انه دكان للخردوات نبيع فيه الخواطر والذكريات.. ونشارك بالقصص ونقرأ من خلاله أفكار اهل الدكاكين المجاوره ونسمع منهم كما نحكى لهم - هو مكان لتواصل جيل أوشك على الرحيل مع جيل هو بطل المستقبل القريب ...

Saturday, June 5, 2010

غرائب البلاليج



هذا هو أغرب حادث بلوجاوى يحدث لى ...فقد كنت أحاول مداعبة أحد أصدقائى القدامى من بتوع زمان مثلى تماما فقلت أهديه كارتا من كروت التهانى الشهيرة المسماه 123 جريتنج أو "123حياك الله" بالعربى يعنى ولما كنت زبونا عندهم فقد اخترت البطاقة ودونت عليها عبارة سريعه لا تخلو من المزاح لأن المجموعات البريديه نبهتنى لموعد المناسبة ...عملت اللازم وكتبت العبارة وبرمت الدوباره وظهر لى المستطيل اياه ...انت مين ايها المرسل المجامل؟ رحت طاسس اسمى وعنوانى وبريدى كمان ...مائة فل وفوقها دسته وزوج احتياطى لزوم مايدبل

جينا بقى للكلام اللى يجيب الضغط ويعلى الجلوكوز واللو- دينستى- ليبيد ...انا كان قلبى حاسس بمجرد ظهور مربع السؤال عن اسم وعنوان المرسل اليه انه حيعاكسنى ويعمل زى أيام البلوج الضائع وكلمات السر المنسيه والعناوين الوهميه ...قلت اجيب عنوان صاحبى "فيدو" من لستة العناوين قص ولصق عشان يبقى سليم !كل محاولاتى المائتين وسبعين باءت بفشل.. كل مرة يطلع علامة اكس حمرا ويقوللى "اتأكد من العنوان يا أخينا "وبعدها سؤال مانتاش عاوز تبعت الكارت لحد تانى اقول طيب ابعته ياواحد اتنين تلاته برضه( لفيدو) بس على الياهووه من فضلك ...وبمجرد أن أدوس زر الإرسال ... اسمع صوت قهقهة من خلف الشاشه وربما من عقلى الباطن يصحبها علامة اكس حمراء وفشل فى ارسال الرسالة ...أقول يمكن فيه( نقطه -شرطه- قوس) زايد هنا والا هناك اجرب مرة بالقوس ومره من غيره مره ساده ومره عالريحه مره بيدى ومره لصق وفى كل مره نفس الحكايه بدأ النرفوز ولوى البوز والجز على الضروس وموش عارف الغلط فين ...قلت طب ابعته لنفسى واشوف حايقوللى غلط ده كمان ؟ ...كتبت عنوانى البريدى اللى لا يمحوه الا الزهايمر الكامل وفعصت زر الإرسال بكل قوة فى لحظة تحدى نادره ! ....طلع لى سطر يقول ايها
ال. ..(شتمه بس فى سره )...عنوان المرسل هو نفسه عنوان المرسل اليه ياخويا ..! وطبعا فشل إضافى جديد اتارى ال123 بيفهموا فى البطايق الرقم القومى وفى البلاليج وف كله... فقسنى الواد 123 ...عرف اننى محمدين ومسافر فى قطر الساعة 2 ...هنا وصل الكورتيزون لمداه الأقصى وتفتق ذهنى عن حل آخر ربما يخيل على الواد 123 حياك الله ...بما اننى من أصحاب البريد المزدوج زى لكح وأصحاب الجوازات والجنسيات الدوبل ...إذا فالنلجأ لحيلة الصندوق والعنوان التانى "الياهوهى" والذى لن يكتشفه حتى ولا الكلب هول بتاع المخدرات ...كتبت العنوان بيدى وقلت لما يوصل عندى ابعته فوروارد للشخص المطلوب الذى جعلنى اكره الكروت واللى يجيب سيرتها ...بعت الكارت على نفسى فقال لى الأخ 123 رسالتك فى الطريق لماكس " الذى هو أنا برضه" يعنى طلع غبى وما عرفنيش المهم فتحت الميل وابتسمت ابتسامة عريضه من الودن للودن لما رأيت الواد 123 بيبشرنى ان واحد اسمه ماكس باعت لك كارت وفى ناحية المرسل بيقوللى كارتك وصل ياحلو وبمجرد ما الأخ ماكس " عفريتى يعنى" يفتحه حاديك خبر قلت طب اتأكد بقى وافتحه ثم فى الخباثه ابعته لفيدو الذى كاد أن يصبح الفجر عليه وهو منتظر ...فى هذه اللحظة بالذات بدأت التجليات والعكوسات ما اعرفشى مين سرب الخبر لجماعة 123 حياك الله ... فقرروا الانتقام منى ادوس على الرابط عشان اشوف الكارت بتاعى والا لأ !! ..ولا مجيب ..طب دابل كليك مافى فايده طب كليك يمين ولا عايده ....عرق بارد من الجبهه جز شديد على الضروس شتيمه غير مستحبه للحاسوب وآله ومن اخترعه وجمع هارده وانشا شبكاته ...وفى هذه اللخبطة العصبية وبعد نفاذ صبر أيوب لقيت ماعرفشى ازاى عبارة بتقوللى البوست اتعلق فى المدونه يا ماكس يابتاع زمان .... الله يخرب بيتك يا 123 مين اللى قاللك ان ده بوست والا ده للبلوج ....يظهر انه سمعنى بقول عليه "غبى" حب يورينى انه عارف انى انا أنا حتى لو لبست بلياتشو فراح خابطنى البوست ده وقايل لى وهو يضحك بهيستيريه تحب تشوف البوست وتعاينه ياحدق ؟؟؟ ...قلت باستسلام ايوه يا معالى ال123 اشوفه برضه احسن... ليكون داسس لى فيه مخدرات والا ممنوعات ماهو السيكيوريتى بتاع البلاليج روخر ما بيحبينيش قوى يعنى وبينا طار بايت ....كا فأنى الأخ 123 بارسال الكارت الذى لف الكون بإيصاله بعلم الوصول.. ورد على فيدو بعدها بتلقيه الكارت وهوما كان كل مرادى من كل هذه المعركة التى فاقت من ضراوتها وفضائحها قافلة السلام التركيه التى منعت عنوة وظلما ..وعدوانا ...هكذا كان هذا البوسط الذى جاء غلطه... ولكنى غير ندماااااااان ....عليها
كما قال هانى ولد شاكر


