انه دكان للخردوات نبيع فيه الخواطر والذكريات.. ونشارك بالقصص ونقرأ من خلاله أفكار اهل الدكاكين المجاوره ونسمع منهم كما نحكى لهم - هو مكان لتواصل جيل أوشك على الرحيل مع جيل هو بطل المستقبل القريب ...

Thursday, July 1, 2010

الى كندا ...بدلا من القعاد عالكنبه







خلا البيت من الأولاد ...تزوج كبيرهم وسكن فى القاهره ..ولحقه الثانى وانتقل للقاهرة للعمل فى أحد مكاتبها الهندسيه عدنا كما بدأنا هدوء فى البيت لا يقطعه الا صوت المذبع جوووووووون يانهار آآآآآآبيااااااض ...هالله هالله...وفجأة تأتينى مكالمة من زوجتى وأنا فى المكتب ...ما رأيك نطلع رحلة من المعلن عنها فى الجرنال لحسن السنه دى كانت مليانه ضغوط ونكد وحوادث ودكاتره يعنى لما استوينا ..طيب فين الرحله ..براغ وميونيخ وبلد مش فاكرها فى النمسا ...كلم عبده آوت جوينج ...اسمه كده فعلا طلبت نمره اعطتها لى زوجتى رد صوت نسائى على الطرف الآخر ميونيخ؟ تبقى مع عبده آوت جوينج معاك عبده آوت جوينج ...انا قلت باينى اتصلت بوزارة الخارجيه!! ايه العروض اللى عندك يا عبده ... فال معنديش وقت اتكلم كتير!! عندك ميل ؟ طبعا دانا ماكس بتاع زمان البلاليجى المعروف...ملليهولى شكرا وقفل ...معجبنيش آوت جوينج مخدش وادى معايا ..صبرت لجل المودام متزعلشى جاء الميل وفيه العروض والأسعار ذات البنود المخفيه والمصاريف المستخبيه وأى مزار على المستهلك حتى الطبيخ والمكوه وربما غسل الأطباق كله بحسابه ...ولما ضربتها فى مخى لقيت اننا حانترمى فى فندق وبعد يومين كده يالللا على الباص مفيش وقت اللى بعده ...شغلت مخى وقلت طب ليه ماخدش رأى صديقى استاذ الكرسى فى جامعة كارلتون؟ هو فى الحقيقه استاذ كنبه لأن حلمى زاد وزنه جدا جدا ويحتاج لكرسى عريض جدا ...بمجرد أن عرضت عليه الفكره فى ميل عاجل بادر بعد ساعة واحده بإرسال دعوة شخصيه لى ولزوجتى لزيارة كندا موجهة للسفاره بالقاهرة ...فوجئت بالدعوه برينت ياجدع طب فين الأبلكيشن خش عالنت وهاته موجود بى دى اف املا اطبع صورك واطلع على مصر فى قطر العصر..وم الفجر على باب السفاره فى جردل سيتى يوم حار جدا وصلت فجرا لقيت نفسى رقم 26 فى كشف يقوم برصده أحد المتقدمين .. الأمن حاسم والعمال يمسحون السلالم ...أمامى ساعتين على مايفتحوا فى الثامنه مراجعة فى كتالوج الفيزا المكون من 14 صفحه الملو كده والسؤالات كده والصور لازم على خلفيه بيضا ووشك اللى زى القمر على مسافة 3 مللى وخمسه وسبعين ميكرون من الحافه وكتافك باينه واوعى يكون وشك معووج ذات اليمين أو ذات الشمال لقيت فيه دول معفيه من الفيزا مثل بتسوانا وأى جزيره بريطانيه فى أى محيط وطبعا اسرائيل دول بيفوتو فى الحيط من غير باظبورطات!! و دول غلبانه جدا معفيه ودول تاريخيه جدا تخش فى الطوابير المهم جاء الفرج وبدأت الفتاه السكعوريتى ام عصايه كاشفه للديناميت ترص طالبى القرب من كندا فى طابور 1-2- 3- والأسماء تنادى والسلم لا يسع سوى سبعه والباقى فى الشارع طابور افعوانى ...يظهر شخص تبدو عليه سيماء الخبرة الكنديه الفيزيه ويقول كله معاه ورقة الاتشك ليست ...يصيح الجميع ليست ايه ياخويا ؟...زى دى ياجماعه ...يرفعها فى الهواء ...يتسابق الجميع فى التوسل محدش معاه واحده فاضيه نصورها ؟؟ انا معايا واحده ومليها بالرصاص ..طيران على مكتبة التصوير ...سؤال تانى من الست أم عصايه السكعوريتى ...اللى مامهاهوش نموذج 5و 6 يروح يجيبهم ويملاهم مافيش دخول جوه من غيرهم ...طب هم ايه ..الأديشنال والإكستينشن بيبر ...