انه دكان للخردوات نبيع فيه الخواطر والذكريات.. ونشارك بالقصص ونقرأ من خلاله أفكار اهل الدكاكين المجاوره ونسمع منهم كما نحكى لهم - هو مكان لتواصل جيل أوشك على الرحيل مع جيل هو بطل المستقبل القريب ...

Saturday, January 31, 2009

مهد الحفيد




عدت من رحلة عمل طويلة نوعا ما فى الغردقة استغرقت أسبوعين كاملين كنت خلالها أحس أننى أعيش فى بطرسبرج أو فى باكو ذلك أن الفندق كله يعج بالروس والجمهوريات المستقلة واللغة السائده فى المكان هى الروسى حتى العاملين فى الفندق اصبحوا روس اللسان من المطبخ حتى الروم سيرفيس ...الرحلة بالباص تأخذ من اسكندرية لهناك 10 -11 ساعة ..


المدينة تغيرت جدا فقد كانت آخر مرة زرتها سائحا من عشرسنوات تغيرت للأحسن طبعا ..لكنها تعانى من الركود هذا العام أصحاب المحلات الخالية من الزبائن " المريشين" يشاهدون التليفيزيون فى محلاتهم لأن الزبائن غير موجودين ...هل علينا فى الأسبوع الماضى وفود المصاريه لزوم أجازة نصف العام فجعلونى أحس أننى مازلت هنا فى ميدان رمسيس بالتحديد ...المهم خروجا عن


العنوان وتحديثا للأمور كما يفعل أهل البلاليج كتبت شيئا عما حدث وابدأ به




غضبة بلاد الترك ويا فنزويلا


خلت رقابينا مايبنهم موش طويله


لما وقف راجل وإسمه أردوغان


قدام شيمون الصهاينه ابو ألف حيله


أظهر له ظرابين التراكوه آم نفخ


أوداج دى عثمانلى ..وعثمانلى أصيله


حمر له وشه واتنفض ..شاور بجد


فقع العيون الكسيره والنفس الذليله


وقال كفايه الكدب يكفى قوم بقى


لم الورق ساب المكان شتم الحضور


هل كانو دول مننا .. أو وسطنا ؟؟


لكنه دم الحر.... لما يثور يفور


مافيش له ريس فى الحقوق غير ربنا


ينفع كده ياخوانا.... لما ينتفض


بدل العروبة الترك ... واحنا فى البليله






نعود لموضوعنا الأساسى بعد هذا التحديث والتهييس.. فقد أخذتنى مأمورية الغردقة من عمل كنت أقوم به فى ورشتى المتواضعة فى العجمى كنت اصنع سريرا هزازا لأول حفيد لى ..ومنهمكا فيه ...كنت قد صنعت واحدا لأبنى الأصغر فى الثمانينات ولا أدرى أين استقر فقد اقترضه الأقارب لما كبر ابنى وتنقل من بيت لبيت وطبعا أخذ طريقه للروبابيكيا ..أنا وزوجتى بمجرد أن علمنا بنبأ مايسمى "إذا كان حايبان " الشهير بدأنا فى الاستعداد هى بالتريكو والبطاطين المنسوجه والطواقى والشرابات وأنا بالسرير والمرجيحة ..نزلت واشتريت الخشب بالمقاسات والتخانات المطلوبه ووقفت فى ورشة المنشار أقطع وامسح الأخشاب كأى نجار محترف وحملت كل شىء للعجمى مقر العدة والشواكيش والمناشير وانهيت الأجناب والموله التى هى "على العريس" عادة وكنت فى مرحلة تصميم وتنفيذ الحامل الذى سيتأرجح المهد عليه حين اضطررت للسفر ... ,والصورة المرفقة لمهد ولدى الصغير زياد وهو نائم داخله ...ويتمرجح أما الصورة الأخرى زيادالطفل عندما كبر قليلا .. والآن هو مهندس معمارى مشهود له ..مازال أمامى شهرين ونصف تقريبا يمكن انهاء المهد خلالهما ..


