون , فورب السماء والأرض انه لحق مثلما انكم تنطقون

هذه قصة اعجبتنى فنقلتها كما هى على لسان كاتبها

شاورت للتاكسى و ركبت
ببوص للسواق اتفاجئت من كبر سنه و من وشة الى مافيهوش مكان سليم من كتر التجاعيد الى مغطية على شكله و متبت فى الطارة و ايديه فيها رعشه خفيفة
مش عارف لية اول لما ركبت جنبه حسيت ان هما دول الناس الى بتقول الدنيا لسة بخير
انا : حضرتك بتسوق بقالك كتير ؟
السائق : انا بسوق التاكسى من سنة 1948
(يعنى بيسوق من قبل ما جدى يتجوز اصلا )
انا : و ياترى اية خلاصة خبرتك فى السواقة الى ممكن تقولها لواحد زيى عشان اتعلم منها
السائق : نملة سودة على صخرة سودة فى ليلة حالكة الظلمة يرزقها الله
انا : قصدك اية ؟!!
السائق : هحكيلك حكاية حلصت معايا الشهر ده علشان تفهم قصدى
انا : ياريت
السائق : انا فضلت عيان 10 ايام و مبشتغلش و مكونتش قادر اتحرك من السرير و انا طبعا على باب الله و اليوم بيومه ..و بعد اسبوع ماكنش فيه فى البيت ولا مليم .. انا عارف و مراتى مخبيه عليا .. اقولها هنعمل اية يا سيتى تقولى الخير كتير يا حاج .. و هى عمالة تشحت اكل من الجيران و انا طبعا ولادى الى فيهم مكفيهم و كل واحد فى وادى و عنده مشاكله .. بعد 10 ايام قولت للحاجة هنزل الشغل حلفت مانا نازل الشغل عشان حموت منها .. فكدبت عليها و قولتها هروح القهوة ساعة و ارجع عشان اتخنقت و عاوز اشم هوا
و دورت العربية و قلت ياربنا يا رزاق
فضلت ماشى لحد ملاقيت عربية 504 عطلانة و السواق بتاعها بيقولى معايا واحد عربى طالع المطار تاخده عشان عربيتى عطلت ؟ واخد بالك من حكمة ربنا ؟ معاه 504 حالتها بريمو و عطلت , قلت له اوصله
ركب معايا الزبون طلع من عمان سألنى هتاخد كام قولتله الى تجيبه و أكد عليا قولتله الى تجيبه هاخده
عرفت انه رايح قرية البضايع عشان هيخلص حاجة هناك .. فقولتله انا حفيدى بيشتغل هناك و ممكن يساعدك .. و بالفعل لاقيت حفيدى هناك فى الوردية .. طبعا كان ممكن ملاقهوش .. خلصنا الحاجة الى عاوزها و رجعنا الدقى
سألنى عاوز كام يا حاجة ؟ قولته احنا اتفقنا الى تجيبه فراح مدينى 50 جنية خدهم و همشى .. قالى راضى قولته اه راضى الحمد لله
قالى بص يا حاج الجمرك كان المفروض 1400 جنية و حفيدك خلانى ادفع 600 جنية يعنى فيه فرق 800 جنية دول طالعين من ذمتى ليك يعنى حلالك و دول 200 جنية اجرة المشوار يبقى الف جنيه و ال 50 جنية الى معاك هدية منى ليك
شفت يا استاذ يعنى مشوار واحد جابلى الف جنيه ممكن اشتغل شهر و ماجبهومش .. شوفت ربنا نزلنى من بيتى وعطل التاكسى 504 و اوجد لى كل المسببات علشان يرزقنى الرزق ده .. اصل كل ده بتاع ربنا .. دى الحاجة الوحيدة الى اتعلمتها فى حياتى

و نزلت من التاكسى بعد موصلت و كان نفسى اقعد اسمع منه اكتر بس انا كمان كان عندى موعد مع
الجرى المستمر وراء الرزق

ومن ظن ان الرزق ياتى بقوة :: ما أكل العصفور شيئا مع النسر

ايها الناس ....المكنه طلَّعت قماش

ممكن نقول:أيها الناس ..... المكنه طلعت قماش _
___________________________________________
 بعد يومين الا ربع فى العجمى ومحاولات مضنيه لتشغيل الغساله الايديال العتيقه ذات المفتاح الاوتوماتيكى الخرِب ....انتصرنا على المفتاح اللعين ابو 48 طرف ورجل ...قال لى البائع المفاتيح كتير واصنافها ما تعِّدش لازم تفك القديم وتجيبه وتيجى وانا اديلك زيه ....ولما كنت مقروصا من لخبطة الأطراف العديده ....والألوان المختلفه للسلوك وتوصيلاتها خاصة فى الحاجات المركبه والتى تعنى الغلطة فيها .....التوهان واستحالة العودة ....ولمعرفتى المسبقه بالمصير ...فقد شرعت قبل الفك والنزع ان اكتب على كل سلك رقم مكانه الصحيح على الكليبس الخاص به حتى تعود المياه الى مجاريها ...والغسيل الى هدومنا ...استخدمت الورق والسيلوتيب وقسمت المفتاح الى مدخلات والتى يسميها الفرنجة والعجم
" الإينبوتس " ومخرجات او ما يسميه العجم" الآوتبوتس " وهاتك يا ترقيم وتلزيق بنظام ولا امساكية رمضان السلك الاحمرانى فى الترمينال الفولانى والسلك الاخضرانى اللى دبلت فيه الأغانى فى التيرمينال العلانى ....ولم ادرى ان 4 ورقات قليلات الأدب منهن انزلقن وتركن اسلاكهن وسقطن فى قاع الغساله ....وانا اعمى طرشى مابينضرشى ...حازم اخى جاء يساعدنى فى اعادة الشىء لأصله ....فصاح ...انا ملاحظ ان الرمادى والابيض والروز والأصفر ماعليهومشى تاج ....ازاى ... غضب شديد.... ولعن لكل سلك تجرد من المشاعر والقى بثوبه ورقمه فى المجهول.... اللعنه على الرباعى المنحل والمتمرد .... قلت اذا فلنركب الباقين المؤدبين ونعود للقلة القليلة المندسه والتى خلعت رداء الحياء وطلعت لنا لسانها فى تحد ظاهر ...
 انسدل ليل ليلتنا الأولى دون ان نصل للحل ...سهرت طول الليل اكتب ماتريكس احتمالات 4 الوان واربع اماكن غير محدده قطعا ...لأن ليست كل النهايات مشغوله بطرف سلك... فمنها فارغ ايضا ....رسمت جدول احتمالات... وجدت انه هناك 16 احتمال لوضع الأسلاك فى النهايات الطرفية للمفتاح ....فقط بعد التاكد من موضعها السليم وليس الخاطىء ...اذا لابد من البحث عن الوريقات الأربع فى جوف الغساله وفى مكان ضيق مظلم ملىء بالعقبات والأسلاك والتخانيق استلزم استخدام ادوات ولمبات ومكانس كهربيه وعصيان طويله وبوص صيد السمك و مفكات وابر تريكو ....وكاننا نبحث عن شفرة الكنز المفقود ....لم انم الا بعد ان حصدت الأوراق الأربعة من اماكن لا يمكن تصورها فى جوف الغسالة اللعينه ( احداها جاءت من قلب المكنسه الكهربية التى شفطتها وحدها فى محاولة لجمعهم كلهم فى ضربة واحده )....ولا اقول على كمية السباب واللعنات التى صببتها صبا فوق الأسلاك الأربعة اللائى تجردن من سلوكياتهن ومن الوانهن ومن ارقامهن القوميه ...نمت نصف صاحى ...وفى الفجر بدات محاولات تطبيق الاحتمالات ال16 ..وبعد كل محاوله يتم تشغبل الغساله برنامج" سى" لنرى هل يمشى الموضوع طبيعى ام دربكه وخزعبلات ....المهم طوال اليوم نجرى التجارب وتفشل ونغرق بالمياه ونعيد الكره ....وفى المغرب ....صاحت الغساله .......
ايها الناس..... المكنه طلعت قماش .....بس مغسول .......ستار
 هكذا انا عنيد الى اقصى مدى ولايمكن ان استريح الا ان انتصر على الآله ...وويل لأى سلك  روز او رمادى او ابيض اوحتى اصفر منِّى ...لو كررها ....انتهت

