فيسبوكاويات (موش عارف نمره كام )اصلى مابعدّش

(يقول صديقى احمد الصباغ : لكل فعل رد فعل مساوى له فى المقدار (من باب النفسنة) ومضاد له فى الاتجاه (من باب العند
------------------------------------------------
ويقول اسحق ابن نيوتن ابن ابى شجرة :
آل مين فعلك يافعل ...قالّك ده لهو وخفى
قاللو يارد الفعل ...وانت كمان اختفى
بلاش تبقى عبيط ... وعلى البطون تنكفى
يفرح عزولك فيك ... م الدم مايكتفى
تحزق زعيق وصويت ....وبالقليل تكتفى
وفى النهاية الحكاية ...كده بالقروش تصطفى
يطلع محامى وشاهد ...نار القلوب تنطفى
والحكم يطلع براءة ...والجانى يطلع وفى

****

منع ظهور نادر السيد على قناة الاهلى
منع ظهور ابراهيم عيسى على قناة التحرير
منع ظهور دينا عبد الرحمن على قناة التحرير
و من قبلهم منع حمدى قنديل من تقديم برنامجه على قناة التحرير
-------------------------------------------------------------------
شغل الحله البرستو :: ولع الشعله التمام
حط دينا ...او خريستو :: كلهم عندى لئام
فيه وساوس عندى جامده :: اصل سب الجيش حرام
كل دُولَه سبوا جيشنا :: قالو عنه "موش تمام "
قالو انو داس فرامل :: لبس الثوره اللجام
... قال بعزم مابو "هيس" :: سلموا لينا الزمام
واحنا مالنا منكو فيكو :: ضرب شومه بالحزام
واللى يرمش منكو تانى :: جوه قبره راح ينام

************

إنتشر كلام حول وجود صفقة بين مالك القناة الجديد "سليمان عامر" مع "المجلس...وتحقيقا لطلب الراحل صلاح جاهين المُلِح عندما
•قال : قفّل لى على كل المواضيع ...ورد الكورس: قفّل قفّل قفّل قفّل ....فقال مافيناش كانى ومافيناش مانى .....وقد كان
-------------------------------------------------------------------
صفقه وموافقه والكلام مفهوم
اكتم لى دولا وانا وانت نديم ونديم
عندك مشاكل مافيش مانع حُفر ورديم
ونسك على ماضى وكلام فاضى جديد وقديم
اصل الولاد دول هرونا برامج نقد فى التقديم
بيقلبوا ناسنا علينا واحنا ناس مظاليم
قتلانا بمعدل خفيف ....و"أيــــزو " سليم
والسحل ده "ماينور " ماهوش " ميجور" كبير وعظيم
وفيه فرص "تحسين" لإنتاجنا بقتيل يقتل قتيل
وعندنا كمان قتل جمله ...لجمهور بالحكم ...بالتيم
شغلتنا صعبة واديك فاهم ....بس برضه لئيم
عاوزين ندارى على شموعنا لاجل ماينجح التنويم

"جـــدو قــــطر...." رحلة مع الحفيد للتعرف على عالم السكة الحديد

طوال الأسبوع الماضى كانت المكالمات التليفونية بيننا انا وحفيدى تشمل عبارة واحدة "جدو قطر" وانا اقول حاضر لما اجيلك يبقى" جدو قطر" وانا كمان جايلك فى القطر عشان تبقى كملت... ركبت قطار الساعة 7 صباحا يوم الخميس من سيدى جابر ومنها مباشرة الى بيت ابنى وحفيدى فى الجيزه وجدته قد ذهب للحضانة وهو يردد من الصباح "جدو قطر" ...فقد اشترينا له العديد من القطارات الكهربية الصغيرة والسيارات الريموت لكنه ابدى اهتماما خاصا بالقطارات فهى تمشى على قضبان لا تحيد عنها ومن الممكن ان تسير فى دائرة وعرباتها متعددة تجر بعضها بعضا هو عادة مايستلقى على جنبه ارضا ويعيش بخياله مع القطارات وهى تمضى امامه ويراقيها عن قرب واذكر اننى كنت افعل ذلك فى طفولتى مع الفارق اننى كنت اصنع مايشبه القطار فلم تكن اللعب قد تطورت بشكلها الحالى واقصى ماكان يمكن الحصول عليه عربة من الصفيح مثلا تشبه الحقيقية بنسبة لا تجاوز 10 فى المائة فقط وكان الخيال يلعب الدور الباقى ...لذا كان الوعد جادا فى ان اصحبه الجمعة الى محطة مصر للتعرف على تلك المعدة الميكانيكية الكبيرة والقوية ليراها على الطبيعة ويركبها ايضا ...جاء وقت رجوع آدم من الحضانة فذهبت مع والدته لاحضاره ومفاجأته هناك ...من خلف الأشجار راقبته يلعب مع حلا وعمر وينطلق فى جرأة ليصعد سلما ويذهب من الحديقة داخل المبنى وحده ...عرفته من شعره المجعد وبياض بشرته ودخلنا من الباب لنجده واقفا فجرى نحونا مع ابتسامة بعرض وجهه كله واخذ فى تعريف الداده والأبله بشخصى وقال مشيرا الىّ " انكل " جريا على ماتنادينى به زوجة ابنى وعاد فأدرك وصحح "جدو ...قطر" ؟ وجلس على حجرى فرحا طول الطريق ونط من الفرحة لرؤية جدته ايضا بالمنزل ...بالليل قرر العودة منفردا معنا ليبيت فى المنيل تاركا والديه واخته لأننا سنصبح الجمعة قاصدين القطار كما وعدنا ...نام فى العاشرة عندنا بعد حدوته واغنيات وقمت الفجر لأجده على رأسى يخبط فيها قائلا "جدو قطر" ...على الكومبيوتر ومن جوجل احضرت له اشكال القطارات كلها بما فيهاالقطار الطلقة اليابانى الشهير ...لبس البالطو والكوفية وفى التاسعة صباحا مشينا نتحدث على كورنيش المنيل ونتابع القطط والكلاب والأحصنة السائرة ,,,وعلى كوبرى الملك الصالح دلى رجله راغبا فى الغطس من بين حديد الكوبرى ونحن فى يناير وهو يردد بحر بحر ..اخذناصورة على الكوبرى ثم اكملنا الى محطة مترو الملك الصالح وقلت له هذا اول قطر ستركبه فى حياتك ....وتذكرت والده (ابنى) الذى كان مثله تماما مغرم بالسيارات والترام والقطارات لدرجة اننى اخذته وهو فى الثالثة من عمره الى محطة مصر وركبته كابينة قطار مع السائق وجعله السائق يطلق صفارة القطار ذات الصوت المهول وكان فى منتهى السعادة لكونه من جعل القطر يصفر بقوة وبيده الصغيرة ...ابنى هذا الآن مهندس ميكانيكا يعمل فى توربينات توليد الطاقة الكهربية العملاقه ...والطفل تظهر ميوله من البداية ...وآدم كذلك يهوى السيارات والقطارات ويفحصها بدقة ليعرف سرها الدفين ...وصلنا للمترو واجتزنا الحاجز بالتذكرة ووقفنا على الرصيف وجاء مترو من الناحية المقابلة ومشى فصرخ معتقدا أنه فاتنا... وغاب قطارنا خمس دقائق اخذت ألهيه بتعريفه بماسيحدث.. صفارة متقطعه ثم يقف ويفتح الباب لندخل مع الركاب ونجلس ...تململ من طول الانتظار ثم جاء المترو فوجد كل ماقلته حقيقة ...أجلسه رجل وسط الزحام وكلما اختفيت عنه وسط الزحام اطل برأسه لطمئن بوجودى ثم عرّف الركاب كلهم بى وبنفسه قائلا ...آدم .... جدو عادل... ويشير لصدره وصدرى ...جاء دورنا للنزول فى رمسيس فرفض النزول واراد ان يكمل ربما للمرج فالتجربة فريده والكل يبتسم له والباب مستمر فى الفتح والغلق كل محطة دنيا تانيه وعالم كبير جدا ومزدحم ...اقنعته اننا بصدد رؤية قطر اكبر من ذلك بكثير فنزل معى والتقطنا صورة فى محطة الشهداء ثم ذهبنا لداخل المحطة وقطعت تذكرة عودة لى وزوجتى للعودة لاسكنرية السبت ...فى قاعة التذاكر انطلق جريا وفرحا وفرجة على المحطة المجددة.... ثم ذهبنا للماستر سين بقى وهو القضبان والجرار والقطار وكان من حظنا اننا وجدنا قطارا على وشك القيام والجرار الخلفيى به السائق فوقفنا بجواره وهو يسمع هدير الديزل الضخم يدوى بالمحطة وافهمت السائق هواية آدم وغرامه بالقطارات فأراه الكونترول وكابينة القيادة ثم تحرك القطار ومعاه عمو السواق ولوحنا له باى باى عمو... وهو يمضى بالقطار الضخم بعيدا وكان الشيبسى قد اخذ يُقرمَش ويُلتَهم بين اسنان آدم الصغيرة وهو منتشى وسعيد بالفرجة على هذا العالم الحديدى الجديد ياللا بينا بقى على المترو الأزرق ...وجدته يجذبنى بقوة الى شىء مغطى وتبرز منه عجلة قياده وآدم يشدنى بقوة قائلا جدو سوق انا اسوق ...كانت هناك عدة وحدات من مكانس الأرض الكهربية التى تشبه الكلارك او ونش الشوكة واقفة على جانب المحطة فأخذته هناك فركب كالسهم وامتطى عجلة القيادة بهمة وكانه يقودها بجدية تامة ويبحث عن اى زرار يشغلها جاء مسئول وطردنا بادب خشية ان تتحرك المعدة بنا فنروح فى الكازوزه ...ركبنا المترو عائدين للملك الصالح وقررت للتنويع ان نأخذ المعدية الصغيرة التى تعمل بالمجداف مابين شطى النيل فى منطقة الباشا بالمنيل ...وكانت تجربة اخرى لآدم عاد بعدها منتشيا وسعيدا ...هنا فقط بدأ يسأل عن بابا وماما واخته آمنه وحكى للجميع على مغامرتنا الأولى فى عالم السكة الحديد وكل ما اصادف انتباهه لى أصفر له صوت الصفارة المتقطعة التى يصدرها المترو عند فتح وغلق الأبواب فيبتسم وتبرق عينيه جدا ...وكأنه يستعيد الذكرى