ضمن هواياتى العديدة النجارة وصنعت لبيتى العديد من القطع النافعة ..ومن علمنى النجارة وفنونها هو عم احمد الذى صنع لنا أثاث منزلنا فى السبعينيات ..كانت ورشته فى منطقة الروضة بالقاهرة وكان عجوزا ونحيفا ..وكلما رفع قطعة خشب صاح قائلا " ياقوة الله.." كانت تلك لزمته ...لما رأى منى حبا فى النجارة قال تعالى معايا يوميا وانا أشطب فى عفشك وانا أعلمك ما عندى من أصول ومهارات ...وقد كان ..كنت فى دورة تدريبية طويله فى القاهرة تسمى فى الجيش" فرقة" فكنت أذهب إليه ظهرا وأعمل معه فى عفش بيتى يوميا وهو من شجعنى على الاستمرار فى هذه الهوايه


بدأت بعمل مكتبه أو" بابلوتيكا "متحديا نجارا فى اسكندرية أخذ يماطلنى فى عملها ومن زهقى أخذت الخشب وعملتها بنفسى ...لست أدرى سبب السعادة هكذا بالأحفاد ..أهى الرغبة فى البقاء ؟؟ واستمرار الاسم ؟؟ أم هو حب عام للأطفال؟؟ ..أنا شخصيا لى ممن هم فى منزلة الأحفاد عشرات فأخوتى ماشاء الله عشرة وأنا فى المنتصف تماما خمسة فوقى وخمسة بعدى وكلهم لهم أولاد وأحفاد وأحبهم جميعا وأسعد أوقاتى هى التى أمضيها فى مشاغبتهم واختراع ألعاب تبهرهم ومراقبة الدهشة على وجوههم .. فى أحد المناسبات قمت بمشاغبة حفيدة أختى الصغرى واسمها عندى" فريده الجديده" زى مصر الجديده كده قلت لها : اسمعى أنا دلوقتى معنديش بنات عندى اتنين صبيان وانتو اتنين بنات ..فإيه رأيك أدى مامتك قرشين كده يعنى عشرين اتنين وعشرين جنيه وابدلك بابنى الصغير زياد وانتى تيجى تعيشى معانا وهويروح بدالك عند مامتك وباباكى ويبقى كل واحد عنده من الصنفين ولد وبنت ...البنت اتسعت حدقتاها وأخذت تكيل لى الأعذار : أصل السرير بتاعى ماينفعشى اسيبه ..وبعدين الكراسات والكتب والشنطة لالا.. واروح الحضانه ازاى وأنا أفند لها كل الحجج بوجود البدائل ...البنت جرت على والدها الذى جاء متأخرا وقالت له: الحق عمو ده عاوز يشترينى بعشرين جنيه ...ومن يومها وفريده الجديده تأخذمنى موقفا كلما رأتنى ...لا انسى أبدا كلمة عامل مصعد فى أحد العمارات بالقاهرة وكنت أصعد مع أطفالى وكان صغيرهم يبكى ...كان الرجل نوبيا أسمر بعمامة بيضاء ولما رأى بكاء الطفل قال بابتسامة كشفت عن أسنانه بالغة البياض : لماذا يبكى البيمبو ...إن الشمس لا تطلع الا من أجل هؤلاء الأطفال ...قالها حكمة ..وأنا معه.. فالشمس لا تشرق إلا من أجل هذه الوجوه البريئة


48 comments:

ماما أمولة said...

ماشاء الله ربنا يبارك يارب

دمت بحفظ الله

fashkool said...

