انه دكان للخردوات نبيع فيه الخواطر والذكريات.. ونشارك بالقصص ونقرأ من خلاله أفكار اهل الدكاكين المجاوره ونسمع منهم كما نحكى لهم - هو مكان لتواصل جيل أوشك على الرحيل مع جيل هو بطل المستقبل القريب ...

Sunday, September 12, 2010

القفا بووك" -"كتاب القفيان" -- afa book


كنت سعيدا بدخولى عالم التدوين والبلاليج واعتبرته مدخلا لطيفا لقراءة الأفكار والإنتاج الفكرى والأدبى لأصحاب المدونات الذين كنت أرى بعضهم فى التليفزيون ..بعد ان تصورت ان البريد الإلكترونى هو قمة التواصل

ولكنى كنت أسمع عن شيء آخر اسمه الفيس بووك ..شوفت فولان!! كتب كذا ع الفيس بووك

واصبحت الدعوات تأتينى على البريد كن صديقى على( البلاكسو )...كن صديقى على( وير آر يو ناو) ...هل تقبلنى صديقا على( الملطيبلاى) ؟؟..كنت أقبل الدعاوى لأن المرسلين كلهم اصحابى ...لم اكن ادخل على هذه المنتديات لأنى لا أعرف كيف أدخل.. فقط كنت أقول لمن يصادقنى يامرحبتين وهلا ..وكنت ارد على الخطابات فقط عندما يشعروننى بأن لدى إشعار من فولان وعلان وترتان فأرد عليهم جميعا من باب التأدب مع الأصدقاء لكن ماعرفش ادخل لوحدى كده زى البلاليج ..ظل الحال كذلك فتره الى أن بدأت رسائل الأصدقاء تأتينى قائلة علان وترتان أصبحا من أصدقائك ...قلت ايه؟ ...قلت لا اله الا الله ..هاتهم ياسيدى البيت يساع م الحبايب ميه وحصيرة الصيف واسعه .. ومن ثم من دون ان أدرى اصبحت ضمن الفيسبوكاويين ولقيت ان قائمة بريدى هم اصدقائى بالشفعه ثم كل واحد منهم له اصدقاء وأقارب الاقيهم فى الدايره الأوسع ...وخطر فى بالى سؤال ..لماذا سموه الفيس بوك " كتاب الوجوه " لأن الأعضاء يضعون صوره 6*9 ..طب لماذا لا نعمل منتدى اسمه (قفا بوك) ويطلع المشتركين بقفاهم وموش لازم بالوش منعا للإحراج والمعاكسات ...وتأكيدا للصداقه بحيث يتعرف المرء على صديقه ولو من قفاه ..دليل على المعرفه التامه والعشره الطويله ...وحتى تظهر النميمه ...اليس المثل الشعبى هو القائل : "فى الوش مرايه وفى القفا سلايه "؟؟ يعنى المضروب زمبه من صديقه تظهر السلايه واضحه فى قفاه ...والذى تكثر سكاكينه يظهر قفاه مرشوقا بعشرات السلايات - كما القنفد ... أنا قد بدأت بنفسى وفوجئت بالمصور يصورنى هذه الصوره أثناء حضورى لقاءا فكريا وندوة ..فلما طالعت الصوره ضحكت وقلت هذه نموذجا معتبرا لمنتدى القفا بوك أضعها فى البروفيل - رغم انها لم تصور فى أثناء جلوسى على كرسى الحلاقه- كما أوصى بها فى دستور( القفا بووك ) انما تفى بالغرض ...ولما كتبت هذه الفكره فى الفيس بووك علق أحد أقاربى على الموضوع وقال ...زى مافيه فيس ...فيه قفا ...وبعدين بنات حواء هم الأوفر حظا لأنهن لا يحلقن ولا يدرجن وأغلبهن من المحجبات فلا يؤذيهن أحد ولا يعاكسهن دبور ...فهيا بنا لمنتدى القفا بووك ونجعله منافسا للفيس بووك الشهير

18 comments:

أتنين حبيبين said...

هههههههههههههههههههههه

وربنا انت حكايه


ممكن انضم معاك

اصلى زهقت من الفيس بو

وماله القفا اهو كله شغال

ويباركله يا معلم

لولولوى

ههههههههههههههههههههههههههههههه

أتنين حبيبين said...

لوووووووووووووووووووووووووووى

مبروك عليا اول تعليق

ومبروك علينا القفا بوك يا معلم

هع هع هعع

الشاعر الفنان أحمد فتحى فؤاد said...

والله فكرة

اطلع برجالتك يا فرج

صباح الخييييييييييييييييير

تحياتى

Unknown said...