الشراكه والفكاكه

هدد حسين سالم كاتم اسرار المخلوع واسرته بفضح اسرار خطيره لو انهم بدأو فى اقحامه ككبش فداء للدفاع عن صديقه وشريكه فى كل شىء
----------------------------------------------- ِ
الشراكه والفكاكه ياللا نصّص يالللا جيب
الرياسة دى كياسه والتجاره حشو جيب
تيجى نعمل شركه حركه تيجى نركب عنجريب
نومه وف عز المشاكل نترمى ونشرب حليب
ياللا نمضى عقد بينا بس انا مااظهرش ...عيب
واوعى برضه حد يعرف ..دى الديابه عن قريب
لو تشم اللحمه تهجم ..مصدر الدخان لهيب
لو عرف حد ابقى قول ....يكسب الحظ اللبيب
والغبى يفضل متيّس ..عمره مايطول النصيب
طول ماعينك ع العلالى ..تغرف الغرفه بشياكه
لو تبيع سلعه باسمى ...يفرح الشارى بتناكه
بين عباد الله يقول ...جبت فاكهه م الفواكه
الزعيم ماضى عليها ...رامى بذرتها الخواجه
والولاد م الصنف تاكل ..واللى كَل مايعوزشى حاجه
ده الرضى السامى حلاوته ...انه محشى فى الديباجه
طول ماسيرتى فى الودان ...دكانتنا فى الألاجه
بس اياك يوم تسيّح ... او تقول مين الدجاحه
اللى باضت والا كاكت ....للشفايف فيه سراجه
وانت عارف عندى عادلى ...لو يمسى ع الحبيب
لسعته لسعة عقارب ...نفخته فى حته عيب
يبقى تكتم سرى عندك ...اصلى باسمع صوت دبيب
نمله السليمان تقوللى ..لو فى سيرتى راح تجيب
والعيال دول تبعى برضه ..كل واحد له نصيب
وان حصل لى اى طارىء ...ادِّى مالى اوعى سيب
وامضى عقد الضد برضه ...مين حايضمن فى المشيب
واللى يغدر يوم ياصاحبى ...يبقى لازم له طبيب
يكتشف سر المنايا ...سرنا اصله .....رهيب

الخطر والتخويف من اشياء وهمية

;فى كل الجرائد اليومية اخبار عن اخطار تحدق بالوطن وانفجارات ستحدث ووقيعة بين فصيل وآخر وهجوم من عدو مجهول وبلطجية
----------------------------------------------
خطرٌ داهم خطرٌ داهم :: الحق قام من قبره مناحـــــــم
وطيور سوده جوه الأوضه :: وديب بيعوّص جنبه جماجم
فيه سحليه راسها رزيّه :: وبومه تبرّق وغراب جــــــــاثم
فيه حراميه الف وميه :: سرقو البنك ومين حـــــــايحاكم
فيه تعويره فى يد اميره :: لهفو السلسلة سرقو الخاتم
فيه سلعوّه بره وجوّه :: اكلت عيّل .....بلعت هـــــــانم
والسمك البورى المتوحش :: روخر يهبش رِجـــل النايم
فيه قمر ابصرايه بيصــــــــوّر :: وبيرمى قنابل ويلاكــــــم
اما العملا عينهم كحـــــــله :: بيدسوا ازايز زيت باكــــم
والنار اللى بتحرق روخـــره :: لهاليبها ماتطولها سلالم
ماية نار نازله من المنور :: طوق اشعاع بيضوى وعــازم
عازم على ارضينا اخواته :: نووى وذرى احـــمر قـــــاتم
والدم الماشى على الحيطه :: برص بديله فيه كان عايم
الدم الناشف فى عروقنا :: وبلازما فى اكياس موش لازم
هيكل عظمى يشبه عمى :: نط وبرّق قمت انا شــــــاتم
راح شنكلنى بكوعه قتلنى :: بس انا كعورته ف بير كاتم
وبحله برســـــتو انا غطيته :: كده خليته يحك الخــــاتم
جـــه عفريت ازرق بيــــنور :: رحت بليزر عاميو ..عفارم
صرّخ صرخه بشتيمه وسخه :: وخَبَط فى الباب سيفه الصارم
رحت انا بقى لابد فى البانيو :: ومن يومها انا قاعد وملازم<
----------------------------------------------------------------------
وفى ذكرى الثورة الأولى تساءل الناس سؤال عن رغبة كل منا فى هذا اليوم المجيد



• عاوز تكون فين و تقول إيه يوم 25 يناير
• 20012
عايز اكون وسط الميدان ماسك علم
وبقول بصوت واضح جهورى ومنسجم
عايز بلادى اللى خدوها تعود وسلم واستلم
... سلم لنا تانى الحماسه والرياسه والقلم
رجع لاخويا اللى اتقتل روحه وقلبه اللى اتخرم
طفى النيران فى قلب ام ضناها واراه التراب
وكان املها فى الحياه وف عينها راجل محترم
بطّل تقول انك حميتنى امال د مين اللى اتشكم
واللى اتعكم واللى اتسحل واللى الرصاص خلاه عدم
عاوزين نشوف مين الإيدين ورقم تلاته فى كل بلوه ياحكم
فين الفلوس فين الحيتان فين المحاكمه والرمم
فين الأدله والفلول فين الجمال فين البغال يوم الزخم
فين اللى كانو بالسيوف ويا المطاوى وبالحجارة بنترجم
عاوز بلادى ...بشكل عادى تعود لحضن ضناها تانى بدون صنم

من ذكريات الثورة - المتحولون والمصلجية

خيري رمضان يونيو 2010 : أنا مش عارف الناس زعلانة ليه عشان خالد سعيد ، واحد حشاش ...و مات ، نهد البلد عشانه يعني خيري رمضان يناير 2011 : أنا مش عارف الناس مركزة ليه علي المتظاهرين اللي بيموتوا و متجاهلين شهداء الشرطة الأبطال ، يعني مايدافعوش عن نفسهم .