عزيزى ماكس .. تحياتى
انا اول مره ازورك فى مدونتك وكنت سمعت عنك عند عمنا الشاعر بيرم المصرى
اهلا بيك فى مربع الدردشه فىمدونتى وشرفتنى ونورتنى
سألتنى عن اصل اسم الغردقه ودا سؤال ينسجم مع البوست بتاعك فى رحلت العمل بتاعتك للغردقه .. الحمد لله على سلامتك والف مبروك الحفيد بتاعك ويتربى فى عزك يارب
شوف يا سيدى .. انا مش بفهم فى التاريخ ولا حاجه دى حاجات صغيره وبتصادف واكون عارفها

اصل اسم الغردقه

زمان كان اسمها (خور جده)
يعنى ميناء جده عشان الحجاج واللى عايز يروح الحجاز بحرى

بعدين اتحرفت الكلمه دى الى حور جادا
تم قلب الخاء حاءا وما زالت هذه الكلمه متداوله لدى الاجانب

احنا بقى المصريين طبعا بنقدر نعبى الشمس فى قزايز وطورنا حور جادا الى الغردقه

ولو حطيت التلاث اسامى جنب بعض تلاقى الجرس الموسيقى بتاعه التلاته واحد
ارجو ان اكون قد افدتك

تحياتى وارجو التواصل

DoNyA said...

:)
طب ممكن يا جدو
تشتريني انا ب كنيه واحد بس
علثان اقعد في السرير الكميل ده

حمدله علي السلامه اولا
ثانيا فريده الجديده دي زي العثثثثثثل انا توقعت شكلها وانت بتقولها كده
حسيت بيها اوي
ربنا يخليلك كل احفادك واولادك يارب

salma mohamed said...

السلام عليكم
مبارك لقب الجد
وربنا يديك طولة العمر وتشوفه عريس ويا عروسته وتشيل عياله,
الاطفال هما اللي بيحلوا الدنيا وخصوصا لو من رحم الشخص,
والمثل بيقول اعز من الولد ولد الولد,
يا بخته بجده,انا كمان عاوزه سرير هزاز.

أحــوال الهـوي said...

استاذنا الرائع
بمهارة و رشاقه ابحرت بنا شرقا و غربنا بمواضيع شتي ثم رست خواطرك علي شط الاحباب و الاحفاد
و كان سؤالك عن حبنا للاحفاد اعتقد انه مثل حب المراهقة المتأخرة بمعني نري شبابنا فيهم فيوم رزقنا الله بابنائنا كانت فرحة ما بعدها فرحه و نستعيدها برؤية الاحفاد
مجرد و جهة نظر
وقد اغيرها حينما يرزقنا الله باول حفيد

تحياتي

شمس النهار said...

حمد الله علي السلامه
البوست لطيف جدا
بالنسبه للأحفاد ده شئ جميل جدا بابا كان دايما يقول لي اعز الولد ولد الولد
لما كنت اناغشه واقوله بتحب عليه بناتي
فكان يضحك ويقول لي كده
كمان بيكون الانسان كبر واولاده كبروافبيشوف فيهم اولاده وهمه صغيرين وبيعمل معاهم اللي السعي في الحياه لتوفير العيشه الكريمه ليهم حرمه من انه يستمتع بصحبتهم
ربنا مايحرمش حد من هذا الاحساس الممتع وخليك ليهم جميعا

soly88 said...

العزيز ماكس
مبروك على قرب وصول الحفيد
والنجاره هوايه مفيده جدا للبيت
وواضح انك اسطى جامد
اليوم لم تعد هناك موبيليا جيدة الصنع

maxbeta3zaman said...

ماما أمولة
الله يكرمك ويبارك فيك

maxbeta3zaman said...

عزيزى الفشكول الذى هو فى الأصول كشكول
أثلجت صدرى لما عرفتنى الحكايه ..كنت متخيل انها يمكن تكون لها أصول فرعونيه زى السلسلة( ديروط منفلوط دهروط أسيوط سمالوط )التى تعود لأصول فرعونية يظهر انهم ماوصلوش لهناك وماكنش فيه حج على أيامهم ..أشكرك على الرد

maxbeta3zaman said...

دنيا
طبعا اهلا بك ده احنا نتشرف
الأطفال دول لهم حاجات مدهشة وردود أفعال تلقائية عفوية جميله ..خصوصا لم الموقف يكون جديد عليهم
شكرا لك وأهلا بك دائما

maxbeta3zaman said...

