أنا لما اتغاظ اقول على طول

بت محقونا من السباعى الطبيب المدلس ..الذى اشترى دنياه بآخرته وزور وكذب فى معظم القضايا التى تمس السلطة واهلها ...استفزنى صلفه وكذبه الواضح وحلفانه بانه على حق ...بانت ملامحه الكاذبة جدا وتعثره فى الرد ورفضه المداخلات لذا فقد كلت له هذه السطور الهجائية آملا ان تؤدى مع جهود المخلصين الى خلعه كما خلع الذين هم أجعص منه

قالوا سباعى والسباع منه براء
سموه ضباعى أو كلب عاوى فى الخلاء
باين عليه الكدب من راسه الى كعب الحذاء
موش ده طبيب الأمن ..والأمن جازل ليه العطاء ؟
موش ده طبيب السُلطه والسَلَطه وترزى رفّا للقضاء ؟
موش ده اللى تقاريره بترمى اللوم على المقتول ...وحالف ع الولاء ؟
يكشف على المقتول يقوللك حى وحياة ربنا
خرم الرصاصه ف مخه ويقوللك ده فاق
أما النزيف الداخلى ده اصله شربات الرقاق
الواد اكل له أكله دسمه وبعدها قام نام ما فاق
والقسم ماجاش ناحيته ...كمان ده ميت فى الزقاق
وكمان زراق الوش م الزهره ومن نضح الوعاء
أما علامة الظهر م الشازلونج ...أصله خوص وضاق
لما القتيل ريح عليه فى الشمس جوه سجنه فى القشلاق
وعلامة الجزمه على وشه ده ايه ؟ ..طبطبه بالإتفاق؟
طب ليه سنانه مكسره ؟ م النقل والبندق وجوز الهند ؟
والا م الملاكمه ؟ ....ماتعرفوش انه بطل شبرا وبولاق
والبنت دى الى بيقولوا ابوها بيغتصب فيها بغباء
البت طلعت صاغ سليم وما فيش آثار للإعتداء
احنا بدقه بنشتغل والقطنه مابتكدبشى واحلف بالطلاق
ان كلامنا فى السليم والتحقيقات آخر تمام مافيش نفاق
بعتولو يكشف ع الشليح قاللو يافرج الله ...معلول مافيش له دواء
النقل حارج شارم يفرمه فرم وادعوله بدعاء
انه يطول بيه المطال من غير سؤال أو حتى داء
فيه سبع يهبر يد من كان الولى لنعمته ...فين الوفاء
ياشعب ناكر للجميل ...دانا الوفى لجيمى وعلاء

استغاثة للعدل

عندما قامت الثورة بدا واضحا ان المحاكمات تجرى على استحياء وعلى جرائم واهية غسيل أموال -تربح -غسيل مواعين - بينما دماء الشهداء التى أراقها القتلة لم تدخل ضمن التهم - والهابرين هبرات ثقال طلقاء يمرحون فى المكاتب فى حبور ويهربون ما استطاعوا من أموال سائلة ويبيعون ما تحت أيديهم من عقارات لذويهم وأقاربهم وخدمهم فى حرية تامه ورئيس بنك التهر يب الذى هو بياع مصر سابقا ينعم بحرية الحركة ويساعد عصابة على بابا فى تهريب ماتيسر من نقد الى بلاد المقر المعروفة والتى لا تسلم مجرمين ابدا ...شلة الأنس ترتب أمورها والمجلس فى صمت والنيابة لم تتحرك ولم يتقدم أحد ببلاغات والشعب يغلى لذا كتبت هذه السطور ليتحرك القضاة ورجال القانون.. بلادنا سرقت وأبناؤنا قتلوا ولم تتحرك الجهات المعنية