----------------------------------------------------------------------
... عايم مع الموجات... وفلول على ثورات
معقول يميل للحقيقه ؟ دايما مع الباشوات
يرقع قوام بالصوت ...لو قط سيده ده مات
اما الشهيد لو طب ...بيقول صريع القات
مايل مع الرايجه ... سابح مع الجنيهات
ويهز راسه شمال ...ويمين كمان اوقات
ويمجّد الظالمين .... ويوافق البهوات
قالو الشباب ثاير ...قاللك دى فيها بنات
صايعه ومافيش ليها ... مامات ولا بابات
وعيال ماهيش لاقيه ... رصفان عليها تبات
اوم نزلو ياكلو عيش ... ويحدفوا طوبات
اما الجِمال والبغال ... وعليهم الأغوات
دول وحدهم جم هناك ...بيأجروا كرايتّات
وبيلعبوا بالسيوف ...ويحطّبوا ف دماغات
ماحد منهم قصد ... فتنه ولا أشتات
أشتوت هناك باللهب ... والفلكلور ما مات
تعرفشى مين السبب ...الضرب كان من سكات
لكن برغم العجب ...اتشنكلوا ف ويلات
والجمع لما انتصر ... قالوا دى ثوره وجات
كات صعبه قولتها ... على شفة البهوات
قالو دى هوجه وفرح ... ومافيش فرح بيبات
الليله تخلص فى ساعة ...ونعود لزمن السكات
لكن دى فوره بفوره ...والناس ماعادت فتات
والكتله جامده اما نزلت ....خرست موسيقى النايات
واتلم لغلوغه جوّه ...واتلجِّــــــمت رايــــــــــــــــــات
وادى كدابين الزفه ...والعين دى زايغه ف سُبات
ماراحش ابدا امل .... فى عودة الأوقات
لما المديح للزعامه ...كان اللبان والتبات
وكانت المعجنه ... بتربّى ابو الزلات
والفتّه فى المصلحة ...والكوسه فى التعيينات
ومازال لديهم امل ....م الموت يعود الرفات

*************************************

اخبار عن مقابله سريه مع المخلوع والمرشد....والحقيقه الله اعلم لكن ؟
----------------------------------------------------------------------
المصلحة تغلب.... وفين المصلحة ؟
عند الخسيس؟ راح اروح و قول له بصحصحة
تسيبنى وانا اسيبك ونبقى سمن على عسل
أطلع اقول بكره دى حالته مكـحكحه
وخلاص بقى كفايه وحايجيب الفلوس
وبايه بقى تفيدنا .... اباحة وشرشحه
وكفايه انه نايم على سرير موش طرى
والواد كمان تعبان مناهده وزحزحه
والقاضى زهقان من الورق ده كوم كبير
وسيناريو مضروب مافيش فيه مسرحه
وسألته ياكبير موش كده تمشى معاك المصلحه
سكت وجاوب وهز دماغه..... بس بنحنحه

جوز فى البرلمان خسروا

ألف ألف مبروك يا شباب ... مرتضى منصور رمز السى دى خسر يا رجالة وحصّل اخوه عكاشة رمز البطة ...
وانا من زعلى عليهم قلت
-------------------------------------------------------------------------------------واحد لسانه زفر والـــــــــــــتانى بطّاوى
قام ده سبق ده وخسر والتانى كان ناوى
قلبوا دماغنا بصراخ سيديهات على حكــاوى
ده للخليع حبِّيب ودا الــــــعوبان غـــــــاوى
ده بالهبل معروف وده فى الكلام حـــــاوى
ماشى بكاميرا ومايك شياطين وبتخـــاوى
وتعدأنفاس البشر مين ع الكلام ناوى
ولما بالعك اتمسك شتم القضاه العاوى
حطوه فى سجن اتلوى قاللك انا حصاوى
تبت وخلاص حاتعدل كدبه و م بتساوى
م السجن طالع سليط ولســـانه بمطاوى
يطلع يقف فى الميدان حواليه مزز صلصال
وف ركن زفه وصاجات ع الواحده فيه طبال
كاميرات تصور هناك لقطات فيها استهبال
مسرح كبير للعبث كومبارس كله عيال
راحت عليه وانخلع للجالسين قام قال
مدح ودفاع عنّهم ماتقولشى دول أخوال
تمدح فى مين والقتيل ع الأرض اهوه مانشال
والتانى بلسانه الزفر ماسابشى حد ف حال
كل العباد عنده بقر هوّ الوحيد شغال
عمال يرص ف تهم عمال على بطال
فاتح لكل البشر أضابير وفيهم شال
سيديهات وجرم اتحسب فى قراية الفنجال

السلف ...والتلف

البيت الابيض : محادثات بين طنطاوي واوباما حول البرلمان وقرض صندوق النقد الدولى - بوابة السلف والندامه
-------------------------------------------------------------------------------
سلفنى حبة مونى :: ياعم عبد الغنى
دانا خزنتى نفّضت :: والشعب بيسبِّنى
سلفنى لوكشة دولار :: دا خَضاره بيشدنى
بيجيب جوافه وخضار :: فى الأزمه بيفكّنى
هات لى كمان كوز دره :: اصفر وحبُّه طرى
وشوال دقيق للخبيز :: والمايه لو معدنى
اصل الولاد وقّفوا :: والعجله طوق معدنى
والناس هناك طوابير :: مفروض بهم باعتنى
بترول كمان لو معاك :: والا خلاص بعتنى
الغاز ببيعه ببلاش :: المتر منه ..بجنى
فيه ناس بتقتل فى ناس :: والبُمبه اهى بميت جنى
راح اسيب ياعم اللجام :: بس انت هات ...زقنى
قاعد فى هم ونكد :: ماحاجه بتسرنى
اضراب فى ديل اضراب :: حنشان بديل منحنى
شفت الهتاف فى الميدان؟ :: الكل بيزمنى
حتى المجالس كمان :: فى القعده بتزفنى

المحامى يحامى ....عن الأفقى

فى آخر مرافعات الدفاع وجه «الديب» حديثه إلى «مبارك» قائلاً: «يا نسر الجو الجريح، لا تحزن من غدر الذين كانوا يتقربون منك، ومن قومك الذين انهالوا عليك بالشماتة وأنت أعزل، فلست أفضل من رسول الله، صلى الله عليه وسلم الذى دعا إلى الله حين وجد عنفاً من أهل مكة.. واصمد لعل الله يفك كربك»

----------------------------------------------------------------
يانسر الجو يامدبوح :: مين الندل اللى فاكرك ديك
دفاعى بان اهوه مشروح :: بمال الشعب انا بافديك
يحاسبك مين على اللحلوح :: جيوبك فيها بس ايديك
فوارغ ضرب شيلناها :: مسحنا كل بصمه ليك
دفاتر جرمها ممسوح :: شهادة الكل انك "شيك"
مافيش توريث مافيش خطه :: فشر كل اللى قالو عليك
كمان خاين وبتماين ؟ :: وباسو قبلها رجليك
ودلوقتى بقرن غزال :: يحطوها فى ننى عنيك
صحيح الشعب ده غادر :: مافيش غير "ماجده" "باكيه" عليك
قالت انذار قوى وجامد :: لكل اللى يقرب ليك
يقوم زلزال يجيب داغهم :: تزفك للسما مزازيك
وبرضه شفيق ماهوش ساكت :: بيسعى سعيه كله ليك
واولادك يروحو ميدان يكون مليان ::بصورك وانت باشا وبيك
اسفهم ع اللى حاصل كوم :: بتاع البط جاب رجليك
صبح يشتم على الفراعين :: وباعك وادى ضهره ليك
تحول عبد للمجلس :: بقى روخر بيدعى عليك
ماشفش الهاله بتنور :: فى راسك والشموع حواليك
وبركة دعوة الوالدين :: تحاوطك والإبر ف ايديك
وف سريرك كمان شامخ :: جمال دايخ يدارى فيك
لكنى ديب مانبش فرخه :: وحاتقوللى برافو عليك
وراح تدينى بالمليار :: ساعة م القاضى يحكم ليك
براءه هى مضمونه :: مادام الشاى معاه الكيك