Salma mohamed
الله يبارك فيك ..فعلا الأطفال هم بهجة الحياة ...وهم من يجعلون التواصل الإنسانى ممكنا بعدما قضى التليفيزيون والكومبيتر على جزء كبير من ذلك التواصل الأسرى ..والأولاد البنين هم الأكثر انفصالا واستقلالا عن الأسرة عن البنات ..الولد من سن 14 كده يعتبرالأصدقاء هم الأهم بعكس البنات فهن اكثر اتصالا بالوالدين حتى بعد الزواج فالوالدين والجدين لديهم فرصة فى هذه الفترة ليتفاعلوا معهم ويصبح الأمر بعد ذلك باى ..وهاى

maxbeta3zaman said...

أحوال الهوى صاحب الشعر الجميل
وجهة نظر وجيهة ,,وتبقى أمومة وأبوبة ثانية أحسن من المراهقة المتأخرة بتاعة السيما التى نراها فى الأفلام ..وأحيانا فى بريد الأهرام وغالبا فى صفحات الحوادث
يقول الشاعر فى وصفه للكوز
له أذن بلا سمع
وذى قلب بلا قلب
إذا استولى على حب
فقل ماشئت فى الصب
تحياتى لك وأهلا وسهلا بك

maxbeta3zaman said...

شمس النهار
فعلا الواحد يحس ان الزمن مر بسرعة جدا وانشغلنا بالعمل والسفر كثيرا ونفاجأ بأنهم كذلك قد انشغلوا بحياتهم وعملهم ...وتأتى الفرصة ثانية مع الجيل التالى بدء جديد مع انشغال أقل
شكرا لك ومنياتى لك ولأسرتك بكل الخير

maxbeta3zaman said...

solly 88
الله يبارك فيك ..يارب يطلع ولد فرفوش زى جده ..واولاد قد انتقوا له آدم اسما من الآن ..وكأنما هو أبو البشرية ..لما نشوف ..أنا زرت البلوج عندك ولقيتك عثرت على كنز من الأوراق والخواطر وقريت باكورة السيل والبقية تأتى
أهلا بك

fashkool said...

العزيز ماكس : قريت التعليق بتاعك .. لكن انا كنت باختصر .. خور جده او هورجادا او الغردقه كانت ميناء تجارى للتجاره البحريه بالاضافه الى الحج بين الحجاز ومصر .. ويارب اكون عند حسن ظنك
اما السلسله .. ديروط ومنفلوط وسمالوط فى الغالب مش حنعرف هما اتسموا كدا ليه .. هى كان اصلها فرعونى لكن ليه مش عارف .. حاولت ان اعرف اصل الاسم بتاع (حدت) اللى هى دمنهور .. ما وصلتش لحاجه بعكس عين شمس وممفيس وحلوان والبدرشين اللى لهم اصل ومعروف ليه تسموا بالاسامى دى
تحياتى يا استاذ ماكس

TIMMY !! said...

{بنا يخيل لكم الحفيد الجدي بإذن الله
و يتربى في عزو :)

و بالنسبة للنجارة فمش عارف هي تقريبا في جينات خريجي الفنية العسكرية و لا إيه :) ؟؟

كان عندنا دكتور ربنا يكرمه و يشفيه إسمه الدكتور على الذهبي , خريج فنية برضه , كان بيقول لنا إنه كان هاوي نجارة , و أول ما خلص كلية كان بيتعلم نجارة في ورشة في بلدهم لأنه كان بيحب يعرف كتير عن النجارة ,

المهم خلي بال حضرتك من مركز الثقل بتاع السرير ,
و أكبر عزم ممكن يقلب السرير و الحاجات دي :) ,

معلش حبيت أتفزلك شوية :)

maxbeta3zaman said...

أخى الفشكول الذى هو بأحوال الأصول :كشكول
أصل انا قلت يمكن تكون كده شبه حور محب ودى على ماأظن فرعونى ...أما سلسلة الفرشوط وأخواتها فلى صديق دفعة من دهروط وهو الذى قال لى مرة ان هذه السلسلة لها أصل فرعونى ...وٍأحيل الموضوع إلى إبنتنا الباحثة فى الحضارة : كيارا دليل الحيارى لإفادتنا عن المسألة الفرشوطية الأسيوطية الديروطية
والشكر والتحية لك دوما

maxbeta3zaman said...

