انه دكان للخردوات نبيع فيه الخواطر والذكريات.. ونشارك بالقصص ونقرأ من خلاله أفكار اهل الدكاكين المجاوره ونسمع منهم كما نحكى لهم - هو مكان لتواصل جيل أوشك على الرحيل مع جيل هو بطل المستقبل القريب ...

Friday, October 10, 2008

فى بيــــــــــــتنا... حـــــــــنش


ppppp

عاد الحنش للذاكرة ...فقد نادى الجيران على زوجة ابنى وقالو لها ....ماتنزليش الجنينه إلا بعصايه فى إيدك ...ولا تقطفيش نعناع م الجنينه لحسن فيه "حنش " ولما كانت زوجة ابنى قاهرية فلم تفهم المقصود وقالت لهم : يعنى إيه حنش؟؟ ..راحو قايلين لها "ثُوعبانون" كده بالمفتشر...طبعا هى كانت تشتكى لى مر الشكوى لمجرد ظهور 3-4 برص غلبان عند باب البيت وكانت تخاف منهم موت ..وعملت لهم خطة مكافحة (شبشبيه -شيحيه)..لكن الحنش وظهوره للجيران ..أدى لنزوح العروسين من العجمى ..والإقامه معنا .. وأصبحنا بهم سعداء ... ذهبت لهناك لأستطلع الأمر سيما وأننى أقمت هناك شهرا أنظف الحديقه وأقص الزرع ..وأشرب الشاى بالنعناع..وأنا غاوى زرع وعندى نباتات كثيره ..غولت لما تركتها مده ..لكنى كلما سنحت الفرصة أروح واشتغل فيها شويه كمان أنا عامل نظام رى أوتوماتيكى بتايمر يروى الحديقة طول العام ببرنامج آلى يتكرر كل 24 ساعة وأعدله صيفا وشتاء حسب المطر والبروده ...المهم الجيران شافونى فى الجنينه كرروا على التحذير ,, وأشارت أم احمد جارتنا الغربيه بأن الحنش صعد وتربع على بلكونة الجيران وعمل دائرة خلزونيه قطرها "كده يا أستاذ ماكس" وأشارت بما يقارب صينية البطاطس بالفرن كده ...طبعا أنا أصبحت أكثر حرصا فى مشييى وتجولى خصوصا منطقة الورشه المليئة بالكراكيب والعدد ...ولكن هذا ليس أول عهدى بالثعابين ..فقد قتلت منهم خمسا .. أثنين فى مصر وثلاثة فى السعوديه