يامحــاكم يا محاكــــم
ياللى بالعدل انت قايم
لمـــا تلقى لــص قاتل
خش ع الشخص اللى نايم
قام جايب داغه وسارق
...تلتميت لحلوح وخاتم
قوم تيجى انت تحــاكمه
ع اللحاليـــــح والخواتم
والقتــيل دمه مطرطش
والسلاح فى الدم عايم
يطلع القانونــجى يكتب
العريـــــــظه ..والقوايم
سارق الرزمـــه ام ميه
والـــغوايش والخواتــــم
هدد الأمــــــلاك ولاطش
فوقها مكوه بسلك لازم
لم صُـــــّره فى الملايه
شافه كام بواب وخادم
بصمته ع الأكره تثبت
انه م الهجامه... هاجم
والقتــــيل لم يأتى ذكره
فى الحـــكايه والجرايم
بس سرقه ..بس نصبه
واد لئيم قــــارح وعاطل
يعمل ايه موش لاقى ياكل
ماتسيبوه ياخواننا يمكن
ان عفيــــــتو راح يتوب
اغفـــــروا ده الرب يغفر
الخطــــــــــــــايا والذنوب
رجع اللــــــحاليح ياشلضم
وامشى دوغرى السرقه عيب
الحـــــــــــــــرامى بعينو برق
قال خلاص حـــــامشى معاكم
وشوش الأفوكـــــــــاتو كلمه
ضحكوا ضحكـــــــه كالعوالم
قاللوا فلتحيــــــــــــا النيابه
رد روخــــــــــــر قال كمان
قول ياواد تحيـــــا المحاكم
ولما تلكأ الوريث فى المثول أمام قاضى التحقيق متشبسا بالقصر ممتنعا عن الحضور طواعية وأمهلوه فلم يحضر وأرسلوا له المحضر فلم يستلم الإعلان ...أعلنوا أنه سيحضر الأحد فلم يحضر حتى الثلاثاء أرسلت لصديق متفائل أقول

سلم لى ع الباميــــه
بتقول عداله عاميه
أمـــــّال ده يطلع إيه
ترماى وفيه ابونيه
والا دول ناميـــــــه
ماتعيبشى ف كبيرها
لو حتى جاب بيرها
وبهدل مصـــــايرها
برضو دا ابن البيه
مكتوب له فى الكرنيه
انـــــــــــه معافى وإيه
مايبنشى على قاضى
لو هوه موش فاضى
يبعت عفاف راضى
تدّينـــــــا كام كوبليه
وهو يتــــــــــــــأنتخ
ليه رجلــــــه تتوسخ
ياناس مافيش ابوخ
من كلمـــــــــه همازه
من أيــــــــــن لك هذا
ده كلام ماهوش طازه
والريـــــــحة باينه فيه

maxbeta3zaman: حزب قديم وثورة مضاده

maxbeta3zaman: حزب قديم وثورة مضاده

من تفاعلات الثورة

جاءت أحداث الثورة مفاجئة لى لم أكن اتوقع زخمها وانضمام الشارع لها بهذه القوة ...كنت أظنهم سيضربون وتفرقهم خراطيم المياه والعصى والبلطجية كما حدث فى كل الوقفات الاحتجاجية السابقة ...بل اننى كنت اشفق على صدق نيتهم من غدر قوات البطش المستعدة لهم تماما والتى كانت على علم ببدء الشرارة وموعدها ومكانها واسماء من دعى اليها على الفيس بووك ...كنت قد غيرت فكرتى عن شباب هذا الجيل جيل أولادى من كثرة ما رأيت وسمعت وقرأت فى المدونات قلت لهم فى احد ردودى اننى كنت اظنهم غير ذلك فيما يخص الجدية والاهتمام بالقضايا العامة الهامة واستعدادهم للتضحية رأيت غضبا فى كتاباتهم ورفضا لاتحدار مصر الى هذا المستوى المتدنى دوليا وعربيا ....لذلك فوجئت بحجم المتظاهرين وعزمهم وانتابنى شعور مماثل ليوم العبور المجيد فى 73 حيث كنا فى مثل عمرهم حينئذ وشاركنا مع جيلنا فى محو هذا العار الذى لحق بمصر عام 67 ...وهاهم أولاد جيل الستينات ينتفضوا ويزيحوا الغبار عن وجه مصر الفتى الذى ماكان له ان يمرغ فى الوحل هكذا طوال عقود ثلاتة كتبت مع اول تباشير الثورة واشتعال نارها هذه الأبيات فى الفيس بوك