TIMMYالناظر الينا بالشقلوب
الله يكرمك يا أخى ..ويبدو أن النجارة فعلا هواية لدى الجماعة بتوعنا لأن لى كذا واحد دفعة لهم نفس الهواية مع اننا موش قرايب ...وعلى الذهبى أنا أعرفه فهو أحد أوائل الدفعة الخامسة أو السادسة على ما أتذكر ..هو انت تبعنا ؟؟
عموما ولا يهمك ال centre of gravity & Max.torque & Area Moment of inertia كله معمول حسابه عشان يبقى safe (both for bending & tortional moments )والواد لن يزيد عن 2-3كيلو أهلا بك تيممى دائما

fashkool said...

ازيك يا عم ماكس بتاع زمان
لقيتك عن عمنا بيرم المصرى جيت اسلم عليك
تحياتى

TIMMY !! said...

أستاذ باشمهندس ماكس بتاع زمان ,

لحسن الحظ أنا مش تبعكم :) أنا مدني مش ملكي , بس الدكتور علي كان رئيس قسم باور عندنا و كان المشرف على مشروعنا كمان ,
و لو اني احتمال أبقى تبعكم لمدة 3 سنين .. كظابط احتياط بس :)

Beram ElMasry said...

الاخ العزيز . maxbeta3zaman
السلام عليكم ورحمة الله وبركاته
اولا حمدا لله على السلامة وموفق باذن الله
مليون مبروك بقدوم ولى العهد حفظة الله من كل مكروه وربنا يوفقك وتخلص السرير ويارب يعجب ولى العهد ، ومتكنش فريدة الجديدة قالت له على فصولاتك الغريبة فى اجراء حركات التنقل والتبادل ، اموت واشوف عينيها الحلوة وهى تفتش عن اجابة للاسئلة الغير منطقية ومحاولة الخروج من هذا الفخ
بدون نقاش انت مبهج فيما تكتب وتصور
لك تحياتى والسلام عليكم ، ولا سلام مع اليهود

mahasen saber said...

ياه انا كنت فين ده كله

انا فاكره حضرتك لسه غايب عن التدوين وكتير كتير دخلت اتطمن على حضرتك

والريدر عندى مش بيظهر اى مواضيع جديده لمدونة حضرتك

انا اسفه على غلطة الريدر بتاعى

واسفه على غيبتى بدون قصد

وحضرتك نورت تانى وتانى وامتعت كالمعتاد من حضرتك دايما

mahasen saber said...

بعدين انا جيت على اخبار سعيده
حفيد وضيف جديد على الاسره

ربنا يبارك لحضرتك فيه ويجعله خير سند لوالده ووالدته وخير حفيد لارقى جد فى الدنيا

انا افتقدت حضرتك جدا والله
والريد ده شكله هياكل ضرب منى وتعذيب للصبح ولما يبانله ريدر تانى

الرابطة وبناء الأمة said...

السلام عليكم ورحمة الله وبركاته
نتقدم بدعوي لك أخي ( أختي ) المدون بمناقشة
محاكمة عادلة
مبارك بين التأييد والرفض
ملف يناقش ويحلل ويضع الحلول
رائيك يهمنا جدا
مع خالص تحياتنا الكتيبة السياسية

الرابطة وبناء الأمة said...

السلام عليكم ورحمة الله وبركاته
نتقدم بدعوي لك أخي ( أختي ) المدون بمناقشة
محاكمة عادلة
مبارك بين التأييد والرفض
ملف يناقش ويحلل ويضع الحلول
رائيك يهمنا جدا
مع خالص تحياتنا الكتيبة السياسية

زينـه said...

جميلة القصيدة :؛

و لقب جد جميل

تعيش وتعمل مهد لحفيد حفيدك

maxbeta3zaman said...

Fashkool
تسرنى دائما زيارتك ..كما أسعد بالموضوعات التى أقرأها عندك ربنا يديم المودة

maxbeta3zaman said...