يصيح الحضور ..بس دول موش على النت ....لا لازم دول.. الورق يرجع من غيرهم ماتضيعوش وقتكم ...يسألها أحد الشباب منين النموذجين دول؟ توشوشه فى ودنه فيجرى لآخر الشارع ويعود ومعه ورقتين مكرمشتين ...لايبدوان من ورق كندا خالص وانما هما أقرب لقراطيس اللب منهم الى ورق فيزا ..سمح له باجتياز الباب الأمنى لما أظهرهما .. وسالناه قبل اختفائه من اين لك بالوصفة السحريه ...شاور ناحية الشمال فى الآخر واحد بيبيعهم اسمه رؤوف ...اسم جميل ...توجهت سائلا محدش يعرف محل رؤوف الذى يملك الورقه الماسيه ؟ محل هىء هىء هىء ...امشى كده تلاقيه مشيت طويلا فى شوارع جردل سيتى المعوجه ...فبرز لى من وسط العربيات فتى قصير يعرف من المنظر المتلهف والدوسيه المطوى مدمنى النموذج الذى ليس بعده نموذج ...قال اصلهم بيعاكسونى ..وأشار لى بالركوب فى سيارة هوندا فاخره وقال: على الكرسى بجوارك النماذج كلها شوف اللى انت عاوزه ...6و 5 يارؤوف لو سمحت..! خدهم ...شكرته جدا وقلت كام ؟تمنهم ؟وأنا بسذاجة اطلع فكه قلت حايقوللى 75 قرش والا جنيه اذا به يشير لى بيده المليئة بالورقات من فئة المائة جنيه 30 جنيه بس عشان خاطرك ...أدخلت الفكه وأخرجت 50 فقال فكه فكه ملوحا بالمئات المطبقه بين أصابعه ...فتشت كل جيوبى على ماجمعت له ال30 ونظرت فى الورقه اذا بها نموذج عتيق مهلهل يحوى اسماء الأب والأم والأخوات وتاريخهم الإجرامى ان وجد وجريت أدعو على رؤوف ومعاونيه فى هذا النصب العلنى المشترك ..(السكعوريتى مع رؤوف) دلفت للداخل بعد اطمئنانها على الورقتين ام 30 ووجدت كل من دخل على كراسى انتظار وشباكين للفحص زوار كندا كثر جلس بجوارى شاب حاصل على دكتوراه من فرنسا وأصبح كنديا ومعه جواز كندى لكن ذلك لم يشفع له نفس النصب الخارجى طبق عليه .. كان كل خوفى ان تتأخر الفيزا كما هو مكتوب" شهر" ..وذلك يلغى خطتى لأنى أريد السفر والعوده قبل رمضان ...جاء دورى عند فتاة هادئه مبتسمه سؤالين فقط وابتسامه واتفضل ادفع الرسوم ..طب امتى استلم الفيزا ...خلال 3 أيام ماكسيمام.. الله يمكسم لك الخير يابنتى يعنى اروح ...أومأت برأسها نعم ...خرجت من السفاره منتشيا ذلك أننى عندما أخذت فيزا لأمريكا عام 2005 البنت اللى كانت فى الشباك كانت صفيقه ومستفزه وأسئلتها أكثر استفزازا ..لكن بنات السفاره الكنديه اكثر زوقا ورقه ..الدنيا حر جدا لم استطع حتى المرور على ولدى لوداعه عالسوبرجيت ياسطى ...فى الثامنه صباح اليوم التالى تليفون يرن فى المكتب انت فولان أيوه لك طرد من سفارة كندا وهكذا لم يستغرق الموضوع برمته 72 ساعه من وقت طققان الفكره فى النفوخ لحد الحصول على الفيزا شىء الكترونى فعلا دخلت بعدها فى دوامة حجز التذاكر من النت كل ماجى ادوس على زرار" بوووك" تروح الدنيا مضلمه بعد ماكون حطيت رقم الفيزا وعنوانى والبلاوى اللى يتمناها أى هاكر لئيم ...ابعت شكوى للإكسبيديا وموقع تشيب تيكيت ...يردوا على: بحثنا فلم نجد أى حجز باسمك ايها الشاكى الباكى ..شكرا لاستخدامك اكسبيديا دوت كوم ....3 أيام خميس وجمعه وسبت وأنا فى حرب طاحنه تشبه حرب اكتوبر العظيم مع النت والمواقع أم تذاكر طيران واشى سيل وخصومات كله فى الهجايص لم ينقذنى يوم الأحد سوى الشهم صاحب كلاسى تورز الذى وصلنى لأفضل سعر على خطوط محترمه.. وهكذا تم التخطيط المهرول لرحلة كندا التى لم تكن على البال ولا على الخاطر الى أوتاوا وتورونتو نطير ونعود مع عيد ثورة يوليو المجيده والى يحيى وهانى أصدقائى وجيرانى سكان تورنتو اهدى هذه السطور