أول حنش صادفته كان فى نفس حديقة العجمى وكان بيدى فأس زراعة ثقيل ..وتسلق الحنش سور البيت ببطء فهويت على دماغه عدل بضربة واحدة ..فمات فورا كان ذلك فى أواخر الثمانينات ...الحنش الثانى كان فى منطقة الباحة بالسعوديه وهى جبال وعره تعيش فيها الثعابين والقرود والذئاب عيشة طبيعيه ..ونحن بنى البشر من طرأنا عليهم وشاركناهم المكان ...كان يوم عرفه ..وكنت صائما ..وكان الجو حارا يومها ..أنهيت عملى فى الرابعة عصرا وتوجهت لمكان الإقامة (وهو سكن صغير على قمة جبل 2000 متر فوق سطح البحر ) ..من شدة الظمأ دخلت فاستلقيت على سريرى مع استبقاء قدماى على الأرض ...وبينما أنا كذلك فى حالة استرخاء ...إذا بكوبرا زرقاء اللون طولها يقارب المترين تزخف بهمة من الصالة تجاهى عدل آى والله تجاهى مباشرة ...وليس بيدى أى شيء وهى بينى وبين المطبخ مستودع الآلات الحاده الوحيد ...فما كان منى الا أن قفزت لأقف فوق السرير لأستكشف الزائر القادم من غير عزومه ..واترك فسحة للتفكير من هول المفاجأة ...وببركة الصوم وحده أخافت هذه الحركة الكوبرا ..التى قالت لنفسها " ده طلع كبير قوى وواصل للسقف " وانا فى ذعر لايعلمه إلا الله ..خافت الأفعى وعرجت يمين لتدخل خلف الثلاجه الموجودة فى الصاله "كانت ويستنجهوس" ..طبعا ده إدانى فرصة للتحرك للشباك والنداء على العمال الهنود المخلصين " ياسانكوى ..يايوسف خان .. ياراماشاندران."..الحقو تعبان دخل عندى..وقى لحظات وجدت 12 هندى بالهراوات يجرون تجاهى ويقولون بالانجليزى المكسر " مانيدجار...اسنيك " ودخلو فى الصالة.. فين ...هنا ورا التلاجه وبسرعه عملو نصف دائرة حول الثلاجه ..وأخذو يتمتمون بكلام هندى لا أفهمه ويصرخون ويهزون التلاجه ..فظهرت الحيه فانقضوا عليها بالعصى حتى هدأت حركتها وجاءوا بها لى وهى تتلوى ..كان رفاقى الهنود هم أبطال تلك الواقعه ..وكان دورى الوحيد هو تقمص شخصية المارد الخارج من القمقم بثا للرعب فى عقل الأفعى ...وقد كنت أنا المرعوب الحقيقي ..الحنش التالى هو حرامى الأرانب ...كان أحد السعوديين قد أهدانى زوج من الأرانب لأربيهم فى حديقة سكنى الجبلى ..وعملت لهم عشة من السلك وتكاثروا ووصلوا ل19 أرنب وكنت سعيد بهم جدا أطل عليهم يوميا وأطعمهم ناتج قص نجيلة ملعب كرة القدم فى الاستاد هناك ..فى اليوم الموعود لاحظت اختفاء كل الأرانب فى الحفر ..ووجدت شيئا مكوما فى ركن العشه ولا يتحرك ...كان كوبرا أخرى ضخمه ...كنت بالخارج فناديت على مزارعى الملعب وكان منهم مصريين ..جاءوه من أعلى وضربوه على رأسه فلم يقوم كان قد التهم لتوه أرنبا بالكامل ...ولما فردوه وجدنا انتفاخا فى بطنه.. شقها العمال ..فاستخرجوا أرنبا كبيرا ممددا ..كما لو كان بصدد ضرب غطس فى حمام سباحة ..حتى أننا صورنا هذا الحنش وأرسلنا الصورة لإدارة الشركة كى يغيروا لنا مكان السكن الجبلى الموحش هذا ...ولم يحدث ...الحنش التالى جاء من النافذه ربما للبحث عن فقيديه السابقين ..ولما رأيته قادما وناديت على ٌحماتى الهنود توارى بين الصخور ووجدوه وقتلوه هو الآخر ..كان من الكوبرا أيضا ...أما الخامس والأخير فكان وطنيا سكندريا أيضا وكنت أنا قاتله ..فقد كنت وشقيقى الأصغر نقص نبات ست الحسن الذى ملأ الحديقة وتسلق كل شىء ..وبينما نحن كذلك لفت نظرى شىء ساكن تحت أوراق الموز الجافة يشبه الخرطوم ولكنه منقط ومزركش زركشة لا تخطؤها عين واحد سوابق أحناش مثلى أنا ..هوه ميت ولا حى؟؟ تساءلنا ؟؟ قلت له ناولنى السيف (سيف نقلم به الأشجار)..ناولنى فناولته ضربة غاص معها السيف فى طين الحديقة شبرا ...وتحرك الحنش متلويا وقد قسمته نصفين ..واحترت كيف آحذه للخارج ونصفه العلوى مازال حيا ..كان الحل فى مقص الشجر الذى قبضت به على دماغه ففيص ..وهكذا كنت أنا الشجيع مرتين... والمبلغ والمستنجد 3 مرات والملاحظ ..ان الظاهرالواحد مننا بيبقى شجاع فى بلده بس أما فى الخارج فتقل الشجاعة عنده ويستنجد... فتحية منى لمنقذى الهنود الذين كنت أحبهم جدا وهم كذلك ,أناليوم لتوى قد اشتريت الشيح وأعد العده لهجوم جديد عل حنش جديد ..ففى بيتنا حنش

53 comments:

Beram ElMasry said...

اسعد الله صباحك بكل الخير ثعبان المزارع تعبان غلبان وعلى قد حاله وحضرتك قتلت واحد قبل كدة مش خمسة واذا كان لبيرا فاطلب مدد فما اكثر الهنود عندنا
غيرت اسم المدونة ارجو الاحاطة
السلام عليكم ورحمة الله
بناء على رغبة الكثير من الاصدقاء المدونين ، وفى مقدمتهم الاخ الدكتور توكل مسعود ، فى تغير اصم مدونتى من ( المدهول ) الى اسم اخر يليق بمحتوى المدونة ، وانطلاقا من طبيعتة الغيورة على اصدقائه ، ومن الاسماء المعروضة ( كرباج سودانى ) وقد وقع عليه اختياؤى ، وصار هذا اسم المدونة الجديد
لااختلاف فىالمحتوى ولا تغير فى موعد كل جديد وهو يوم الثلاثاء
لكم كل الحب والاحترام

☼♫♪ عمــاد الدين يــوسف ☼♫♪ said...

