انه دكان للخردوات نبيع فيه الخواطر والذكريات.. ونشارك بالقصص ونقرأ من خلاله أفكار اهل الدكاكين المجاوره ونسمع منهم كما نحكى لهم - هو مكان لتواصل جيل أوشك على الرحيل مع جيل هو بطل المستقبل القريب ...

Monday, September 8, 2008

استكمالا لخناقتى مع البلوج

لما طردنى البلوجاوى من صفحات التعليق خصوصا صفحة صديق العمر شريف اتغظت فكتبت فيه القصيدة التاليه:-
طهقت من التعليق ...وجالى ف دماغى إنبيق ...فقد رفض البلوجاوى تعليقى...وكأنى نمساوى موش أفريقى..
سألنى على اسمى فقلت لامانع ... وكلمةمرورى لامانع لامانع ..ولجل تحاشى كلام الشوارع ...سكت وكتمت فى قلبى المواجع ... لكن الحمار اللى إسمه البلوج ...وطبعا حصاوى وكاتون ودوج...رفض لى الدخول والولوج والكلام ....كأنى عزول مش صديق للأنام...فنرفزلى حالى ونفر عروقى ...وخلى اللى تحتى بقى دوغرى فوقى ...فرحت مصور صحيفة الكلام ...عشان تبقى شاهد ياعبد السلام ... وعلقتهالو فى آخررسالة ..عشان مايسوقشى على الهبالة ... ويشهد عليه الأفاضل صحابنا ...يشوف الجميع المصاب اللى صابنا ...فمين اللى فينا مريض بالزهايمر ...أناواللا هو اللى مخه مدمر ...دانا يعنى لسه حافظ له الوداد ... وقلت بلاش الأباحه ياواد... يقوم هوه يرفض ويرفص كمان ... ويكرشنى بره كواد العبان...وانا واد مسالم معنديش مطاوى ...وبامشى أزك واعد الخطاوى ...ولسه يادوب فى البلوج باسمى ... واقول للصغير ياباباوياعمى ....صحابى بتسأل وفين تعليقاتك ؟ ...أقول البقية ف حياتى وحياتك ... مانعنى البتاع إنى أدخل عليكم...واقول كلمتين هم سلام عليكم ...ختام الكلام دوغرى حابعت عريظه... لبطرس وكوفى عنان اللى راح...واقول له تعالى وشوف الحريقه...دىوالعه ف قلوبنا دى هى الحقيقه

15 comments:

someone in life said...

اول قصيدة في البلوج ... حلوة خالص يا مستر ماكس طيب شوف ايه الحكاية مع حد بلوجاوي قديم اكيد هانحب انك تشرفنا و تنورنا بتعليقك

تحياتي

كـــيــــــــارا said...

والله موضوع تحفه

وسردك ليها جميل خالص

بس انت بس اللي تلاقيك مش كتبت الباس صح


كل سنه وانت طيب

تحياتي

سمراء said...

جميل جدا الايقاع

واشكرك على زيارتك وتعليقك الرقيق
دورت على القصة بتاعت السبعينيات لكن معرفتش اول لها
هدور تاني

سمراء

canary said...

هو واضح طبعا ان البلوجر رافضك تماما وقد يعود هذا الى وجود حزازيات بينك وبينه مثلا
او انه عليك تار بايت بينك وبين بلوج اسبوت
او انه والله أعلم ممكن تكون سرقت رصيدة فى البنوك وطفشت مثلا مثلا
وعليه هو مش طايقلك كلمه ولا قابل منك تعليق
ربنا يهدى النفوس بينك وبينه ودى ايام مفترجه ادعى فيها على النت أيام 12 و 13 و 14 منه
تحياتى

maxbeta3zaman said...

إلى someone in life
أنا كده لما اتغاظ أقول على طول نثر شعر..والكلام بيجر بعضه ..لكن والحق يقال الواد البلجاوى طلع مظلوم وانا اللى موش عارف افتح الدكان ..ولى سوابق معاه ..فقد ضاع لى بلوج سابق أنشأه لى صديقى شريف ...وما أنسانيه الا الشيطان أن أذكره ...ففشلت فى الدخول اليه وأنشأت ذاك البلوج الجديد فمازال البلوجاوى فاكرلى الحكايه وواضعنى تحت المجهر

maxbeta3zaman said...

الى كيارا ..دليل الحيارى
طيب الله خاطرك ...وزادك فى السرد حسنا
ظهر يا كيارا ..ويا دليلا للحيارى أننى قد كتبت اسم الكنيه بدلا من اسم الجى ميل نظرا لأنى من جيل ال B.B.C>>>born before computers
وذلك ما يجعل الأخطاء وارده والسهو أكثر احتمالا
سرنى مرورك وكل سنة وانت أكثر من طيبه

maxbeta3zaman said...

الى سمراء
صاحبة الكلام المركز والمصفى ..القصة تجديها تحت شويه وعنوانها (أقصر قصة كتبتها وكانت فى سبتمبر الجارى ممكن تكون فى older posts..ضمن حكاياتى عن مجلة عين الحسود التى شاركنى فيها شريف البلجاوى الشهير
دمتى حلما للطفوله منية للنفس العليله

maxbeta3zaman said...

