انه دكان للخردوات نبيع فيه الخواطر والذكريات.. ونشارك بالقصص ونقرأ من خلاله أفكار اهل الدكاكين المجاوره ونسمع منهم كما نحكى لهم - هو مكان لتواصل جيل أوشك على الرحيل مع جيل هو بطل المستقبل القريب ...

Monday, March 9, 2009

زجلو بلوج2



كان أن أنشأت بلوجا جديدا بدل الذي ضاع ...ولما فتحته!وفى كل مرة كنت أفتحه أجد مستطيلا يسألني أنا.. وكذا كل زائر عن تأكيد كلمة المرور وذلك ببعض الحروف المشخبطه والمعوجه والمشلفطة مما كان يرهقني وينرفزنى أنا وكل زائري البلوج ...وقد أهداني أحد المدونين طريقة محوه فتمكنت بعد العناء من إلقائه في البحر ونضفنا البلوج من هذا الكرسي المتعب ...وكانت الأبيات التالية تعبيرا عن الفرحة بإزالة هذا الكابوس والشكر لتيممى صاحب الطريقة :


وجدتها ..عملتها ..أزلتها ...مسحتها
ما أجمل الأساتيك

تمسح ....ولا تخليك

تزهق وتضرب بوز

كان عندي كرسي قعيد

جنبه حروف شخابيط

ولماكنت عبيط

ماعرفتش امسحهم

أوم شوفت واحد جار

عنده قلم... فرجار

أستيكه... سنها نار

شار لى... فعصت زرار

آم دوغرى ..ماسحهم

آللك سيتينج .كوممــنت

شو ورد ..نو..صممت

و ف ثانيه كان شالهم

فرحت انا وجريت

وفتحت باب البيت

عالبوسط انا بصيت

مالقيتشى ريحتهم

عقبال ماكل الناس

ماتشوفشى هذا الباس

دا زرار ماهوش كناس

نضف....... بلوجاتهم


..الموضوع التانى انى قد وصلتنى العديد من الدعوات من أصدقائى يدعونى كل منهم وهم كل من فى قائمة البريد عندى الى الانضمام لما يسمى"بالمالطيبلاى"..ولأنهم أصدقائى فأنا على التو بارحب وأقبل بس لقيت الأخ المالطى ده بيعمللى بروفايل وكلمة سر ..واروح انا مطاوعه وعامل كل شىء وكلمة سر رهيبه ..ولكن بعد 5 دقائق أكون نسيتها زى الجدع ..ألاقى واحد تانى باعتلى دعوة آجى أكتب له موافقة وكلمتين تحية ومحبه وترحاب لزوم الزوق يعنى يقوم المالطى سائلنى السؤال المحرج اياه ...سيادتك مين بالضبط ...أقوله المدعوق ماكس بتاع زفت ..يقوللى طب كلمة السر بتاعتك ايه يابطل ..فيزيد هرشى فى دماغى واتنح واقوله طب من الأول يامعلم ...يقوم عامللى بروفيل جديد وبكلمة سر أخرى ... بعد اسبوعين لقيت نفسى مستنسخ مرتين تلاته عند زملائى احاول اشيل واحد الاقى عفريته يطلع موش عارف منين ..وهكذا أصابنى الفصام المالطاوى فكتبت الاعتذار التالى


الشىء اللى محيرنى ومطيرنى ...

