انه دكان للخردوات نبيع فيه الخواطر والذكريات.. ونشارك بالقصص ونقرأ من خلاله أفكار اهل الدكاكين المجاوره ونسمع منهم كما نحكى لهم - هو مكان لتواصل جيل أوشك على الرحيل مع جيل هو بطل المستقبل القريب ...

Wednesday, October 29, 2008

زجلو بلوج

هذه بعض من المختارات الزجلو بلوج مما كتبت سابقا منها ماهو فى بوستات قديمه ومنها ماكان تعليقا على بوست فى بلوج قرأته ..فهيا بنا نقرأ.....الأولى لما عاند البلوج معى فى دخولى !حتى للبلوج خاصتى وحتى عند صديقى العزيز شريف كلما حاولت الدخول أشار لى بالمنع وبأنى على خطأ فكتبت
طردنى البلوجاوى من صفحات التعليق خصوصا صفحة صديق العمر: شريف اتغظت فكتبت فيه:-
سألنى على اسمى فقلت لامانع ..
. وكلمةمرورى لامانع لامانع
..ولجل تحاشى كلام الشوارع ..
.سكت وكتمت فى قلبى المواجع ..
. لكن الحمار اللى إسمه البلوج ..
.وطبعا حصاوى وكاتون ودوج.
..رفض لى الدخول والولوج والكلام ..
.كأنى عزول مش صديق للأنـــــــام
...فنرفزلى حالى ونفر عروقى ..
وخلى اللى تحتى بقى دوغرى فوقى
...فرحت مصور صحيفة الكلام
.عشان تبقى شاهد ياعبد السلام.
... وعلقتهالو فى آخررسالة
.. عشان مايسوقشى على الهبالة
ويشهد عليه الأفاضل صحابنا
.. ....يشوف الجميع المصاب اللى صابنا
...فمين اللى فينا مريض بالزهايمر
أناواللا هو اللى مخــــه مدمـــــــــر
.... ..دانا يعنى لسه حافظ له الوداد
وقلت بلاش الأباحـــــــــــــــه ياواد

. يقوم هوه يرفض ويرفص كمان...
ويكرشنى بره كــــواد العبـــــــان.
..وانا واد مسالم معنديش مطاوى ..
.وبامشى أزك واعد الخطـــــاوى
ولسه يادوب فى البلوج باسمى
...... واقول للصغير ياباباوياعمى
....صحابى بتسأل وفين تعليقاتك ؟
.أقول البقية ف حياتى وحياتك.
مانعنى البتاع إنى أدخل عليكم..
.واقول كلمتين هم سلام عليكم .
ختام الكلام دوغرى حابعت عريظه
. .... لبطرس وكوفى عنان اللى راح
...واقول له تعالى وشوف الحريقه
...دىوالعه ف قلوبنا دى هى الحقيقه
أما التاليه فكانت تعليقا على فيلم تسجيلى عن جزيره سياحيه جميله اسمها بورا بورا وعن جمالها كتبت :
لما شوفت بورا بورا
قلت يمكن عينى عوره
اصلى عمرى يوم ما شوفت
زى دى تبقى جزيره؟؟
نخله خضره.. مايه صافيه
رمله بيضا..ناسها قله.. موش كتيره
شلالاتها نازله فوره
والحريم م الفرحة يرقص
زى عاكف ..أو شكيره
بس لابسين فوق دماغهم
طوق ورود فوق كل قوره
والكاسات فيها مايه زرقا
هى مايه؟؟ والا بيره؟؟
احنا نعرف مايه بيضاأو لمونى
بس زرقه؟ ..لأ كتيره!!
والنابوليا حلوه جدا
والسرير ....زى الفطيره
لأ كمان فيها جاكوزى
ميته زرقه ...وخطيره
والسما ألوانها فاتحه
والغيوم ماهيش كتيره
بين شجر نايم مأنتخ
عنجريب نزل ضفيره
والهنا باين عليهم
ماحلا بورا من جزيره
فوق بساط الريح نشوفها
حتى نركب فوقه طـوره.....(الطوره =4)
بورا بورا بورا بورا
ياللا نحلم بورابورا
أما الثالثة والأخيره فكانت ردا على صديق الطفولة والصبا د.عبد الحليم الأستاذ الجامعى المهاجر لكندا والذىأرسل ليضمنى لمجموعة بريديه خاصة ويطلب منى قبول الدعوه كتبت له:
ياألف مرحب بعبــــــحليم
لو اعرف افرش ميت كليم
يكون جديد موش م القديم
ولونهم احمر موش قتيـــم
هو الحنش عاوز تقـــــديم؟
بس احنا برضه نقف زنهار
ونزغرطولـــو ..ليل ونـــهار
اصل احنا أهله ...موش زوار
وهو أيضا خـــل........ قديـــم
ماننسى أبدا لمـــــتنا
فى بيتكو أو ف جنينتنا
وفى الكور ياما شوطنا
وكلنا رز ولحمة وتيــــــــن
ونكتفى بهذا القدر حتى لا يزهق منا القارئ