حوار مع روح الشهيد

فى فجر ذكرى الثورة
فى نص الليل وفى المطره ....ميدان مليان بناس جايين
وحواليهم رياح عطِره بروح شهدا ...كمان شاهدين
وارواح اللى ماتو هناك دى جت تشهد مع الحاضرين
فى ذكرى مولد الثورة ..وع الثوره دى حالفه يمين
ماترتاح اى روح فاضت او انداست او اتفرمت مع التانيين
لحد ما كل اتباعه واعوانه وكل مفرملاتى نصب فى كمين
يلاقى مصير قـــِتِم محتوم ويُجزى باللى قاله الدين
قصاص عادل يكون فاصل ويشفى كل صدر حزين
سمعت انا روح نادتنى هناك وقالتلى عرفت انا مين
فقلت انا والله موش عارف ملامحك بس موش باينين
وايه ده نور والا دى هالات وليه طاير كده عالى ماتنزل
لمحت البسمه فى سنه وجاوبنى بصوت ماعرفشى جاى منين
انا اللى رصاص الغدر صابنى هنا وشاورلى ...واسمى" حسين"
وجيت هنا بس اطّمن ...عملتوا ايه ...وصلتو لفين
وليه سلمتوا اوراقكم و روّحتم وسيبتوها لهم ...فاكرين
حاميكو ده حاماكو بجد ....دانا جانى يِعَدّو .....مِتِين
وكله جاى متخرم ومتبطط ومتشوه ...فى عين واتنين
ايه اللى خلى حاميها يسوق فيها ....ويصبح شين
سألته وانت عايش فين؟ صحيح فى الجنه والا فين ؟
فقال ياه ع اللى شوفته هناك ...ياريتنى روحت من سنتين
تحب تجينا يوم جمعه تشوف وتتفرج كمان بالعين
فنطيت قلت خدنى معاك انا وياك اروح نوبتين
بشرط انك متشبطشى ..وتلبدلى بيوت الجنه موش بروحين
ورضوان لو سال ده مين تقولله زياره وماشى موش قاعدين
مافوقت الا على منادى وبينادى بصوت جامد على الحاضرين
محدش يقفل السكه وموش عاوزين فلول بينا ..كده... سامعين
ندهت بعلو صوتى عليه ...وبصيت فوق ناديت.. ياحسين
لقيت الكل باصينلى ويتهامسو ...وقال واحد... سيبوه مسكين

الأخبار والصور الملفقه...وحوار بينى وبين صديقى

Adel Mahdy


• عادل حمودة جايب صورة لغرقى من السيول في السعودية ليقول أنها جثث مسيحيي ماسبيرو


: Ahmed Fathy اللى بيقول


o هذا الرجل لايقول صدقا .. يذيع خبرا عن نزهة لجمال مبارك على كوبرى مايو .. ويتضح انه كان مع أخيه فى طرة يصلى .. ويقول أن هناك الملايين دخلت فى حساب مبارك بالبنك الأهلى .. ويرد البنك المركزى بان المال تحت تصرفه من يومها .. والآن فضيحة جديدة .. أرى أن تغلق الفجر .. لولا ان هناك الكثيرون ممن ...سيقع عليهم الظلم


o الكردى اللى بيقول

====================================o



وكان للعبد لله السكندرى رأى آخر






Adel Mahdy


الفجر لما يدن ...لازم الديك يقول


حتى ان قالولو بيض ...حيبيض حسب الأصول


فيه كوره بنج بونج ..سابها الواد الخرونج


ماهو ايده خلف ضهره ...ماهو هوه كينج كونج


الديك سهاه وخدها ...وبالشمال رفصها


آم لما جه معاده ...قال كاك.. لازم يقول


جت عالصرخه الفراخ ...آم هوه داخ وساخ


شوفتو انا بيضت بيضه ...كله كاكا بذهول


معقوله تبيض ياديكنا ...والله دا شىء مهول


لكن فيه فرخه رقمه ...زاحت رجله بحكمه


بصت فى النور لاقيتها ...فارغه ف ادتله شتمه


العشه بحالها هاضت ... شوفتو الديك الجهول


خلّى كدبك مِساوى ....فرّحت فينا العــــــــزول




وكانت هذه المداخلات والحوارات بينى وبين صديقى شيرين الكردى فى نفس الخيط


الكردى : آه والله ياماكس وهذه هى الكماله زى الكشرى بتاع سحس


عمك دا ثورى والا ...فله من الفلول


ورد العبد لله السكندرى :


عامللى فيها ثورى ...واخباره طازه وفورى


تلقاه تمللى قاعد ... فى البار جنب الفلول


وبيضرب فول سودانى ... ويبيع ام الخلول


يرفع كاسو فى كاسو ... ويطرطق ودن غول


أوم هما دوغرى يقولو ... والسر جوه العقول


لكن هوه بمهاره ... يصطاد والصيد اصول


بيخش جوه ف دماغهم .. وبيسمع من سداغهم


وبيلقط الحوادث ......واللى بيشهد يقول


البار مكان مضلّم ... لكن اخوك معلم


وبيقرا حركة شفايف ....لو حتى ف بقه فول


او هوه حتى بيبلع ... يرضك صاحبك بيسمع


البلع يعنى مؤامره ...والكحة رشة ديتول






دى بقى كمالة الكماله ياكردى ....بعد كده بقى رز بلبن ونغسل ايدينا الا الكشرى زروط الدنيا

قصة لها معنى ومغزى

كتب الأستاذ الجامعى

من ذكريات المدرج.

.أنا من الحزب الوطني يادكتور!