Adel Mahdy
5:16am Feb 18

نكتب على الحيطه بدون زيطه وبالطباشير

كلام ثوره.. هتاف جامــــد ...نريد تغيير

نغير كل شىء فاسد... وبيعاند ..وعاكس سير

ديول لساها تتدحلب ..وبتقلب فى دى الأضابير

بتمسح فى الظلام آثار ..وبتموه... شوفو التقارير

وبكره نقوم نلاقى الجرم متبخر ..ومتفتفت...وواكله الطير

وكله براءه بالقانون ولا أدله ولا بصمات ...ده كان تعمير

ماشوفتوش الصحارى ازاى بقت خضره ملانه جرجير

مشفتوش الرعاع بالسيف وبالمطوه... غزو كارفور

مين اللى كان حامى الأمه... كده بهمه كبير وصغير

سيبونا نكمل الخطه ..وآدى الثوره... كانت تزمير

بلفناكم.. وكلناكم ..وطاطينا.. عملنا نفسنا أموات

ووقت ماكنتو بتغنو ...وبتصلو..وتتخانقو نفخنا الكير

عملنا ثوره ع الثوره ....وشيلناكم....دا شغل خبير

فيا ثوار... ياشعب ...نام صاحى.. ماتغفلش الا تلقاهم

فوق الاكتاف بيتشالو.... وثورتكم....... فالقها خابور

وكتبت هذه السطور مع ظهور البلطجية ومهاجمتهم للناس للترويع
Adel Mahdy 10:50pm Feb 16

‫البلطجيه اشتكو ...من كتر سكاكينه
والعادلى لما انزوى ...كترت سكاكينه
روح ياجدع للميدان ...واهتف بعلو الصوت
احنــــــــا الشباب البطل اللى طلـــــع عينو
مقدرش يكتم نواحــــــــه وصبره نفد ...فينو
... الواد بتاع الورث ويا البرص لمو ديلهم المتعاص
والطبخه حمضت وماكملش اللى عاوزينه
باظ السياريو ده اللى كان مرسوم
ده جيل مفتح رقم ايده على المفاتيح
مايخدعوش لعبكم ...والمكر عارفينو
وانا اللى كنت فاكركم شباب هايف
طلع عرابى وسعد والكامل وبعديهم
شباب يناير ..يواصلو ويعدلو اللى مال
دوس ياجدع ع الدليت وامسح نظام الغش
وان كا ن معصلج وبيهنج وموش راضى
فرمط وعيد الكود لأن الكل حافظينه

حزب قديم وثورة مضاده

انتبهنا على ثورة تحركت فحركت مصر كلها وأسقطت النظام من قمته ...ولأنها ثورة من غير المحترفين فقد تركت ذيول وأذناب النظام دون معالجة ظنا انها تسقط وحدها مع سقوط الرأس لكن سرعان ما اتضح ان البقايا وذوى المصالح قد عقدوا العزم على القيام بثورة مضاده تفرم الثوار عديمى الخبرة ومفتقدى الدهاء ....كتبت أحذر