ههههههههههههههههههههههه
عمو ماكس الحبيب

من الواضح ان حضرتك مجاهد ثعابيني قديم ولك باع طويل في فن قتال الثعابين وان كنت من الواضح اكتسبته بالاستغاثه والفرجه على معارك التصفيه الثعبانيه
ومالو اهم حاجه ان حضرتك ارتقيت لمنزلة المنفذ في يوم ما ولله الحمد حيث ان اول تجاربك الميدانيه كانت مع ثعبان محلي
لا اشك انه تعبان مولا وصحتو على قدو ولم تحدث هذه المواجهه مع نظيره السعودي حيث المكبوس والبريان والهريس وما لذ وطاب من ارانب الجبال البريه وهنا الفرق شاسع
ههههههههههههههه
لو محتاج اي مساعده انا في خدمة حضرتك ويشرفني
تحياتي

maxbeta3zaman said...

جيفارا
بما إنك عايش فى الغابات مع الثوار اللاتين اللى التعابين حواليهم بتشغى وبيلعبوا بيها زى الماديليا كده وبيلفوها حوالين صوابعهم ..عاوزك تشوفلى واحد رفاعى من اللى بيقول للتعبان " (تعالى هنا يا ولا ..بدل ماكسر دماغك) !! ...يروح التعبان جاى زى الكلب وراسه فى الأرض ويسلم نفسه للباشا الرفاعى ... والله صاحب مصنع فى العامريه قال لى كده بالضبط يعنى حصل المشوار ده قدامه؟!!وبعدين انا طول ما فيدى سلاح بابقى ولا جاكى شان !! انما فاضى والحنش جاى ناوى النزال ..لابد من الاستعانه بصديق ..حتى لو هندى

maxbeta3zaman said...

أخويا بيرم دا موش تعبان مزارع ده بتاع حجر وساكن جحور الحجر الجيرى واحنا اللى زرعنا حواليه فهو فاتح اللون لكن سمه ربنا مايوريك ..أنا قتلت اتنين موش واحد واحد بسيف الحق ...والتانى بفأس الحق ...قصدى الحقل
عموما أنا مدى نمر بلوجاتكو كلها للأستاذ جورج قرداحى الرفاعى أول ماتزنق حاقول استعن ببلوج يتصل ترمو عليه بوستات على دعوات على ابتهالات يقوم مهدود على طول

Bondok said...

ث .....ع.....ب....ا...ن
حنشن
ربنا يسترها معاك انشاء الله و تعتر فيه ابل ما يعتر هو فيك
ابقى طمنى عليك و قلنا عملت معاه ايه

نيجار said...

عمو ماكس
بجد والله شرفتني ونورتني بزيارتك لمدونتي المتواضعه وبجد كلماتك الجميله خرجتني من حاله الحزن اللي كنت متقوقعه فيها اليومين دول ربنا يسعدك ويفرح قلبك زي ما فرحتني ،
على فكره أنا بأترعب من التعابين رغم انهم اقل خطوره من تعابين البشر بس والله كويس انك ما بتخافش منهم وبتعرف تموتهم
تحياتي لحضرتك

شمس النهار said...

ربنا يقويك عليه
انامش بس بخاف منهم انا مجرد سيرتهم بتخوفني
مع اني مابخفش لامن فيران والا ابراص والاسحالي
بس انا كان لي معاهم احلام كتير جدا مع اني ماشفتش تعبان في حياتي غير مرتين مره كان بيني وبينه دورين وكان في بلد ارياف
ومره في بلكونة الجيران
ربنا يعافينا من شرهم

mahasen saber said...

اه يا ربى ليه كده ليه البوست ده يا استاذى الفاضل...
استاذ ماكس انا بترعب بترعب من السيره دى اللهم احفظنا بس قريت البوست للاخر عشان خاطر حضرتك بس هيا المذكوره الكوبرا دى منها الوان يعنى ازرق واخضر وبمبى مسخسخ ...اللهم احفظنا اعوذبالله انا بخاف اصلا من البورص ومشتقاته مابال حضرتك بال اعوذ بالله اللهم احفظنا بس بقول لحضرتك وارجوك قلى فعلا وهستنى رد التعليق هو فعلا الشيح بيبعدهم وبيخوفهم وبينفروا منه...

mahasen saber said...