عيد ميلاد زيوده ابنى

فى يوم ميلاد ابنى الحبيب زياد اهديته هذه السطور( 24 يوليو من كل عام )
لم تات فرصة لأعبر لك شعرا عن محبتى ..وسعادتى بك كونك ابنى ...وكونك بهذا الخلق الرفيع ...والعقلية المبدعة واليوم اجدها فرصة اخط لك فيها وعلنا ما اكنه لك
لما يبقى طلع وردك زاين الدنــــــــــيا...ضـــناك
لما كان يسمع لصوتك دوغرى كان يجرى وراك
شايل الفن اصل جده .. كان عظيم سابه معاك
لمسه من فنه راحتلك ..بص للمبنى هناك
تلتقى لمسة وليدى ...والشمايل زادت العلم اتساق
********
السنين بتمر بدرى ...لسه فاكرك فى صباك
عامل القرد اللمونى ...راكب الشجره هناك
والأليف كات اسمه لوبّو .. يهبش اللى يوم أذاك
فاكر اليوم اللى روحنا ...فيه كرير واخوك معاك
فاكر الغطس اللى خدته ...ف البيسين من غير عراك
واكتشفنا ان صاحبه ....كان وزير ...ناصب شِبَاك
بس احنا فوتنا منها ... والجميع حاسب اباك
الوزير ابوشعر شايب والحبايب ...فى التراك
******
بافتكر ارض الحـــــــجاز والحرم .. والعمره فـــــجرى
وانت لابس البشكير ...وماسكه ع البلاط عمال بتجرى
والبروست معاه توميه ..والباجيرو والقرود الصبح بدرى
والجـــــبال فى الباحه عاليه ..والطريق بالجرى مغرى
فاكر الليجو اللى جبته ؟؟ فاكر اما عملت كوبرى
يومها قلت الواد ده شاطر ...والفنون ف ايديه بتسرى
فاكر اما رسمت مامتك ...الورق لسه ف حجرى
والصور ملو الدولاب ...والحكاوى ملو صدرى
*******
يوم ميلاد ابنى وحبيبى عينى وفؤادى مانامو
قلت اسهر له وافكر ...اهدى ابنى اليوم قصيده
طالعه من مهجة محبه رايحه للروح الجميله
اصل ابنى زياد ده غالى ...والمسافه موش بعيده
دقه بصباع ع الزراير ...تطلع الجمله المفيده
كل عام وانت ف سعاده ...والسنه الجايه اكيده
القى فى بيتك عروسه ... حلوة وحياتك سعيده

مرشحى المحتــــــــــــمل

قافية المرشحين المحتملين
تخيلت جمعا من أنصار كل المرشحين المحتملين يقفون في ساحة ضخمه ويعدد كل منهم صفات وميزات مرشحه ...تماما كما يفعل مندوبو التعامل في بورصة الأوراق المالية الذين نراهم يهللون ويرفعون أيديهم في حماسة ...دون أن ندرى ماذا يقصدون وما هو مدلول الإشارات والعبارات التي يقولها كل منهم ...".بيع" مثلا ....أو" اشترى" ربما ....الحقنى " بدول ياعم" .... ممكن..المهم هو سوق للبيع والشراء هبوط وصعود بيان وحسرة ...فرص تسنح لتحقيق ربح أو تدارك خسارة فادحة ...وكانت هذه السطور ع الريق

مرشحي المحتمل :: كالبدر لما اكتمل
ومرشحك نوصفه :: خيبه وراكبه الجمل
مرشحي عسكري :: ومرشحك مُعــــتقل
خريج سجون مُعتبر :: فييس وعامل بطل
مرشحي شيخ طرق :: حريف في كل النِّحل
شوف دقنه من حسنها :: يطويها من غير مَلل
مرشحي في اللسان :: لبلب عــــدُوُّه انزهل
واضح صريح البيان :: طول عمره عدل وعَدَل
ومرشحك يضربوه :: بالصرمه لو يوم وصل
ولما فلسع أخوه :: رمـــوا وراه الــــــقُلل
مرشحي بالكباب :: واعد لـــكل المِــــــلل
والبانجو صار للشباب :: رسمي يبيعه الزُّمل
مرشحي واد جريء :: في معاركه دايما بطل
ومرشحك موش بريء :: سيرته تجيب الزعل
مرشحي ابن البلد :: شنباته اهى تنـــــــجدل
يفــــهمنا وبنفهمه :: وكلامه زى العـســـــــل
شومته في أيده الشمال :: ويمينه كَبس وعضل
ومرشحك فرفــــور :: من نفخه تلقاه انفتــل
ما وقفشى مره ف طابور :: وشعاره" نام في العسل"
مرشحي واد همـــام :: يفــــطر بفحلين بصــــــل
وينط جوّه الــــــترام :: وانشالله عمره ما وصل
حبل الوداد والـــوئام :: عمـــره معاه ما انفـــصل
مرشــــحي لـلـــــعدو :: واقف كـــــــــأنه الـــــجبل
رامي عليهم سهام :: خللى البعـــــــــيد انتول
مرشحي للمريض :: عازم يزيل العِلـــــــــــــل
المصل عنده جديد :: في العرق أو في العضل
مرشحي للشهيد :: عنده الكـــــــتير يتعمل
لابد أهل الشهيد :: يتنصفوا مهما حصل
مرشحي م الميدان :: ولا عمره عنه انفصل
وبصوته يهتف كمان :: الشعب هوّه البطل
وانا وسطهم عقلي تاه :: أصل المصاب صار جلل