انى لقيت نفسى بوشين

...كل شويه الاقى صاحب

...جه يدعينى فاقول نعمين

....وكل شويه الاقى انى مطالب

....اعمل كلمة سر فاقول حسنين

...يجرى يقوم يعمللى بطاقه

....وألاقى نفسى بروحين

...واحد ماكس وواحد عادل

...والعادل يصبح عادلين

...امسح واحد يطلع واحد

.. زى أغانى الروح والعين

...تقبض روحه تفقع عينه

....يطلع برضه بروح وعينين

زى ماقالت ليلى مرادكو

... وانا محتاره بين لاتنين


التالته بقى كانت ردا على قصيدة شاعرنا الجميل أحوال الهوى الذى كتب قصيدة عن كلمة الحب التى تثقل على لسان الرجل مع انها سهلة وموش طويله ولكن تمحى من ذاكرة الرجل كما كلمة سر البلوج تماما فهو كتب قصيدة تصف لهفة المحبوبة على سماع الكلمة المعبرة عن الحب وكان ردى عليها بأبيات فيها حل آخر ولكنه فاشل

لو بصيت في عيونها و شفت نظره اسيرة

و كمان فيها بسمه و دمعه و فرحه و حيرة

عرف ان الحب ف بالها و مخليها ف حاله شريده

تسمع همس نفسهابيعلي و يعلي و كام تنهيده

و ان قلت لها باحبك مش ممكن تسمعها اكيده

هتقولك انا مش سامعه و هي بفرحه سعيده

و ان قلت لها باحبك تاني

هتشوف لمعة عينها شديده

تبقي ساعتها تكرر قولك
قولها باحبك
واناعارف دي اصعب كلمة ينطق بيها قلبك

تلقي الدنيا في صمت و سحر

قولها باحبك

تحضن نشوة نبضك كله في لحظة عمر

تلقى الكون بيحقق كل آمالك وكمان حلمك

وكانت السطور التاليه هى ردى على أحوال الهوى-الذى نرجو أن يعود للتغريد بالحب قريبا -وأن يكون المانع خيرا
ممكن نفس المعنى تقوله بورده

وتحسه الهانم فى الحال

وكمان بالعين لما بتنظر للعين

ودى برضه موش عاوزه سؤال

ياسلام لو خاتم ألماظ ومعاه

كام فستان وفوقيهم شال

أو عقدين وبروش وفورير

وما يمنعشى كمان خلخال

تبقى ولا الأخ فالنتينو

ويومها تتبدل أحوال

كل الهوى والنور والمايه

وكل اللى ما يتقال يتقال

لكن كل حيل آدم مفهومه

ماتعيشى المايه ف غربال

تعمل مهما تعمل تغمز تهمز تلمز

موش عاوزه الا الكلمه اياها

اللى العالم كله قراها واتهجاها

وصاحبنا محرم غناها

" قوللى باحبك قوللى "

عاوزه اسمعها تمللى

بترجع أيامى وباحس انى بقرب منك

لما تقوللى بحبك قول قول

موش حاعمللك طبق الفول

غير لما تقول





27 comments:

صفـــــاء said...

موضوع تأكيد كلمه المرور دة ممل فعلا
وبكرهه فى اى مدونه

التانى دة انا معرفش حتى هو أيه

موضوع الدكتور احوال ربنا يرد غيبته انا كنت قرأته فعلا وعلقت عليه لكن لازم تعليق على تعليقك سيادتك لأنه زجلى ساخر فكاهى يصف نفسيه المرأة وأن كان بشكل ساخر بس جميل
يعنى برضه مينمنعش يا باشمهندس ان الواحد يقدر المودام بتاعته بشويه حاجات حلوة تتعايق بيهم أمام العائله بس ولا أى حاجه فى الدنيا تغنى الست عن كلمه السر دى اللى بتفتح خزنه قلبها ولا أجدع طفاشه
دومت ساخر

norahaty said...