اه وطبعا لازم اشكر حضرتك جدا جدا جدا وقوى كمان موت على زيارات حضرتك لمدونتى واهتمام حضرتك بيها وعلى تعليقات حضرتك لمفيده والجميله والى بتنور بصيرتى ...
جزاك الله كل خير وربنايديم المعرفه والحب فيه ولوجهه الكريم
الف الف شكر لحضرتك على ذوقك واخلاق حضرتك الكريمه معايا...

Bannoura said...

OMG

صعب أوصف لحضرتك إحساسي دلوقت

خليتني أدور تحت الكرسي
وأنا قاعدة لوحدي في البيت
وهلاقي تعبان طالعلي

وأنا أصلا أصلا
عندي فوبيا من الدود
أي حاجة بتتلوى
بجد بخاف منها

أنا فعلا اترعبت
كان الله في العون

وعلى الله تلاقي التعبان بسرعة
وتبقى تعادل
3 قصاد
3
: )))

Sherif said...

هذه الجسارة أكيد هى من آثار الصاعقة زمان .. مع الفارق

ربنا يحفظكم ويحفظنا جميعا من كل شر

بس الصاعقة كانت تنطيط وها وهيى وشوية أونطة وخلاص

انما لحد الحنشان .. فأشهد لك بالشجاعة والجبروت

مثير البوست .. على خطورته

maxbeta3zaman said...

الى بندق
دعواتكم يابو البناديق ... الشيح فى يمينى والسيف فى الشمال ... وحاخش عليه وأقول هـــع ...عاه اطلع ياللى لابد فى الشجر
دفاع المستميت فلا يبالى
وصد عن حمى الوطن المجيد

maxbeta3zaman said...

maxmannourنيجار
الشرف لنا بنيتى فأنت التى أخذتينا لجزر المحيط ..وكيف نحزن وعندنا كل تلك الآفاق الرحبة وكل هؤلاء الأصدقاء وكل هذه الخيوط الممتده تلف الكرة الأرضية لفا وتغلفها كما شلة الصوف المكعبلةثم أن الوقت أثمن من أن نضيعه فى حزن وهم وتشرنق ..أما اشجاعة الثعبانيه فمن كثرة اللقاءوالنزال ..انا من النوع الذى تزده الصعاب صلابة فأهاجمها لو كانت هناك فرصة فأنا شجيع السيما لكن شنبى ليس بريمه

maxbeta3zaman said...

شمس النهار
الحج السنادى والا الدعا جلا...عموما الدعا كان مركز على السنه دى موش اللى جايه ..لكن إذا كان مكتب التنسيق الحجاجى قفل أو كان مجموعنا ميجبش غير عمره بس فماشى ..واحنا موش حانجيب سيرة تعابين ولا حناش تانى بس بعد مانموت اللى عندنا أو نطفشه

maxbeta3zaman said...

يا أم عبد الرحمن
دا التعبان ده ابسط مارأيت فى جبال الباحة ..طب دانا كنت أقعد فى مكتبى هناك الاقى شىء اسمه الضب نوع من الزواحف شبه الديناصور بس على صغير ده بقى موطنه كان شبابيك مكتبى ..وكان لما يجيلى زائر غريب ويقعد أمامى ..كنت ألحظ انه يتنح كده فجأه ..ويبص ناحية الشباك ..يكون هناك ضبا ملونا طوله نصف متر يتمخطر على سلك الشباك ولا يلقى لنا بالا ولاكأننا موجودين ..يمشى ببطء شديد ليصعد إلى بيته ..الذى هو سقف المكتب الأزبستوس يمكن يكون جايب لمراته كيس فاكهه وجاى مرهق م الشغل ..أما عن الشيح البابونج (من الأعشاب الصحراويه ) فمفعوله أكيد فى طرد هذه المخلوقات من المكان ..هى لا تحب رائحته النفاذه ..وتبتعد فورا عن المكان الموجود فيه الشيح .. وطريقة وضعه هى عمل (صرر) صغيره من الشاش تملأ بالشيح وتعلق أو تنشر فى أرجاء المكان فيطفش اللى بالى بالك من غير تسميه ...ويروحو بره يشوفولهم عقد عمل فى بيت تانى

maxbeta3zaman said...