صورة وذكريات

تعود ذكرى هذه الصورة والخطاب لعام 1983 فى مدينة مونتراى بولاية كاليفورنيا الأمريكية حيث كنا ندرس هناك والصورة مع الأدميرال ريلينج الذى كتب لى سطرين بخط يده فى اسفل الخطاب الرسمى الذى ارسله لى مع الصورة ونص السطرين هو : شكرا لك مرة اخرى على دورك فى ان كنت " مترجمى الشخصى " وبعدها علامة تعجب ...مع خالص تمنياتى ...ثم توقيعه ...ولتلك العبارة قصة كوميدية ففى مرة وفى وسط المحاضرات فوجئت بالأدميرال ريلينج يطلبنى ويقول لى انه لاحظ ان خطى فى الكتابة جميل واننى بالطبع اعرف العربية بما انها لغتى الأصلية ...وبدا فى رواية الحكاية لى وهى السبب فى طلبه الخدمة الشخصية له
حكى لى الأدميرال ريلينج ان له صديق ادميرال ايضا من كولومبيا او البرازيل لاأتذكر بالضبط المهم انه صديق مقرب له جدا ويعرفان بعضهما عائليا ولغة هذا الصديق الأسبانية أو البرتغالية وطبعا يعرف الانجليزية ولكن الأدميرال ريلينج لا يعرف منها حرفا واحدا ولا كلمة توحد ربنا ...فوجىء ريلينج بصديقه ساكن امريكا الجنوبية يرسل له خطابا شخصيا كله اسبانى ولم يفهم منه كلمة واحده سوى اسماؤه واسماء اولاده وتوقيع الرجل فى الختالم ....قال لى وهو يضحك ...ابن اللذينه ده صاحبى وعارف انى بلاطه فى الاسبانى وباعت لى جواب طويل عريض موش فاهم منه ولا كلمه وتعبت على ملاقيت واحد يترجم لى مافيه ...وانا عاوزك تكتب له رسالة رد على رسالته بالعربى اللى انا متأكد انه مايعرفش منها اى حرف وبلاطه زى ما انا بلاطه فى الاسبانى وانا نكاية فى صاحبه قررت ان اكتب له الرسالة المطلوبة بالخط الديوانى الذى تكتب به عادة الشهادات والجوائز بحيث يصعب عليه حتى التنبؤ بنوع اللغة المكتوب بها الرسالة ....أخذ الرجل يملى على نص رسالته الجوابية ويسلم عليه وعلى زوجته واولاده وانا اكتب الترجمة بالعربية وبالخط الديوانى ذو الطابع الزخرفى وكأنى اكتب شهادة التخرج لأحد الحاصلين على الدكتوراه من جامعة القاهرة مثلا ...وكلما كتبت سطرا ضحك الأدميرال من الشكل الناتج لتصوره ماسبكون عليه صديقه الاسبانيولى عندما يرى الخطاب فلا يعرف منه حرفا وقال انه لن يتمكن حتى معرفة اللغة وسيظنها صينى لأنها زخرفية الشكل ...المهم انهيت الرسالة الطويلة ووقعها هو بخط يده وباسمه بنفس القلم ....وشد على يدى وضحك وانصرفت بين ضحكات الحاضرين وقتها ....ونسيت الموضوع الى ان فوجئت بخطابه المرفق مع الصورة فتذكرت الواقعة ....الغريب ان الشهادة التى امسكها بيدى فى الصورة سرقها لص مع باقى شهاداتى الأصلية والبعثات والبكالوريوس الأصلية كلها من سيارتى يوم اخذتها لأعمل منها نسخ تصوير لأرسلها الى جهات عمل فى السعودية مع السيرة الذاتية ...وبقيت فقط الصورة الموجودة هنا والخطاب الذى ارسله الرجل لى وضاعت كل مؤهلاتى مع حقيبة اوراق كنت اضعها تحت الكرسى اثناء حضورى جنازة قريب لى توفى يوم ان قررت اصور الشهادات كلها واعمل سى فى كامل للتقدم للعمل كمهندس فى احد الشركات او الدول العربية ...هذا اللص حرق دمى كما لم يحرقه احد من قبل ولا من بعد ...ولم يرض المعهد الأمريكى ده أن يعطينى بدل فاقد حتى مع علمه بما حدث ...
هناك بعض اللصوص الشرفاء يأخذ المحفظة او الحقيبه ويأخذ منها المال ويعيد لك اوراقك وبطاقتك لعلمه انك تحتاجها فى عملك وحياتك وبعضهم يكون من الخسة بحيث لا يهتم ويمكن يحرق الورق ايضا طالما لن يجنى من ورائه مالا ......وجدت هذا الخطاب الأصفر والصورة فى مظروف قديم وانا ارتب اوراقى فى منزل العجمى وسط اوراق الذكريات والكراكيب التى ترك عليها الزمن بصمته

حـــــــوده ناسا ...المرشح المحتمل ...رمز الساروخ

..أكثر من 450 مرشحا محتملا حتى الآن تقدموا لسحب ملفات الترشح لرئاسة مصر في أولى مراحل انتخابات الرئاسة وهي فتح باب الترشيح الذي بدأ يوم السبت الماضي، معظمهم شخصيات غير معروفة، من طبقات متوسطة وتحت المتوسطة، الأمر الذي يعتبره البعض إيجابيا كأول انتخابات رئاسية في مصر يشارك فيها أناس من عامة الشعب المصرى...
-------------------------------------------------------------
حوده ناسا .....المرشح المحتمل .....رمز الساروخ
*********************************

أمّا شـــــــغله حلوه جدا :: لازم انزل فى الرياســــــه
هىّ يعنى حـــلوه ليهم :: واحنا بس ناس كناسه
فيه فلوس مرصوده للى :: يكتب اسمه وبسلاسه
موش مهم الماضى اردم :: المهم فيه حماســــــه
حاجرى اسحب النموزج :: يملوهولى فى الخباسه
وانزل الشارع واجعــّــــر :: مين يبارى فى السياسه
والإداره دى بأداره :: فى البنوك مافيش نِحـــــــاسه
كومبيوتر ع القهاوى :: فى الفنون مافيش نَجاسه
شوفتو قهوة حوده لاقرع :: بنديروها..... بالكياسه
لا قتصاد..... لعبتنا أصلا :: التراب فى إيدينا ماسه
داخليه.... خارجيه.... :: نغلب الجن..... بغلاسه
واللى يفـــتح عينو فينا :: نفقعوها ....بالرصاصــه
ياللا إجرى ع العقارى :: اكتب اسمى ...حوده ناسا
والساروخ رمزى المفضل :: امريكانى..... حوده ناسا
اوعى تنسى يابن بلدى :: الساروخ ....او حوده ناسا

الأحفاد

اثناء الثورة وفى ايامها الأولى حبست اسرة ابنى عندنا وظل الأحفاد عندنا فى الاسكندرية طوال فترة حظر التجول والفت لهم هذه الغنوة على وزن ولحن اغنية كانت تتردد بكثرة فى وقتها وكانت اغنيه وطنية فاكر منها مقطع بيقول
ايد بتحضن فى العلم :: والتانيه بتحوش الرصاص
وكنت معجبا جدا باللحن والكلمة فى هذه الغنوة التى اذيعت مئات المرات وسعيد جدا بوجود احفادى معنا فى الاسكندرية حتى فك حظر التجول الجزئى ....وهذه السطور نظمتها لهم وبنفس اللحن والوزن للنشيد الوطنى الثورى

عندنا كتكوت صغيّر :: كل يوم عمال يغيّر
مشيته الله أكبر :: ماشى بيدب وخلاص
**********

كل يوم عمال بيكبر:: طلته ع الصبح سكر

يمسك اللعبه يفكر :: حتى فى اللعب اختصاص

***************

لمّا بــــيطول المـــوبايل :: ايده بتسوّى الهوايل

تلتقاه عمال يدايل :: نجده واسعاف ميكروباص

***************

لما تحضن فى العروسه :: ع الخدود تديها بوسه

والرضاعه فيها حوسه :: واللى نشِّف ياما لاص

الاستفتاء ...ووهم البقاء "فالس من مقام صول كبير"