يااااااااااااااااااماكس يبتاع زمان
والنهاردةوبكرة كمان حمدلله على السلامة
من العجمى اللى كان واخدك المدة دى
كلها بس يظهر الجو هناك حلو بدليل انك رجعت لنا بكلام فى منتهى الجمال(زى عوايدك
عايزة اقولك نصيحة لوجة الله فى حكايةالاسم وكلمة السر:اختار لك اسمين او حتى اسم واحد لكن 2كلمة سر فقط على حسب الميل اللى حتبعت عليه لو جوميل يببقى 1مثلا ولو ياهوووميل يبقى 2كده ماتنساس لا الاسم ولا كلمة السر..اصل انا ياما ألفت ولحنت ووزعت كمان كلمات سر بأسمى واول ما أخلص انساهاااااااااااااااواقعد اقول افتح يا شعير افتح يا لوبيا طيب افتح ياااااااااااااااااااااااااافول حتى! )
اما الصيدلى المشهور أحوال الهوى يارب يكون بخير وييسر له اموره ويحلها له من عنده ويرجع بالسلامة لبلده ولاهله وكمان لمدونته وللمدونين اصابه.
رغيت كتير انا مش كده؟:(
معلش بقى استحملنا:)

Appy said...

سيبك من كل اللى فوق والاستايك ده
بجد انت ردك على قصيده احوال الهوى تجنن بجد يا جدعان ما انتم كويسين اهو امال ليه بيقولوا الرجاله اضربت ومبتعرفش تعبر وتقول شوفوا بقى الاوشاعه دى طالعه منين

salma mohamed said...

ههههههههه
كويس انها اتمسحت,
اما بقى بالنسبة لنسيان كلمة السر فحضرتك اكتبها في مفكرة خاصة او مفكرة الموبايل او خصص فايل على ابكمبيوتر تكتب فيه الحاجات المهمة,
اما بقى بالنسبة للقصيدة عن كلمة الحب,
ففعلا الانثى لايشبعها من تعابير الحب غير الكلمة دي واظن مافيش اسهل من كده.

Beram ElMasry said...

maxbeta3zaman
السلام عليكم ورحمة الله وبركاته
صباح نادى . على البادى . بكل الخير
وفهمنى . وعلمنى . وراسم لى خطوط السير
صدقت يا ماكس ، لقد تكلمت بلسان حالى ، وانا نظرى ضعيف ولا يمكن ان يخطر ببال احد حجم المعاناة فى التعرف على الحروف وكان صاحبها يمتحن ثقافتك وقدرتك فى قراءة المخربشات ، والادهى الخلقيات اللونية وتداخلها مع الكتابة وكانه اختبار لكشف عمى الالوان لطلبة كليات الفنون ، وترك الفراغات بين السطور لدرجة ان عجلة الماوس باظت
هل تعلم يا صديقى انى انسخ اعمال الزملاء لتكبيرها بنط 24 ومع ذلك اعانى لان الخلفية السودة او البنى تنتقل مع النسخ ، واحيانا اغير لون الكتابة ، يعنى التعليق ياخد منى من ساعة الى ساعتين فى التعليق الواحد
الكتابة عندك واضحة والخلفية بسيطة لان المطلوب فهم ماكتب لا زيارة محل كشرى
ارجو تقبيل كفى حفيدك نيابة عنى
لك تحياتى والسلام عليكم ، ولا سلام مع اليهود

Sherif said...

باموت فى الزجل التابعى او الدمياطى

وطبيعى لو حبيبى طلب منى هاطلب كمان مخلل وبرنجان

صديقى

انا لاادخل المالطيبلاى من يومها

فهو اقتراح غريب الغى كل ماكان فى موقعنا قديما .. يمكننا ان نفكر فى شئ آخر يعيد الينا حريق بغداد

fashkool said...

عارف يا ماكس بك احسن حاجه فى البوست ده انا اكتشفنا شاعر ربابه يقدر ينافس عمنا الشاعر بيرم المصرى فى اشعاره .. وانا بقى جاى اهدى النفوس واقول لك انت بتنافس عمنا بيرم

ويا عمنابيرم الحق نفسك احسن ماكس بتاع زمان حيفتح دكان جنب دكانك ويبيع نفس البضاعه اللى انت بتبيعها وهو جاى يحاربك
اصل بس يعنى احنا بنهدى النفوس وخلاص
تحياتى يا عمنا

norahaty said...

Just want to say
GOOD MORNING:)

شمس النهار said...