الحزب الواطى الوطواطى

فاكرنا هبل وحانطاطى

قاعد بيخطـــــــط ويدبر

زى الصرصار النطاطى

***

قاعد بيسن فى سكاكينه

ويجمــــــــــع كل محبينه

والمنتفعين من دواووينه

وحايهجم بكره على اخواتى

***

بيقوللك فيه ثوره مضاده

بقيادة المأمور والعمـــده

والخطه كمان خطه جامده

مضمونه وسبحان العاطى

***

راح تبدأ بالعفو الكامــل

ع الفاجر وزميله القاتل

والمال المنــــهوب يتاكل

والشرطه مافيش منها مشاكل

مشروعنا جميل واستعباطى

***

والراجل عيان ع الآخر

موش قادر حتى يتاخر

صبيانه دايــره بتتفاخر

والأمه عامت فى عياطى

***

وعيال الفيس طلعو عينهم

دول كفره طلعوا من دينهم

شايفين الأسد اللى ف صدره

وماسونى جايبه وجايبينهم

كنتاكى كان هوه العاطى

***

صبيانهم قاعدين فى حكومه

عاكمه وعاكه فى المظلومه

راح تخفى ادلــــــه معلومه؟

دا الفـــــــيل باين م الزلومه

وانا حاطط ايدى فى باطاطى

***

والاعتصامات دايره وفايره

مزقوقه بدقه وبمـــــــعايره

وقف مراكبـــــــــهم السايره

دخلـــــــــــــــهم دوامه دايره

والســـعهم نـــبله مطــــــاطى

***

ونقب بقى احــــــنا فجأه

والأمـــــــه ماتقولشى لأه

والصيع يقــــفوا بسيوفهم

والشعب راكــــع ومطاطى

وانا السوع ظهره بسياطى ‬

منقول من مدونة اعجبتنى ...خاصة هذه

عندما يكون الشعر طريفا وظريفا

حــــوراءُ.. يــا حبل الغسيل.. و عودها
كالحــبلِ لكــــنْ .. مـا علـــــيه غســيلُ
و تمـــيلُ -مثلك- يا غســيل إذا اهـتدى
لك مـن "مســاحيقِ الغســيلٍ" رســولُ
تـأتى قلــــــــــوبُ العــاشقـــين تعلقــــًا
بغسيلـــها , و تميـــل حيـث يميـــــــلُ
عَلِقَــت قلــوب العــاشقين بحبلــــــها
فـفؤادُهـم وســـخٌ..و ذاك غسيـــلُ
و يجنِّـن العشـــاقَ عطـرُ غـــسيلِها
إن مسَّ ذيــلَ غسيلِــــها "البرســيلُ"
إن أعطـت الأثــوابَ فُمَّــاً عاديـــاً
غبـطَ الفـــراتُ غــسيـلــَها والنيــل ُ
و كلامُـها يُرضِـى المسامـعَ كلَّـــها
عنــد الغســيل فَفَمُّـــها "تسجيــلُ"ِ

. . *
إن قــالَ قبلــى المُنشـدون بشعـرنا
ما ذاك تدليـــــــسٌ ولا تمثــــــــيل ُ
لكنَّـــه نظـمُ القــرونِ بأهلـِـــــــها
مـن جــاءَ بالأولــى تــراه يقــولُ
وأتيـتُ آخـرَ أهــلِها.. ما لــى يـدٌ
فيــما أقــولُ و ماعــلىَّ سَـــبـيلُ

منقول من مدونة مررت عليها فأعجبتنى هذه السطور فيها ...ظلت هذه الأبيات فى ملف عندى وفى يوم كنت انسق ذاكرة الحاسوب عثرت عليها مركونة فنشرتها تهدئة لحوادث الأخبار المنهكة ...الفضل لصاحبها الأصلى

