من أرشيف القصائد

وجدت هذه القصيده \ الفكره فى فايل مركون فى الحاسوب كانت احدى التعليقلت قد اوحت لى بفكرة القصيده واسمها أحبينى بلا عقد ...كان التعليق يقول ان بعض سطورى تشبه قصيدةاحبينى بلا عقد ...لكاظم الساهر أو النايم بعد السحور ....فأنا قلت اما اشوف ازاى جانى توارد الخواطر ده مع فنان زى ده بيقف على السلم فى فيينا فتجتمع حوله عرايس أوروبا كلها يرقصن ويتمايلن معه ...من أنا ليتلم حولى دستة كومبارس حتى ...سمعت القصيده فجاءنى عفريت الفكاهه فصغت هذه السطور بعنوان (أحبينى بلا عقد ولا شراشيب) وكتبت منها نصفها وركنتها ثم كل ماأفتح الملفات للتنظيف الاقيها أقوم خابطلى بيتين واركن... لحد النهارده قلت اما اقفل العملبه الدراميه الفكاهيه دى ونخلص بقى

أحبينى بلا عقد ولا شراشيب
أحبينى بلاش ويايا شغل الديب
ولو قولتيلى حا نسيب بعض دوغرى حاسيب
لأن انا مخى موش فاضى لــــد ى الألاعيب
زمايلى تحت ع القهوة وطالبين طقم شاى بحليب
حاروح العب لى دور طاوله على دومينو بلا تعذيب
شافولك شخص كان جاهز؟.. كمان كسيب !!
عرفتى فين بقى العقدة ....من الشراشيب

أتارى الحب كان بارد....مالوهش لهيب
كمان زن الودان شغال ززز وسهمه يصيب
تقوللك اصلى موش شايفاه مثال لحبيب !!
مانيش شايفه رومانسيه ..مالوهشى نصيب
وأحلامه.. مفيش طموحات... تصيب يا تخيب
باصصلى لتحت عالكوتشى وعينه لم رمت لبعيد
صاحبنا الموكن واد جاهز ...باينه قريب
لطنت ..وجوز خالة مامته.. لخالها نسيب
فيعنى.. زيتكو ف دقيقو ..وحشو.. زبيب
مالك انت وواد فاشل ...معندوش قرش جوه الجيب
يمرمط فيك وتعيشى ف ضنك وفقر بلا نيلة دا حتى عيب
قريبنا ده راجل قيمة وشهم وسيمة.. قولى ...يجيب
دا والا الفقرى ابو وردة .. وده يفسر ..وده بيعيد
سمعت وكنت ع البسطة حارن الباب ...بعدت الإيد
رميت كوز الدرة المشوى ..فعصت الفل.. مت أكيد
مشيت زى عمرو دياب ..وبطاقيته ..وزيه لما قال انا قلت
انا عايش وموش عايش... لكن قادر على بعدك
كمان قادر ..أحب كمان واجيب واحده أكيد بعدك