انه دكان للخردوات نبيع فيه الخواطر والذكريات.. ونشارك بالقصص ونقرأ من خلاله أفكار اهل الدكاكين المجاوره ونسمع منهم كما نحكى لهم - هو مكان لتواصل جيل أوشك على الرحيل مع جيل هو بطل المستقبل القريب ...

Friday, December 5, 2008

حب...ونهج الحب

انا من قراء مجموعة د.طارق فاروق على الياهو وهى مجموعة محترمة يكتب فيها كثيرون وتصلنى رسائل المجموعة اسبوعيا وأنا من المعجبين بالفكر الراقى والموضوعات المفيده التى ترد من هذه المجموعة المتميزه ..وصلتنى اليوم قصيدة حب جميله من كتابات د. طارق قرأتها فتعجبت لكمية الثورة والنيران والبراكين بل والسجن والقيد وأين؟؟ فى قصيدة حب ملتهبة ...على الفور قفز شيطان الفكاهة عندى ورددت على القصيدة بأخرى تنتقد الأمور التى رأيت أنها غريبة على الحب ...ولربما كان هذا هو الحب العصرى الذى لا أعرفه لأنى من جيل قديم ..فكتبت قصيدتى العاميه وسميتها نهج الطارق والسطور التاليه تحوى القصيدة الأصلية أحبينى وتليها مباشرة قصيدتى "نهج الطارق" ...أو "فى حب باتعه " وعشمى ألا يزعل طارق منى فأنا لا أقصد أى تجريح أو تهكم ..فقط أكتب نقدا بقصيده
بحبّــك..أحبّينــي

إهداء إلى من علّمتني الغرام...قبل الفطام..إلى من أهدتني السلام..دون الخصام..إلى من أسكنتني قلبها..وسقتني من حنان صوتهاشهد المدام..
أهديها كلماتي
بحـــبك.. أحبيني
أيا من عشت أهواكىـ
بقلب صامت باكـي
أحبينـي.. لكى تنساب أفكاري
وألحانـي وأشعاري
وكي تحيا دواوينـي
أحبينـي.. وقولـي أنني الأول
ولا شيء يضاهينـي
أحبينـي.. كما أهواكِ بل نصفـي
وذا يكفـي..ونصف النصف يكفينـي
أحبينـي.. وقولـي أنّكِ ناري
وكونـي أنتِ سجّانـي وسجينـي
أحبينـي.. وزيدي جمر أشواقـي
وكونـي أنت إحراقـي
فكم أشتاق ياشمسـي
لتلك الشمس تكوينـي
أحبينـي.. وزيدينـي
بنور منكِ.. من عينيكِ.. زيدينـي
أحبينـي.. أطيحـي كل آمالـي
لتحيا كل آمالـي ..وكونـي أنتِ زلزالـي
أحبينـي.. وكوني أنتِ بركانـي
وألقينـي.. بنارٍ ملء كفيكِ
ففـي كفيكِ ياعشقـي
أحلى براكينـى أرى
أحبينـي.. وكونـي أنتِ إعصاري
وثوري.. هَدّمـي داري
ولن أحتاج عنوانا
فكفاكـي عناوينـي
*******أحبينـي.. وكونـي أجمل الزهرات
فى أجمل بساتينـي
أحبينـي.. أسيرا بين أسراك
وشدي قيدك الدامـي على روحـي وأحلامـي
فذاك الأسر يرضيني
*******أحبينـي.. وكونـي أنتِ مولاتـي
وزيدي فى جراحاتـي
وأدمينـي..أحبينـي
.. بسوطٍ فاتكٍ قاس
وزيدي جَلد إحساسـي
وعذراً.. لا تواسينـي
أحبينـي.. كطوفان يؤرّقنـي
كنيران ستحرقنـي
كسيّاف يمزقنـي
كجرّاح يداوينـي
أحبّينـي.. أحبّينـي
وكانت قصيدتى
نهج الطارق"
أو قل (فى حب باتعه
أحبينى ..يابت يابتعة حبينى
ولــــو حتى بماية نار
ياحلوة ابقى رشينى
ولو عندك وابور فيه جاز
ماتنسيش رشه فى عينى
ولو نارك آدت فيٌه
بطشت المايه طفينى
واجيب انا برضه بلدوزر
واهد البيت ..فساعدينى
حاهــــــد بيتنا فى الأول
وبيتكو بعده ..على عينى
ونبنى حبــــــــــنا الدايم
بلا سفره ..بلا صينى
أنا م الحب راح اولع
فى نفسى لو هجرتينى
معاك باحس بالطاقة
حاتضرب من شرايينى
وانا جنبك فشر شمشون
ولا ميه...... يزقونى
لكن انت ياحلوة انت
راح اغرق... لو تزقينى
فى بحر عنيك ورموشك
وقلب ابيض كما الصينى
وسونامى ما سونامى
روحى نامى ...وغطينى
دى أمواج هايفه موش عاليه
نعومها.... لو تساعدينى
واقوللك إيه على البراكين
لهيبها ......هوه دا أنينى
فيه واحد يوم قرالى الكف
وقال باتعة حا تــــــرمينى
تاكل لحمى وترمى العضم
وبالمــــــكوه... حا تكوينى
وانا اللى اديت لها الفكرة
وقلت ياطيطه حاورينى
ماكنتش اعرف ان الحب
مع الباتعه حا "يردينى"
عملت جدع وقلت يانار
ف نارها جت ..وجه دخانها فى عينى
فحبينى ..بلا موجه بلا بركان
بلاش ..العنف هاودينى
وخلينا فى حب زمان
كما فاتن معاها عماد
ورا الشجرة وخبينى
اقولك بخ واجرى وانط
واقول ياباتعة غمينى
واعد لحد مايليل
علينا الليل وتنسينى
واقول باتعة تاهت ياولاد
واغنيلك أغانى حليم
واقول يمكن تواسينى
وبرضه أجرى بالبدله
واقول يمكن توافينى