س ع يا باشمهندس مبروك المدونة وانشاءالله اتابع عليها كلامك الظريف اللي بيفرفش الواحد ويخليه يحس بالتفاؤل وربنا يديك الصحة والعافية وطولة العمر وانت في كامل عافيتك وتفرح بأحفادك وتفضل منور لأولادك وزوجتك الفاضلة دنيتهم.
انا شفت الفيلم والصور الخاصة بالجلد بعد استعمال المغناطيس وفهمت ان مغنطة الميه بتساعد علي رطوبة الجلد وتمنع جفافه؟؟؟؟ صح؟ طيب ايه العلاقة مش فاهمة ممكن تشرحهالي وشكرا
مها

maxbeta3zaman said...

من صاحب ومدير القفا بووك الى اتنين حبيبين ...هناك اغنيه لليلى مراد تقول احنا لاتنين والعين فى العين اهنا قبين واسعد حبيبين احنا لاتنين ...فأنا اللى محيرنى انتو واحد والا اتنين؟؟ ..وبعدين حاتخشوا المنتدى بروحين يعنى "بقفايين" لامؤاخذه والا بقفا واحد على شكل حرف واى لامؤاخذه برضه ..وضحلى الأمور ايها اتنين حبيبين عشان اعمل حسابى الدنيا حاتبقى زحمه قوى وموش حانلاحق ع القفيان لو لو لو لو لىىىىىى ...وزغرطى ياللى مانتيش غرمانه

maxbeta3zaman said...

اتنين حبيبين برضه ...الف نهار ابيض يا أيها الكوبل المحب تعالوا لمنتدانا وسيبكو من الفيس الممل ده احنا اكثر طرافه وحاتتعرفوا على قفيان زى الرز
بس انا مانيش انتيخ قوى فى انشاء وإدارة المنتديات ده انا ضاعت منى مدونه زمان لأنى نسيت الباص وورد ...هع هع هع هع آى والله وعملت دى ماكس بتاع زمان وكدت انسى باصها ايضا لولا شيرين الكردى الجدع بتاع لست الا شوية ورق ده ابو كتاب مانتو عارفينه ...ده بقى صاحبى وهو اللى علمنى البلاليج ...وهوه اللى فكرنى بالباص وورد الجديده واللى كاتبها على الشاشه بالرصاص وبرضه جت الست صبريه تنضف راحت مسحاها فكرتها وساخه ..فانا محتاج طقم مديرين يمشوا المنتدى ده ويمنعوا الواغش ...قد المهمه يا حبيبه ؟؟؟ قولوا أيوه يامعلم تحت أمرك

maxbeta3zaman said...

من صاحب الدكان الى الشاعر والفنان احمد فتحى فؤاد ...المتسمى على اسم الملك فؤاد ابو الملك فاروق موش كده ...كان نفسك تطلع ملك يامعلم ...بس الثوره جت خلعتهم جميعا معلهشى ..والله انت اللى ضحكتنى ...انا ماكنتش واخد بالى من اطلع برجالتك يافرج دى لكن اختى اللى كانت قاعده عندى فهمتنى الفوله ...مسرحيه موش كده وفيها ضرب قفيان وورم صح ؟؟ بس احنا ماعندناش ضرب على القفا فيه صوره م القفا بس وتبقى عضو عامل فئات اوعامل أو فلاح

Haytham Alsayes said...

السلام عليكم

مدونتك اعجبتني كثيرا
الفيس بوك سخيف هكذا اراه بالرغم من اشتراكي فيه
لم احبه واحببت المدونات اكثر منه بكثير


تحياتي

maxbeta3zaman said...