37 comments:

"عبير النجار "نيجار said...

عمو ماكس
والله انت حرام الموهبه الجميله دي تتدفن كده بجد أنا أكتر واحده عارفه روعة كلماتك بجد بسم الله ما شاء الله
وبالذات طبعاً اللي حضرتك كتبتها في بورابورا علشان كتبتها عندي طبعاً
والباقيين روعه وإوعي تزعل يا عمو من البلوج اللي قفل غلطان والله ويستاهل الضرب كمان
تحياتي ليك عمو ماكس

maxbeta3zaman said...

نيجار
أوتعرفين تأثير بورا بورا لما رأيناها فى الفيلم إضافة لما حكاه بعض أقاربنا الذين زاروا مثل هذه الجزر فى شرق آسيا -ماليزيا وتايلندوإندونسيا- نخطط الآن ونبحث عن أفضل الأماكن وأفضل الأسعار لنعمل رحلة لهناك فى الربيع القادم زوجتى وأنا فى ذكرى عيد زواجنا الثلاثين آملين أن نجد ما فى الصور حقيقة واقعيه..أما البلوج فقد تصالحنا فيما بعد وشيلنا كمان تأكيد الكلمه التى كانت زى الشوكه فى الحلق وكانت كنبش الفراخ البلدى.. وحتى أنا كتبت عدة سطور زجليه من فرحتى بذلك التصالح مع ابو البلاليج ...ونحن الآن سمنه على ..قصدى زيت زتون على عسل عشان الكلسترول

Anonymous said...

مرحبابكل زجل
قديم كان او على عجل
اكتب حكم اكتب دجل
بلا خوف بلا وجل

كلام عالقلب عسل

☼♫♪ عمــاد الدين يــوسف ☼♫♪ said...

عمو ماكس الحبيب اولا مبروك اللوك الجديد ولونو القديم كان احلى ، وحمدلله على سلامة تدوين حضرتك ودائما تمتعنا بروحك الخفيفه كظلك الذي يليق بشاب في العشرين من العمر وبرصانة كتاباتك التي تناسب كبار العلماء والاكاديميين
لك حبي وتقديري وتحياتي

maxbeta3zaman said...

شريف (عبدين)
ده انت اللى عسل ياسيدى ويارفيق عين الحسود الجريده الصفحة والتى كانت رسومك فيها هى العسل ذاته ...آه قفزت لذهنى على الفور عدد5 بيت من هذه المجلة فخذ عندك :
أنا المحلوق لى شعرى
أنا المحبوس فى الجب
أنا المزغود فى جنبى
أنا المكلوم فى قلبى
وده كله من الشامى
وأنت تعرف طبعا من هو الشامى
وعلى ماأذكر كان يجاورها صورة لفتى رأسه كهامان وقلبه تعبان ..وجنبه أذغودان

Anonymous said...