50 comments:

norahaty said...

السلام عليكم ورحمة
الله تعالى وبركاته
حب ايه ده اللى حيهد الدنيا على بعضها !هو فيه حد لاقى سكن الايام دى!!
عجبتنى اوى اوى وسبحان الله دى تانى مرة اقرأ لك حاجة وكنت ناوية اكتب لك عليها لكن الانشغالات بقى انت عارف:)
الحاجة الاولى اللى قرأتها وعجبتنى كان تعليقك عند عن الخروف Appy plant اللى ماصدق شاف اخوانه وقال يافكيك
و(سحل) يامسكين اخوك الاصغر

مولان said...

ايه الحب ده وباتعه كمان

لا جامده جامده

علي فكره انا كيارا شكلك مش عرفتني

كل سنه انت طيب

maxbeta3zaman said...

الى النور اللى بيهاتى
أهلا بك ..الحقيقه انا برضه استغربت الحب البركانى السوطى السجنوى اللى كله ولعه عشان كده كتبت فى حب باتعه ناقدا الحب النارى لكنى احترم الكاتب جدا واقرا له باستمرار نورتينا بالنور اللى بيهاتى

maxbeta3zaman said...

المولان
يعنى انت كيارا دليل الحيارى..فعلا ماعرفتش الاسم جديد أو يمكن هو الزهايمر الذى يصيب من هم على شاكلتنا وانت غيرتى البلوج ليه ؟ ضاع منك زى ماحصل لنا ؟ أم هو النيو لوك ..وأين التاريخ ...ذهب مع الريخ؟؟ خلاص أنا كده عرفت وحاروح أدعبس ...كل عام وانت بخير

مولان said...

لا مدونه ضي القمر اتعملها هاك

بس مدونه ايام زمان هتلاقيها في البروفيل

كل سنه وانت طييييييييييييب

Sherif said...
This comment has been removed by the author.
Sherif said...

كنت أتوقع ألا تمر مر الكرام


قصيدة ساخنة والرد اسخن .. وأنا أعشق تلك الحوارات على طريقة أشعار زمان كأبى النواس

يرجى التفضل بالافادة عما تم حيال ذلك المحب الشاعر بعد كل الأوفرز هذه التى قدمها للمحبوبة

هل لانت أم ماذا؟

كل سنة وانت والاسرة طيبين

عمرو said...

صباح الخيرالقصيده الأولى مضحكه يمكن أكتر من القيده التانيه
أيه كم الكلمات الفظه المحيفه اللى لا تتناسب مع موضوع الحب اللى وردت فى القصيده الأولى دى ؟
يا عم ده مش حب يا عم ده تحقيق فى لاظوغلى و العياذ بالله
بس أنت بجد فنان و الله
آل باتعه آل هههههههه

maxbeta3zaman said...

شريف أبو اللامات والياءات والواوات فى تبادديلها وتوافيقها المختلفة
أما بعد فإننى أتوقع للمحب النارى أن تكون المحبوبة الآن قد نفذت الوصية فهى تشرحه بموس المحبة الحامى وتقيده بكلابشات المودة الدائمة وتعطيه من الشلاليط والنص ركبه من النوع الذى يشبه أكل الزبيب كما أعتقد انها قد ولعت فى هدومه بنار الهوى المضطرمه كل ذلك داخل زنزانة رقم 13 فى سجن طرة للمحبين وتمسك بكرباج مروض النمور فى السيرك وتلسعه به بين الحين والآخر قائلة أنا مرفضلكشى طلب أبدا ياعمرى كل هذا والمحب يضحك فى هيستيرية صائحا هوه كده
نص النص والا ربع الربع ..يا حاجة ؟؟

maxbeta3zaman said...