Timmy
لحسن الحظ ليه ..احنا موش وحشين قوى كده لكن الحياه العسكرية صعبة على كتير من الناس ..واحنا دخلنا الكلية دى فى ظروف مريرة وما قوللكشى كنا بناكل ايه وبنعمل ايه فى الصيف اللى الناس كلها تبقى أجازات احنا ناخد ترم تالت ونطلع مناورات فى طريق الواحات ..يبقى انت هندسة عين شمس ..وهل طلعت القرعة اللى بتقول مواليد يوم كذا هم اللى داخلين والباقى مؤجل ؟؟ اليومين دول قلين من يصيبه الدور ..حتى وإن كان نصيبك احتيط فثق انك حاتطلع بخبرة هايله من الخدمة العسكرية ..أبسطها تعود العمل تحت ضغط ..وتجربة العمل ضمن منظومة محكمة ومنضبطة ..اذا كنت ممن مقتون الحياة العسكرية فعليك بالدعاء لغاية يوم القرعة ..."اللهم حوالينا ولا علينا" ...تلاقى ربك سترها

maxbeta3zaman said...

محاسن صابر أشهر المدونين قاطبة
الحقيقة انى كنت متغاظ م اللى بيحصل ده والأخبار اللى تخللى الواحد ملوش نفس لأى حاجه وقعت اتابع فى الأخبار والتصرفات والمواقف لغاية مادخلت فى جروب "مفروسى الأمة" التابعةلرابطة "متفرجى العالم
أما عن الريدر عندك فيظهر انه حود على المدونة التى تاهت منى وتحمل نفس الإسم تقريبا لذلك تبدو وكأنها لشخص هاجر من البلاد لأن آخر بوست فيها من 7-شهور ...هذه الماكينات الالكترونيه دى لها حاجات كده والبلاليج انا ليا معاها حكايات
المهم شوفناك فى التليفزيون فى البرنامج وقولنا بقى حاتبقى مشغوله جامد بعد ما المدونة بقت معروفة إعلاميا ..وانت اتكلمت كويس جدا
سعداء جدا بذلك المربع الأخضر الذى يحوى دوائر واسمه محاسن صابر

maxbeta3zaman said...

أخونا البيرم
سلام من هوا العجمى أرق
وشكرى بيرما شعرا ونثرا
اليوم انا توى عائد من هناك وقد جمعت الخشب ودهنته وصورته صورة لأعرض المنظر على ابنى وزوجته ..غالبا (زمار الحى لا يطرب) ..الأطرف أننى بعد تجميعه أحسست انه عميق أكثر من اللازم 62 سم وجاءنى هاجس ماذا لو جاءت والدته لتلتقطه من المهد ويختل توازنها فتقع عليه وتفطسه..فحدثنى عقلى التانى اللوام بأن أعمل آلية لرفع الموله أو جعلها متحركة صعودا وهبوطا أو جعل المرتبه سميكة جدا .. أما فريده الجديدة ياسيدى فقد رأيتها الخميس وقد فاجأتنى انها مثلت دور فى فيلم كرتون منشور على اليو تيوب واسمه " زليزله" ورسمه أطفال وأخرجه والد فريده ...ففريده ووالداها وجداها كلهم فنون جميله اسكندريه وعملوا فيلم عن امنا الغوله عائلى كلهم اشتركوا فيه وطلع هايل ...قالت لى فريده : عارف مين عامل دور الفراشه فى القصة ؟؟أنا وصفق لها الحاضرون من الأسرة

maxbeta3zaman said...

زيـــنه
زان القصيدة تفضلك بقراءتها وازداد بلوجنا شرفا بتشريفك له..و شكرا على دعائك الرقيق

بـراااح said...

الاستاذ ماكس ... ربنا يبارك لحضرتك و للاسرة جميعا بالمولود السعيد و اتمني له السعادة دائما في ظل كل هذا الحب الذي ينتظره

maxbeta3zaman said...