ألف حمدالله على السلامة يا عمووو
نورت مصر والله
إن شاء الله انبسطت ؟؟
و ألف مبروك كمان الشكل الجديد للمدونة

اللون الأبيض لون راقي ومريح جدا
لمدونة هايلة زي مدونة حضرتك

فكرة حضرتك جميلة جدا..أنا من مده كنت بفكر أكسر حاجز الكسل
وأنشر بعضا من قديمي المتجدد

بس لسه شوية على الخطوة دي
تحياتي القلبية وألف حمدالله على السلامة كمان مرة

maxbeta3zaman said...

عماد
والله ما لكلكناها إلا لتكبير الفونط فضربت معنا على ابيض بدل البيج ذلك أن أحد زائرينا الكرام قد اشتكى من صغر الفونط فعملناها بولد وكبير منعا للإرهاق البصرى فلئن كان البنى اليق مع المواضيع التى تعود فى مجملها لزمن غابر فلا ضير ..وقد تعلمنا الطريقة وشكرا على الزيارة وتهانينا لك أيضا على تجديد الصورة

أمل حمدي said...

استاذي /ماكس

قمت بزيارة زمنك الجميل

اتمنى ان نقرأ كل بوستات حضرتك

دمت بكل الخير والصحة

اللهم امين

maxbeta3zaman said...

البنورة
الله يسلمك ويسدد فى الخير دائما خطاك ...الرحلة كانت ممتازه ورافقنى فيها زميل من هنا ..بورسودان لا تعرف البرد فجوها صيفى حار جدا معظم العام وأقل حرارة فى شهور الشتاء ..وتغيرت المدينة كثيرا عن آخر مرة زرتها فقد تطورت شوارعها وكورنيش البحر والمحلات للأفضل ..والكهرباء مازالت تنقطع عدة مرات مساء ...أما أهل السودان ففيهم مودة وحب فائقين لكل ما هو مصرى ...يلمسه المرء فى التعامل اليومى.. التدين ووداعة الأخلاق سمة سائدة فى السودانيين ..جلست نصف ساعة مع ترزى جلاليب على الطراز السودانى ليفصل لى واحدة فلما عرف اننى مصرى جلس يحدثنى بحب شديد عن ذكرياته فى مصر التى زارها مرتين ,,,وساعدنى فى انتقاء شال ابيض مما يضعه الزول على كتفه عادة وأخذ يفاصل مع التاجر كما لو كان هو المشترى ...وسألنى هل ستلبس هذا الزى؟؟ فأجبت عمليا بأن ارتديته عنده وعدت به مشيا الى الفندق

maxbeta3zaman said...

أهلا بأمولة التى بعتلها جواب ...فسألت فينا على عكس أغنية شفيق جلال التى لم ترد عليه أمونته فتساءل عن الأسباب وزعل وقال لها على كيفك واه ...مرحبا بك زائرة تشرفنا بالزيارة الأولى ...فتفضلى بالمرور على ماسبق ...وسنكون عندكم دائمافى أغلى حته فى الوطن ...والتى وقفت تتحدى الزمن "بورسعيد"

Empress appy said...

طيب والله جميله جدا بجد
وضحكتنى كمان وانا نادر لما بقيت اقفش نفسى بضحك

maxbeta3zaman said...

Appy >> جاوز الظالمون المدى
فحق الجهاد وحق الفدى ...هذه مقدمة لإبداء الجديه ...زعلت جدا لأنك ضحكتى على الكلام ..ده أنا باكتبه عشان الناس تبكى زى الأفلام الهندى سانجام وسوراج ..ده احنا بلد الزعيم فيها "عادل إمام ..ولا يقبض على المرء فيها إن هو ضبط متلبسافى حالة ضحك بين أو قهقهة مسموعة ..وان شاء الله براءة فى قضية ضبطك لنفسك تضحكين بينما بلدنا سرادق عزاء لا تنفك خشباته أبدا.. عموما أنا اعرف محامى طلع صاحب العباره براءة وشوفى كان قاتل كام ؟؟ فموضوع ضحكك ده براءة حتى لو كان القفش ذاتيا ...لأنه ببساطه معهوش إذن نيابه ...أتابع كتاباتك وتعليقاتك فى البلاليج المجاورة والصديقه وأعرف مدى اهتمامك بهموم البلد والناس ...شرفتنى زيارتك للمكان ويا أهلا بمن تسلحت بسلاح ذى ورده درءا لكل من زاد عن حده !!