أنا بادعى فعلا عشان هدف التعادل خصوصا ان الماتش على أرضنا وبين جمهورنا والشجاعه هنا مضمونه.. وعذرا إذا كان الموضوع مزعجا لقارئه ..وانما دى برضه تبقى عبره لمن يتوهم أن مشكلته هى أعقد المشاكل وان مايواحهه هو أكبر العقبات ...وبعدين سيبك من الفوبيا واللوبيا ..لو اتحطيتى فى موقف صعب وكان فيه حاجات بتتلوى ..حاتلاقى نفسك نسيت الفوبيا وبتنظرى لما هو أهم

maxbeta3zaman said...

شريف
فاكر أيام صاعقة السطوح والخوذ اللميع فى البر فى البحر فى الجو أنا حاطط فى موقع الدفعة صورة صعقاويه لينا انا وانت على سطوح س5 انما انت فيها ولا داج همرشولد ف زمانه ..تصميم إيه ..عزم إيه ...عساك تكون شوفتها ..وبعدين انت عارف ...كنا فى حباطه تعدى العقارب من تحت رجلينا واحنا بتفرج على التلفاز عادى جدا حتى ماتقولشى السلامو عليكووهناك قصصا مضحكة على الهوام هناك حابقى أحكيهالك فى التليفون أولما اشوفك

Bannoura said...

لالالا يا عمو أبدا
ازعاج إيه بس
دول حبة رعب وراحو لحالهم خلاااااص

: D

ربنا يقويك دايما إن شاء الله

سمراء said...

الرفاعي الصغير
لم نعتاد التعامل مع المخلوقات التي خلقها الله لتوازن البيئة ونخاف منها
وانا كذلك كنت اخافها واللي بيخاف من العفريت يطلع له
ولكني الان اقف امام تلك المخلوقات بثبات والعجيب انهم لا يهاجموني وانا لا اهاجمهم
وتمر الامور بسلام
لدرجة اعتقدت فيها انهم ياذوننا متخيلين مثل تخيلانا تماما
الهجوم خير من الدفاع

الرفاعية اصدقاء للثعابين وليسوا اعداد
سمراء

maxbeta3zaman said...

سمراء
هم فعلا لم يهاجمونى ولا مره ولكن مجرد القلق من وجودهم واحتمال أن يفهمونا خطأ يجعل التخلص منهم بالتطفيش لو أمكن ثم بالقضاء عليهم لو همو أصروا على مضايقة السكان بالتواجد علنا وعمل استعراض قوة ..والخشيه هى أن يمد الواحد يده مره وسط النباتات فى وجود سعادته فيظن اننا ننوى شرا فيعاملنا معاملة كليوباترا.. ففقدان الثقة متبادل واللى يعرف رفاعى يقوللى عليه ييجى يطلعه وياخده انشالله لحديقة الحيوان ..أهلا بحلم للطفوله لم نراه من مده طويله

mahasen saber said...

مهو مشكلتى ان رد فعلى غبى وبطئيعنى ممكن من كتر خوفى بدل ما اجرى منه تلاقينى بجرى عليه آه والله...
او اغمض عينى وانكمش واستنى نصيبة وافضل كده تحت رحمة القدر
والله انا عايزه اعشاب تصحصحلى ردة فعلى شويه وتخليها رده ايجابيه ....

maxbeta3zaman said...

البنوره المسحوره واللميع فى آن واحد
ايوه كده الشجيع مايهمه حناش ...أول ماتلاقى أى حاجه بتلعب كده ...قولى هع مين هناك ....الحنش يتكهرب ويبقى نمله.. وانا لما اصرفه من عندى حاوصيه مايروحشى عند أى من اًصحاب البلاليج اللى نعرفهم

maxbeta3zaman said...

الى محاسن صابر
تقول أم كلثوم فى أحد روائعها
من كتر خوفى... ضربت حنشى
ورحت عنده ..وانا قصدى أجرى
بس وانت داخله اضربى بأى حاجة ف إيدك وفى كل اتجاه ...تلاقى واحده منهم جت فى السليم على طول ...ربنا ما يجيب لك حنشان ...بس للاحتيط كل واحد يرش شيح حوالين البلوج بتاعه ...وانت بالذات ممكن تنقعى النجوم اللى بتشتى عندك دى فى الشيح قبل كل مره تفتحى البلوج ..تقوم هى ترش لك حوالين الدكان وتمنع كل الواغش من مجرد انه يهوب نواحيكى

Beram ElMasry said...

العزيز الغالى . maxbeta3zaman
فى حفظ الله وامنه تذهب ، وفى خيره وبفضله تعود
بارك الله فيك وسوف ابدا فورا التعديل
مش هطول عليك ، هذا دليل على القرءة باستيعاب مش تادية واجب
الى ان تعود بخير لك تحباتى

... amr said...