براااح
اسم يوحى بالامتداد والسعة والخضرة
الله يبارك فيك ويعطيك مثلى..أو أربعة أمثال ماتمنيتيه لمولودنا المنتظر ..فطالما الدنيا براح فلنملأها بالأمنيات الطيبه على قدر اتساعها ..اسم يذكرنى بأغنية لعبد الوهاب وكتبها بيرم التونسى قديما يقول فيها
محلاها عيشة الفلاح
مطمن جلبه مرتاح
يتمرغ على أرض براح
والخيمه الزرجه ساتراه
أهلا بك دائما

Bondok said...

اهلا اهلا استاذ ماكس
لقد افتقدت كتاباتك المدة الي فاتت دي كلها
بس الاخبار دي كلها جميله ربنا يوصله بالسلامه و يديك الصحة تعلمه مما علمتك الدنيا

Sherif said...

العزيز ماكس
-----------
عودا حميدا صديقى

تغيب ولكنك تعود أكثر تألقا .. مبروك الحفيد وحمدا لله عالسلامة .. هو شعور جربته صديق ولم اكن اصدق اننى ساحبه .. الى ان انتهيت اخيرا لأن اطلب ابنتى فى التليفون فاقول لها فين لينا؟

وحين يصلون بالسلامة تجدك تحتضنهم أولا .. وتطمئن على صحتهم واحوالهم وبعدين تقول

هيه .. وانتوا ازيكوا بقى؟

م/ الحسيني لزومي said...

اقرأ نص اتفاقية منع تهريب السلاح لغزة
وادعوا الله ان يثبت مصر في عدم التوقيع عليها
www.moatnondedelsh3ab.blogspot.com

maxbeta3zaman said...

bondok القابض على الكونتراباص كما عندليب الدقى
انت الذى فينك ..فكلما فوتت على دكانك الاقيه قافل ...الناس بتقفل سبت وحد وانت قافللى طول السنة ...وبعدين أنا كنت باشتغل نجار وبوهيجى اليومين اللى فاتو ..وحودت عالغرقة أسبوعين ..كنت انا الوحيد اللى باشتغل وسط المستلقين على الرمال فى الشمس ..والمبلبطين فى خلجان البحر
ربنا يكرمك بأولاد وأحفاد ...فى هذه اللحظة انفتحت السماء فى اسكندرية بكريات الثلج والمطر الغزير بركاتك يا بندق

maxbeta3zaman said...

شريف الشهير بنجيب محفوظ
المهم ان الولاد لما عرفوا انه ولد وانشد ظهرهم وانسند ...قالوا يسموه آدم ..وانا كل ماييجى الاسم على بالى افتكر كلمتين العبرى اللى كانو بيقولهم لنا فى الكلية "آدم موشيه هالخ من عير قاهير "...مع قطعة المحفوظات التى كان يرددها حمدى جمال والتى تبدأ :" بحيدر شلحان" ...طبعا الولاد دول لهم معزة -بتشديد الزين -خاصة ...وانت فين دلوقتى ..فى المصرو بتاع زمان ..والا فى بلاد اللولى والمرجان ؟؟؟

maxbeta3zaman said...

م الحسينى لزومى
طبعا نقرأها ونشوف ...ونشوف على جناح التبريزى وتابعه قفه مخبيين ايه لينا فى الجراب من زنب ومهاميز ...الا احنا موش ناقصين مهمزه

صفـــــــاء said...

.
بالنسبه للزجل الجميل دة

فــ بصراحه مبقاش يفرق معايا ياكش كلهم يولعو على بعض احنا هنموت نفسنا بقى . الواحد زهق حتى من الموضوع دة

الهوايه بقى جميله جدا
وطقت فى دماغى مرة روحت عامله باب للمنور لأنه فاتح على المطبخ والهوى كان بيسفخ فيا طول اليوم
هو مكنش باب باب يعنى بس عملت حلق خشب على مقاس مكان الباب و دقيت فيه سلك من ورا وبعدين كسيته مشمع
فى الصيف اشيل المشمع وفى الشتا احطه
شوفت النصاحه ؟
.

maxbeta3zaman said...

