انه دكان للخردوات نبيع فيه الخواطر والذكريات.. ونشارك بالقصص ونقرأ من خلاله أفكار اهل الدكاكين المجاوره ونسمع منهم كما نحكى لهم - هو مكان لتواصل جيل أوشك على الرحيل مع جيل هو بطل المستقبل القريب ...

Thursday, March 19, 2009

أختراع أعجبنى

بينما أنا مستغرق فى قراءة البريد ..إذا بخطاب من صديقى المهاجر لكندا يدل عنوانه على اختراع مصرى وفكرة فريدة تجعل ركن السيارة بالمقدمة سهلا جدا ...وفى مكان على مقاسها بالضبط ومن المفترض أن يتم بعدة مناورات بالظهر قد تزيد على 10 محاولات نظرا لضيق المكان ...كما أن المبتكر الذى يستحق كل التقدير على فكرته جربها أيضا فى الخروج السلس من نفس المكان الضيق ...تحية منى لذلك المبتكر الذى لا أعرف اسمه ولكنى افهم بلا شك الجهد المبذول حتى تمام الوصول لهذه النتيجة والفكرة الرائعة فتفضلوا بمشاهدة الفيلم القصير المرفق والذى يوضح الفكرة ....من مثل هؤلاء تأتى أعظم الأفكار ..وأكثر ما أسعدنى صدوره من مصر

37 comments:

شمس النهار said...

مش ممكن فكره لطيفه جدا ومضحكه بس هل هتنفع في كل العربيات الكبيره
عشان دي عربيه صغيره خالص فاسهل التغيير فيها اعتقد يعني انا مش خبيره

Unknown said...

السلام عليكم ورحمة
الله تعالى وبركاته
حقا لو الاختراع قابل للتحقيق
او للتنفيذ على المستوى الاقتصادى
وقدر هو الموظف أو اى جهة تتبناه لتحقيقهاالوصول الى شركات تصنيع السيارات تبقى فعلا فكرة هايلة ووممتازة
(وليلة القدر اتفتحت للموظف ده
زى ما تفتحت قبل كده
(لعمنا بيل جيتس)
وكم فيكِ يامصر من
المواهب المدفونة
المحتاجة حد يكتشفها:)
وشكراً يامكس بتاع زمان
والنهاردة وبكرة كمان

doctor mohamad said...

طيب _ أنا باتصفح ع الموبايل و علشان أشوف الفيديو بتبقى قصة طويلة عريضة .. هو الفيديو ماينفعش يتشرح؟ .. نبذة صغيرة كدا يعنى .. يا إما بقى أستنى لحد ما أروح نت كافى .. شوقتونا كدا! .. ربنا ما يكتب عليكم التصفح بالموبايل.

Empress appy said...

يا ريت انا اكتر واحد بتتعقد من الموضوع ده وخاصه كنت هبطح جارى بسبب لزقه عربيته فى عربيتى بالغم من ان عربيتى صغيرة

Anonymous said...
This comment has been removed by the author.
Anonymous said...

يذكرنى هذا الموضوع بيوم وصلت ورش سبعة لقيت مجموعة كبار المهندسين عندى فى ورشة التجهيزات قيادتى

ناطين فوق عربية زيل وكل واحد ماسك مازورة ترزى وبيقيسوا فى الهواء .. وبيقولوا لبعض ينفع ينفع

ايه بقى اللى ينفع؟ يركبوا محركات نصر لكل عربيات الزيل
طبعا البروتوتايب اللى جربته استلزم
اطالة بوز العربية نظرا لاصطدام مكان طلمبة الزيت للنصر بكورونة الزيل الامامية
وتغيير الجيربوكس والكورونة الخلفية بأخرى نصر عشان الـ
reductiion ratio
مختلف .. ورفع الكابينة سنة عشان المجموعة تبقى مستريحة .. يعنى كابوس توقف بقدرة قادر

على ان الفكرة حل رائع لمطلب ملح .. الا ان الحماس لايمنعنى من سؤال .. اين تذهب تلك العجلة المدهشة؟ وهل هذا على حساب الشنطة؟ ومن اين يأتيها الدرايف والسيارة بالتأكيد جر امامى ؟.. كردان اضافى او وصلة؟ وكيف هى توزيعة كل المكونات داخل ارضية السيارة؟

اتحدث اليك صديقى باعتبارنا فى الاساس مهندسو سيارات ..
ومع خالص تقديرى لهذا الموظف .. الا ان هذا عمل مهندسى السيارات الذين فشلوا الى الآن فى صناعة سيارة صنع فى مصر

كلنا نعشق بلدنا .. ونتمنى لها الرقى .. لكن ليس على طريقة تركيب موتور بيركينز على عربية جاز 53 فى الارياف

... amr said...