إم مجدى التى هى مها أمين
الله يبارك فيك ياستى ويعطيك من الخير مثلما دعوت به لنا وأكثر ..زأما موضوع المغناطيس والجلد فهو غريب الشأن ...موضوع نضارة البشره وطراوة وترطيب الجلد حقيقى وأنا لمسته بنفسى وأنا- ذو اليد الخشنه التى دائما تمسك بالمناشير والمفكات والمفاتيح البلدى وأنا أعبث بالأجهزة والماكينات فتلك هوايتى من صغرى ..فوجئت بعد استحمامى بالمغناطيس ده ان يدى اصبحت من النعومة بمكان ولا أصابع نانسي عجرم وكان عندى شبه كاللو محرفش فى ركبتى الشمال من الصلاه ماعرف والا من كتر ضرب الناس بالنص ركبه ...المهم ..فوجئت بهذا الكللو يتحول رويدا رويدا الى الجلد الآدمى بدلا من جلد الخرتيت وذلك باستعمالى الماء الممغنط ...وتفسير ذلك ان الماء الممغنط يزيل الخلايا الجلديه الميته والتى تستقر على الجلد ومن ثم تظهر الخلايا الحيه النضره على السطح هذا من جهه ..ومن جهة أخرى فإن اصحاب نظرية الطب البديل يقولون ان الجسم محتاج لطاقة مغناطيسيه تكتسبها الخلايا الجلديه اثناء مرور الماء الممغنط عليها فتنشط خلايا الجلد وتؤدى وظائفها الطبيعيه ومنها الترطيب واللون الزاهى -غير الباهت (المجير )..هذا مافهمته من قراءة عشرات المقالات عن هذا العلم والبحوث المتصله به والمتزعم لهذه البحوث والتجارب عالم روسى موش فالكر اسمه هو مليان حرف شين كده ...وأنا حابعت لك على الميل لو كان موجود أو على الفيس بووك سبع مقالات طويله لو كان عندك وقت اقرأيهم ففيهم اجبة عن كل تساؤلاتك تعاليلى على الفيس بووك يا أم احمد

maxbeta3zaman said...

هيثم السايس ..الذى هو عندنا مآنس
ياسيدى ربنا يديم المعروف ...وانا كمان معجب بمدونتك اللى لسه حاقراها بعد مااكتب الكلمتين دول ..شوفت ..انت كمان موش عاجبك الفيس بووك وشايف زييى انه لا يعطى فرصه كافيه لإبداء الرأى ..هو تلغرافى من نوع" نفض له واحلق له ..وبينا موبايلات..و ياللا باى" ..أما البلاليج فبتقعد وتستربع وتصلى بينا ع النبى ثم تقول الحكايه أو الفكره كما يحلو لك كما أن التعليق بيبقى برضه مرتاح موش "برافو عليكى ياكيكى لووووول" ...ومادام الأمر كذلك فلا تنسى أخذ الكاميرا الديجيتال معاك وانت رايح تحلق المره الجايه وتنضم لمنتدى القفا بووك وتبقى من مديريه لأن انا موش كومبيوتراوى قوى انا من جيل البى بى سى زى ماانت راسى
أهلا بك هيثما

صفــــاء said...

لا يا سيدى ماليش فى حكايه القفا دى

هو الفيس بوك كدة رضا قوى

صحيح فكرتك جميله وجديدة بس خلينا فى اللى نعرفه

وعليه فـ قولى حسابك على الفيس بوك اضيفك انا كمان

شمس النهار said...

كل سنه وحضرتك طيب

الحقيقه عندي فيس بوك من اول مااخترعوه علشان بناتي عملوه
وكان لازم اكون معاهم واشوف بيعملوا ايه
علشان حضرتك عارف ان الانسان عدو مايجهله
وطبعا الناس اللي زي دقه قديمه وبيخااافوا علي بناتهم
المهم يعني
الفيس ده الاولاد عاملينه يتبادلوا الكلام هاي يافلانه بكره في اوتنج هاي ياعلانه بكره عيد ميلاد ميدو
ويحطوا صورهم
لكن حاجه مفيده مافيش
او علي الاقل لي انا
والفيس عندي عائلي لايوجد به الا ابناء العائله واصحابهم المقربين اللي اعرفهم واعرف اهاليهم وطبعا اجواز بناتي
لكن فكرتك كويسه برضه
بس خاليها رجااال فقط
حيث لاقفا للنساء لابطرحه ولا من غير طرحه

:))
تحياتي

محبة الرحمن said...

ما شاء الله

تدوينه متميزة

فكرة رائعه

maxbeta3zaman said...

صفاء ذات الكناريا المتشعلق فى الهواء يمتص رحيقا
أولا هاهو رابطى ولينكى الفيسبوكاوى
http://www.facebook.com/adel.mahdy
والله ياصفاء مانا عارف ازاى اتعمل انا لقيت رسايل زى الرز نازله على الميل بوكس بتاعى بتقوللى ميار اتخذتك صديقا - ميار دى بنت بنت اختى - وهى بطلة جمباز دوليه وعندها حوالى 9-10 سنين ..طبعا انا افرح واقول ميوره حبيبتى ادخلى برجلك اليمين ..شويه الاقى ابن أخويا علاء واصحابى فى الكليه وعدايلى واختى اللى ف أمريكا وولادها ....لغاية لما غرزت وبقيت فيس بوكاوى من غير مادرى ...ومن هنا جاتنى الفكره القفاويه الفكاهيه دى ...هيه قلت ايه وش ولا قفا ؟ يعنى ملك والا كتابه ..كتابه انت حره العرض سارى لبعد العيد الكبير بس بعد كده بفلوس وفلوس جامده جدا ...ونشوفك ع الفيس بقى

maxbeta3zaman said...