على بابا الملحمه الشعبيه

على بابا بعد الضنا لابس حرير فى حرير

ياساده كان ياما كان :. فى سالف الأزمان

راجل فــــقير غلبان :.اسمه رئيس بــــــابا

اسمه رئيس بابا

قاعد فى عرض كبير :. لابس هدوم كشمير

والياقه حـــــــلوه حرير :. ودماغه فيــــه كابا

ودماغه فيه كابا

نزلو تلات شبان :. نشوا اللى جنبه وبان

إنه ماهوش غلبان :. فلسع ولا إصابه

فلسع ولا إصابه

نزلتلو ع الطبطاب :. جات له لحد الباب

رمى جزمته والكاب :. قاللك أنا بابا

قاللك انا بابا

مااقعُدشى فيها كتير :. حلمى انّى أبقى سفير

دى الناس عددها كتير :. والدوله دى غابه

والدوله دى غابه

أوم لما أترستق :. قاللك نهار ازرق

إزاى أنا أسرق :. دى السلطه جذّابه

دى السلطه جذابه

كل الفلوس دى إيراد؟ :. من غير مكن عداد ؟؟

دا خــــــــير بلدنــــــــا زاد :. لمــــــــا بقيت بـــــابا

لما بقيت بابا

وف ريحُه مرجانه :. ساهيه وتعبانه

مكاره سهتانه :. خليك هنا مــــــــعانا

خليك هنا معانا

قالتلو خد غَرفَه :. طب ليه مااخد قُفّه

ياوليه موش شايفه :.دى اليغمه جلابه

دى اليغمه جلابه

إدُّى ابـنك المتـعوس :. قصـرين وتل فلوس

لو بكره رحت يحوس :. حانكون فيها غلابه

حانكون فيها غلابه

قاللك واروح انا فين :. لو جت سنة الفين

حانعيش كمان عقدين :. ونروح على طابا

ونروح على طابا

بس ساعتها حاكون :. حوشت كام مليون

لاصــــــفار تكون مليون :. قدام واحد يابا

قدام واحد يابا

يادوب نكون عاملين :.حسابين هناك فى العين

هما العرب خاينين ؟؟ :. والا احنا نتــــــــــغابى

والا احنا نتغابى

والواد جمال خليه :. يمسك رئيس دا عنيه

طلعت مذاكره وإيه :. ومــــــواهبه خلابه

ومواهبه خــلاّبه

خليلو دى الشله :. ضـــبط لنا الفله

وقميص مع فانله :. بصمه وسبّابه

بصمه وسبّابه

اسجن له مين حاسس :. شرد له مين نافس

حابس ياناس حابس :. دى الطلعه جذابه

دى الطلعه جذابه

ارقوه ياناس ارقوه :. وعلى الجلوس زفوه

ايّـــــــوْه ياناس ايّوْه :. ايش جبتى ياسحابه

ايش جيبتى يا سحابه

قال الرئيس دا الواد :. فيه ناس قصاده شداد

لو عنتر ابو شــــــــــــداد :. حايقول عاوز بابا

حايقول عاوز بابا

وانا صحتى كحكوح :. قربت احصل نوح

ماقدرش اعيْن انزوح :. مابلاش كده يابا

مابلاش كده يابا

راحوا الولاد نازلين :. قالبينها زفت وطين

أمروه يلت عــــــــجين :. كالقرد فى الغابه

كالقرد فى الغـــــــــابه

ونهاية المشوار :. راح نط دوغرى وغار

راح شرم فيها مطار :. جنبيها بقى طابا

جنبيها بقى طابا

آدى اللى كان وكان :. للراجل الغلبان

والست خشيشبان :. دى الفطنه حسّابه

دى الفطنه حسّابه

توابع الثوره

ثورة على الثورة بقلم: طاهر أبو زيد

كتب طاهر ابو زيد لاعب الكره الشهير والمعلق الرياضى حاليا مقال فى جريدة الشروق بعنوان ثورة على الثورة وكان ردى على المقال هذه السطور

صدقت يا طاهر

لكن اللى لى ظاهر

ان الجماعه دول

على حاجه متعاهدين

وعليها حلفوا يمين

ان البعيد حايروح

من غير مساءله ونوح

وف خانة اللحلوح

حايسف كام مليار

وهمــــــه يتوللوا

كـــل اللى بيطلوا

بالودن والا العين

ويقطعوا الأوراق

يتلكـــــــعوا بإبطاء

وولاء يشــــد علاء

وجمال كمان لو فاق

حايسف مليـــــارين

والشعب حايس لاص

ماباينلهمومشى خلاص

ملــــــعون ابو الإخلاص

لو كان للص متين

وبعد بيان شرم الشيخ الذى أذيع من العربية وكتبت سطوره بلؤم ظاهر وادعاء كاذب بالبراءة والشرف وتوعد لكل من كتب عن الفساد والسرقات والتهليب والتهريب بالملاحقة القضائية كتبت اقول

1:34pm Apr 10 ‫بيان من شارم

فتشونى مامعاييش ولا حتى مليار يتيم

دانا يابنى كل دخلى ييجى تسعميت مليم

باقبضهم واديهلها واقعد ادعى الكريم

عايش فى قصر الرياسه ..والدخل عندى عديم

مكسور على الإيجار والنور وصولاته كوم

والجزار عنده لسته ..بوفتيك بتلو ولحوم

وقف بضاعته وواقف ع الباب ببلطه وشوم

بيقول فين الجدع ده ...حاضرب دماغه بقدوم

علىشان كده موش بتشوفونى لاخصوصى ولا فى العموم

طب دانا لما اختفيت ..كان لاختفائى لزوم

رحت بطياره دوغرى ..على شارم اغطس واعوم

وانتو تسدوا ديونى ..بدل اما ابيع الهدوم

موش انتو شعبى وناسى ...كان بينا عشره فى يوم