عمو ماكس .... ازيك يا راجل يا طيب ربنا يبعد عنك و عن اهل بيتك كل شر و كل حنش .... كل سنة و انت طيب

maxbeta3zaman said...

عمر\عمرو
الله يكرمك يا أحد العمرين ..أنا قررت تأجيل الحرب الحنشيه لما بعد عودتى من بورسودان الأسبوع بعد القادم مصر أمانه ف إيدك ياعمر سايبهالك ميه ميه ومطفيلك كل الحرايق ..وسايبلك طفايه فى ركن البلوج ده ...اسحبها وبخ بيها أى مصدر شرر على ماارجع قول ورايا ...
مصر هى أمى
حارقه هى دمى
شكلها ف صفارى
ذلهــا ف مــلامحى
حتى شوفو قمحى موش مكفى مصر
مصر .. طم.. مصر ..ططم ..

Bannoura said...

ههههههههههههههههههههههه
إيه يا عمو النشيد ده
ده من تأليف حضرتك برده ؟؟؟؟؟

maxbeta3zaman said...

البنوره المسحوره واللميع
نعم نعم لسه كاتبه حالا دلوقتى لأنى مسافر ودى لعمرو عشان ياخد باله م البلد على ماارجع م السودان ويخلى البلد ف عينيه ...موش هى برضه كده ...والا الكلام كده وكده؟

mahasen saber said...

رايى حضرتك كده خلاص علم وينفذ
احنا يهمنا الا راحة حبايبنا وانا ابطل خوف شويه اصل مندوب الادرينالين على قوى وبقه اعلى من منسوب السد ...

Bannoura said...

ترجع بألف سلامة إن شاء الله
هتغيب عننا كتير حضرتك ؟؟؟

... amr said...

تمام سياتك . . . سيطرنا على حريق مستشفى المطرية و حاليا نقاوم حريق في مول الكمبيوتر بالكوربة ....احنا بنبذل كل جهودنا لحين عودتك من المصيف يا فندم .... مراسلكم من امام الولعة


عمرو المولع بحبك يا بلدي

elsha3er said...

السلام عليكم

اولا انا ما احبش التعابين عامة

ثانيا انا عينى وجعتنى من القرأة ارجوك ابقى كبر الخط


احمد الشاعر

Beram ElMasry said...

العزيز الغالى . maxbeta3zaman
اقسم بالله صادقا ان سعادتى بهذا النقد اضعاف الاطراء مادام حق الرد مكفول
شوف يا معالى الباشا النقد سليم وهو اضافةالواو فى البيت الثالث ( وبين البشر وتم الاصلاح )
وضعت فيما يلى البيت المقترح من جانبك واسفله البيت الاصلى ليظهر الفارق وهو ستة حروف يعنى زيادة تفعيلة كاملة ، ومع العلم ان المعنى فى بيتك اجمل
وحلمنا الوردى كان توشكا وكان فيها كمان مزروع
املنا الوردى فى توشكا وفيها كــان مــزروع
كذلك البيتين التاليين الاول مقترحكم والتالى هو البيت الاصلى لترى بنفسك ان البيت المقتر يقل بثلاثة احرف ( قال ) وهو وتد مفروق ، وكان فى بيتى اجمل لانها تعنى ان الامر انتهى
قالولنا خيرها يكفينا ينسينا سنين الجوع
قالو خيرها كان يكفٌينا ينسٌينا سنين الجـوع
البيت الاخير اللذى اوردته فيه كلمة ( ورمالها ) فصحى والعامية رملتها ) وكذلك مياه عاميتها مية ، مع ان النصف الثانى من بيتك اجمل
ورمالها شربت مياه وشربنا سوا حسره ونكد
ارجو من الله ان تكون قد عدت لنا سالما غانما باذن الله
لك تحياتى وعود حميد

DoNyA said...

حنش ....
ده انا بخاف من القطه
يطلعلي حنش

أُسعدت مساءً اولا ...
ثانيا
استمتعت جدا بقصصك الواقعيه
التي تمتزج بنوع من المرح والابوه والدفيء الخفي
الذي يجذبني تجاهه

مودتي

maxbeta3zaman said...

عمرو
خللى الطفايه جنبك باستمرار واسحب الكبريت كله م السوق ...لان كده انا حارجع الاقى البلاليج كلها ولعت ...!!!

maxbeta3zaman said...