الأستاذ الدكتور محمد هاشم عبد الباري

الحشرات عالم جذاب ومحيّر في أمره، ويدعو إلى التأمّل والتفكر والتدبّر، ليس في تنوعها وفى أشكالها وألوانها وتكوينها، وليس في حياتها وسلوكها ومعيشتها وبيئاتها وملائماتها في الشكل والتركيب لنمط حياتها. ليس كل ذلك فحسب وإنما كذلك في وظائف أعضائها وآليّاتها في تأدية تلك الوظائف، وهو ما يطلق عليه علم وظائف الأعضاء أو "الفسيولوجي"، وذلك هو تخصصي، فتخصصي هو علم وظائف الأعضاء في الحشرات، وبالتعبير العلمي هو "فسيولوجيا الحشرات "Insect "Physiology". . لقد استهوتنى كلية الزراعة وعلومها فهي بحق أم الكليات، والزراعة في الحقيقة وبلا شك هي أصل الحضارات، واستهواني في كلية الزراعة قسم الحشرات الاقتصادية Economic Entomology، واستهواني في علوم الحشرات علم فسيولوجيا الحشرات، واستهواني في فسيولوجيا الحشرات فسيولوجيا الأعصاب Neurophysiology! لا عجب. فلقد اجتذبت الحشرات طبيبا انجليزيا فافتتن بها، واستحوذت على كل اهتماماته فهجر الطب وعكف على دراسة الحشرات وحياتها ووظائف أعضائها في العشرينات من القرن الماضي، فكان أن أصبح هو العالم الأشهر في الحشرات "السير فنسينت ويجليسويرث" مؤسس علم فسيولوجيا الحشرات في العالم! كثيرا جدا ما يسألني الآخرون في بداية التعارف وبخاصة الأساتذة الجامعيين عن تخصصي عندما يعلمون أنني أدرّس في كلية الزراعة، ثم يتعجبون ويندهشون ويعقدون حواجبهم عندما أقول لهم أنني أدرّس في قسم الحشرات الاقتصادية، فأكون مجهزا سلفا لشرح الاسم! أنهم، وعلى الأرجح أنتم كذلك، سوف تتركون الحشرات وتمسكون بالاقتصادية! إن كلمة "اقتصاد" في اللغة: من "القصد" وهو التوسط والاعتدال (المعجم الوسيط مادة قصد) ، ومنه قوله تعالى: "وَاقْصِدْ فِي مَشْيِكَ" (سورة لقمان الآية 19)، والقصد في الآية منزلة بين التفريط والإفراط ، وبين التقتير والإسراف، هذا في اللغة أيضا.
أما في الاصطلاح فعرّفه "آدم سميث" (عام 1776) : بأنه "علم الثروة أو العلم الذي يختص بوسائل اغتناء الأمم". ويعرّفه "روبنز" (عام 1932): بأنه "العلم الذي يبحث في سلوك الفرد تجاه حاجاته المعتادة ووسائله المحدودة ذات الاستعمالات المتنوعة". أي أنه العلم الذي يدرس كيفية تلبية الناس لحاجاتهم وإشباعهم لرغباتهم المختلفة. وأعتقد أنّ الاقتصاد في النهاية يترجم إلى ربح وخسارة، ومنفعة وضرر، وفقر وغناء، وضنك وشقاء وراحة واسترخاء، وعذاب ومتعة! قدّرت منظمة الصحة العالمية عام 1972 نحو 100مليونحالة ملاريا في منطقة جنوب شرق آسيا، 70% منها تحدث في الهند، وفى عام 1947 قدّر نحو 75 مليون شخص عانوا من الملاريا في الهند بنحو 800 ألف حالة وفاة. الدراسة عن الخسائر الاقتصادية الراجعة إلى الملاريا قالت أنّ الملاريا كانت مسئولة عن نحو 750 مليون دولار في ذلك الوقت (مرض، ضرر، عذاب، كبد، معاناة، عطالة، خسائر، موت). كل ذلك بسبب نوع من البعوض (حشرات) ينقل الملاريا للإنسان عند اللدغ!!! أعتقد أنك سوف تكون في غاية السعادة عندما ترى زوجتك أو ابنتك ترفل في فستان من الحرير "الطبيعي" الذي ثمن المتر منه آلاف الدولارات، والمصنوع من شرانق دودة حرير القز (حشرات). وقد يضفى عليها شيئا من الرقة ولو إلى حين! وبالتأكيد أن زوجتك أو ابنتك سوف تتباهى وتتفاخر(تتفشخر) به عند الأخريات من نساء وبنات الأقارب والأصدقاء والجيران! (ربح، منفعة، جمال، رومانسية، بهجة، بهاء، راحة، متعة، انسجام، فشخرة!).أعتقد أنّ مفهوم الحشرات الاقتصادية قد وصل. إن الأمثلة على منافع وعلى مضار الحشرات لا تنتهي، وقد يكون لنا معها حديث إن شاء المولى عزّ وجلّ. من بين المليون نوع من الحشرات التي عرفها وعرّفها وكشف عنها الإنسان نحن نقوم في "قسم الحشرات الاقتصادية" بتدريس أكثر من 300 نوع من أهم الآفات الحشرية والحشرات النافعة في البيئة المحلية الزراعية وغير الزراعية للطلاب في مقرر "الحشرات الاقتصادية"، علما بأننا نقوم بتدريس عشرات العلوم المتعلقة بالحشرات. ظللت أدرّس ذلك المقرر طوال سنوات عملي بكلية الزراعة وحتى الآن بجانب علوم "فسيولوجيا الحشرات" وغيرها. وللمعاونة في تدريس "الحشرات الاقتصادية" لدينا مجموعة حشرية محنطة ومتحف متواضع في القسم، ونطالب الطلاب الدارسين للمقرر بجمع مجموعة حشرات من البيئة المحيطة وتصبيرها وتعريفها ودراستها والإلمام بها. هذه المجموعة الحشرية يقدمها الطلاب في نهاية الفصل الدراسي الجامعي ونمنحهم فيها درجات في إطار أعمال السنة. في أحد أعوام أواخر التسعينات من القرن الماضي، وقد كنت مسئولا عن تدريس مقرر "الحشرات الاقتصادية" نظريا وعمليا، وفى أواخر الفصل الدراسي جاء إلى مكتبي السيد البروفيسور رئيس القسم، وكان يكبرني بعدة أعوام، غاضبا ومستاء. بلغني أنّ أحد طلاب المقرر قد كسر قفل أحد دواليب عرض الحشرات في بهو القسم وسرق بعض الحشرات المحنطة. وأخذ رئيس القسم يهدد ويتوعّد ذلك الطالب المجهول بالويل والثبور وعظائم الأمور، وأخذ يهدد بأنه سوف يفعل كذا وسوف يفعل كذا في كل الدفعة إذا لم يحددوا الطالب الذي فعل ذلك. أخذت في تهدئة الرجل الذي لم أعلم بذلك الشأن إلا منه في تلك اللحظة، وهوّنت عليه الأمر، وطلبت منه أن يترك هذا الأمر لي وسوف أقوم بحل المشكلة. كان عدد هؤلاء الطلاب الدارسين للمقرر نحو 560 طالبا وطالبة. وكنت أحاضرهم في مدرج كبير أسبوعيا من السادسة إلى الثامنة مساء. لم أقم بأي إجراء بخصوص تلك الواقعة حتى حان موعد محاضرتي لهم بعد أربعة أيام من ابلاغى. دخلت المدرج في موعد المحاضرة بالضبط كالعادة. وقفت على المنصة صامتا أنظر إلى الطلاب لمدة دقيقتين فكان الطلاب وكأن على رءوسهم الطير واعتراهم الوجوم. لم يكونوا يعرفون بتلك الواقعة، فبالطبع لم يقل لهم أحد ولم يفشى الطالب الجاني عمّا فعل. انه سرق تلك الحشرات لكى يقدّمها في مجموعته الحشرية وينال عليها درجة.كنت متكدّرا بالفعل من تلك الفعلة. وكنت أعتبر الطلاب دائما هم أبنائي بالفعل. وكان الكثيرون من الطالبات والطلاب ينادونني أو يكتبون لي باسم "أبى". لقد كنت أشعر في قرارة نفسي بأن أحد أبنائي الذين قمت بتربيتهم وأحببتهم هو الذي فعل تلك الفعلة. لقد كان شعوري واحساسى أنّ الأمر يخصني أنا، وأن ذلك العار قد لحق بى أنا شخصيا. كنت أغار على طلابي وأحبهم ولم أكن أتخيّل أن يصدر من أيّهم ماصدر. ومع ذلك، ومع المرارة التي لحقت بنفسي، فقد قلقت عليهم من وجومي وصمتي في المدرج، وقلقت على توجّسهم، تحاملت على نفسي وأقرأتهم السلام كالعادة في محاضراتي. ثم سميْت الله وحمدت الله وأثنيت على الله وصليت على رسوله الكريم صلى الله عليه وسلم، كالعادة أيضا عندما أبدأ المحاضرة. ثم حدثتهم عمّا بدر من أحدهم، وعن عدم تخيّلي لما حدث، وأبلغتهم تهديدات السيد الدكتور رئيس مجلس القسم، وأبلغتهم استياء كل أساتذة القسم والفنيين والعاملين فيه. كل ذلك وسط محيط من الصمت الرهيب من الطلاب. ثم تكلمت معهم عن الأمانة، وعن الشجاعة، وعن الرجولة، وعن الفضيلة، وعن الكذب والإيمان، وعن نوعية الإنسان المسلم. كل ذلك وهم واجمون. وأخيرا قلت لهم: "درجاتكم أمانة عندي أمام الله. لن أهدد بصعوبة الامتحان كما يفعل البعض. لن آخذ البريء بذنب المذنب. أبدا. لن أفعل أي شيء. أبدا. ولن أسمح لغيري أن يفعل شيء ضدكم. أبدا. لن يأتيني ذلك الابن ليعترف لي على انفراد. أبدا. سأطلب شيء واحد فقط، وربما يكون أصعب من أي شيء يمكن أن يتخذ ضدكم بسبب تلك الفعلة. سأستدير إلى ناحية السبورة وأعطيكم ظهري لمدة دقيقة، وسوف يقف بينكم الطالب الذي فعل ذلك لتعرفوه، حتى تعرفون المذنب وتشعرون ببراءتكم. وحتى لا ينظر بعضكم إلى بعض في شك، وحتى لا يشعر أحد منكم أنه مشكوك فيه. والآن أستدير، فليقف الابن المذنب لفترة كافية لتنظروا إليه وليجلس قبل أن أستدير لكم ثانية، فأنا لايهمنى أن أعرفه، ولو عرفته فلن أفعل شيئا" واستدرت وأعطيتهم ظهري. بمجرد أن أعطيتهم ظهري سمعت همهمة للمدرج لم تلبث أن توقفت، وغرق المدرج في صمت رهيب. حقيقة لم أعرف كم لبثت على ذلك الوضع ولكن الوقت الذي مرّ على هكذا قد يكون أكثر من ثلاثة دقائق. ومن شدة الصمت أعتقد أنّ عيناي كانتا قد غفلتا، فلقد شعرت أنني كنت وحدي في المدرج مقبورا. وربما أفقت من غفوتي معتقدا أنني كنت وحدي في المدرج في جنح الليل. ثم استدرت لهم ثانية. ياللهول. لقد وجدت طالبا في وسط المدرج واقفا في انكسار، والطلاب كأنّ على رءوسهم الطير، واجمون ومرتعدون ويمسحون دموعهم في صمت. ياللهول. ماكنت أتوقع أبدا أن يحدث ذلك. مطلقا. وقف الطالب الشاب ليرى نفسه لزملائه ولى ويعترف بذنبه في صمت، ليقول بجسده وبروحه وليس بلسانه "أنا الفاعل"، "أنا السارق"، "أنا المخرب". لم يستح ذلك الشاب من نظرات المئات، لا تقل من زملائه بل قل من زميلاته الشابات! ياللعجب! لم يأبه ذلك الشاب إن كنت قد أضعف وأتراجع وأحنث في وعدى فأوقع به أشد العقاب؟ أبسط العقاب كان الفصل من الكلية وضياع المستقبل وهو فى السنة الرابعةعلى وشك التخرج. لم يكترث أن يصل الأمر إلى والديه فيسبب لهما الإحراج والعار؟ لم يهتم ببكاء زميلاته وزملائه الصامت وقلقهم عليه فيجلس قبل أن أستدير وأراه؟ كان يمكن أن يتعلل لنفسه أنه لم يكن موجودا فى تلك المحاضرة وكان غائبا. كان يمكن أن يتعلل لنفسه أنه لن يعرفه أحد. انه لشيء عجاب! كل ذلك جال بخاطري بسرعة البرق فدمعت عيناي وأشرت بيدي قائلا فى انفعال شديد: "هذا هو الإسلام، هذه هي الرجولة، هذا هو الشباب المسلم، هذه هي الشجاعة، اجلس يابنى، باركك الله". قبل أن أكمل كلامي كان المدرج قد انفجر في البكاء، طالبات وطلبة! لقد استغرق ذلك الموقف من وقت المحاضرة نحو عشرين دقيقة، وهى تساوى مجموع وقت الراحة. فالمحاضرات عندنا ساعتان لكل ساعة عشر دقائق راحة. في اعتباري أن ثلث الساعة تلك لم تكن أهم من المحاضرة فحسب ولكنها كانت أهم من الفصل الدراسي كله. أعطيت محاضرتي كاملة في الزمن المحدد لها بالضبط وصرفت الطلاب، تعوّد الطلاب منى أن يجلسوا خلال المحاضرة بفاصل فى المدرّج بين الطالبات والطلبة، وأن أصرف زميلاتهم بالكامل أولا ثم أصرف الطلاب الذكور بعدهم. ذهبت بعد المحاضرة إلى مكتبي لأكمل برنامجي اليومي وكان لدى عمل أنجزه. مكتبي داخل معملي والمعمل منفصل عن بقية القسم ويطل على حدائق الكلية مباشرة وكان الظلام خارج المعمل دامسا. كنت منهمكا في قراءة أحد التقارير العلمية حينما شعرت بحركة وأن أحدهم يقف بباب المعمل في الظلام. رفعت رأسي ونظرت صوب الباب فإذا بشاب يقف بالباب ينظر إلىّ. قلت له: "من أنت يابنى وهل من خدمة أؤديها لك؟"قال لي: "أنا الطالب المذنب الذي وقف في المدرج في المحاضرة"كنت قد نسيت شكله وملامحه حينما وقف في المدرج وسط زملائه. فقد كنت صادقا في وعدى ولم أكن أبدا غير صادق، بل كنت قد نسيت الموضوع برمّته بعد أن ألقيت المحاضرة. وقبل أن أتكلم أنا مع الطالب أردف قائلا:"أنا من الحزب الوطني يا دكتور"وقبل أن أردّ عليه كان قد أبرز بطاقة عضوية الحزب الوطني مناولا لي إياها قائلا: "أرجو أن تمزقها أنت بنفسك يادكتور"نظرت للبطاقة في يدي وقلّبتها بين أصابعي وكانت بطاقة فخمة من البلاستيك المقوّى الذي صنعوا منه بطاقات الرقم القومي بعد ذلك بسنوات!قلت له على الفور: "لا، بل احتفظ بها يابنىّ ولا تستغلها إلا في الخير"تناولها الطالب منى في تردد وكأنه غير مصدق لما سمعه منى، ثم صافحني معانقا وانصرف. لم أر ذلك الطالب بعدها مطلقا، وربما كنت أراه، وبالتأكيد كان يحضر المحاضرات، وبالتأكيد امتحنته شفهيا وعمليا، ولكنني لم أتذكر شكله ولا ملامحه، ولم يكن يعنيني ذلك. ولكنّ خريجي تلك الدفعة كانوا يحضرون إلى على فترات ويعرفوني بأنفسهم بأنهم من الدفعة التي "بكى فيها المدرج"، ومن يعرف ؟ ربما كان ذلك الطالب بينهم عندما كانوا يزورونى، دون أن أدرى! بعد أسبوع تقريبا من ذلك الموقف جاء إلىّ البروفيسور رئيس مجلس القسم يسألني عن الإجراء الذي اتخذته في واقعة الطالب الذي كسر الدولاب وأخذ الحشرات. قلت له أنني فعلت اللازم فلاذ بالصمت، ولم يسألني هو أو أحد غيره بعد ذلك أبدا. لا أدرى إن كان ذلك الطالب قد غلبته نفسه الأمّارة بالسوء واستمر في عضوية الحزب الوطني ونال بعض المنافع والمناصب والسلطة والفلوس وأصبح الآن من الفلول، أم تغلبت شجاعته على المطامع وترك الحزب، ولكنني أحبه مثل بقية الطلاب وأدعو له ولهم بالخير والهداية. هؤلاء هم طلابنا، وهؤلاء هم شبابنا، وهؤلاء هم أبناؤناعندما يكتنفهم المناخ الطيب ويصادفون القدوة الصالحة ويبتعد عنهم شياطين الإنس. يظهر بريق الذهب عندما تنفض من عليه التراب. من سلوك الوزغ (البرص أو البرعص أو أبو بريص) عندما يشعر بالتهديد والخطر أن يفصل ذيله الذي يتلوّى ويتركه يتلوّى ويهرب، فيتلهّى فيه الناس ويظنون أنهم قد قضوا على الوزغ، وينشغلون عن بقيّة جسم الوزغ الذي يكوّن لنفسه ذيل جديد!

