انه دكان للخردوات نبيع فيه الخواطر والذكريات.. ونشارك بالقصص ونقرأ من خلاله أفكار اهل الدكاكين المجاوره ونسمع منهم كما نحكى لهم - هو مكان لتواصل جيل أوشك على الرحيل مع جيل هو بطل المستقبل القريب ...

Friday, September 5, 2008

مشمش يتحدث عن نفسه

كنت أبلبط فى قرية كرير ذات صباح وفجأة تزاحمت هذه الأبيات فى رأسى بدرجة .. جعلتنى أخرج من الماء مسرعا وأفرغها على أى ورقة وجدتها حولى ......وأسميتها مشمش يتحدث عن نفسه علىنهج قصيدة مصر تتحدث عن نفسها للشاعر العظيم حافظ إبراهيم (مع الفارق الهائل فى القيمة والمقام) أقول:

أنا الحاكم :. أنا الباكم
أنا هتلر :. أنا عنتر
أنا القانون أنا الدستور
أحط واشيل واميل واقدر
وأنتو الشعب أنتو النمل
وانا سليمان أدوس واطمر
أنا اللى بضربه من إيدى يموت ميه
يطير ميه وافعص ميه أو أكتر
أنا الحامى أنا النامى
أنا القاضى وانا العسكر
أنا اللى بقول حضر رمضان
وفات شعبان واقول للصايم اتسحر
ولما يطول صيام رمضان دا شهر طويل
كفايه عشرين وموش أكتر
هلاله بشوفه وبعينى ولا الفلكى يبارينى
بشوفه ف وسط ميت نجمه وبأماره بلون احمر
أنا اللى بقول على المواعيد واجيب العيد
واحط واشيل شيخ الأزهر
وهى دى الشفافيه كنوز جوايا مخفيه
بشوف الغيب وكف الإيد لكن عمرى مابتمنظر
أنا اللى باحمى كل الناس وكل المال
ولو واحد ضرب جاره مخليش حد يتعور
أنا اللى لو ف يوم قال لى واحد مهياص
كلام معسول أدوخ واسكر
واصدق كل كلمة مدح حلوه ودح
بحكمه أو فى صورة نصح ومين عالنعمه يتبتر
وشوف يابنى الشباب شغال ايديه عماله مش بطال
عيال حريفه فى الدومينو فى قرص الزهر بقو سكر
شباب لو خش فى بطوله ودوليه ف كوتشينه
يجيب الكاس بلا منازع عيال سهرانه فى التمرين
وخبره جامده ست سنين بيتمرن وبيعفر
مافيش واحد ملوش شغله يسوق ترماى يسوق بغله
ولو سوق الحمير يغلا يكون حََََمًار ومين اشطر؟
أنا اللى بحكمتى وّقَعت كام طياره زرع بصل
واخللى القطر يضرب قطر على نفس القضيب لاْغْبَر
وماله...... يتحرق ألفين دا تعداد البلد ملايين
طالع دينّا فى سد الدين سيبونا نقص ...ونقشر
ولو واحد يغرّق "بوط" ملان بالناس (بوط=boat (
ياخد كباس يسافر ....بس راح يحضر
باخللى المقترض يهرب ودوغرى يفوت
يروح بره يدبر قوت بدل ما ف مصر يتعثر
حبايبى ..فلوس بسلفهم واكيسهم
واقول ياللا على اليونان وبكره الأمر يتدبر
أنا اللى باحب كل الناس تسقف لى
تشجعنى وتهتف لى ولو منظــــر
أنا اللى بقول لهم حكمه بتنفعهم وتوجعهم
كما الحقنه...تشكشك بس فى السنتر
وانا اللى بحوش زكام عنكو واحصنكو
لصحتكو... بابيد الطير لأمراض الطيور تكتر!!
عشانكو بازود الأسعار بنص دولار
تزيد كام سلعه ..ولا حاجه جيوبكو بالفلوس تعمر
كمان شوفو مشاريعى شتا ربيعى
وغاز بقلل من الميه صحارى مزرّعه أخضر
وخطه كمان خماسيه سداسيه سباعيه
محدش قال عشاريه؟؟ تعالى حاسبنى لو تقدر
أصيغ ليكو قوانينكو كما مزاجى
ولو حتى قانون للفول يفوت دوغرى ويتمرر
كمان دوستورنا عدلتو وضبطو وهندستو
عشان يبقى التنافس حر ويحكمكو شيوخ منصر
أنا اللى لما افوت فى الحى تقف طوابير كتير م الخلق
وتهتفلى بعمق الحلق كلام بصعوبه يتفسر
لكن معرفشى ياخوان ليه بلاقى قزازعرابيتى
عليه ميه كتير م الجنب بتطلع من شفايف الناس
دى واللا الدنيا بتمطر؟؟
أنا اللى بالسلام خليت جيوشنا تخش جوه البيت
بقت منظر بقت بوكليت بقى اللى يشوفها يتحسر
على الجدعان ..على الشبان بقى وحدات للاستعراض
وبهلوانات..تنط..تفط غنا وهتاف لشاهبندر
وأكبر ميزه فى شعبى حبيب قلبى
ده إنه للبلا نساى ولا بيقرا ..ولا يفكر
وهو ده رهانى عليه أقول له كلام ..عدل.. بومبيه
يقول أوكـــــــــــيه ويصبح ناسى ....ناس سكر!!
عشان كده ناوى فيها اقعد أقوم وارقد
لحد ماييجى ملك الموت أقول له : "ليه كده مبدّر"
دانا لسه يادوب تسعين ..ماجبت ميتين
ونوح عاش م العقود تسعين.. ف سيبنى كمان انا أكتر