البنورة اللميع
الله يسلمك ..أسبوع واحد ان شاء الله ...وانا عديت على بندق القديم وعجبنى جدا وسبت هناك تعليقات ..وأنا سعيد بأن بندق بييجى الدكان

maxbeta3zaman said...

أخونا الشاعر ومين بيحبهم يابو النجوم ...الظاهر همه اللى بيحبونا موش عارف إيه اللى بيحدفهم علينا ...اما الفونط وحجم الحرف فمن عندك انت ممكن تكبرهم ...فيو
تكست سايز... لارج أو لارجر أو حتى اكس لارج وموش عارف هل يمكن من البدايه انى اكتبه كبير ..طبعا حاعمل كده لجل الكل يكون مبسوط
شرفتنا بزيارتك حللت أهلا ونزلت سهلا ...

maxbeta3zaman said...

أبو البيارم
حياك الله ..ما قترحت مجرد اقتراح موسيقى ليس إلا ولا يجوز لى تعديل نص أنت مالكه ..ولا عيب فى دخول كلمة فصحى (أحيانا)على شعر عامى وكان العملاق جاهين كثيرا مايفعل ذلك وكذا بيرم التونسى العظيم ...تحياتى لك ودائما على خير نلتقى

maxbeta3zaman said...

أهلا بدنيا من زائرة
لاتخشى فقد بدرنا الشيح حول كل البلاليج ...,اظن انهم رشوا عندك كمان
واشكرك على المرور على حكاوى المدونه وهى بالفعل كلها حقيقيه زى برنامج "حدث بالفعل
ومادمت قد بادرتينا بالزياره فحق للمزور أن يزور زائره فها هو الماوس وهاهو الرابط
كليك "

Bannoura said...

مش قادرة أوصف لحضرتك مدى سعادتي
إن بوستاتي بتنال إعجاب حضرتك
والفكرة بتاعتي نجحت
إننا نحط إيدنا في إيد بعض
صدقني كده بندق هيتحمس أكتر وأكتر
وهيطلع حاجات أجمل
: ))))
مستنيين رجوع حضرتك بألف سلامة إن شاء الله
تقبل مروري
والصداع اللي أنا عاملاه ده
: D

nooor said...

ههههههههههههههههههههه
ماكس بتاع زمان
كم استمتع بكتاباتك
حقيقة لا اتوقف عن الضحك كلما ممرت من هنا
اجمل مافيها انك تجد جملة بفصحى ابو جهل ثم تنتهي بكلمة عامية تماما
"كان الحل فى مقص الشجر الذى قبضت به على دماغه ففيص
هههههههههههههههههههه "

اكتر حاجة عجبتني الكوبرا
لما وقفت عالسرير قالت ده طلع طويل وكبير اوي..
ههههههههههههههههههههههه

دمت بالف الف خير
جميل ان تملك نظام ري صيفي وشتوي
في منزلي تعطلت لنضة المطبخ لمدة شهر لم اغيرها حتى وصل اهلي بالسلامة من سفرهم
دمت بالف خير
:)

someone in life said...

ماكس بتاع زمان

ازاي حضرتك .. ايه الحكايات الجامدة دي انا باتعامل مع العقارب بس و بالشبشب علي طول
سلاح قوي و نفاذ

بمناسبة العقارب حضرتك برج العقرب زيي بالظبط امتي عيد ميلادك علشان نولع شمع و حاجات من دي ؟

☼♫♪ عمــاد الدين يــوسف ☼♫♪ said...

عمو ماكس الحبيب
طال انقطاعك عنا ولعل السبب خيرا
وودت ان اطمأن عليك

تحياتي

mahasen saber said...

حضرتك غايب ليه خير حضرتك كويس...
اتمنا ان حضرتك تبقا بافضل حال وبوافر الصحه ...
انا دماغى بتودى وتجيب فممكن حضرتك تطمنى عشان دماغى تبطل مشوره
...........
يا رب تكون بافضل حال...

maxbeta3zaman said...

البنورة المسحورة واللميع
طبعا تعجبنى البوستات فالحروف تكشف معدن كاتبها والفكر الجيد والاهتمام باناس هو جوهر الإنسانية ..وأنا عنما تستوقفنى سطور أحد البلاليج أتمشى فيها حتى أصل لأولها وأقدمها ,,وأنت لميع بالفعل ... أنا اكتب من بورسودان حيث تقلع طائرتنا مساء اليوم عودة للوطن بإذن الله ,ووأنا الآن فى مقهى الكز تحوطنى المراوح الضخمة حيث الجو حار رطب

maxbeta3zaman said...