ياأهل تورنتو


انتو ياناس انتو


ازاى هنا سكنتو


طب ما حنا كنا جيران


التلج فوق منكم


والبرد قارصكم


والخضره حارسكم


من كل انس وجان


واسعه ومايتها


ماليه بحيراتها

وجبالها وغابتها


تيجى تلتميت فدان

4 comments:

أم الخـلود said...

رحلة موفقة .. ولكن القيام بها كان حافل جدا ولم يخطر على البال

سكة سفر said...

اولا اشكرك جدا على تشريفك لمدونتى المتواضعة و على " ابنتى " التى امطرتنى بها مما يزيدنى شرفا

و ثانيا رحلة سعيدة موفقة جميلة عليك و على زوجتك و ترجعولنا بألف سلامة

maxbeta3zaman said...

OM ELKOLOOD
SORRY FOR WRITING IN ENGLISH THE REASON THAT IAM REPLYING FROM OTTOWA WHERE COMPUTERS HAVE ARABIC KEYS
ACTUALLY WE ENJOIED THE TOUR VERY MUCH SPECIALLY TORONTO THE BIG CITY & LIKE YOU SAID EVERY THING CAME SUDDENLY IN A WEEK OR SO
THANKS FOR VISIT

maxbeta3zaman said...

Sekket safar
the honour is ours dear daughter - Usually I syy frakly my openion when it comes to poems or posts that I find reflecting real talant & the lines I read in your posts are of that kind >>>> thanks to you for your kind words & wishes
when i come back I;ll switch back my tongue to the normal language "Arabic "

About Me

My photo
أحب الثقافة والفنون والشعر وتبادل الأفكار النافعة والهوايات المتعددة والمصنوعات اليدوية والرسم والمسرح والأغانى القديمة ذات المعانى الراقية والأفلام الكوميدية اتقن الكثير من الأعمال اليدوية (اصنع بنفسك )واهوى أصلاح أى معدة تتلف : حته جديده بقى أنا الماكس فى أحشائه الضحك كامن فهل ساءلوا بلوجاتى عن طرفاتى