مواطن مصرى نايم said...

ايه يا عمو ماكس
ليه مسحت التعليق الجميل بتاعك بعد ما نزلتة
دى الابيات بجد
و الله عجبتنى جداااا
و دى كمان جميلة

تحياتى
تقبل مرورى

maxbeta3zaman said...

المواطن المصرى النابه
والله ما مسحتها إلا منعا للقلق عندك وقد أعدت إرسالها لك "خصوصى على الميل بتاعك علها تكون وصلت ...انما انا الذى أعجبنى البلوج خاصتك جدا انك مواطن نابه ولست نائما أو أنك نايم كده وكده يعنى (عارف نكته الديك اللى ...آخرها) سيبها تنزل؟
تحياتى واسجل إعجابى بما هو عندك ووعد بزيارات متعدده

مواطن مصرى نايم said...

لا يا عمو ماكس
انا مفيش قلق خالص عندى
عندى اكتب اللى انت عاوزة
دا انا بكتب حاجات اتقل من كده
ربنا هو اللى بيستر

بس انا مش عارف نكتة الديك
عاوز اعرفها
هههههههههههه

و شكرا على تعليق حضرتك

تحياتى

اسلام

maxbeta3zaman said...

المواطن المصرى النايم القرفصاء
خلاص ياعم مادمت هكذا فسنرسل لك عالهوا مباشرة مايذهب معه الكتاب عادة للمحاكم ...وانا بعتها لك على الميل المكتوب عندك لعلها وصلت مع نكتة الديك اياه ونراك دائما ونزورك دائما برضه ...واذهب لقصيدة "مشمش" فى بوستات أغسطس تقريبا فهى من نفس الطراز المعمارى "للكرسى -الورث"

Beram ElMasry said...

اخى . maxbeta3zaman
السم عليكم ورحمة الله
كيف حالك يازول كيف حالك يا ذوق لن تعرف مدى سعادتى بتشريفك وتركت الكتابة فى قصيدة الغد لاشكرك
فمين اللى فينا مريض بالزهايمر
أناواللا هو اللى مخــــه مدمـــــــــر
وقرات مجموعة الازجال وباين انى حلم ورقى وارحل واشوف لى عيش فى حتة ثانية
تحياتى لصديق احبه واحترمه

maxbeta3zaman said...

صديقى بيرم المصرى
كلامه قديم على عصرى
وقوله جد فى المليان
وحبه فى القلوب يسرى
ولونه وطنى على تلسيع
وكرباجه سودانى فظيع
لاغاوى منظره وتلميع
ومايقولكشى فين أجــرى
وماسك كل من فيها
بيهبر من أراضيها
ويهدم فى معانيها
وبيقول... والجبان يــجرى

شمس النهار said...

ياخساره انك ماعرفتش تدخل علي المدونه القديمه بتاعتك
بس الحمد لله اننا ماتحرمناش نقرا الكلام الجميل ده
اخبار الحنش ايه
الدنيا تمام دلوقتي

Beram ElMasry said...

اخي العزيز . maxbeta3zaman
سلام يازول سلام يا ابو الذوق
شكرا لتعليقك اللى يودى بعيد وعلى فكرة انا ذكرت لشمس النهار انك السبب فى نشر الحدوتة لانى كنت بارد عليك ومكملتش القصيدة اللى كنت هنشرها للمناسبة
شكرا للاطراء الجميل ولك تحياتى

Mostafa Safwat said...

انا سعيد جدا انك رجعت بالسلامة رغم اني كنت فاكر انك في العجمي بتموت التعبان
مكنتش اعرف انك في السودان
يلا يا باشا اكتبلنا كمان و كمان
من كل حاجة كتبتها زمان.
حلوة المزيكا دي اهه من بعض ما عندكم واضح ان الموضوع عدوى هههههههههههه
وعلى فكرة نكتة الديك جامدة موت ؛

maxbeta3zaman said...