25 comments:

maxbeta3zaman said...

والله مانا عارف ادارى كسوفى ازاى
الحكاية انى بقى لى ساعة عمال احاول ابعت كارت تهننئة بعيد ميلاد صديق قديم لى ..اسمه فيدو ...قعد البتاع اللى اسمه "123 جريتنج" ده يقوللى العنوان غلط وميل صحبك غلط مع انى عمال احطه كوبى وبيست ...المهم لما غلب حمارى رحت باعته لنفسى على نفس عنوانى البريدى اشوف حايقوللى غلط والا صح ...راح قايللى مع كلمة" ياغبى "...عنوان المرسل هو نفس عنوان المرسل اليه ...فكرنى بأيام النرفزه والوورد فاريفيكيشن والشخابيط ....ولما لقيته مصرا على التغابى والعناد معى ولما كنت مازلت املك بعض الحداقه الاسكندرانى لزوم النشأه ...رحت باعت الكارت ده على عنوانى البريدى البديل على الياهوو فلم يتعرف الواد الجالس على باب ال123 على شخصى المتنكر وراح قابل الرسالة وقال لى انه باعتها خلاص ...بس على فين ؟ على عنوانى "الياهووهى" ...وعشان اتأكد انه اتبعت قلت افتحه وبعدين ابعته "لفيدو" صاحبى فوروارد ..قوم الواد 123 ميقدرشى يقوللى انه غلط طبعا لأنى دايما ابعت من العنوان ده
المهم اثناء محاولاتى العصبية عملت دابل كليك على الناحية اليمين راحت طالعالى لسته مانيش عارف جت منين وفجأه لقيت الكارت منشور على البلوج اللى بقى لى سنه مافتحتوش ولقيت البتاع متبروز ومنشور ...يادى الفضايح ...هذا سر هذا البوست غير المقصود والذى نشر عنوة وبغير قصد ...وقال ايه بيقوللى اترك تعليقك على هذا البوسط ....العيال بتوع 123 عوزين لهم قصيده هجاء حاقول فيها كلام موش كويس عشانهم
وربنا مايفضح لكو كارت