ذكريات وجدتها مدفوسه فى خطاب باعته لواحد صاحبى ولم اكن اذكر انى كتبتها متى ؟ وأين ولا أعرف المهم اهو نبش فراخ والسلام

اللواء مختار الملا للجزيرة مباشر مصر: الشباب الموجود بالتحرير شباب وطني ولكنه لا يعبر عن رأي الشعب المصري كله...
خروج الشعب للإنتاخابات اليوم........الا يعتبر هذا تأييد للمجلس العسكري وشرعيته ونظام إدارته للبلاد؟
هتافات الناس في الشوارع للجيش......الا يعتبر هذا استفتاء غير معلن على بقاء المجلس؟
عدم وجود بلطجية لأول مرة... في الإنتخابات......الا يعتبر هذا استفتاء غير مباشر على بقاء المجلس؟
-----------------------------------------------------------------
"مقام صول كبير "فالس" الاستفتاء ووهم البقاء "كونشرتو وسوناتا
بيقوللك دا استفتا عا المجلس كى يجلس
ايه رأيك ده كلامك موش صح وبتهيّس
الشـــعب امّا بــــــينزل يستفتى او يُدلى
بالصوت يبقى بيخلص م الخنقه ويتنفّس
موش معنى انه اختار نواب يبقى اختارك
ده بيسرع بالـــخطوه مادام انت بتتعارك
عمـــــّال تُزهــــق روحه وتفقّع فى عيونه
قام هاودك قـــــال ينزل ويصوّت ويشارك
ودى خــــــطوه بعديـــــها المجلس يستأذن
ويسلِّم دى السُّلطــــــــه قبل أذان ما يـــأذّن
ده الغضب امّا بيكتر بيــــــكوِّم ويخــــــــزّن
ويفــــجَّر فى عــــــــــــروقنا الثوره ويتمكّن
قــــوم ننـــــزل وحانهـــــتف فليسقط فليسقط
وانتــــو تزيدو عنــــــــادكو والغليان يتشعوط
وده يـــــــعمل موش سامع وده روخر يستعبط
آخــــــــرتها فليسقط ... راح يسقُط راح يسقط

مقتطفات فيسبوكاويه

http://www.alkarmamagazine.com/?cat=19
صدر العدد الأول قبيل الثورة مباشرة ثم اختفت لمدة عام كامل ونشط صديقنا الكردى مدير التحرير وصاحب الفكرة واصدر العدد التانى فمازحته مهنئا
بمناسبة صدور العدد الثانى من "الكرمه" المجلة الالكترونية بعد عام كامل من اول عدد ....دى تبقى مجله سنويه موش اسبوعيه والا شهريه
صاحب الكرمه ...برَم البَرمَه
جاب مواضيع جامده ومهمّه
واحنــا اتارينا ....بعد الغيبه
فـــــاكرينه ....لبّسنا العمّه
وقـــفل بابها ...وضب ضلفها

سنه كده بين عددين ...بالذمه؟

بـــــقى التالت... مع فول نابت
ورئيــسنا السادس ...ع القمه

**********

بعد مذبحة بورسعيد وقف رئيس المجلس العسكرى يقول فى تصريح غريب كل الغرابه : وفين الشعب فين دوره ساكتين ليه ؟؟؟؟ تعجبت الكره الأرضيه من هذا الكلام بالكامل

قال الزعيم بعد مذبحة بورسعيد اومال فين الشعب فين الناس مابتعملشى واجبها ليه ؟
قاللك وفين الشعب ما بيطحنشى ليه
كل اللى يفتح بقه يهتف ....اومّال ايه
راح تسيبوا كل الدبح لينا والا ايه ؟؟؟
كل واحد له طريحه يخش يدبحها بايديه
واحنا عادى كل مره حاندارى عليه
بس ينجز واما يقتل مايقولشى كان بدرى عليه
******
لما نص الشعب والشرفا يلبُّوا دى العيال
نعمل احنا دوله حلوة روشه حاتفوق الخيال
كل يوم بيقولوا يسقط لما خلّوا حالنا حال
لما نسقط مين يشيل الحمل والأحمال تقال
كل فرمان نصدره يطع غلط ..طب شيله.. شال
اعملوا مجلس معاكو طب عملنا !! عمره قال ؟؟
النصيحه فى الصفيحه ...والمجد وتاريخ النضال
كلهم بقوا من نصيبنا ...مين حماكو من مبارك ؟ من جمال ؟؟
*****************************************
تخيل لهذيان مصاب فى احداث محمد محمود فى غرفة العمليات

هذيان اللحظة الأخيرة

ولمحت طاقة مستديرة فوق راسى تلمع بأنوار مبهرة واناس حولى ثيابهم اخضر فاتح كالتى اراها فى المسلسلات ...ايادى بقفازات كاوتشوك تعبث بى ..الكل ينظر الى وجهى وامعائى التى تطل من بطنى ...سمعت اصوات خافته توت توت توت وانطفأ النور فجأه ....اين انا
----------------------------------------
ياعم خيّط بمصارين القطط بطنى
وامسح دمايا دى اللى سالت سيل
دا اللى ضربنى بالرصاص صابنى
عشان بقول له كفايه السحل والتقتيل
يزعل قوى لو صاحبى جه يشيلنى
ويقول له سيبه خلاص ده مات وتقيل
سيبه كده ينزف لحد الدم ما يصفى
اصل العيال دى حياتها كلها تمثيل
الواد ده صايع وانا عارفه ومستنى
باقى العصابه يهِدوا دوله وقياده ونيل
عاوزين يهزّوا العامود والحائط المبنى
لكن دى عينى صاحيالهم ونفسى طويل
يوم بعد يوم خرم الهتاف ودنى
يسقط ويسقط ....يسقط ده مين ياعميل
احنا النشامى الشداد يطلع دا مين يابنى
فرفطنا شللتكو وقسِّمنا الجميع ياجميل
...

فيسبوكاويات للحفظ

قارئة الفنجان
-----------------------------------------
سكة سفر خضرا...مفروشه بالبودره
وعيال كتير بكره ...راح يمسكوا بديلِك
وعريس على حصانه ...أبيض كبير شانه
والنـــــور بألوانه ...حايـــــعلقوه ف بيتك
فــــيه حد من دمِّك ...شارياه وبيــــــهمك
يمكن قريب عمك ...فيه شىء بينُه وبينك
أما العوازل دول ...راح يشكو عند الصول
ويقولوا موش معقول ...الطبل والمزازيك
دى ولادنـــا بتـــــذاكر ...والامتـــــحان باكر
والواد ماهوش فاكر ...وحاجات كتير تلاكيك
وازاى يــــا عــــــرّافه ... والقهوه شــفّافه
بتقولى فيه كنافه ...وسط الطبق فيــه كيك
دانا شاربه نيس كافيه ...ومدوباه ف اوليه
حاتقولّلك أومّال إيه ....تضحك تقول.... تماحيك
******************