طيب اعلق انا علي ايه والا ايه دلوقتي
البوست كله لطيف جدا
ورد حضرتك علي دكتور احوال الهوي لطيف جدا ربنا يرجعه لمدونته بالسلامه

maxbeta3zaman said...

كلمة المرور أكيد قريفت كل اللى تعامل معها ولذلك انفشيت لما محيتها
طبعا لازم من تقدير مادى -فى المناسبات -وإلا كان مدعاة للشك والريبه أيضا لأن بنى جلدتنا يتهمون بتغير الحال عند حدوث ما يريب من خلبصة وخلافه ويفاجأ من جاب الحاجات الحلوة بقول :خير ياخويا عملت ايه النهارده عشان تدخل بالورد والهدايا دى هه..أكيد عملتلك عمله ...وهكذا
هى سينيما الحياة
أهلا بك

maxbeta3zaman said...
This comment has been removed by the author.
maxbeta3zaman said...

المصيبه انى اما بعمل كده بيقوللى ان كلمة السر دى ضعيفة وعاوزه فيتامين ..أقوم انا مجعلصها ومخليها صعبه حتى على من ألفها نفسه ..ومن حلاوتها وقوتها بانساها ..وهكذا.. مدير عام البلاليج خلاص حفظنى من كتر ماعملت عنده من كلمات وبلاليج بس دى اللى دامت لأن صديقى شريف فكرنى بكلمة السر الرهيبه التى أنشأنا بها سويا هذا البلوج وكان عندى هنا فى زياره
هو أحوال الهوى ركب المراكب اياها اللى بتروح قرب إيطاليا ؟؟ ويكملوها عوم ؟؟ ماظنش ..انشالله يرجع ونتناقر انا وهو فى المحبه وأحوالها نسيت اقول ان التعليق ده لنورهاتى

maxbeta3zaman said...

ِAppy
كان لسه فيه حلقه عند منى الشاذلى جابت 2 دكاترة مخ وكبده.. لأ.. قصدى وأعصاب وتشريح قعدوا يتكلموا ويقولوا ان مخ الراجل يهتم بأشياء أخرى ولا يجيد الحديث ولا التعبير كالمرأة وده بدراسات ومجسات حطوها على نوافيخ الناس ..ولقوا ان منطقة الحب والمشاعر لاسعه عند الرجل وملعلعة عند المرأه وده سبب الصمت الحبى الكلامى عند الغالبيه العظمى منهم

maxbeta3zaman said...

salma mohamed
كلمة السر ياسلمى أنا عملت فيها البدع ..أكتبها فى نوته النوته كلها تضيع ..كتبتها بالرصاص على قاعدة الشاشة المستديره آم جت الست صبريه اللى بتنظف ماسحاها باعتبارها و..خه وكان جنبها كام pin #
مهمين كله راح فى الكازوزه
أما عن الحب الذى هو ياروحى عليه كما قالت أم كلثوم فأنا متأكد من أن هذه الكلمة هى المربط وهى ما تحاول كل حواء التأكد منها وانظرى الى السينيما فى كل العالم نفس السؤال
" انت صحيح بتحبنى يا أحمد "
ويكون غالبا رد "احمد" الملاوع كما قال فريد لشاديه
شوفى جفنى ..احمر ازاى من حبك
شوفى وشى ..اصفر ازاى من حبك
ياسلام على حبى وحبك ..وعد ومكتوبلى أحبك ...ولكنه لايقول لها بصراحة مايريح قلبها ...بل يجيب
طبعا وانت عندك ذرة شك فى ده ؟؟؟
وهكذا هم الرجال يجيبوا العصبى موش كده

norahaty said...

ياسعادة الباشمهندس
ما انا عارفة ان التعليق ده ليّ:)
حتقولى ازاى عرفتى؟حأقولك بالعدد
انا كنت نمرة 2 فى التعليقات
يبقى انا نمرة اتنين فى ردود حضرتك
:)ذكاء خارق منى مش كده:)

maxbeta3zaman said...