صفاء
أحسن برضه الكلام فى الخشب أجدع وأنفع
بس برافو عليك ..باب.. باب نوبه واحده ونقر ولسان والا مستطيل كده بالمسامير ..بس والله عفارم لأنه زى زبت السيارة صيفا وشتاء " مالتى بيربوس دور
وهذه فعلا النصاحة وإلا فلا

رابطة هويتي اسلامية said...

الحجاب حقيقة ثابتة أم مجال للتفكير

من باب تناول جميع الأراء وفتح باب النقاش كان لابد أن نتبني في رابطتنا هذا النقاش الذي سوف يجعل من النقاش مرجع للجميع للوصول إلي الحقيقة التي يعرفها البعض وتخفي علي البعض ويحاول البعض تجنبها.
ومن هنا تبنت الرابطة أن تكون هي حجة علي من يدور بينهم النقاش علي صفحاتها.
نفجر الجديد دائما حوارنا اليوم
الحجاب حقيقة ثابتة أم مجال للتفكير
وفيها ننقاش بعض المدونات التي أعلنتها صراحة رفضها للحجاب وحوارنا اليوم موجه إلي مدونة " مذكرات ثائرة ".
ندعوكم للمشاركة في هذا الحوار المفيد
تقبلوا دعوتنا ننتظركم لنستفاد منكم
رابطة هويتي إسلامية

الرابطة وبناء الأمة said...

السلام عليكم ورحمة الله وبركاته
دعوة
أخي يا من رفضت سياسة مبارك عليك أن تكمل معنا الطريق حتي لا تكون دعواك دعوة إفتراء دون إثبات
دعوي مرفوعة ضد مبارك بنص ".........................."
أول جلسة
نتمني منك أخي المدون الحضور للجلسة
مع تحياتنا لك بالتوفيق
الكتيبة السياسية

fashkool said...

اهلا يا باشمهندس .. والله نورتنى .. ايوه كدا يا راجل .. شوف المدونه نورت ازاى عشان انت جيت عندى وكنت مستنيك من زمان
تحياتى

GHARAM said...

الله مشاعر جميلة لوجود الأحفاد، فأغز الولد ولد الولد، أنا في أنتظار هذا اليوم بفارغ الصبر نفسي اشوف أحفادي والعب معاهم وأدلعهم وأكلهم واشربهم واغير لهم هدومهم، بجد نفسي أشوف اليوم ده وبأتمناه من ربنا ، يارب يديك الصحه وطول العمر وتشوفهم عرايس وعرسان في الكوشه يابابا جدو

maxbeta3zaman said...

GHARAM
الله يكرمك ياستى ..وتفرحى كما فرحنا بأول الأحفاد مع انه لسة لم يخرج للنور بعد ..انما الاستعدادات على أشدها
وأشكرك على دعواتك الكريمة لنا ..ولك ندعو بمثلها وزياده

maxbeta3zaman said...

أخونا العزيز الفشكول
أصابتنا عدوى الأصول والأسماء وأصلها منذ ان عرفنا منك ...وها نحن نكتب بوستا عن أسامى الأحياء السكندرية ..التى هى قطرة من بحر الأصول لديكم أغرب ما فيها ان سموحه طلع عراقى ويهودى ردم بحيره وبقت حى كامل حاليا

norahaty said...

ياكسوفى:( ياكسوفى:( ياكسوفى
مكسوفة ومش قادرة اتكلم لكن
عارفة ان من قصد كريم لا يُضام
ياماكس يبتاع زمان ودلوقتى
وبكرة كمان ومبروك الحفيد
يافندم يتربى فى عز ابائه
واجداده كمان

About Me

My photo
أحب الثقافة والفنون والشعر وتبادل الأفكار النافعة والهوايات المتعددة والمصنوعات اليدوية والرسم والمسرح والأغانى القديمة ذات المعانى الراقية والأفلام الكوميدية اتقن الكثير من الأعمال اليدوية (اصنع بنفسك )واهوى أصلاح أى معدة تتلف : حته جديده بقى أنا الماكس فى أحشائه الضحك كامن فهل ساءلوا بلوجاتى عن طرفاتى