انه دكان للخردوات نبيع فيه الخواطر والذكريات.. ونشارك بالقصص ونقرأ من خلاله أفكار اهل الدكاكين المجاوره ونسمع منهم كما نحكى لهم - هو مكان لتواصل جيل أوشك على الرحيل مع جيل هو بطل المستقبل القريب ...

Monday, April 11, 2011

على بابا الملحمه الشعبيه



على بابا بعد الضنا لابس حرير فى حرير


ياساده كان ياما كان :. فى سالف الأزمان


راجل فــــقير غلبان :.اسمه رئيس بــــــابا


اسمه رئيس بابا


قاعد فى عرض كبير :. لابس هدوم كشمير


والياقه حـــــــلوه حرير :. ودماغه فيــــه كابا


ودماغه فيه كابا


نزلو تلات شبان :. نشوا اللى جنبه وبان


إنه ماهوش غلبان :. فلسع ولا إصابه


فلسع ولا إصابه


نزلتلو ع الطبطاب :. جات له لحد الباب


رمى جزمته والكاب :. قاللك أنا بابا


قاللك انا بابا


مااقعُدشى فيها كتير :. حلمى انّى أبقى سفير


دى الناس عددها كتير :. والدوله دى غابه


والدوله دى غابه


أوم لما أترستق :. قاللك نهار ازرق


إزاى أنا أسرق :. دى السلطه جذّابه


دى السلطه جذابه


كل الفلوس دى إيراد؟ :. من غير مكن عداد ؟؟


دا خــــــــير بلدنــــــــا زاد :. لمــــــــا بقيت بـــــابا


لما بقيت بابا


وف ريحُه مرجانه :. ساهيه وتعبانه


مكاره سهتانه :. خليك هنا مــــــــعانا


خليك هنا معانا


قالتلو خد غَرفَه :. طب ليه مااخد قُفّه


ياوليه موش شايفه :.دى اليغمه جلابه


دى اليغمه جلابه


إدُّى ابـنك المتـعوس :. قصـرين وتل فلوس


لو بكره رحت يحوس :. حانكون فيها غلابه


حانكون فيها غلابه


قاللك واروح انا فين :. لو جت سنة الفين


حانعيش كمان عقدين :. ونروح على طابا


ونروح على طابا


بس ساعتها حاكون :. حوشت كام مليون


لاصــــــفار تكون مليون :. قدام واحد يابا


قدام واحد يابا


يادوب نكون عاملين :.حسابين هناك فى العين


هما العرب خاينين ؟؟ :. والا احنا نتــــــــــغابى


والا احنا نتغابى


والواد جمال خليه :. يمسك رئيس دا عنيه


طلعت مذاكره وإيه :. ومــــــواهبه خلابه


ومواهبه خــلاّبه


خليلو دى الشله :. ضـــبط لنا الفله


وقميص مع فانله :. بصمه وسبّابه


بصمه وسبّابه


اسجن له مين حاسس :. شرد له مين نافس


حابس ياناس حابس :. دى الطلعه جذابه


دى الطلعه جذابه


ارقوه ياناس ارقوه :. وعلى الجلوس زفوه


ايّـــــــوْه ياناس ايّوْه :. ايش جبتى ياسحابه


ايش جيبتى يا سحابه


قال الرئيس دا الواد :. فيه ناس قصاده شداد


لو عنتر ابو شــــــــــــداد :. حايقول عاوز بابا


حايقول عاوز بابا


وانا صحتى كحكوح :. قربت احصل نوح


ماقدرش اعيْن انزوح :. مابلاش كده يابا


مابلاش كده يابا


راحوا الولاد نازلين :. قالبينها زفت وطين


أمروه يلت عــــــــجين :. كالقرد فى الغابه


كالقرد فى الغـــــــــابه


ونهاية المشوار :. راح نط دوغرى وغار


راح شرم فيها مطار :. جنبيها بقى طابا


جنبيها بقى طابا


آدى اللى كان وكان :. للراجل الغلبان


والست خشيشبان :. دى الفطنه حسّابه


دى الفطنه حسّابه

2 comments:

norahaty said...

على بابا كان
حواليه 40 حرامى
اما بتاعنا بقى كـان
حواليه 40000000000000
وحط ما شئت انت من الأصفار
ويمكن يكونوا اكتر كمان من كل
الأرقام اللى احنا عارفينها.
قصيدة زجلية جميلة ياماكس بتاع
زمان ودلوقتى وبكرة كمان

maxbeta3zaman said...

على بابا كان حرامى شعبى لكن بقى لمايكون فخم وعليوى كده وعنده حشم وخدم وشعب كبييييير لازم تكون عصابته كبيييييرااااه وكرشها وااااااسع والهبره الواحده بمليون فدان والصره الواحده بمليون طن بلاتين.. موش دهب عشان دوكهه راحت عليه ...الولاد طالعين فى الدبل البيضا العريضه دلوقتى ومالخواتم الألماظ

About Me

My photo
أحب الثقافة والفنون والشعر وتبادل الأفكار النافعة والهوايات المتعددة والمصنوعات اليدوية والرسم والمسرح والأغانى القديمة ذات المعانى الراقية والأفلام الكوميدية اتقن الكثير من الأعمال اليدوية (اصنع بنفسك )واهوى أصلاح أى معدة تتلف : حته جديده بقى أنا الماكس فى أحشائه الضحك كامن فهل ساءلوا بلوجاتى عن طرفاتى