جامدة جدا ... بس الفكرة انها تنفع كمان للعربيات الكبيرة كمان ... هيبقى أشد و أشد ... بس الخوف كل الخوف بصراحة انهم - لامؤاخذة - يفطسوا الموضوع .. بدلا من محاولة احتضانة و تطويرة ان أمكن

maxbeta3zaman said...

شمس النهار
هى فكرة أملتها ظروف الزحام وحرب حجز مكان للركن ..الواحد بيخاف يطلع بالسيارة مشوار بعد الظهر يرجع مايلقاش مكان للركن ...الناس بتبقى لابده ورا الشبابيك ..." واد ياتامر اجرى حط العربية فيه واحد مشى " ..
والفكرة جيده وممكن تركيبها بطريقة أو أخرى فى عربات أكبر بحيث يستغل الاستبن فى ذلك وينزل آليا من موضعه ثم يعود بعد أداء المهمة

maxbeta3zaman said...

نورهاتى
فعلا تبقى "ندر ما ندر "..كما فعل اسماعيل يس مع احمد مظهر فى "العتبة الخضرا" ومن الممكن تنفيذها بدقة أعلى من قبل الشركات المنتجة ...فقط لو وجدوا لها لزوم عند شعوب تعانى من زحام المواقف الشارعية مثلنا ..المهم تكون لمصر السبق فى" صاحب الاختراع الفظيع.. لأغراض الركن السريع "

maxbeta3zaman said...

doctor mohamad
طبعا ممكن يتشرح بالكلمات يامحمد
هى عجلة احتياطية ...تتدلى من مؤخرة العربية ..فتنزل على الأرض ...موش طولى لأ بالعرض ...فتعمل علىسرعةالركن بسرعة كحلاقة الذقن ..وتخش ف مكانها بالمقاس ...كما الرجل فى المداس
وفى الطلوع برضه لهلوبه ..حتى لو تحت العجل فيه طوبه ...أظن كده الأمور واضحة

maxbeta3zaman said...

Appy
خلاص مضى زمن البطح ..وجاء زمن الركن بالمللى ,,,حيث تقاس المسافة بين الاكصدامات بورق البافرة ..وما بين الجنب والرصيف بشعرة الراس

Beram ElMasry said...

اخى وحبيبى شارك بالتعليق على موضوع السلام فقولك مفيد ان شاء الله

doctor mohamad said...

طبعا حلوة و واضحة .. كاللحمة ف عيد الأضحى .. فكرة جميلة و هادفة .. تستاهل مليون صقفة .. راح تختصر الأوقات .. و هتختصر المسافات .. و هتفرح عم الأسطى .. و هتبسطه آخر بسطه.

فشكووول said...

السلام عليكم ماكس بتاع زمان
والله الراجل ده عبقرى
ما حدش يفكر الفكره الجميله دى
عجله من الخلف تشيل العربيه وتحطها مطرح ما انت عايزها
تحياتى لهذا العبقرى المصرى
يا استاذ ماكس عندنا الافكار كتيره
لكن ازاى تطلع للنور
واحنا مخنوقين وروحنا حتطلع من جسمنا
تحياتى

maxbeta3zaman said...

شريف الذى هو فى الأصل عبدين وفى الصورة نجيب بك محفوظ ...والشىء بالشىء يذكر فقد حولنا وفى توقيت مماثل أتوبيسات الوارد الأمريكانى الى العمل بمحركات الجاز 66 الروسى مع تطويل الكردان وتعديل القواعد وعملنا الوحدة غير المسبوقة بين الشرق والغرب واقتيد رتل من الباصات الغربوشرقية الى مقر القائد الهمام الذى سر بها أيما سرور وفزنا بكوفرته على ما افتكر ...أما بخصوص الdrive
اغلب الظن انه هيدروليكى واحد بمب وواحد هيدروليك سلندر وواحد هيروليك موتور وكونترول فالف ويمكن استخدام ط الباور استيرنج فى ذلك ...طبعا يمكن تعديل وضع العجلة بحيث ترفع وتميل لتسكن فى مكانها الطبيعى كاستبن ولا تنزل الا فى وقت الركن المزنوق
فاكر رشاش المبيدات بتاع نادى الرياض اللى عملناه سوا ؟؟...والا فاكر أزمة انسداد صرف عشب الاستاد عندك اللى استخدمناله فكرة المياه المندفعة من باشبورى زى بتاعة الساتر الترابى 73
والا العربية الجيمس الاتوماتيك اللى رازوك بيها وكان النزول منها يشبه النزول من فوق السطوح ....ايه أيام

maxbeta3zaman said...