البيرم المصرى
السلام عليكم ورحمة الله وبركاته
كان امتحانا فى فك الطلاسم وفكنا أخونا تيممى منه ..بانسبة للشاشة هناك إمكانية لتكبير حجم النصوص المقروءة ..تحت خيارات view >>text size>>largest ده يخلى الكلام سيما
أما الحفيد فجارى تسويته على مهل وقد رأينا صورته المتحركة ثلاثية الأبعاد وكان يفعل مايشبه الضحك؟؟أو البسمه ويفرك عينيه بيديه الصغيرتين جدا رغم انه بلا شك لا يرى ..وهو دائم الرفس كأبى تريكه

maxbeta3zaman said...

شريف الحريف ..أو عبدين ابو المحبين
الفول شرط لحسن المقول
والحب ورد.. يأبى الذبول
فقلها بلسانك تلقى القبول
وإلا ف جنازتك تدق الطبول
وبعدين تطلب ايه موش تقول الأول كلمة السر وبعدين تفطر ...فيه واحد معرفة وماسك منصب مهم وكل شوية فى التلفاز قعد مرة وسط حشد من النساء يقول انه يصب كلمات الشكر والمديح على زوجته عشرات المرات صباحا ومساء ولما ابديت اعتراضى على الكثرة فقط لأن كثرة الوفاق نفاق كما يقولون ...بادرنى بسؤال محرج : "هو الأخ مين بالضبط" ؟
وزغر الى كل النسوة اللائى كن يتابعن المحاضرة الحبكلاميه بتنهيدات وتصعيبات زغرة وكأنى شديت الفيشة من تلفاز كان يذيع تمثيلية نـــور ومهند..ومن يومها وأنا اتبع كلام كاظم افندى الساهر
قول أحبك كى تزول غمامتى
أولا يكون نهارك مقندلا وطويلا
المالطى أخو البلطى تقليه أو تشويه ولا تدخل فيه دخلنا فحدث الدوبلكيشن وتاهت الدفعة فى مالطه

maxbeta3zaman said...

الفشكول
عرفت الآن من أين جاءت التسميه .. فشكل يفشكل فشكولا ..ده أخونا بيرم ده عالى الهمه وجاد فى قضاياه وأنا غالبا ما أتناول الفكاهة وبشعر حلمنتيشى يعنى ..لكنى أتذوق الشعر والزجل الجيد
طبعا انا فاهم انك تداعب كلانا وأنك فشكول تأصيل الأصول.. ومن حبايبنا الموصولين بالود دائما

maxbeta3zaman said...

نورهاتى بنور من يمها آتى
صباح منير وزهر نضير وقمر يزور ولا يختفى
تلاه الحبور وجد السرور برد السلام فلم نكتفى

maxbeta3zaman said...

شمس النهار
يافندم تشريفك لنا بالزيارة ومجرد ظهور المربع الذى تتوسطه الزهرةشرف لنا ما بعده شرف ...وبعدين انت دعيالنا كلنا فى الحج
أهلا بك دائما

☼♫♪ عمــاد الدين يــوسف ☼♫♪ said...

عمو ماكس الحبيب ... انا حبيت اتكلم عن تأكيد كلمة انك وحشتني جدا ووحشتني مدونتك الحبيبه واعذرني لانقطاعي بغير ارادتي ومستنيك تنورني في
الصالون ... قصدي المدونة بتاعتي

تحياتي

maxbeta3zaman said...

عماد الدين ( الصحفى ) وليس الشارع الفنى القاهرى
طب حضر الشاى المنعنع لنى جاى على جناح التبريزى وجناح السرعة أيضا وهاهو الكليك على اسمك (المزرق) عندى
اى المتحول للون الأزرق علامة الأكتيفيتى وخووووش على العمده

doctor mohamad said...