لقد ترك الحزب الوطني لنا ذيله نتلهّى به ومضى ليستأنف حياته بذيل جديد!

محمد هاشم عبد البارى21 شوّال 1432 ه19 سبتمبر 2011 م

منقول كما هو دون اى تصرف فى المحتوى فما فيه من العبر و الدروس ابلغ من اى كلمات اخرى

مقتطفات فيسوكاويه شعريه 2

استكمالا لما سبق وحفظا لتخاريفى الشعرية من الضياع فأنا اكتبها على الطاير وعلى الكى بورد مباشرة وارسلها ردا او تعليقا على موقف ولما كان الفيس بووك كا لجريده فإن الأشياء تضيع فيه وتختفى بعد ظهورها بدقيقة لأن التيكرز نازله ترص فى تعليقات واخبار وكاريكاتيرات ....زحام يطرد بعضه بعضا لكن صديقى البلوج كالكتاب تظل السطور فيه باقية يمكن استدعاءها فى اى وقت وانا احب ان استرجع الذكريات بين الحين والآخر وسطورى نبتى وعصير قصب فكرى اريدها امامى لذلك استعدت ما استطعت من سطور لأضعها هنا فقد ضاع مئات غيرها لا اعرف اين ذهبت ....وهاهى بعض سطورى فى الفيس بووك بعضها لا أذكر مناسبة كتابته ولكن الصب تفضحه عيونه ...وينم عن نوم شخيره

-----------------------------------------------
بعد ظهور كليب الضباط الذين عذبوا وصعقوا وضربوا اثنين من البلطجيه تجار السلاح ومهما كان المتهم ...ومهما كانت فداحة جرمه لا أرضى أبدا بالتعذيب والإهانة فهناك قانون

********
ماكانشى والله العشم تعمل كده ياحسين
نقرك ناقـــــور الوبــــا ..والا غراب البيــــــــن
وعداك سليل لافترا ...خللى ضميرك شين
الكاكى طول عمرهم وطنــــيه ومقاتلـــين
والسود سواد قلبهم معروف بقاله سنين
ايه اللى كب الهباب فى بياض حليب صنفين
مين جه غرس رجلكو فى وحل غايصه وطين
هل شوفتم الجمسى او احمد اسماعيل
هل انتم الشاذلى؟ هل وسطكم تحسين
مين منكو يعرف رياض ..مين منكو شاف مأمون
انتو اللى عريتو ...ناس فى الجنان عاليين
خِتم الشرف فوق جبينهم ...واسأل عليهم رابين
----------------------------------------------------------------------------------
ودى واضحه من غير مقدمات ولا توالى