إلى ساكنة الكنارى آيلند
الموضوع طار بايت بينى وبينه ...هو ضيعلى بلوجى الأولانى ...وانا ضيعت مفتاح دكانى ...نبقى خالصين ...بس هو لابد لى فى الدره وكل ماجى ادخل يغيظنى ..وانا واد عصبى مع هدوئى المعروف ..اللى يدوس لى على زرار الغيظ اديه من النثر والشعر مالذ وطاب واسألو شريف عن معلقاتى أيام الكليه
أهلا بطير طار وحط فى دكانى

... amr said...

حلوة القصيدة ... باين عليك بلوجاتي قديم ... و معلقاتي صميم

اول مرة اجي هنا:) انشاء الله هكررها

كل سنة و حضرتك طيب

maxbeta3zaman said...

الى عمرو إوعمر
سرنى مرورك على الدكان واليك:-
يا أهلا بعمر الصديق الجديد
ياقارى كلامى هناك من بعيد
إذا كنت جامد وقلبك حديد
حتقرا لمشمش وتفضل تعيد
وانا فى البلوج حديث العهود
بانط ف شجرها كنط القرود
واضيع بلوجى واعيد من جديد
أهلا بك صديقا

انت تسال والكمبيوتر يجيب said...

الأخ العزيز ماكس بتاع زمان
تحيه طيبه وبعد
بعد زيارتنا لمدونتك نرجوا ان تشارك معنا فى برنامجنا الأذاعى من الأذاعه الرئيسيه لمصر
وهو اول برنامج عن النت والمدونات فى الشرق الأوسط
ندعوك انت وزوار مدونتك لزيارة موقعنا ومدونتنا لمعرفة كل التفاصيل
المدونه
http://netonradio.blogspot.com
الموقع
http://dear.to/cairo

maxbeta3zaman said...

الى كايرو كومبيوتر
انتو فعلا الإذاعة والا زى تمثيلية محطة المعادى التلفيزيونيه؟عموما حافترض انكم الإذاعة وبرنامج رأى المستمع بتاع الصبح ده
أنا : أيوه يأستاذ ممدوح معاك ماكسبتاعزمان البلوجاوى ,,وشك منور الميكوفون يا أستاذنا ..
أدخل فى الموضوع على طول من فضلك
أنا: الحقيقة يا أستاذ موضوع الغيش بقى مشكلة والأفران مغلبانا
مم: لا لا موضوعنا النهاردة موش العيش ده كان فى الشتا اللى فات
أنا:يــوه يبقى أكيد الموضوع النهارده عن المدارس ..تصور يا أستاذ ممدوح التعليم كفته خالص والمصاريف والدروس تثقل كاهلنا جميعاوالولاد بتتخرج ماتعرفشى حاجة
أستاذ مكس الحلقة النهارده موش عن التعليم هى الحقيقة عن الصخرةالى طبت
أنا: صخرة؟...طبت ؟ أصل انا كنت فى التراويح ...
ممدوح:يظهر الخط انقطع تــــــوت تــــــوت

maxbeta3zaman said...

الآذاعة طبت عندنا ياجماعه
سوف أكنس وأرش حوالين الدكان لأن الأوزاعه اللى بجد جايه وموش عاوزين لمه من فضلكم زى اللى بتتلم حوالين طارق علام فى برنامج دهب دهب ...مكروفون الأوزاعه حساس جدا وبيطلع أى خربشه ..وهمه فالولى يااستاذ ماكس بس ..يعنى أنا صاحب الصالون واللى اشاورله يتكلم ولما اعمل كده يبطل على طول عاوزين نظهر بمظهر حدارى فى الأوزاعه ..كل واحد يرش قدام دكانه لو سمحتو وعاوزين يافطه قماش كده نكتب عليها البلجاويون يرحبون بالإذاعه

Unknown said...

معقولة يا ماكس دانت بلوجاتى قديم بقى

maxmannour2 said...

احمد شوقى الشاعر الامير والصديق الاقدم من البلاليج كلها
انا ادخلت فى عالم البلوج من عام 2008 وكان صديقى شيرين الكردى هو من عرفنى بها وعمل لى حساب بعد ان كنت بريدى التراسل فقط وزاد الطين بله فيما بعد ظهور الفيس بووك هههههههههههههههههههههههههههههههههههههههههه

About Me

My photo
أحب الثقافة والفنون والشعر وتبادل الأفكار النافعة والهوايات المتعددة والمصنوعات اليدوية والرسم والمسرح والأغانى القديمة ذات المعانى الراقية والأفلام الكوميدية اتقن الكثير من الأعمال اليدوية (اصنع بنفسك )واهوى أصلاح أى معدة تتلف : حته جديده بقى أنا الماكس فى أحشائه الضحك كامن فهل ساءلوا بلوجاتى عن طرفاتى