أحــوال الهـوي said...

و الله ياباشمهندس
انا نفسي ابوس الواد بتاع 123
لانه عمل عمل جليل لي شخصيا
لانك واحشني جدا و مش عارف اسال مين او اتصل بجنابك ازاي

ومن حسن حظي
اني لقيتك معلق عندي

يا استاذنا و حبيب قلبي
ياريت اطمن عليك و علي حفيدك وسيلة تواصلنا هي المدونه اللي العنكبوت عشش فيها وانا سالت العنكبوت قال ماشافكش من زمان يارب يكرمك لانك طمنتني عليك

eallam@isam.com.sa

تحياتي

Anonymous said...

ماكسمان العظيم
--------------
نفس شعور دكتور عصام بالامتنان والشكر للواد بتاع
123
برافو برافو انه اعادك الينا وقد يئست منا الظنون

هلا بالشباب ولا اسكت لل الله حسا

أود لو انك جمعت تلك المغامرات الصغيرة فى ملف هو والقنبلة الفولية وناتعثرت فيه من طرائف خلال مشوارك

سنرى بعد كيف ننشره

تحياتى

maxbeta3zaman said...

أخونا أحوال
مثلى فى ذلك مثل اللمبى الذى نام وقام فوجدنفسه فى اسطنبول
من غير معرفة بما حدث ...طبعا سعادتى بمروركم تفوق كل ماعانيت وخبطت ورقعت فى الزراير ...كما كانت فرصة إطلالة على المدونات والدكاكين التى اشتقنا لتصفحها والتواصل من خلالها
أهلا بأحوال
مر علينا ومال

maxbeta3zaman said...

تشريف الشريف لصحبه شرف
لا تبوس الواد "123حياك الله" ده ...انه ولد خبيث وبتاع مقالب يا راجل ده كان حايطلعنى من هدومى عمللى زى الشخابيط وانت مين ياللى انا موش عارفك ..عارف نكتة "حسنين اللى مسافر فى قطرالساعة 2 "...أنا كنت ذلك الحسنين ...عارف لما تعوم تعوم وترجع لورا برضه .... أنا بس عاوز افكرك بحاجة كده لزوم العوم بينى وبينك ....فاكر المايوه الصوف الملىء بالرمال ماركة ..... اوعى تكون نسيت واشوفك يوم لقاء الدفعة فى دار أ.ذفى صلاح سالم اوعى تنسى

mostafa rayan said...

حسنا سوف ننتظر القصيدة
ههههههههه
بس في سؤال يعنى ايه (الياهووهى) وكمان يعنى ايه "جيهه" معلش اعذر جهلي
تحياتى لك يا استاذي ودمت بكل الخير

maxbeta3zaman said...