طائرة امريكية لنقل الممنوعين من السفر
--------------------------------------------------------------------
لوى الــــــعم ســــام دراعنا وخـــد ولاده مـــــــعاه
والــــــكل واقف على الســـــلم بيقول ياحـــول الله
لــون الـــــــــــــعلم والدولار والقوة إيـــه معناه
بـــيدافعوا عن أهلــــــــهم مهما قاضـــــــينا ادّاه
رفـــــعت اميركا صُباعــــــها الحـــــامى بالتــحذير
قالـــــو الولاد يطلـــــعوا ومافيش كلام مـــن ده
وسيـــــــاده وكرامه ده كــلام مايخصناش احنا
وقانونكو والمحــــــــــكمه دول قلتين مـــع زيــر
حـــــاتزرجنو وتـــــعندوا وتـــــخبّطوا مـــعانا
يبقى المـــعونه وعمولــــه والشّبرقه حاتطير
والــــعيش وقمـــح البليله بيقول مساء الخير
والتــــكنولوجيا الخطيره والســــــــــر ويانا
غضب اوباما وهيلارى لو زاد حايبقى خطير
هاتو الولاد فى الخباسه والسر يبقى ف بير
صاح الخبــــــــــير عندنا أمنى استراتيجى
افتـــــــح ياعم المطار ..حط الشنط ع السير
غـــاويه يامصر الشـــــــّجار ويخونك التعبير
ياعم اصــــل الحـــــــكايه تهويشه ع الماشى
لا كسبنا بنط البطوله ..ولا مشيو م التحرير
*******************

الطياره وصلت قبرص حاملة المتهمين الأمريكان
 
فى العش والا طار ...طار طار عدّى البحور
قادت فى قلبى نار ...نار نار زى البابور
ليه بس يااستعمار .... تدّينا ..واحد خابور
شوفتوش شبيه الحمار ...سايق ساقيه تدور
جاله فجأه شحار .....قمّص هد الجسور
بعد اما تربس دمه فار .... ساب الدنيا تغور
والبس يابو الميزان ... عدلك لازم يجور
جالو الرخ الكبير .... حمل كتاكيت وطار
زرجن ابو الميزان ...قاللو مافيش هزار
نط من الكرسى قام ....داير بينهم شجار
دهشه جوه العيون .... الحق ده البن فار
*****************

فيسبوكاويات (موش عارف نمره كام )اصلى مابعدّش

(يقول صديقى احمد الصباغ : لكل فعل رد فعل مساوى له فى المقدار (من باب النفسنة) ومضاد له فى الاتجاه (من باب العند
------------------------------------------------
ويقول اسحق ابن نيوتن ابن ابى شجرة :
آل مين فعلك يافعل ...قالّك ده لهو وخفى
قاللو يارد الفعل ...وانت كمان اختفى
بلاش تبقى عبيط ... وعلى البطون تنكفى
يفرح عزولك فيك ... م الدم مايكتفى
تحزق زعيق وصويت ....وبالقليل تكتفى
وفى النهاية الحكاية ...كده بالقروش تصطفى
يطلع محامى وشاهد ...نار القلوب تنطفى
والحكم يطلع براءة ...والجانى يطلع وفى

****

منع ظهور نادر السيد على قناة الاهلى
منع ظهور ابراهيم عيسى على قناة التحرير
منع ظهور دينا عبد الرحمن على قناة التحرير
و من قبلهم منع حمدى قنديل من تقديم برنامجه على قناة التحرير
-------------------------------------------------------------------
شغل الحله البرستو :: ولع الشعله التمام
حط دينا ...او خريستو :: كلهم عندى لئام
فيه وساوس عندى جامده :: اصل سب الجيش حرام
كل دُولَه سبوا جيشنا :: قالو عنه "موش تمام "
قالو انو داس فرامل :: لبس الثوره اللجام
... قال بعزم مابو "هيس" :: سلموا لينا الزمام
واحنا مالنا منكو فيكو :: ضرب شومه بالحزام
واللى يرمش منكو تانى :: جوه قبره راح ينام

************

إنتشر كلام حول وجود صفقة بين مالك القناة الجديد "سليمان عامر" مع "المجلس...وتحقيقا لطلب الراحل صلاح جاهين المُلِح عندما
•قال : قفّل لى على كل المواضيع ...ورد الكورس: قفّل قفّل قفّل قفّل ....فقال مافيناش كانى ومافيناش مانى .....وقد كان
-------------------------------------------------------------------
صفقه وموافقه والكلام مفهوم
اكتم لى دولا وانا وانت نديم ونديم
عندك مشاكل مافيش مانع حُفر ورديم
ونسك على ماضى وكلام فاضى جديد وقديم
اصل الولاد دول هرونا برامج نقد فى التقديم
بيقلبوا ناسنا علينا واحنا ناس مظاليم
قتلانا بمعدل خفيف ....و"أيــــزو " سليم
والسحل ده "ماينور " ماهوش " ميجور" كبير وعظيم
وفيه فرص "تحسين" لإنتاجنا بقتيل يقتل قتيل
وعندنا كمان قتل جمله ...لجمهور بالحكم ...بالتيم
شغلتنا صعبة واديك فاهم ....بس برضه لئيم
عاوزين ندارى على شموعنا لاجل ماينجح التنويم

