انه دكان للخردوات نبيع فيه الخواطر والذكريات.. ونشارك بالقصص ونقرأ من خلاله أفكار اهل الدكاكين المجاوره ونسمع منهم كما نحكى لهم - هو مكان لتواصل جيل أوشك على الرحيل مع جيل هو بطل المستقبل القريب ...

Thursday, April 28, 2011

استغاثة للعدل





عندما قامت الثورة بدا واضحا ان المحاكمات تجرى على استحياء وعلى جرائم واهية غسيل أموال -تربح -غسيل مواعين - بينما دماء الشهداء التى أراقها القتلة لم تدخل ضمن التهم - والهابرين هبرات ثقال طلقاء يمرحون فى المكاتب فى حبور ويهربون ما استطاعوا من أموال سائلة ويبيعون ما تحت أيديهم من عقارات لذويهم وأقاربهم وخدمهم فى حرية تامه ورئيس بنك التهر يب الذى هو بياع مصر سابقا ينعم بحرية الحركة ويساعد عصابة على بابا فى تهريب ماتيسر من نقد الى بلاد المقر المعروفة والتى لا تسلم مجرمين ابدا ...شلة الأنس ترتب أمورها والمجلس فى صمت والنيابة لم تتحرك ولم يتقدم أحد ببلاغات والشعب يغلى لذا كتبت هذه السطور ليتحرك القضاة ورجال القانون.. بلادنا سرقت وأبناؤنا قتلوا ولم تتحرك الجهات المعنية

يامحــاكم يا محاكــــم
ياللى بالعدل انت قايم
لمـــا تلقى لــص قاتل
خش ع الشخص اللى نايم
قام جايب داغه وسارق
...تلتميت لحلوح وخاتم
قوم تيجى انت تحــاكمه
ع اللحاليـــــح والخواتم
والقتــيل دمه مطرطش
والسلاح فى الدم عايم
يطلع القانونــجى يكتب
العريـــــــظه ..والقوايم
سارق الرزمـــه ام ميه
والـــغوايش والخواتــــم
هدد الأمــــــلاك ولاطش
فوقها مكوه بسلك لازم
لم صُـــــّره فى الملايه
شافه كام بواب وخادم
بصمته ع الأكره تثبت
انه م الهجامه... هاجم
والقتــــيل لم يأتى ذكره
فى الحـــكايه والجرايم
بس سرقه ..بس نصبه
واد لئيم قــــارح وعاطل
يعمل ايه موش لاقى ياكل
ماتسيبوه ياخواننا يمكن
ان عفيــــــتو راح يتوب
اغفـــــروا ده الرب يغفر
الخطــــــــــــــايا والذنوب
رجع اللــــــحاليح ياشلضم
وامشى دوغرى السرقه عيب
الحـــــــــــــــرامى بعينو برق
قال خلاص حـــــامشى معاكم
وشوش الأفوكـــــــــاتو كلمه
ضحكوا ضحكـــــــه كالعوالم
قاللوا فلتحيــــــــــــا النيابه
رد روخــــــــــــر قال كمان
قول ياواد تحيـــــا المحاكم
ولما تلكأ الوريث فى المثول أمام قاضى التحقيق متشبسا بالقصر ممتنعا عن الحضور طواعية وأمهلوه فلم يحضر وأرسلوا له المحضر فلم يستلم الإعلان ...أعلنوا أنه سيحضر الأحد فلم يحضر حتى الثلاثاء أرسلت لصديق متفائل أقول



سلم لى ع الباميــــه
بتقول عداله عاميه
أمـــــّال ده يطلع إيه
ترماى وفيه ابونيه
والا دول ناميـــــــه
ماتعيبشى ف كبيرها
لو حتى جاب بيرها
وبهدل مصـــــايرها
برضو دا ابن البيه
مكتوب له فى الكرنيه
انـــــــــــه معافى وإيه
مايبنشى على قاضى
لو هوه موش فاضى
يبعت عفاف راضى
تدّينـــــــا كام كوبليه
وهو يتــــــــــــــأنتخ
ليه رجلــــــه تتوسخ
ياناس مافيش ابوخ
من كلمـــــــــه همازه
من أيــــــــــن لك هذا
ده كلام ماهوش طازه
والريـــــــحة باينه فيه

2 comments:

norahaty said...

ربنا يستر ياماكس
أحسن دا الحال لا
يسر عدو ولا حبيب
والناس قسمين
قسم بيغلى من
الحاصل وقسم
ولا على باله وعايز
(الاستقرار)
يرجع بقى باي تمن

maxbeta3zaman said...

يانورهاتى قد بانت اللبه من تحت القبه ولعبنا سويا حاورينى ياطيطه ولجان رايحه ولجان جايه والأيام الفاضله شويه ...على رمضان.. والمحاكمات السلحفانيه ...اظهرت اللى فى النيه زى ماقال ماكس بتاع زمان فى مشمش يتحدث ..."عشان كده ناوى فيها اقعد اقوم وارقد لحد ماييجى ملك الموت أقولله ليه كده مبدر" ..وده اللى مخليهم بيفضلوا الحل الإلاهى الذى تنقضى بموجبه الدعاوى والحكاوى وخلاص بقى ما تسيبو الولاد ..فقد مات الداد ...وتبدا الفصل الثانى من مسلسل عائلة ونيس ..لكن بعد التدليس

About Me

My photo
أحب الثقافة والفنون والشعر وتبادل الأفكار النافعة والهوايات المتعددة والمصنوعات اليدوية والرسم والمسرح والأغانى القديمة ذات المعانى الراقية والأفلام الكوميدية اتقن الكثير من الأعمال اليدوية (اصنع بنفسك )واهوى أصلاح أى معدة تتلف : حته جديده بقى أنا الماكس فى أحشائه الضحك كامن فهل ساءلوا بلوجاتى عن طرفاتى