شرح المعانى والبيان.. لابننا سامى ريان
أما "الياهوهى" فالمقصود بها صندوق البريد على "الياهوه ميل" أو مايسميه الفرنجه "الياهووه ميل بوكس "وهى صفة لصندوق البريد من عندى زى :اليابانى والهندى والتايلندى وهكذا.. أما كلمة جيهه" فلا أظن أن الأجيال الجديده تعرفها حتى الاسكندرانيه منهم ...جيهه تعنى ياسيدى وهى المرادف لابن حتتى وابن الحى وابن الشارع المجاور وابن المنطقة والمدينه التى أنا منها ...كنا فى صبانا نسمع الغلام اذا تكاثر عليه الغرباء ليضربوه يصرخ صرخة واحده "جيهه" فإذا بكل الغلمان والجيران يهبون للنجده ...وكانت نفس الكلمة تستخدم للنداء عصرا على قريق الكرة الشراب للنزول ولعب مباراة كسر عين مع فريق الأحياء المجاوره فى حى محرم بك فى الوسعايه وفى شارع المنزلاوى والظاهر والمعز وعند المحكمه لعب فطاحل نادى الاتحاد والأوليمبى اقوى المباريات على "كأس من صفيح" ..وأذكر منهم الكاس الصغير وهو الذى لعب مؤخرا للزمالك وأخوه الكاس الكبير والبحر جسور وعز الدين يعقوب وفؤاد مرسىوأحمد خليل الشهير بزهره والبورىكلهم كانوا نجوم ..وقد كنا نسمع وقتها الناس التى تهتف أثناء انتخابات مجلس " الأمه" وهذا كان اسمه وقتها كانو يهتفون للمرشح بقولهم :
" ابن الجيهه أولى بيها" أى ابن الحته اولى بالكرسى من الغريب لا أعتقد أن هذه المصطلحات ورثت أو حتى تم تداولها بين الأجيال التاليه لقد حل محلها: كبر واحلق له والطحن وآخر حاجه ولول وكوووول والحكرته والقشفره وفركش وبينا موبايلات ويالا باى.. طبعا ده لزوم تطور الدنيا وعصر المعلومات وبما انك شاب فلا بد ان تغيب عنك تلك الأشياء القديمه ... أما القصيدة اذا اردت التعرف على شىء من الزجل الهجاءى الذى قلته فى مناسبه مشابهه لما حدث هنا فارجع لبوست قديم عندى ربما فى 2009 .. واسمه زجلو بلوج 2 حيث غاظنى البلوج ورفض دخولى لمدونتى فكتبت فيه ابياتا مملوءة بالغيظ والغضب ان اردت اقرأ فهى عينه مما يمكنى قوله عندما يغيظنى النت أو الحاسوب ويزرجن معايا .. ياه العمليه كبرت ووسعت منى... يالا باى

سكة سفر said...

فعلا حمد الله ع سلامتك .. دخلت كتير و مش لقيت جديد بس الحمد لله انك نورت تانى و يارب دايما الانوار لا تنقطع و حمد الله ع سلامة الكارت من رحلته المكوكية

maxbeta3zaman said...

سكة سفر
والله ياسكة يابنتى انى عدت بغلطة غريبه وسعيد انها جرتنى للقراءة والتجول ربنا يكرمك ولا يقطع عنك ابدا لا نور ولا مايه ولا غاز طبيعى ...والحمد لله الكارت وصل لص3ديقى وشكرنى عليه بس ما عرفشى لدلوقتى ماحدث لهذا الكارت العجيب
أهلا بسكة سفر ودايما رايح جاى ...وبالمناسبة هل تعرفى حكاية ذهاب وايهاب ؟؟

فشكووول said...

اهلا عم ماكس
يا راجل اشرقت الانوار
والدنيا كانت ضلمه
وكنت بعت منادى ينادى ويقول يا ولاد الحلال
عمكم ماكس ما حدش شافه يمين ولا شمال
ويروح المنادى ونجيب منادى اخر ولا حس ولا خبر
لحد الـ 123
يظهر والله اعلم سمع منادى بينادى ويسأل عن ماكس بتاع زمان فعمل فيك الفصل البارد ده ورجعك لنا تانى
وبالرغم من الحوسه اللى انت كنت فيها واللخبطه .. برضه الواد 123 عمل فينا جميل كبير .. اصل ماكناش لاقيينك لا فى سلقط ولا فى ملقط
نورتنا وما تبقاش تغيب كدا تانى عننا.. اصل والله وحشتنا

تحياتنا

maxbeta3zaman said...