عمرو
لا هى متحركة جدا ..وتنفع كمان للعربات الأكبر ..وتفيد جدا فى تفادى الكمين الليلى حيث تعمل للخلف در وتفلسع فى الاتجاه المضاد على كعبها إذا كان الواحد ناسى الرخصة مثلا أو عامل مخالفة م اللى بتودى اللومان ...طبعا لا أمل أن يتولى حد هنا مثل هذه الأفكار ممكن حد خارجى يتبنى المخترع ده لو اقتنع ...لأن تفطيس الأفكار أصبح واجب على كل مواطن ومواطنة فى بر مصر

maxbeta3zaman said...

Beram ElMasry
جايلك يابو البيارم وبالخطوة السريعة التى تشبه الهرولة لأن ركبتىواجعانى باين فيها تمزق" واحتمال خشونه "

maxbeta3zaman said...

fashkool
والله يا أخى الفشكول انا تعجبنى كل فكرة تعب فيها صاحبها وصابر حتى نفذها وقد ذكرنى هذا الموضوع بصباى فقد كانت أمنية عمرى أن أصبح مخترعا وكان لدى منبه صوته ضعيف فأردت تحويله ليعمل بالكهرباء فنزعت عقرب الدقائق وجعلت عقرب الساعات قطبا موجبا وعند الساعة 3 وضعت قطعة صلصال عليها نحاسة كقطب سالب وتقفل الدائرة عندما يلمس العقرب النحاسة فتشغل جرسا كهربيا من بتوع زمان ..كنت أحب العلوم جدا والرياضيات واخترعت ذلك لأصحو فى الفجر لاستكمل مذاكرتى ...ونمت سعيدا جدا بعد ضبطه على 4 ساعات نوم فقط ...وكاد قلبى أن ينخلع من مكانه لحظة أن دق فى نص الليل وصحا البيت كله ولم أعرف كيف أفصله فى الظلام ...كان اختراعا تافها لكنه كان مصدر سعادة ما بعدها سعادة انتهت تماما بعد ما رن رنته الأولى

Anonymous said...

العزيز ماكس
-----------
ياأخى انت تذكرنى باشياء هى احلى من قصص الف ليلة .. فانت تشدنى لاعود مهندسا وتذكرنا بهاتيك الايام .. بينما تحولنا بقدرة قادر الى مواهبنا الحقيقية القديمة كما يقول مسعد غانم

شاعر وزجال ومؤلف كمثلك وفيلسوف ومدير تحرير مجلة كمثله وقصاص ورسام كحالاتى .. مع بعض مواهب اخرى كالكاريكاتير

أذكرك صديقى بمجلة حائط كانت تدعى "شئ من الفكر" التى اخرجها مدحت ويحيى الوقدى رحمه الله وآخرون مثقفون جدا

وبعد التمحيص من جانبك .. شددت مقالا عنيفا عين حسوديا قلت انت فيه

فقد جاءت المجلة تحتوى على عصير الفكر "
المقدوح فى زيت الذهن المغلى
حتى ليقف الطالب امام المجلة فيبكى من شدة الفكر .. واننا نقترح ان يطلق عليها اسم
شئ من الذكر
او شيل من الفكر
"او كما قال

فعلا أيام

☼♫♪ عمــاد الدين يــوسف ☼♫♪ said...

ههههههههههههه
عمو ماكس الحبيب طبعا الحاجه ديما ام الاختراع ونظرا لساعة الذروة المصريه اللي هي عباره عن اليوم بطوله جاء اختراع ركن السيارة ده علامة مصرية مسجلة ...ومشجديد على العقل المصري خير جند الارض

تحياتي
وكنت عايز استأذن حضرتك بما ان راي حضرتك مهم جدا بالنسبالي كنت عايزك تزر اللينك ده وتقولي رايك بدون مجامله
http://www.ouregypt.us/Bemad/main.html

Unknown said...