"جـــدو قــــطر...." رحلة مع الحفيد للتعرف على عالم السكة الحديد

طوال الأسبوع الماضى كانت المكالمات التليفونية بيننا انا وحفيدى تشمل عبارة واحدة "جدو قطر" وانا اقول حاضر لما اجيلك يبقى" جدو قطر" وانا كمان جايلك فى القطر عشان تبقى كملت... ركبت قطار الساعة 7 صباحا يوم الخميس من سيدى جابر ومنها مباشرة الى بيت ابنى وحفيدى فى الجيزه وجدته قد ذهب للحضانة وهو يردد من الصباح "جدو قطر" ...فقد اشترينا له العديد من القطارات الكهربية الصغيرة والسيارات الريموت لكنه ابدى اهتماما خاصا بالقطارات فهى تمشى على قضبان لا تحيد عنها ومن الممكن ان تسير فى دائرة وعرباتها متعددة تجر بعضها بعضا هو عادة مايستلقى على جنبه ارضا ويعيش بخياله مع القطارات وهى تمضى امامه ويراقيها عن قرب واذكر اننى كنت افعل ذلك فى طفولتى مع الفارق اننى كنت اصنع مايشبه القطار فلم تكن اللعب قد تطورت بشكلها الحالى واقصى ماكان يمكن الحصول عليه عربة من الصفيح مثلا تشبه الحقيقية بنسبة لا تجاوز 10 فى المائة فقط وكان الخيال يلعب الدور الباقى ...لذا كان الوعد جادا فى ان اصحبه الجمعة الى محطة مصر للتعرف على تلك المعدة الميكانيكية الكبيرة والقوية ليراها على الطبيعة ويركبها ايضا ...جاء وقت رجوع آدم من الحضانة فذهبت مع والدته لاحضاره ومفاجأته هناك ...من خلف الأشجار راقبته يلعب مع حلا وعمر وينطلق فى جرأة ليصعد سلما ويذهب من الحديقة داخل المبنى وحده ...عرفته من شعره المجعد وبياض بشرته ودخلنا من الباب لنجده واقفا فجرى نحونا مع ابتسامة بعرض وجهه كله واخذ فى تعريف الداده والأبله بشخصى وقال مشيرا الىّ " انكل " جريا على ماتنادينى به زوجة ابنى وعاد فأدرك وصحح "جدو ...قطر" ؟ وجلس على حجرى فرحا طول الطريق ونط من الفرحة لرؤية جدته ايضا بالمنزل ...بالليل قرر العودة منفردا معنا ليبيت فى المنيل تاركا والديه واخته لأننا سنصبح الجمعة قاصدين القطار كما وعدنا ...نام فى العاشرة عندنا بعد حدوته واغنيات وقمت الفجر لأجده على رأسى يخبط فيها قائلا "جدو قطر" ...على الكومبيوتر ومن جوجل احضرت له اشكال القطارات كلها بما فيهاالقطار الطلقة اليابانى الشهير ...لبس البالطو والكوفية وفى التاسعة صباحا مشينا نتحدث على كورنيش المنيل ونتابع القطط والكلاب والأحصنة السائرة ,,,وعلى كوبرى الملك الصالح دلى رجله راغبا فى الغطس من بين حديد الكوبرى ونحن فى يناير وهو يردد بحر بحر ..اخذناصورة على الكوبرى ثم اكملنا الى محطة مترو الملك الصالح وقلت له هذا اول قطر ستركبه فى حياتك ....وتذكرت والده (ابنى) الذى كان مثله تماما مغرم بالسيارات والترام والقطارات لدرجة اننى اخذته وهو فى الثالثة من عمره الى محطة مصر وركبته كابينة قطار مع السائق وجعله السائق يطلق صفارة القطار ذات الصوت المهول وكان فى منتهى السعادة لكونه من جعل القطر يصفر بقوة وبيده الصغيرة ...ابنى هذا الآن مهندس ميكانيكا يعمل فى توربينات توليد الطاقة الكهربية العملاقه ...والطفل تظهر ميوله من البداية ...وآدم كذلك يهوى السيارات والقطارات ويفحصها بدقة ليعرف سرها الدفين ...وصلنا للمترو واجتزنا الحاجز بالتذكرة ووقفنا على الرصيف وجاء مترو من الناحية المقابلة ومشى فصرخ معتقدا أنه فاتنا... وغاب قطارنا خمس دقائق اخذت ألهيه بتعريفه بماسيحدث.. صفارة متقطعه ثم يقف ويفتح الباب لندخل مع الركاب ونجلس ...تململ من طول الانتظار ثم جاء المترو فوجد كل ماقلته حقيقة ...أجلسه رجل وسط الزحام وكلما اختفيت عنه وسط الزحام اطل برأسه لطمئن بوجودى ثم عرّف الركاب كلهم بى وبنفسه قائلا ...آدم .... جدو عادل... ويشير لصدره وصدرى ...جاء دورنا للنزول فى رمسيس فرفض النزول واراد ان يكمل ربما للمرج فالتجربة فريده والكل يبتسم له والباب مستمر فى الفتح والغلق كل محطة دنيا تانيه وعالم كبير جدا ومزدحم ...اقنعته اننا بصدد رؤية قطر اكبر من ذلك بكثير فنزل معى والتقطنا صورة فى محطة الشهداء ثم ذهبنا لداخل المحطة وقطعت تذكرة عودة لى وزوجتى للعودة لاسكنرية السبت ...فى قاعة التذاكر انطلق جريا وفرحا وفرجة على المحطة المجددة.... ثم ذهبنا للماستر سين بقى وهو القضبان والجرار والقطار وكان من حظنا اننا وجدنا قطارا على وشك القيام والجرار الخلفيى به السائق فوقفنا بجواره وهو يسمع هدير الديزل الضخم يدوى بالمحطة وافهمت السائق هواية آدم وغرامه بالقطارات فأراه الكونترول وكابينة القيادة ثم تحرك القطار ومعاه عمو السواق ولوحنا له باى باى عمو... وهو يمضى بالقطار الضخم بعيدا وكان الشيبسى قد اخذ يُقرمَش ويُلتَهم بين اسنان آدم الصغيرة وهو منتشى وسعيد بالفرجة على هذا العالم الحديدى الجديد ياللا بينا بقى على المترو الأزرق ...وجدته يجذبنى بقوة الى شىء مغطى وتبرز منه عجلة قياده وآدم يشدنى بقوة قائلا جدو سوق انا اسوق ...كانت هناك عدة وحدات من مكانس الأرض الكهربية التى تشبه الكلارك او ونش الشوكة واقفة على جانب المحطة فأخذته هناك فركب كالسهم وامتطى عجلة القيادة بهمة وكانه يقودها بجدية تامة ويبحث عن اى زرار يشغلها جاء مسئول وطردنا بادب خشية ان تتحرك المعدة بنا فنروح فى الكازوزه ...ركبنا المترو عائدين للملك الصالح وقررت للتنويع ان نأخذ المعدية الصغيرة التى تعمل بالمجداف مابين شطى النيل فى منطقة الباشا بالمنيل ...وكانت تجربة اخرى لآدم عاد بعدها منتشيا وسعيدا ...هنا فقط بدأ يسأل عن بابا وماما واخته آمنه وحكى للجميع على مغامرتنا الأولى فى عالم السكة الحديد وكل ما اصادف انتباهه لى أصفر له صوت الصفارة المتقطعة التى يصدرها المترو عند فتح وغلق الأبواب فيبتسم وتبرق عينيه جدا ...وكأنه يستعيد الذكرى

الشراكه والفكاكه

هدد حسين سالم كاتم اسرار المخلوع واسرته بفضح اسرار خطيره لو انهم بدأو فى اقحامه ككبش فداء للدفاع عن صديقه وشريكه فى كل شىء
----------------------------------------------- ِ
الشراكه والفكاكه ياللا نصّص يالللا جيب
الرياسة دى كياسه والتجاره حشو جيب
تيجى نعمل شركه حركه تيجى نركب عنجريب
نومه وف عز المشاكل نترمى ونشرب حليب
ياللا نمضى عقد بينا بس انا مااظهرش ...عيب
واوعى برضه حد يعرف ..دى الديابه عن قريب
لو تشم اللحمه تهجم ..مصدر الدخان لهيب
لو عرف حد ابقى قول ....يكسب الحظ اللبيب
والغبى يفضل متيّس ..عمره مايطول النصيب
طول ماعينك ع العلالى ..تغرف الغرفه بشياكه
لو تبيع سلعه باسمى ...يفرح الشارى بتناكه
بين عباد الله يقول ...جبت فاكهه م الفواكه
الزعيم ماضى عليها ...رامى بذرتها الخواجه
والولاد م الصنف تاكل ..واللى كَل مايعوزشى حاجه
ده الرضى السامى حلاوته ...انه محشى فى الديباجه
طول ماسيرتى فى الودان ...دكانتنا فى الألاجه
بس اياك يوم تسيّح ... او تقول مين الدجاحه
اللى باضت والا كاكت ....للشفايف فيه سراجه
وانت عارف عندى عادلى ...لو يمسى ع الحبيب
لسعته لسعة عقارب ...نفخته فى حته عيب
يبقى تكتم سرى عندك ...اصلى باسمع صوت دبيب
نمله السليمان تقوللى ..لو فى سيرتى راح تجيب
والعيال دول تبعى برضه ..كل واحد له نصيب
وان حصل لى اى طارىء ...ادِّى مالى اوعى سيب
وامضى عقد الضد برضه ...مين حايضمن فى المشيب
واللى يغدر يوم ياصاحبى ...يبقى لازم له طبيب
يكتشف سر المنايا ...سرنا اصله .....رهيب