هع هع هع هع
هذا نص ما جاءنا من 123 اننى فتحت
الكارت المرسل "منى برضه لنفسى" طب كان ماله لو بعته مباشرة لصاحبه يا أخى بدل الدوخه
feedo [max_mahdy@yahoo.com] has just viewed the ecard (06805210505656856427) you sent on 05-Jun-2010

Check out the latest additions to our already existing gallery of over 20,000 ecards for 3,000 seasonal and everyday categories

You can schedule your ecards so you won't miss anyone's birthday or forget to greet them for the holidays. خد بالك من" يو وانت هيس" هى دى مربط الفرس وهى الدوخه والنرفزه كلها

Plus we really value your feedback, so leave us a comment or give us a thumbs-up any time!

Thank you for choosing 123Greetings.comلا شكر على واجب ياخويا ده انت طلعت خبيث

Your friends at 123Greetings.com
http://www.123greetings.com
وهنا الفشرة الكبرى
We respect your privacy. You will not be receiving any promotional emails from us
because of this ecard. To view our privacy policy, click on the link below:
برايفسى ايه وبتاع ايه دا انتو خلتوها عالبحرى وجننتونى معاكم بس غلبتكو برضه يا 123حياك الله

maxbeta3zaman said...

فشكول
أبا الفشاكيل حى على الفلاح
وبالنبابيت والشوم السلاح
وهيا نمتطى قارب وزودياك
نحرر مرمره عند الصباح
فكم من نملة غلبت عتلا
اذا نخرت بإصرار يا صاح

محمود المصرى said...

موضوعك شيق بس خالى بالك من غدر الواد 123 وخليكوا من بعيد لبعيد
ارجوا نكون اصدقاء وتيجى تزورنى وتشوف موضوعى الجديد ومتنساش التعليق
اخوك
محمود المصرى

maxbeta3zaman said...

محمود المصرى كريم العتصرين
وأحد بناة المجد بين الأهرامين
أهلا بك فى دكاننا الذى كان مغلقا لعدم دفع الضرايب العقاريه وعدم وجود النفس بكسر النون المشدده ولكن الواد 123 حياك الله هو اللى نرفزنى وفضحنى ونشر جواباتى على الملا من غير إذن ولا هلا ...وطبعا سأكون صديقك وحاجى وازورك واجيب معايا كيس مشمش من اللى مالى السوق وبالمناسبه هل قرأت قصيدة الأبنودى أنا المصرى كريم العنصرين يا مصرى ....ارجع عندى هنا شويه تلااقيها منشوره حاتعجبك

حاجات جوايا said...

يااااااه 123 جريتينج
هو لسه عايش

كنت بستخدمه زمان انا واصحابى فى ارسالى البطاقات بس ايامها مكنش لسه فيه مدونات
فمش عارفة هو دخلك عالمدونة ازاى

عموما ولا يهمك ايه يعنى حضرتك محرج ليه
ده على راى د عصام " احوال الهوى " له الفضل بعد ربنا ان حضرتك تكتب البوست ده وترجع للمدونة واتعرف بحضرتك

حضرتك شرفتنى بالزيارة
دمت بكل الخير

Unknown said...

الله يسامحك ياماكس
يبتاع زمان
ودلوقتى وبكرة كمان
زى ما سمعت صوتى للجيران
ويمكن وصل لحد الميدان
من الضحك على المعركة
بينك وبين
123جريتنج الكربان
لكن برضه بنشكرك وبنشكره
وبنقدمله الشكر والعرفان
انه خلانا نستمتع
بالبوست التموووووومام

maxbeta3zaman said...