يارب بس يدولوا حق براءة الاختراع

بس اختراع جميل تسلم ايده

وبجد افكار جميلة
وكمان انتا برضة مخترع ، مخترع مدونة هايلة
والبوست هاايل والمدونة جميلة جداً

Unknown said...

السلام عليكم ورحمة
الله تعالى وبركاته
وصباح الخير كمان
ماكس يابتاع زمان
ودلوقتى وبكره كمان
ايه اللى شاغلك اوى كده؟
لعله:) خير إن شاء الله
طمنا عليك وارجع
للاختراعات
وتنفيذها
تانى:)

maxbeta3zaman said...

شريف بك محفوظ
ههههههههه ضحكتنى ...أنا فاكر فى قرار قاع جمجمة الذاكرة انى كتبت شىء من هذا وعلقناه أو وزعناه على زمايلنا ..هو انت عترت على عدد من هذه المجلةالرصاص ذات الورقة الواحدة ؟ اللى يضحكنى أكثر بقى هو ذكريات القصة الخيالية التى كنا نتقاسم فقراتها سويا وبرعى دخل معانا " الأميرة موش عارف ايه" ...فقد أنهى برعى فقرته بأن "البطل وضعوه على الفراش وطلبوا النقاش" ...وكان قصده النقاش اى المفاوضات والجدال.. طبعا أنا لخيالى المتقمص لألف ليلة وليله والحرس والخدم قرأت الكلمة وكأنها اسم لبودى جارد اسمه النقاش بتشديد القاف ...فأكملت الفقرة كالآتى ...فدخل النقاش فاقتلعه من الفراش ...ونزل فيه ضرب لما ورم له قفاه ....برعى لما قرأ كمالتى وقع من الضحك لأن قصده كان غير ما فهمت تماما ..هكذا كان الحال فى خالى الأزمان

maxbeta3zaman said...

☼♫♪ عمــاد الدين يــوسف ☼♫♪
طبعا ذهبت وقرأت عدة مقالات وأرى ان لك قلم مميز ...واستغربت معرفتك بزميلنا مسعد غنيم فهو زميل كلية ودفعة ...وهو ده بتاع عصير الفكر وفيلسوف القضايا ...وما دمت معه فأنت من الأحرار يااحمد ...كما قيل فى رد قلبى"

ودائما للأمام ان شاء الله
وخالص أمنياتى

maxbeta3zaman said...

اصحى يا مصر : اسلام ديو
اهلا بك اسلام ..موش انت برضه صاحب قهوة عوم يا مصرى وسيناريو سرادق الانتخابات الذى احسبه من الطف ما قرأت ...والله يا أخى من صغرى وأنا أهوى الاختراعات فعلا وكثيرا ما تعاملت مع المشاكل الفنية بحلول غير تقليدية لكن أنا لم أخترع البلوج ...انتم الشباب مخترعيها وأنا مجرد ضيف لديكم أدلق كيزانا -جمع كوز - من حكاوى زمان أقدم ..وأقرأ فكر جيل تالى أعلم يقينا أنه الأفضل

maxbeta3zaman said...

نورهاتى ونورها دايما آتى
فعلا كنت فى سفر سببه الاختراعات أيضا كنت فى دورة تدريبية لمهندسى بورسعيد عن آخر ماوصلت إليه تكنولوجيا التحكم الالكترونى فى المحركات الديزل وهو مااستغرقنى تماما أحضر وأذاكر لأن الموضوع حديث جدا وقليل ما نشر عنه ..يعنى الاختراعات ورانا ورانا ..عدت اليوم لأجد تفتيش الأيزو فى انتظارى ..فنحن موصومون بمخالفة ميجور ...فقد نسينا التسجيل فى النموذج 12 و13 من نماذج الجودة الملعونه ..وإن لم نتب ونرجع عن ذلك الاثم الفظيع تسحب منا السعفة الذهبية ونصبح عديمو الأيزو وطريدو الجوده
هذا ما أخذنى من آل بلوج طول اسبوع أو يزيد ..ونشكركم على السؤال الذى لا يأتى الا من آل ورئبال

maxbeta3zaman said...

نظرة
نظرة وكنت احسبها سلام وتمر قوام
أتارى فيها بلوج تمام وكلام فوندام
لمحت اسمين من بينهم كنت عارفهم ماسكين لاقلام
وبيكتبو جوه البلاليج بوست وتعليق عند الأقوام
عالنظرة دى راح اروح واقرا واخد فكرة كده نبقى تمام
يمكن كمان آخد فترة وارجع بكرة تعبان ف حنام

mohamed ghalia said...