شمس النهار
الحمد لله عرفنا كل ألاعيب البلوج وحارسه وشيلنا الكرسى أبو عجل والشخابيط اللى كانت مدوخانا وندخل البلاليج ونخرج فى سلام ...بدأنا حرب الحنش بمجرد العوده وكان الشيح ذو الرائحة النفاذه سلاحنا للردع والتطفيش وتواجدت هناك بالأمس فلم نرى له أثرا ..وعاد العرايس للبيت لكن لابد من ازالة النباتات المتسلقه التى تحوى هذه المخلوقات وسنفعل ذلك أيضابإذن الله تحياتى لك

maxbeta3zaman said...

أبو البيارم
بس طلعت قصة جميله ..وعجبتنى جدا ..وآهى القصيده باقيه للإسبوع الجاى ..والا انت الشعر مابيجيش الا فى التلات ..الحدوته فيها من الصور ما يقارب القصائد معنى ومن الخيال ذى المعنى الكثير وهذا هو سر الجمال فى رأيي المتواضع
تحياتى واعتزازى

maxbeta3zaman said...

بندق
الله يسلمك ياسيدى وذهبنا للنزال متسلحين بنعل من جلد الثعابين أهداه لى الأخوة السودانيين - معرفشى مين اللى قال لهم على مواضيعى مع الحنشه؟- فهم اعطونى النعل لأدخل بيه على الحنش فيقول انى واد مقطع السمكة وجلدها ولابسه كمان فى رجلى فيهرب منى هروب الفريسة من الصياد ...وتخيل انى سألت واحد متخصص فى الجلود دى هناك على طريقة صيد هذه التعابين عندهم فقال ان الطريقة ان الصياد ينام ويمد رجله تجاه المنطقة اللى فيها التعبان ويعمل انه نايم وينتظر لحد ما التعبان يبلع رجله بالكامل ويريح.. يقوم هو فجأه مطلع سكين حامى جدا وشاقق بيه الحنش من جنب بقه لتحت فيموت وياخده ...هل رأيت أكثر من ذلك جرأه؟؟؟
عشان كده بيعملوا جلده جزم ...لكن انت عرفت منين نكتة الديك ؟ انت عارفها قبل كده والا انت برضه النايم المصرى وبكتب بلوج بروحين ؟ يابندووووك

Mostafa Safwat said...

الحمد لله على السلامة من مغامرة الثعبان
اما بالنسبة لنكتة الديك
فهي نكته قديمة جدا
و في الجعبة الكثير و الكثير من النكات حيث انها هواية تصل في بعض الاحيان للتأليف ؛ بس متقلش لحد

كـــيــــــــارا said...

ايه الكلام الحلو ده


لا بجد فل فل فل

الله عليك


وانا كمان مره البلوج قفل

عاااااااااااااااااااااااااااا

maxbeta3zaman said...

يا كيارا ويادليلا للحيارى
انت أيضا البلوج قفل عاااالى صباعك ..أنا الحمد لله باكتب بصباع واحد فقط ..فلما جه يقفل على صباعى نتشته بسرعة فملحقشى يعمللى كللو بس قفل الباب فى وشى وقال لى : أوعى تيجى هنا تانى ياجدع انت... وراح رازع الباب فى وشى ...أنا بقى رحت رازعه القصيده دى ولافف م الباب الورانى وعامل بلوج جديد خالص هوه ده..أما كونه فل
تقول فيروز:-
شوى وبيفلو
وعنا الحلا كلو
وعنا القمر بالدار
ورد وحكى وأشعار
بس اسهار اسهار !!

maxbeta3zaman said...

البندووووق ذو الصندووووق المليان بالحاجات
سرك فى بير يابو البنادق ...بس تبعتلى "خصوصى" فايل مليان على البريد الجى ميل ذو السعة والبراح فى الخباسه كده من غير تسييح

mahasen saber said...