نور
الله يكرمك يابو الأنوار الحقيقه اننى أنا ايضا يغلبنى الضحك وأنا اكتب هذه الحكاوى ...أما الفصحى فهى لكونى كنت تلميذا جيدا فى اللغة قديما وكان والدى رحمه الله استاذا فيها وكذلك جدى وكان خطى فى الكتابة كما المطبعة حسنا وذلك لهوايتى للخط العربى لذلك كله تجد ان كتابتى دائما تدخلها الفصحى دون قصد.. دمت دائما منيرا مستنيرا

maxbeta3zaman said...

someone in life
أهلا بك... العقارب أخوة للثعابين وكلهم أحبابنا بس من بعيد أما فى المنزل فذلك ما يدعو للحيطة ...الشىء العجيب أن أخوتنا هنا _ أنا فى السودان حاليا _ أهدونى بعد انتهاء الدورة التى كنت أحاضرها ....أهدونى حذاء من جلد الثعبان؟؟؟؟ وتعجبت هل عرفو بالحرب الثعبانية التى أنوى شنها عند عودتى ؟؟ وهكذا سوف أدخل على الحنش مرتديا جلد اخيهم من نوع الأصلة فيعرفون أنى من صياديهم ويخافون منى كما أخاف منهم ...ولربما أدى ذلك لعقد صلح منفرد ... أما عن اللأبراج فأنا فعلا برج العقرب وفى الحادى والعشرين من نوفمبر ...وقد وجدت ان جدى قد كتب لى قصيدة بالفصحى عند ولادتي أرخ فيها لتاريخ ميلاددى القمرى والميلادى بأبيات شعر غاية فى الرقة ...ضاعت منى الورقة الكرتون التى تحوى القصيدة لكن مطلعها كان
سررنا بهذا الوليد الأغر
فحييت من قادم منتظر
وقد طال شوق إليك فجئت
لأول يوم بشهر صفر
وذكر فى منتصفها بيتا يقول ..
وواحد وعشرين نوفمبر
لميلاد عيسى نمى واشتهلر

وختمها بقوله( وقد كنت الولد الأول على خمس أخوات
)
رعى الله مولودنا عادلا
ووقاه شرا ووقاه ضر
وشد به أزر خمس له
من الأخوات بطول العمر

maxbeta3zaman said...

إلى الثائر جيفارا عماد
أنا فى بورسودان ..واليوم مساء نعود للوطن ونلقاكم على كل الخير ان شاء الله

maxbeta3zaman said...

إلى أم عبد الرحمن محاسن صابر
لقد سافرت مطلع الأسبوع الماضى لبورسودان حيث أكتب الآن ...وأنا على مرمى ومد البصر من مكه حيث أنها فى مقابلها تماما وبيننا فقط عرض البحر الأحمر وقد أنهيت عملى هنا أمس واليوم بإذن اله نعود ومعنا بعضامن جلد الثعابين تحذيرا لحنشنا اللابد فى العجمى وكذا حافظة نقود من نفس الجلد فيا ثعابين ...احذرى واهربى احسللك

كلام على بلاطة said...

;th; hggi
كفاك الله شر الحنش واخواتها
مدونة جميلة

maxbeta3zaman said...

http://www.flamingcursor.com/
عمرو
آدى يا سيدى عنوان البنى آدم اللى كان عاوز يولع البلاليج مسكته من قفاه وهو يحاول عمل عمالته فى البلاليج بتاعة الناس صحابنا ....افتح وطسه بشوية مايه بس حاسب على الكى بورد

nooor said...

العزيز ماكس
اتمنى ان تعاود قراءة تدوينتي الاخيرة مرة اخرى
تحياتي

Beram ElMasry said...

اخى وصديقى العزبز الغالى ،maxbeta3zaman
عود حميد وعمر مديد وسلامة من كل مكروه ، احلام سعبدة وتصبح بكل الخير والعافية

About Me

My photo
أحب الثقافة والفنون والشعر وتبادل الأفكار النافعة والهوايات المتعددة والمصنوعات اليدوية والرسم والمسرح والأغانى القديمة ذات المعانى الراقية والأفلام الكوميدية اتقن الكثير من الأعمال اليدوية (اصنع بنفسك )واهوى أصلاح أى معدة تتلف : حته جديده بقى أنا الماكس فى أحشائه الضحك كامن فهل ساءلوا بلوجاتى عن طرفاتى