11 comments:

soly88 said...

قلبت المواجع علينا ربنا يكرم مشمش
ويقول كمان وكمان

Anonymous said...

هايلة هايلة

وبعدين معاك ياماكس .. أرجو أن تشنف آذاننا بالمزيد من المشمشيات

فنتصعب ولانقدر
نقول حقة ده كان اشطر
وزدنا بالعبر اكثر
كبلسم داوى مااستعسر

وحوّد عند حال اغبر
فحدثنا عن المنظر
ولكن قل فلا تقتر
ومن معنى الكلام اكثر

هناالايام تتمخطر
ماتعرف ايه اللى متقدر
فى يوم لافرخة تتحمر
ويوم لاكوسة تتقشر
ويوم بالعافية شاى سادة
ولا سكر ولابنجر

maxbeta3zaman said...

ياسولى ياغالى ياسولى الندى
كده النسمه تيجى وترميك كده
على الزهره ديه ..وعالغصن ده
يا سولى ياسولى ياسولى .. ياسولى الندى تلك كانت أغنية قديمه ربما لفايزه وكانت تغنى للولى الندى.. وقد بدلت اللام بالسين لزوم التلفيق ... الشعر والصور فى تلك الأغنيه رائعين ...أما بالنسبة لمشمش فأنا لسه قارى قصيدة حامية الوطيس لعمنا أحمد فؤاد نجم الذى لا يشق له غبار فى القصائد اللى فى السليم والتى تدوس على الجراح فعلا بل وتكويها ليحس بها الناس
أهلا بسولى ذو الثمانيه والثمانين ربيعا أو يزيد ا

Heart Beat said...

القصيدة جميلة

و انا بحب الزجل جدا

القصيدة جت على الجرح

تعرف في احدى الدول العربية اللي الحكم فيها ملكي

الملك كان مريض جدا و ملازم الفراش و مع ذلك مش عايز يتنازل عن الحكم لشقيقه

فخرجت نكتة وقتها تقول

ان الملك ده غير اسمه في شهادة الميلاد و كتب اسمه نوح

فجه اخوه لما عرف كده راح غير اسمه هو كمان و كتب ايوب

يعني حتى لو في شخص ما بيتمنى يكون نوح و نفس عمره

يبقى الشعب هايتمنى صبر ايوب

تحياتي

maxbeta3zaman said...