شمس النهار
كل عام وانت والأسره جميعا بخير ..هو ده اللى لاحظته لما أدخلونى على عالم الفيس بوك ده عنوه وبسيف الحياء ونادرا ما أجد فيه شيئا غير لول وفركش ومحمد منير وهذا ماجعلنى افكر فى قفابووك ..وليس المقصود بلقفا خلفية الرقبه وانما الناحيه التانيه للمواجهه موش فيه ناس بتقول فى السيما والتمثيلياتت : " ورينى عرض كتافك "
فلإن كان القفا غير مستحب وتتعامل معه الشرطه بطريقه موش ظريفه ...فإن اسم ورينى عرض كتافك بووك) قد يكون مناسبا أكتر

maxbeta3zaman said...

محبة الرحمن
أهلا بك هى فكرة لقت فى نافوخى ثم طقت من بنات افكارى قفزا الى طرف أصابعى وصولا الى الكى بورد ومنه الى البلوج ومن ثم الى باقى البلاليج المجاوره والصديقه ..
شرفت الدكان

شمس النهار said...

اعتقد حضرتك ان الاسم الجديد لائق اكتر

وخصوصا ان علي راي عادل امام
قفانا هيستحمل ايه ولا ايه

:))

ورينا عرض كتافك بوك

لطيف

ياله علي البركه
ورونا الهمه ياجماع وانا حاجزه من دلوقتي
:))

maxbeta3zaman said...

شمس النهار.. التى أشعت ..
.فعمنا الانبهار
بناء على الطلب الموقع من شمس هانم النهار ومحلها المختار البلوج المرفق والمسمى بنفس الاسم والمعنون بنفس العنوان فقد انتقلنا نحن محضر محكمة البلاليج الكليه الى محل الواقعة ومعى خبير من الشهر العقارى ومن مكتب المواليد ...فحصنا الاسم المكتوب فى أول هذه الصفحة " قفا بووك " واجتمع رأى اللجنه ومعها العامه على ان قفا كلمه موش هى ...وتدفع ببطلانها لجان حقوق الانسان ..والقانون يحظر لمسها بالضرب أو الحديث عنها بصفتها موضع التعذيب فى الأقسام وقد قال فيها السيد المغنى مدحت افندى صالح فى أغنيته الشهيره "ولا باظت ولا خربت ...ولا جابت جاز
دى عيشه ظريفه جدا "
حيث قال فى مقطع يذكر فيه هذا الجزء من خلفية الرأس بقوله
" اتحدى لو فيه واحد :. يوم انضرب بالقفا
والناس بتختشى :. ولا حد بيرتشى
الله على الحياه :. بقى لونها شفتشى
لذلك قررنا وبإجماع الآراء جعل اسم الموقع والا المنتدى الذى اقترحه الجدع اللى اسمه ماكسبتاعزمان ده - ايه الأسامى الغريبه دى - (ورينى عرض كتافك بووك ) دون الإشارة من قريب أو بعيد للقفا الذى هو محل اعتزاز وفخر العرب والمصريين خاصة وقررنا عمل محضر للسيد المواطن ماكسبتاعزمان محل الشكوى يتعهد فيه كتابة وبخط اليد الرقعه موش النسخ .. بانه قد تاب وأناب وقرر عدم التعرض للشاكى السيد قفا بووك باللفظ او بالذكر تلميحا ولا تصريحا ..وتم الحجز على الكى بورد خاصته لمحو الحروف الثلاثه المكونه لاسم الشاكى وهى على الترتيب القف والفاء والألف دون الهمزه ...
وعليه جرى التوقيع من كل من الحاضرين
امضاءات كثيره بالكوبيا
ختم نسر ازرق مشلفط
بصمات متعدده
بيانات الرسوم والتمغه
صوره للسيد الميكرو فيلم
صوره للسيد سكعوريتى البلاليج
صوره للسيد الفاضل جووجل راعى البلاليج

About Me

My photo
أحب الثقافة والفنون والشعر وتبادل الأفكار النافعة والهوايات المتعددة والمصنوعات اليدوية والرسم والمسرح والأغانى القديمة ذات المعانى الراقية والأفلام الكوميدية اتقن الكثير من الأعمال اليدوية (اصنع بنفسك )واهوى أصلاح أى معدة تتلف : حته جديده بقى أنا الماكس فى أحشائه الضحك كامن فهل ساءلوا بلوجاتى عن طرفاتى