والله يانورهاتى والتى نفدت بأعجوبه م الامتحاناتى
اذا كنتو ضحكتو على الكارت التائه ده فأنا اتفرست من الجماعه دول غاظونى جدا كنت كمن يجدف بمجداف فيرجع للوراء وكل مااتنرفز.. العمليه تعك اكتر ...وأهل الجريتنج دول كأنهم قاعدين بيضحكو على الحوسه اللى كنت فيها ياللا اهو كله بثوابه وفيدو انشكح م الكارت من غير مايعرف اللى حصللو

محمود المصرى said...

فعلاَ القصيده عجبتنى وهى فى منتهى الجمال واشكر ذوقك ويارب تكتب الجدي بقى احسن احنا مشتقين
متنساش موضوعى الجديد ومتنساش التعليق لاْن راْيك يهمنى
اخوك
محمود المصرى

العلم نور said...

عايزين الولايات المتحدة الإسلامية تقوم لازم نودود لبعضنا عشان تقوم ..

ودود يا ودود .. وَدوِد .. ودوادا .. وَد (بفتح الواو).. وِد .. (بكسر الواو)

لازم تتودوادو بها (اشتغلوا وسبحوا بها .. صبح وليل .. ليل وصبح .. داخله خارجه .. خارجه داخله) وانشروها.

maxbeta3zaman said...

محمود المصرى كريم العنصرين
أعجبتك القصيده فالحمد لله... طبعا الأبنودى موش ناقصه رايك ولا رأيى فهو قامة شامخة فى الشعر المعاصر ...أما الجدى بتشديد الدال المكسوره فله ناسه أما قلمنا فائق التواضع فيمزج بين الجد والمزح بما يخفف من وطء الواقع المرير وإحياءا لذكريات زمن كانت الدنيا فيه أقل ضوضاء وزحاما وعراكا ونفاقا وبهدلة وعبوسا وكآبة وغيظا

maxbeta3zaman said...

أم الخلود رئيسة الولايات المتحده الإسلاميه الاشتراكيه والشعبيه
نقول معك ياودود يارحيم... وفى نفس الوقت نود أن تتزامن هذه الدعوات مع نهضة فكريه وعلميه وثقافيه تحيى أمجاد أمة سادت... ثم نامت... فداستها الأقدام ...كل الأقدام

soly88 said...

العزيز ماكس
عود أحمد
كم هى رائعه تشبيهاتك
اسلوبك الكوميدى راقى وممتع

maxbeta3zaman said...

soly 88
عزيزى صاحب المذكره واليوميات العجيبه والمليئه بالخواطر تشرفنا بزيارتكم وتقريظكم الذى أخجل تواضعنا ما أنا الا بتاع حكاوى.. اصيد الفكاهة من الواقع المعاش

عين فى الجنة said...

من زمان ماضحكتش بالمنظر ده
تحية لك على الموضوع والبلوج الظريف

maxbeta3zaman said...

راجى ...وقد عدت أدراجى
دايما ياراجى من العذاب والضنا ناجى وربنا مايوقعك فى خصومه ولا عداوه مع الحاسوب ولا البلاليج ولا 123 حياك الله
انا موش عارف ايه اللى بينى وبين الناس دى يمكن انا اللى موش عارف اسوق وصوابعى موش بالخفه ولا اللياقه بتاعة ميسى ولا رولاندينهو وبشوط فى الآوت وكمان باتغاظ بسرعه ...سعيد باننى كنت سببا فى ابتسامك ولو بعد حين

About Me

My photo
أحب الثقافة والفنون والشعر وتبادل الأفكار النافعة والهوايات المتعددة والمصنوعات اليدوية والرسم والمسرح والأغانى القديمة ذات المعانى الراقية والأفلام الكوميدية اتقن الكثير من الأعمال اليدوية (اصنع بنفسك )واهوى أصلاح أى معدة تتلف : حته جديده بقى أنا الماكس فى أحشائه الضحك كامن فهل ساءلوا بلوجاتى عن طرفاتى