جميل فعلا إنى الفكرة من مصرى
يارب دايما
دمت بكل الود

فشكووول said...

ازيك يا استاذ ماكس
واحشنى
تحياتى

Beram ElMasry said...

الاخ العزيز . د. maxbeta3zaman
السلام عليكم ورحمة الله وبركاته
اهلا اهلا ومليون اهلا ، يارب الحفيد يكون بخير وتكون انجزت السرير بتاعه ، وتكون صرفت نظر عن موضوع التبادل ولد وبنت مش ناقصة قلق
سعدت جدا بعضورك
لك تحياتى ، ولا سلام مع اليهود

salma mohamed said...

آسفة على تاخر دخولي
وشكلي هيبقى بايخ اعلق على موضوع من فترة طويلة
بس برضه الموضوع يستاهل
بجد فكرة هايلة والانسان ده لازم حد يهتم بيه,
بس فعلا في اسئلة كتير محتاجة اجابة متعلقة بالموضوع

maxbeta3zaman said...

محمد غالية ..وزيارته أيضا غالية
أهلا بك محمد ..جميلة فكرة مدونتكم وما فيها وإن شاء الله نكون عندكم ..والمجموعة ..ومرحبا بكم

maxbeta3zaman said...

fashkool أخونا العزيز
أعتذر عن الغياب والكمون الجبرى لكنى أطل طلات خاطفة سارقا لحظات أمر على أخوتى وأحبائى من آل بلوج فلكم كل المودة

maxbeta3zaman said...

Beram ElMasry أخونا ذو الملاحم
وعليكم السلام ورحمة الله وبركاته
أم آدم - وهذا هو اسمه المتوقع - دخلت فى الشهر التاسع هذه الأيام وأنا بقى لى تقصير الحامل بتاع السرير لأنه طلع عالى وعميق بعض الشىء مما يصعب التقاط الطفل من داخله لذا فعلى استكماله بس الكسل واخدنى موش عارف ليه ...يظهر ان عبارتك الشهيرة لاسلام مع ...ستزداد ب ولا كلام مع الصهاينة خصوصا مع بيبى وليبرمان الذان سيحولونها ضلمه

maxbeta3zaman said...

salma mohamed بنيتى
ولا يهمك ..انت تفتحى الأكرة وتدخلى أى وقت ...ده احنا هنا واحد جارنا جايب عربية جديدة وغاليه ولم تمشى الا عشرين كيلو من التوكيل للبيت ركنها وغطاها ..فجاء واحد حاول يركن فى فراغ ضيق بجوارها ...راح خالع له الاكصدام والستارة ...وكلهم بلاستيك وفبر وكانت مشكلة ...عرفت فعلا قيمة الفكرة ... وياريتهم شافوها

Unknown said...

السلام عليكم ورحمة
الله تعالى وبركاته
سعادة الباشمهندس اركان حرب
لواء مدرع مدفعية ودبابات ومدرعات
ماكس بتاع زمان ودلوقتى وبكرة كمان
على رأى محمد حماقى بيغنى وبيقولك
( انا جايلك وناويها بظبط وقتيل ع الباب بخبط هتعملى ايه)فانا بعد اذنك عازمة حضرتك عندى فى المدونة
لك هدية عندى من فضلك
وكلام فى سرك كمان
فيه جااااتوة
وفيه عصييير

Unknown said...

السلام عليكم ورحمة
الله تعالى وبركاته
ماكس بتاع زمان ودلوقتى وبكرة كمان
مطلوب من حضرتك تنقل الاسئلة وتجاوبها
عندك هنا لاجل ما كل اصحابك واصدقائك
يعرفوا الحقائق الجميلة عنك واكيد هم عارفين بس زيادة تأكيد للمعرفة:)

About Me

My photo
أحب الثقافة والفنون والشعر وتبادل الأفكار النافعة والهوايات المتعددة والمصنوعات اليدوية والرسم والمسرح والأغانى القديمة ذات المعانى الراقية والأفلام الكوميدية اتقن الكثير من الأعمال اليدوية (اصنع بنفسك )واهوى أصلاح أى معدة تتلف : حته جديده بقى أنا الماكس فى أحشائه الضحك كامن فهل ساءلوا بلوجاتى عن طرفاتى