ياه اخيرا اخيرا حضرتك رجعت عودا حميدا وبلوجا سعيدا ببوستات حضرتك الرائعه باستثناء بوست التعابين عشان ده بالنسبه ليا بوست مقلق ومرعب وعملى خربشه فى عقلى

انا طبعا بهزر وبستخف دمى اى حاجه من حضرتك حلوه بس يكفى ان حضرتك تعرف ان كل ما ادخل المدونه ااقفل عينى لما ااقرب على البوست ده عشان الصور

بس المدونه والبلوج نور
وعجبتنى الخواطر البلوجيه قوى قوى واليى فى بلوج استاذ شريف ونيجار عشان دول حبايبى
حضرتك نورت البلوج والدنيا
واهلا اهلا وسهلا بحضرتك

م/ الحسيني لزومي said...

شارك في الحملة الشعبية للقيد بالجداول الانتخابية وادعو غيرك
ضع بنر الحملة علي مدونتك
البنر موجود علي مدونتي

maxbeta3zaman said...

صاحبة أكثر المدونات شعبية
خلاص رشينا الشيح فى المكان واعتقد يعنى اننا نردم على جميع الحنشان ...ونرحب بالعائدين من البيات الخريفى الذى طال الجميع ..وانت اللى نورت البلوجات نورا بعدد زائريك المصطفين يزاحمون مزاحمة طابور العيش ...فاللهم زدها نعمة ومودة بين الناس

محمد أبو الفتوح said...

يالا سعادتى و يالهنا
ف نفس يومى شفت انا
لأول مره ف حيِّنا
العم ماكس و الجد بيرم
ماكنتش اعرف ان لسه فيه زجل
حاجه تعرِّى الحقايق و تبدد الخجل
و تجرَّأ القلوب لو راعشها الوجل
و ده كل من لسان
العم ماكس و الجد بيرم
يا عم يا عمنا
يا جد يا جدنا
احنا ولادكم هنا
ماسكين فى أرضنا
و زجلكوا يمسنا
قعدتكوا تلمنا
نطلع نغنى باسم
العم ماكس و الجد بيرم

maxbeta3zaman said...

ولدنا محمد كثير الفتوح
دا أحمس أمامها يصوت ..ينوح
مقامه بيوصل لفوق فى العلالي
ويعلا ويكبر لحد السطوح
تعالى وزورنا ودايما منور
كلامنا اللى فيه لما يبطح يعور
بشاشك وقطنك زائد كيس بلاستر
تداوى وتلحم جميع الجروح

Anonymous said...

عمو ؟؟
فينك مختفي
ولا حس ولا خبر ؟؟

ولا جديد على المدونة
طمنا عليك
: ))

Beram ElMasry said...

اخى الكريم زول الاسكنرية
السلام عليكم ورحمة الله
اين انت ايها الاخ الكريم نحن نانس بوجودك فلا تحرمنا تواجدك الكريم
خالص تحياتى

maxbeta3zaman said...

البنورة ذات البريق الملالى
موجودون بس مشغولون ...كان إسبوعا غاية فى الانضغاط والأحداث الغريبة لكن فى آخره جاء الفرج وأصبح الوقت متاحا لمتابعة الدنيا وأخبار البلاليج ومتردد اكتب عن الحكايه والا ... لأ..نكتب برضه أحسن

maxbeta3zaman said...

أخونا البيرم... مرفوع الهامة.. والبيرق
آيبون ..عابدون ..تائبون ...لربنا حامدون
الانشغال هو السبب فلم أكن أعود إلا بعد الحادية عشرة يوميا وكان النوم غاية أملى بعد ساعات طويلة من العمل وشكرا على السؤال

About Me

My photo
أحب الثقافة والفنون والشعر وتبادل الأفكار النافعة والهوايات المتعددة والمصنوعات اليدوية والرسم والمسرح والأغانى القديمة ذات المعانى الراقية والأفلام الكوميدية اتقن الكثير من الأعمال اليدوية (اصنع بنفسك )واهوى أصلاح أى معدة تتلف : حته جديده بقى أنا الماكس فى أحشائه الضحك كامن فهل ساءلوا بلوجاتى عن طرفاتى