--
الشهادة الكبيرة

سألوا كبير العسس ايه اللى شوفته هناك
اعمى وطرشى مابنضرشى من الشـــــباك
وان شوفت حتى معقوله حاقول برضه
هوه انتو سذج وفاكرينى البعيد عكاك
دانا الحارس وانا الفارس وواقف باك
وطول عمرى باصد اجوان مافيش نمله تعدى هناك
وامطوح اى شىء جارح وابات سارح حياتى فداك
والف وادور على الثوار واشد وارخى حبل دوبار
حاتسالنى حاقول ماعرفش
ماشوفتش ايوة انا ماباشوفش
وقاللك ؟ لأه هوه ماقالش
بيقتل؟ ده الكبير ماقتلش
قعد وياك ؟ لا ماقعدش
شربتو شاى ؟ لا ما شربش
طلب من حد تانى يطخ حى ورش ؟
لا مطلبش وانا معرفش
ياصبر ايوب طفــــح بينا الماعـــــــون والصبر
ظهر كل المخبى وبان سقط أهل الطواقى الخُضر
و اتارى الفنجرى وصباعه كانو إشاره لاهل القصر
سلام ع العيله بالكامل وأعوانهم ...ماليهم ظهر !!
فمين ع البطن يضربهم وأعوانــــــهم ولاة الأمر ؟؟
-----------------------------------------------------------------------
اما السطور دى كانت رد على صدبقى بكر اللى ذكر شىء عن تخدير الشعب وتنويمه بطريقه ساذجه فقلت
البنج فى الــــحقنه و تيييت الشعب مهرية
وكلمة الحق غابت وريحة العَمله موش هيه
طلع قُوُلُه وكل عمايله بوش وفاشــــــــوش
طلعنا احنا اللى بنــــــهرج وحرامـــــــــــــيه
-------------------------------------------------------------
اما هذه السطور فكانت تعليقا على صورة علقتها لى وبعض اصدقائى تجمع بين وجوهنا حاليا ونفس الوجوه من 40 سنه بالضبط وردا على تعليقات الأصدقاء المواسين والشامتين والضاحكين فى سرهم اقول

------------------------------
ألا ليت الشـــرابُ يعود يوما :. فأخبره بما فعل الـــغسيلُ
فما الدنيا وحال المرءِ فيها :. الا كسبت للغسيلِِ بدا يميلُ
ويدلق من أتى الدورُ عليه :. ويعلق بالحبال فتى جهولُ
يرى هو فى امتداد العمر نفعا :. وياليت الزمان بنا يطولُ
لكن العمر محسوب الثوانى :.وقطٌرُُ قد أبى المنعَ الهطولُ
----------------------------------------------------------------------
وهذه هات وخذ بينى وبين زميلى ودفعتى احمد فوزى
حتى اليوم ونحن نقترب من أخر سبتمبر 2011 : لم تصدر أحكام إلا على العادلي والمغربي وجرانة وعز ورشيد... وهم الذين ضحى بهم حسني مبارك قبل التخلي .... عسل جت رجله في قضية عز ورشيد بتاعة التراخيص ... الاستثناء الوحيد هو يوسف بطرس غالي .. مش فاهم خد حكم ليه .. يمكن علشان هربان !!!
ده احمد فوزى صديقى اللى بيقول

وده بقى العبد لله اللى بيقول

ذر الرماد فى العيون هو اللى بان للكل
وان كنت فاهم وبتدارى ...مساء الفل
مساء مرحـــــرح ونايم ع السرير بيطل
والمسرح القومى بدا فى موسمه الشتوى
بجوقه كامله وبروايــــه طويــــله تعـــــــل
--------------------------------------------------------------------

دى بقى عن تبرئته لنفسه من قتل اى حد
تعليقا على اولى جلسات المخلوع ودخوله القفص مستلقيا على سرير ومن حوله ولداه يخبئونه من كاميرات التصوير فى مشهد درامى غريب

اتنين ولاد جامدين لابسين ترينج ابيض
واقفين شمال ويمين ..بيحوشوا عن بابا
و اقفين له حيطه جون ..والجون ماهوش شايف
والوش مالهوش لون ...بيمص فى شفايف
ندهو عليه يالبوق ...حاضر مانيش خايف
وبرىء براءة النوق ..ده الجرم شىء هايف
ايه يعنى لو ماتو ...هتيفة التحرير
هوه انت لوهاجمك ...سربين من الصراصير
موش كنت راح تضرب ...شبشب بحجم كبير
وتبخّهم بالمبيد ...وترشهم بالجير
آدى اللى كان منهم ...والضرب شغل الغفير
لا عمرى قلتهم ...اضرب قليل او كتير
هما اللى من حرصهم ...خبونى تحت السرير
وقالولى البد هنا ....واحنا بتوع الكارير
حانلبهم لبه جامده ....وانت تمللى الأمير
شغلانه ديتها ...بكتيرو ساعه وكسور
وما فوقت من رقدتى ...الا اما جانى الزئير
بصيت لقيتهم هنا ...حصرونى ف ميدان سفير
على شرم طرت بهلع ...قولت اما تهدى الأمور
ماهدتشى قولت الرياسه... والكرسى روخر يغور
------------------------------------------------------------------------

ردا على ابيات معناها "حانقول ايه بس على اللى عمال يحصل من حركات موش مفهومة" من المجلس والناس اللى شالها الشعب على اكتافه
ايه الكلام الجامد ده ....وانطلاقا من هذا المنطلق

انا بقى اللى رابح اقولّه ع اللى صار واللى راح
وافتن كمان واجيبله سيرة الموت والجراح
يابنى لقينا مجلس عمال يقفش ويحبس
وبيضرب بالعصايه ويكهرب لو تبسبس
عندو قناعه اكيده قالها فؤاد المهندس
انتم خونه بأجنده لما م الضحك حافطس
والإبطاء موش حاقوللك والقاضى موش كويس
العهد الماضى باقى هوه معقول يفلس
دى جدوره غارزه جامد والجسم كمان منحس
والأمن الوطنى نازل بالتقل كمان يهيس
ويفركش فى اللى ثاروا والندل قاعد متيس
آدى اللى صار ياسيدى نام واتغطى كويس
3/8/2011
-------------------------------------------------------
قال صديقى محسن على الفيس بوك جزء من قصيدة جميله مطلعها

• انتم حزب الكنبة الصامت *** كباية شاي وسجارتين
• أو حزب الفيس بوك الناشط *** اللي لسانه طوله مترين
• أو روكسي ومصطفى محمود *** اللي مكملوهوش ألفين
• فنصيحتي اللي بلاش تاخدوها *** تاخدولكم شاي بالياسمين
• وارتاحوا وجبنالكو منبّـه ... *** وظبطناه على يوم الدين
• ارتاحوا عشان لسة الثورة *** واحنا خرجنا ومش راجعين
• وقال العبد لله السكندرى

-----------------------------------------•
• ده كلام ..قوى جامد ...يامعلم ....على قفيان الظلم يعلم
• داخلين بكره على رمضان والمشلوح موش راضى يسلم
• باكوات الشاى خلصناها والطفايه.... نفضناها
• وسمعنا الثوار تتكلم
• بس المجلس ناوى يجلس والقطنه فى الودن بتحبس
• الصرخات مكتوبه عرايظ وده بيقول الصبر كويس
• هوه كويس لو بنتيجه لو ميت جيجا كنت اتحمس
• انما سرعتكم.. بالكيلو والإجرام كده راح يتليس
• امتى نحس بثوره حقيقى ؟ إذا كان الحاكم بيهيّس
--------------------------------------------------------------