الهارت بيت
اسعدتنى الزياره لكونك تتذوقين الشعر والزجل ولو كنت عرفت لرشيت قدام الدكان عشان الطراوه وعموما :-
ياألفين مرحبا بالهارت بيت
ياريت جبتى معاك لتر زيت
دا كنا عملنا بيه حبة قطايف
وأكلنا الحبايب واشتريت
فوقيهم قول تلات تربع كنافه
وسته تمانيه قول دستة زبادى
وكل بلوج انا شفته... دعيت
وفوق دا كله باكو شاى منعنع
يقول الكل ...كلت اما اتهريت
وحقك عندنا ....رد الزياره
لبوستاتك نشوف كام كيت وكيت

Anonymous said...

أستاذي

حضرتك مش ممكن تكون مستني رأيي المتواضع في رائعة زي دي
بصراحة...؟؟؟

حضرتك مبدع فعلا
لكن اسمحلي...لي تعليق

حضرتك كاتب
دانا لسه يادوب تسعين يازفت الطين

زفت الطين هنا...تعود على مين بالضبط ؟؟؟

عشان لو على ملك الموت...أكيد كده حضرتك دخلت في الممنوع

تقبل تعليقي بصدر رحب
وكل سنة وحضرتك طيب

maxbeta3zaman said...

bannora
الحق كل الحق معك انا فعلا تداركت هذا ولمت نفسى عليه حتى اننى عدلت هذه العباره فى نسخة معدله لكنها وقت تعليق البوست كانت فى الحاسوب العطلان فأنا باستعجال أخذت هذه النسخة غير المعدله من البريد المرسل لأحد أصدقائى ..أقر بالخطأ وشكرا على التنويه موش بقولك بنوره لميع؟؟

Anonymous said...

أستاذي الفاضل
أشكرك جدا على سعة صدر حضرتك
وسامحني إن كنت أخطأت في انتقائي لألفاظي
إذ أنني وقفت حائرة..كيف لي أن أنوه عن هذه الجملة دون أن أتعدى حدودي

أكرر شكري لحضرتك
:)))
تحياتي القلبية

maxbeta3zaman said...

سعة صدر إيه ...الحق إحق أن يتبع !! الكلمتين دول بالذات " حاكوا فى صدرى" منذأن سطرتهم وقد بدلت الأبيات الأخيرة كالآتى:
لحد ماييجى ملك الموت ..أقوله ليه كده مبدر
دانا لسه يادوب تسعين ... ماجبت ميتين ونوح عاش م العقود تسعين .. ف سيبنى كمان أنا أكتر
السؤال هنا هل يمكن تعديل بوست تم نشره عمليا ؟ أم أن السهم نفذ ولا يمكن لصاحب العمل أن يعدل خطأ فيه ؟؟ عملا بالقول لسانك حصانك ..أو الكلمة إذا نطقتها ملكتك وإذا كتمتها ملكتها ...والشكر لك مرتين أول وتانى

Anonymous said...

أستاذي
ممكن طبعا تعدل البوست

أنا بس مش عارفة في الصفحة العربي
لكن في الانجليزي

Edit Posts

جنب أو ناحية بوست جديد

: )))))))))))

تحياتي

Unknown said...

عشان كده ناوى فيها اقعد أقوم وارقد)
لحد ماييجى ملك الموت أقول له : "ليه كده مبدّر"
دانا لسه يادوب تسعين ..ماجبت ميتين
ونوح عاش م العقود تسعين.. ف سيبنى كمان انا أكتر)
مش ملك الموت
اللى شاله
اهو قعد وعاش
وشاف وسمع بنفسه
ما يقال عنه بعد
رحيله عن الكرسى

About Me

My photo
أحب الثقافة والفنون والشعر وتبادل الأفكار النافعة والهوايات المتعددة والمصنوعات اليدوية والرسم والمسرح والأغانى القديمة ذات المعانى الراقية والأفلام الكوميدية اتقن الكثير من الأعمال اليدوية (اصنع بنفسك )واهوى أصلاح أى معدة تتلف : حته جديده بقى أنا الماكس فى أحشائه الضحك كامن فهل ساءلوا بلوجاتى عن طرفاتى