"واحد ماكس و واحد عادل.. و العادل يصبح عادلين.. زى أغانى الروح و العين" .. >إبتسامة عريضة< .. أحسنت ، رائع ، ربنا يكتر م العوادل ، لأ _ لو الحكاية تتعلق بالباسورد .. يبقى ربنا يقلل منهم ، بس تعرف انه حاجة حلوة خالص ان الواحد يبقى بكذا اسم كدا .. تجديد .. و عندى لك إقتراح هايل .. >تلمع عيناه بنظرة ماكرة< .. بيقولو الشئ ال مش عارف تتخلص منه إتعايش معاه و استمتع بيه .. الحكاية ميزة مش عيب .. نعتبرها "نيو لوك" .. لما تدخل تعلق _ليه ما تكتبش ف أخر التعليق "إنتظرونا ف المرة القادمة بشكل جديد و إسم أجدد" >إبتسامة<

maxbeta3zaman said...

doctor mohamad
انت عارف لما تبص فى مرايتين متوازيتين فتشوف نفسك ييجى خمسميت مره ..هوه ده اللى كان مع المالطى ..وطبعا النسيان الذى هو أصل تسمية الإنسان هو السبب انا أنسى كلمة السر بعد 3-4 دقائق ولا تجدى كتابتاه فى ملف ولا حتى على شاشة الجهاز ...ده أنا ضاع منى مدونة بحالها لأنى نسيت ازاى ادخل عليها ..طب وانت عامل ايه ؟؟

Sherif said...

يشرفنى ان ادعوك لحضور حفل توقيع أول كتاب لى فى عالم الادب " لست الا بعض الاوراق" والذى يقام باذن الله يوم الاحد 5 ابريل 2009

المكان : مكتبة ديوان بمصر الجديدة
العنوان : 105 شارع ابو بكر الصديق مصر الجديدة – مقابل نادى ضباط الجلاء بمصر الجديدة
التاريخ : الاحد 5 ابريل 2009
الميعاد : 7 مساءا

فى انتظار تشريفك

هبة النيـــــل said...

وجدتها ..عملتها ..أزلتها ...مسحتها
ما أجمل الأساتيك


تمسح ....ولا تخليك


تزهق وتضرب بوز


كان عندي كرسي قعيد


جنبه حروف شخابيط



ا هذه الروعة يا فندم


حضرتك كاتب لـ "أستيكة" رغم كدا فعلا أمتعتنا وكأنها قصيدة شاعرية رقيقة

فن عالي عالي يا فندم

سعدت بقراءتي لك استاذنا

maxbeta3zaman said...

هبة النيل
والله ياهبة النيل ان الموضوع بتاع اأستيكة ده كان مجرد فرحة بالتخلص من تأكيد الكلمة اللى كان بيطلعلى زى العفريت كل ماجى ادخل الدكان بتاعى وكان جنب "الوورد فاريفيكيشن" ده كرسى من ابو عجل ويغيظنى بقوله طب انت لو موش حرامى اكتب الشخابيط الموجودة عندك - ولأن نظرى بقى موش هوه- وكمان خطه وحش قوى بقيت افشل فى فك الطلاسم وكنت ازهق واصب غضبى على البلاليج واللى عاوز يخش تانى وكان أن اهدانى" تيممى" طريقة محو هذه العقبة فكتبت هذه السطور فرحا ونشوة لانتصارى على ابو الشخابيط ابو كرسى اللى بهدلنى

About Me

My photo
أحب الثقافة والفنون والشعر وتبادل الأفكار النافعة والهوايات المتعددة والمصنوعات اليدوية والرسم والمسرح والأغانى القديمة ذات المعانى الراقية والأفلام الكوميدية اتقن الكثير من الأعمال اليدوية (اصنع بنفسك )واهوى أصلاح أى معدة تتلف : حته جديده بقى أنا الماكس فى أحشائه الضحك كامن فهل ساءلوا بلوجاتى عن طرفاتى