الخطر والتخويف من اشياء وهمية

;فى كل الجرائد اليومية اخبار عن اخطار تحدق بالوطن وانفجارات ستحدث ووقيعة بين فصيل وآخر وهجوم من عدو مجهول وبلطجية
----------------------------------------------
خطرٌ داهم خطرٌ داهم :: الحق قام من قبره مناحـــــــم
وطيور سوده جوه الأوضه :: وديب بيعوّص جنبه جماجم
فيه سحليه راسها رزيّه :: وبومه تبرّق وغراب جــــــــاثم
فيه حراميه الف وميه :: سرقو البنك ومين حـــــــايحاكم
فيه تعويره فى يد اميره :: لهفو السلسلة سرقو الخاتم
فيه سلعوّه بره وجوّه :: اكلت عيّل .....بلعت هـــــــانم
والسمك البورى المتوحش :: روخر يهبش رِجـــل النايم
فيه قمر ابصرايه بيصــــــــوّر :: وبيرمى قنابل ويلاكــــــم
اما العملا عينهم كحـــــــله :: بيدسوا ازايز زيت باكــــم
والنار اللى بتحرق روخـــره :: لهاليبها ماتطولها سلالم
ماية نار نازله من المنور :: طوق اشعاع بيضوى وعــازم
عازم على ارضينا اخواته :: نووى وذرى احـــمر قـــــاتم
والدم الماشى على الحيطه :: برص بديله فيه كان عايم
الدم الناشف فى عروقنا :: وبلازما فى اكياس موش لازم
هيكل عظمى يشبه عمى :: نط وبرّق قمت انا شــــــاتم
راح شنكلنى بكوعه قتلنى :: بس انا كعورته ف بير كاتم
وبحله برســـــتو انا غطيته :: كده خليته يحك الخــــاتم
جـــه عفريت ازرق بيــــنور :: رحت بليزر عاميو ..عفارم
صرّخ صرخه بشتيمه وسخه :: وخَبَط فى الباب سيفه الصارم
رحت انا بقى لابد فى البانيو :: ومن يومها انا قاعد وملازم<
----------------------------------------------------------------------
وفى ذكرى الثورة الأولى تساءل الناس سؤال عن رغبة كل منا فى هذا اليوم المجيد



• عاوز تكون فين و تقول إيه يوم 25 يناير
• 20012
عايز اكون وسط الميدان ماسك علم
وبقول بصوت واضح جهورى ومنسجم
عايز بلادى اللى خدوها تعود وسلم واستلم
... سلم لنا تانى الحماسه والرياسه والقلم
رجع لاخويا اللى اتقتل روحه وقلبه اللى اتخرم
طفى النيران فى قلب ام ضناها واراه التراب
وكان املها فى الحياه وف عينها راجل محترم
بطّل تقول انك حميتنى امال د مين اللى اتشكم
واللى اتعكم واللى اتسحل واللى الرصاص خلاه عدم
عاوزين نشوف مين الإيدين ورقم تلاته فى كل بلوه ياحكم
فين الفلوس فين الحيتان فين المحاكمه والرمم
فين الأدله والفلول فين الجمال فين البغال يوم الزخم
فين اللى كانو بالسيوف ويا المطاوى وبالحجارة بنترجم
عاوز بلادى ...بشكل عادى تعود لحضن ضناها تانى بدون صنم

من ذكريات الثورة - المتحولون والمصلجية

خيري رمضان يونيو 2010 : أنا مش عارف الناس زعلانة ليه عشان خالد سعيد ، واحد حشاش ...و مات ، نهد البلد عشانه يعني خيري رمضان يناير 2011 : أنا مش عارف الناس مركزة ليه علي المتظاهرين اللي بيموتوا و متجاهلين شهداء الشرطة الأبطال ، يعني مايدافعوش عن نفسهم .

----------------------------------------------------------------------
... عايم مع الموجات... وفلول على ثورات
معقول يميل للحقيقه ؟ دايما مع الباشوات
يرقع قوام بالصوت ...لو قط سيده ده مات
اما الشهيد لو طب ...بيقول صريع القات
مايل مع الرايجه ... سابح مع الجنيهات
ويهز راسه شمال ...ويمين كمان اوقات
ويمجّد الظالمين .... ويوافق البهوات
قالو الشباب ثاير ...قاللك دى فيها بنات
صايعه ومافيش ليها ... مامات ولا بابات
وعيال ماهيش لاقيه ... رصفان عليها تبات
اوم نزلو ياكلو عيش ... ويحدفوا طوبات
اما الجِمال والبغال ... وعليهم الأغوات
دول وحدهم جم هناك ...بيأجروا كرايتّات
وبيلعبوا بالسيوف ...ويحطّبوا ف دماغات
ماحد منهم قصد ... فتنه ولا أشتات
أشتوت هناك باللهب ... والفلكلور ما مات
تعرفشى مين السبب ...الضرب كان من سكات
لكن برغم العجب ...اتشنكلوا ف ويلات
والجمع لما انتصر ... قالوا دى ثوره وجات
كات صعبه قولتها ... على شفة البهوات
قالو دى هوجه وفرح ... ومافيش فرح بيبات
الليله تخلص فى ساعة ...ونعود لزمن السكات
لكن دى فوره بفوره ...والناس ماعادت فتات
والكتله جامده اما نزلت ....خرست موسيقى النايات
واتلم لغلوغه جوّه ...واتلجِّــــــمت رايــــــــــــــــــات
وادى كدابين الزفه ...والعين دى زايغه ف سُبات
ماراحش ابدا امل .... فى عودة الأوقات
لما المديح للزعامه ...كان اللبان والتبات
وكانت المعجنه ... بتربّى ابو الزلات
والفتّه فى المصلحة ...والكوسه فى التعيينات
ومازال لديهم امل ....م الموت يعود الرفات

*************************************

اخبار عن مقابله سريه مع المخلوع والمرشد....والحقيقه الله اعلم لكن ؟
----------------------------------------------------------------------
المصلحة تغلب.... وفين المصلحة ؟
عند الخسيس؟ راح اروح و قول له بصحصحة
تسيبنى وانا اسيبك ونبقى سمن على عسل
أطلع اقول بكره دى حالته مكـحكحه
وخلاص بقى كفايه وحايجيب الفلوس
وبايه بقى تفيدنا .... اباحة وشرشحه
وكفايه انه نايم على سرير موش طرى
والواد كمان تعبان مناهده وزحزحه
والقاضى زهقان من الورق ده كوم كبير
وسيناريو مضروب مافيش فيه مسرحه
وسألته ياكبير موش كده تمشى معاك المصلحه
سكت وجاوب وهز دماغه..... بس بنحنحه