آخر واحده عشان الملل بقى ...ماعرفشى ايه اللى خلانا نفكر فى ده؟ يمكن كلام توفيق عكاشه الغريب عن البط والوز والفجل والجرجير وتحديه للبرادعى فى "عدد عيدان الجرجير فى الربطه"؟ ....هوه ده اللى خللى السيد عبيد دفعتى يثير مسألة الورور والجرجير فكان ردى عليه بعيدا عن السياسة خالص وقلت لسيد عبيد
قال شاعر صاحبنا فى حكاية عن الجرجير
جرجرنى حب الصبايا
جبتلهم انا جــــــــــرجير
فرشوه فى وسط الصينيه
وطــــــــــــــــالبونى بالكفته
صرخت انا ده سرّه سر خطير
طلع الزعيم فى آخر استفتا
والكفته مصنوعه بلحم حمير
ايش جاب لجاب الحرير والتّول للبفته
شوفتوش خضار العـــــــــــود وأوراقه
زرعوه تقاوى الحريم لعمايله فى الجته
شوفتو اليابانى اكلته م البحر ايه نوعها
ورق اخضرانى ملزق م اللحوم خالى
والفرد منهم يساوى من صنفنا سته
زعلو الصبايا وقالو انت ياعم بخيل
عينك على السعر موش ع الصنف فى اللسته
------------------------------------------------------------

مقتطفات فيسبوكاويه شعريه ولسان عصفور

منوعات شعرية فيسبوكاويه وثوريه

وردا على تباطؤ المخلوع فى المثول أمام المحكمه وذكره فى أقواله أنه برىء وأن الكل كان معه فى كل قرار خاصة منع الاتصالات عن مصر إبان الثوره كتبت
هــــــــاتولى كل الشــــلّه
أنا موش رئيس ..انا قٌلّه
مــــين الى شد الفِــــــلّه
مين اللى شَــــــد الكوبس
****
موش كان هناك فيه لجنه
مجموعه لاجـــــــــل الفتنه
والريـــــحه كانت نــــــتنه
و الجـــــــــــو كـــــله خبث
****
ماكانشى ليّه وجود
ولا كنت مدّى وعود
دانا كنت ماسك عود
عمال باجرّب حس
****
راجعو الأسامى هناك
روح عاقب اللى أذاك
إزاى تكون شــــــكاك

إنى لشـــــــــعبى أمِس
****
شوفتونى وانا راقد
للأبـــــــــــّهه ...فاقد
وجمال واخوه ساند
والأم مالهاش حس
****
القصـــد مــوش رايــح
و لوحــــدى موش نايح
دانا حسنى موش "سايح"
ياللا سوا ع البوكس
--------------------------------------------


-وتعليقا على اقتراب ثوار ليبيا من أبوب حصن العزيزية بطرابلس

ياابواب العزيزيه .: إفتحى ياللا الباب
ماتسكيش ياوليه :. دى الثوار ع الباب
والمــــجنون لو عندك :. إدّيه بالقبقاب
والدر ام الشجره :. عملتـــــها لأسباب
بس الخانكه داهيّة :. ماشيه تخر لعاب
وتهـــلفط وبتهتف :. وبتطـــــلب عناب
موش حاسه ان الدنيا :. واقفاله ب ركاب
و...قميص كمه مقفل :. شكله كأنه شراب
والعنــــبر مستنى :. وتومرجى بالكـــــــاب
والله انا عندى فكره :. بيضه مافيها هباب
روح وانزل ع الغابه :. واتغطى بجلباب
والبس عمه كبيره :: واطلب رطل كباب
امبراطور من يومك :. وسط قرود وكلاب
----------------------------------------

شهود الزور الذين شهدوا أمام النيابه بوقائع عادوا وأنكروها بعد صفقات وتنبيهات وفلوسات

---------------------------------------------------------------------
المحكمه ,,,والشهود

شهود إثبات وجم ينفوا ...أتارى الزور له ناس ياناس

وصف مــحامى يصطفّوا ... ولعب وشـــطب فى الكراس

لوا وجــه يشهد إكمِنّه ... عارف مين اللى أمره أساس

وقالــها نطـــق بها سِنٌّه ...فى أقــــــــوال النيابه وداس

وجِــــه بـــدّل كـــلامه هناك ...قلب للنفى ديله اتـــــعاص

وصـــل له طــــقم ظبّط له ...كلامـــه قال له كـــون بلاص

وقول ماحدش إدّى أمر ...بضرب رصاص فى روس الناس

وقــول دى روسهم اتخرمت ... لوحــــديها من الإخـــــلاص

ومــن كتر الهتاف بالصوت...وكان مضغوط فشــــق الراس

مشفتوش اللى غنت فا ...بصوت سرسوع فكسرت كـاس؟

ودول مـــلايين بتهتف عاه...ومنها تينـــور ومنــــها باص

وكل دمـــــاغ ليها تردد ...وليها رنــــــين حــــزين حساس

لكن العادلى والشاعر ... وفايد واللوا رمزى دى ناس تنباس

كلامهم إوعوا تؤذو الشعب ...مافيش هنــــا ضرب يا حراس

وفجاه لقينا كل الشعب شد فى شعره فى القاعة وفوقــــه داس

يافاجر فى الشهاده وناسى حق الله.. وقول الزور بقى لأمثالك النبراس

تجامل مين ودول زيك بَشَر فانيين... وناسى قول رسول يوم قال

وقول الزور وقول الزور وظل يقولها ويعيدها لحد ما قالو أصحابه

ياريته سكت.. ياريته سكت وياريتك بتفهم أو تعقل وليك إحساس
----------------------------------------------------

وعن موضوع الثورات المتتالية فى العالم العربى وتفجرها الواحدة تلو الأخرى كتبت اقول

الـــثوره أنفلونزا... فِرّه فى الــشعوب
راح تـــعدى جارك مهما كان واخد دوا
والـــــــتاج ده لما يكون نورى ولعوب
بزكام وعدوى ح تلطشه دوغرى هوا
شافو اللى صار و شافو دقات الكعوب
قــــــاللك حــــــــذارى وبسرعه انزوى
قـــــفّل حـــــدوده جاب لهم مزه لعوب
ونــــــــــــقل بطوله آسيا فورا ع الهوا
درمــــــــغ ولاده بالفلوس مليار يادوب
كفّـــــــــــى وفاض والكل قربع وارتوى
بــــس العيال دى برضه بصت م الثقوب
شافت جموع زى الطوفان والديب عوى
شـــــــافت خليع فلسع بعيد ومعاه كروب
والـــــشله حايصه والبوليس روخر هوى
والــــــــقاتل اللى كان زعيم عاوز طبيب
والـــــواد واخوه بُصُرّة فلوس جريو سوا
طـــــــب نعمل ايه يادهية دقى راح نتوب
ونــــــــــــحط مجلس شورى ليجينا الوبا

أو نلــــــــــهى كل شعوبنا فى حب وجوى
الا الحــــــكايه جد والبطل فيها الشعوب
يـــــارب ســـــلم داحنا مالناش فى النوى
-----------------------------------------------
لاحظت أن الفيس بووك كثير السؤال عن أصحابى وأقربائى درجه أولى وتانيه عادية وتانيه مكيف وكل ما عمل آب لوود لصوره يقوللى مين الكتاكيت دول ومين اللى على شمالك ده لدرجة إنى مره علقت صورة حفر قناة السويس للفنان عبد الهادى الجزار والصوره فيها واحد فى المقدمه "عامل" شايل مقطف فراح معلم على وش الراجل الغلبان اللى فى الصورة وقال مين ده ...طبعا بالخباسة المعهودة فىّ قلت له ده الحاج احمد بياع البيض السريح اللى بيعدى علينا يوميا ...واخذت فى العناد معاه لما لقيته حشرى وأميل لجمع المعلومات عننا جميعا من كونه تواصل اجتماعى فقلت من غيظى


أنا والفيس بووك

الحـــــلو حلو الشمايل
والفيس ده عمال يخايل
والواد فيس ده باصص علينا
وعمّال يسوى ف هوايل
عمّــــــــال بيسأل يتقّص
طب مين قرايبك يامرقص
اكتب وأيـــــــــــاك تنقّص
شايف كله وشايل
عنكو ملفات كتيره
مليان حكاوى وسيره
والوش يقطع خميره
لكنى باعمل جمايل
الإسم وصل اجتماعى
لكنه وأقــــطع دراعى
إنه جاسوس م الأفاعى
ومــــخبّى عنا الجدايل
عارفينها؟ تحت الطاقيه
وملولوه ومش طريه
صهيونى قاصد قضيه
مايعه وملهاش بدايل