جوز فى البرلمان خسروا

ألف ألف مبروك يا شباب ... مرتضى منصور رمز السى دى خسر يا رجالة وحصّل اخوه عكاشة رمز البطة ...
وانا من زعلى عليهم قلت
-------------------------------------------------------------------------------------واحد لسانه زفر والـــــــــــــتانى بطّاوى
قام ده سبق ده وخسر والتانى كان ناوى
قلبوا دماغنا بصراخ سيديهات على حكــاوى
ده للخليع حبِّيب ودا الــــــعوبان غـــــــاوى
ده بالهبل معروف وده فى الكلام حـــــاوى
ماشى بكاميرا ومايك شياطين وبتخـــاوى
وتعدأنفاس البشر مين ع الكلام ناوى
ولما بالعك اتمسك شتم القضاه العاوى
حطوه فى سجن اتلوى قاللك انا حصاوى
تبت وخلاص حاتعدل كدبه و م بتساوى
م السجن طالع سليط ولســـانه بمطاوى
يطلع يقف فى الميدان حواليه مزز صلصال
وف ركن زفه وصاجات ع الواحده فيه طبال
كاميرات تصور هناك لقطات فيها استهبال
مسرح كبير للعبث كومبارس كله عيال
راحت عليه وانخلع للجالسين قام قال
مدح ودفاع عنّهم ماتقولشى دول أخوال
تمدح فى مين والقتيل ع الأرض اهوه مانشال
والتانى بلسانه الزفر ماسابشى حد ف حال
كل العباد عنده بقر هوّ الوحيد شغال
عمال يرص ف تهم عمال على بطال
فاتح لكل البشر أضابير وفيهم شال
سيديهات وجرم اتحسب فى قراية الفنجال

السلف ...والتلف

البيت الابيض : محادثات بين طنطاوي واوباما حول البرلمان وقرض صندوق النقد الدولى - بوابة السلف والندامه
-------------------------------------------------------------------------------
سلفنى حبة مونى :: ياعم عبد الغنى
دانا خزنتى نفّضت :: والشعب بيسبِّنى
سلفنى لوكشة دولار :: دا خَضاره بيشدنى
بيجيب جوافه وخضار :: فى الأزمه بيفكّنى
هات لى كمان كوز دره :: اصفر وحبُّه طرى
وشوال دقيق للخبيز :: والمايه لو معدنى
اصل الولاد وقّفوا :: والعجله طوق معدنى
والناس هناك طوابير :: مفروض بهم باعتنى
بترول كمان لو معاك :: والا خلاص بعتنى
الغاز ببيعه ببلاش :: المتر منه ..بجنى
فيه ناس بتقتل فى ناس :: والبُمبه اهى بميت جنى
راح اسيب ياعم اللجام :: بس انت هات ...زقنى
قاعد فى هم ونكد :: ماحاجه بتسرنى
اضراب فى ديل اضراب :: حنشان بديل منحنى
شفت الهتاف فى الميدان؟ :: الكل بيزمنى
حتى المجالس كمان :: فى القعده بتزفنى

المحامى يحامى ....عن الأفقى

فى آخر مرافعات الدفاع وجه «الديب» حديثه إلى «مبارك» قائلاً: «يا نسر الجو الجريح، لا تحزن من غدر الذين كانوا يتقربون منك، ومن قومك الذين انهالوا عليك بالشماتة وأنت أعزل، فلست أفضل من رسول الله، صلى الله عليه وسلم الذى دعا إلى الله حين وجد عنفاً من أهل مكة.. واصمد لعل الله يفك كربك»

----------------------------------------------------------------
يانسر الجو يامدبوح :: مين الندل اللى فاكرك ديك
دفاعى بان اهوه مشروح :: بمال الشعب انا بافديك
يحاسبك مين على اللحلوح :: جيوبك فيها بس ايديك
فوارغ ضرب شيلناها :: مسحنا كل بصمه ليك
دفاتر جرمها ممسوح :: شهادة الكل انك "شيك"
مافيش توريث مافيش خطه :: فشر كل اللى قالو عليك
كمان خاين وبتماين ؟ :: وباسو قبلها رجليك
ودلوقتى بقرن غزال :: يحطوها فى ننى عنيك
صحيح الشعب ده غادر :: مافيش غير "ماجده" "باكيه" عليك
قالت انذار قوى وجامد :: لكل اللى يقرب ليك
يقوم زلزال يجيب داغهم :: تزفك للسما مزازيك
وبرضه شفيق ماهوش ساكت :: بيسعى سعيه كله ليك
واولادك يروحو ميدان يكون مليان ::بصورك وانت باشا وبيك
اسفهم ع اللى حاصل كوم :: بتاع البط جاب رجليك
صبح يشتم على الفراعين :: وباعك وادى ضهره ليك
تحول عبد للمجلس :: بقى روخر بيدعى عليك
ماشفش الهاله بتنور :: فى راسك والشموع حواليك
وبركة دعوة الوالدين :: تحاوطك والإبر ف ايديك
وف سريرك كمان شامخ :: جمال دايخ يدارى فيك
لكنى ديب مانبش فرخه :: وحاتقوللى برافو عليك
وراح تدينى بالمليار :: ساعة م القاضى يحكم ليك
براءه هى مضمونه :: مادام الشاى معاه الكيك

حوار مع روح الشهيد

فى فجر ذكرى الثورة
فى نص الليل وفى المطره ....ميدان مليان بناس جايين
وحواليهم رياح عطِره بروح شهدا ...كمان شاهدين
وارواح اللى ماتو هناك دى جت تشهد مع الحاضرين
فى ذكرى مولد الثورة ..وع الثوره دى حالفه يمين
ماترتاح اى روح فاضت او انداست او اتفرمت مع التانيين
لحد ما كل اتباعه واعوانه وكل مفرملاتى نصب فى كمين
يلاقى مصير قـــِتِم محتوم ويُجزى باللى قاله الدين
قصاص عادل يكون فاصل ويشفى كل صدر حزين
سمعت انا روح نادتنى هناك وقالتلى عرفت انا مين
فقلت انا والله موش عارف ملامحك بس موش باينين
وايه ده نور والا دى هالات وليه طاير كده عالى ماتنزل
لمحت البسمه فى سنه وجاوبنى بصوت ماعرفشى جاى منين
انا اللى رصاص الغدر صابنى هنا وشاورلى ...واسمى" حسين"
وجيت هنا بس اطّمن ...عملتوا ايه ...وصلتو لفين
وليه سلمتوا اوراقكم و روّحتم وسيبتوها لهم ...فاكرين
حاميكو ده حاماكو بجد ....دانا جانى يِعَدّو .....مِتِين
وكله جاى متخرم ومتبطط ومتشوه ...فى عين واتنين
ايه اللى خلى حاميها يسوق فيها ....ويصبح شين
سألته وانت عايش فين؟ صحيح فى الجنه والا فين ؟
فقال ياه ع اللى شوفته هناك ...ياريتنى روحت من سنتين
تحب تجينا يوم جمعه تشوف وتتفرج كمان بالعين
فنطيت قلت خدنى معاك انا وياك اروح نوبتين
بشرط انك متشبطشى ..وتلبدلى بيوت الجنه موش بروحين
ورضوان لو سال ده مين تقولله زياره وماشى موش قاعدين
مافوقت الا على منادى وبينادى بصوت جامد على الحاضرين
محدش يقفل السكه وموش عاوزين فلول بينا ..كده... سامعين
ندهت بعلو صوتى عليه ...وبصيت فوق ناديت.. ياحسين
لقيت الكل باصينلى ويتهامسو ...وقال واحد... سيبوه مسكين