عمرو
ماهو عشان كده استغربت ومقدرتش امسك إيدى وتخيلت واحد زى شعبولا لما يضربه سلك الغرام حايقول ايه لباتعه وهو القائل :الفرخة لما تعيا دوغرى بيبان عليها ...حاتلاقى ريشها ينفش ..وتحمرلك عينيها ...هيييييه
وكذلك تفعل الحبيبة لما المحب يعطيها الفرصة ...كل عام وانتم بخير

Beram ElMasry said...

اخى العزيز . maxbeta3zaman
السلام عليكم ورحمة الله
كل عتم وانتم وجميع الاهل فى صحة وسلامه مع دعاء بتمام الشفاء للشاب المصاب
شكرا جزيلا على التفضل بالزيارة وشكرا على النقد وحرصك على الاصلاح للوصول الى الافضل
( والتيوس اللى حدانا اللى مافى حد عزى ) اسقاط حتى تقلل من شدة الاستنكار فانا اقصد ان مجرد العزاء اللذى لايكلف شئ لم يقوموا به
( دول عنيهم عالكراسى راح تطيح وبأى هزه ) ، تعديلك المقترح افضل بكثير واجمل فى الميزان ، لكنه يخالف المعنى ، (عنيهم عالكراسى ) يفهم منها انهم يطلبون الكراسى ولم يصلوا اليها ، اما يحاجوا عالكراسى فتعنى خوفهم من فقدانها لانها فى حوزتهم
قصيدتك العامية نهج طارق ، مية نار وجاز ، وباتعة كدة غلبت ريا وسكينة وبقت حرب ولا حرب البسوس
شكرا على توجيهاتك وشكرا للزيارة وكل علم وانت بخير

someone in life said...

مستر ماكس

ايه القصيدة الجامدة دي اللي كلها اكشن و حركات
فيها الحب مشعلل و كله حركة و استغمايه ووابور جاز حاجه فانتاستيك خالص و الله باتعه تستحق يا بختها

كل عام و انت بخير

Bannoura said...

ههههههههههههههههههههههههههههههههههه
أنا جيت أعيد على حضرتك
فلقيت القصيدتين الجامدين دوووول
أنا من عشاق د.طارق فاروق
كاتب ممتاز وصاحب ذوق جدا راقي
وحضرتك قصيدتك فووووق الجميلة
هو حضرتك عضو في جروب فاجومي ؟؟؟؟؟
كل سنة وحضرتك طيب و منورناااا

maxbeta3zaman said...

someone in life
والله يا صام الشاعر هو اللى إداها الفرصة وقعد يقولها لهلبينى وزلزلينى وافقعى عينى وماتنسيش تسلسلينى ..فالبنت حاتعمل إيه غير انها تقوله :تعالى ياحلو بقى اتلقى وعدك ..ياعثمان يامرجان هاتو عدة التشريح والكلبشات اللى فى النملية وولعولى راكية نار عشان ابخ بيها المحبوب ده ..وهكذا كانت الحكايه من دقنه وافتلله..كل عام وانتم بخير

maxbeta3zaman said...

البنورة
التعليق ده م الموبايل والا منين
أولا القصيدتين موش جامدين دا كلهم حركة وولعة وزلازل ..أنا مشترك بس فى مجموعة طارق فاروق على الياهو ..بس الفاجومى ؟؟قصدك أحمد فؤاد نجم ..معرفشى ان له موقع ياريت لو هو ادخل فيه.. نجم ده معلم جامد جدا وانا أعرف قصايده من الستينات لما كان بيهز الدنيا مع الشيخ إمام.. انا مع فاروق من 3 سنين وأقرأ عنده بانتظام ..وله كل احترامى وهو أول واحد بعثت له دى كرد فورى على القصيده وقلت له لو زعلت حاعمل لها ديليت فورا

Ahmed Al-Sabbagh said...

بصراحة الموضوعات اللى حضرتك مختارها غاية فى الروعة
سلمت يمينك

نيجار said...

عمو ماكس
أولا انا اسفه جدا لان غبت كتير بس والله غصب عني
بس والله دايما مبدع وكلامك كله احساس
وبيتهيألي كلامك في العادي شعر
وده واضح جدا من ردود حضرتك علينا
كل سنه وحضرتك طيب

maxbeta3zaman said...

أحمد الصباغ
تسلم يمينك انت ...والشمال كمان لو كنت بتكتب بالأتنين زى الناس الحريفة على الكى بورد ...ده أنا اللى اكتشفت مدونة فيها البسمة العريضة مع طرافة وجديه ودى خلطة أحبها جدا وستجدنى ان شاء الله من الزائرين
ويا أهلا بمن نشرت له الجرانين
وتعداد زواره بالملايين

maxbeta3zaman said...

نيجار
انشالله المانع خير ..وشكرا لك انت فكرتينى بأبيات كتبتها زماااان لما كنت طالب فى ثانوى يعنى عمرى 15 سنة تقريبا.. كانت رد على باب فى مجلة صباح الخير اسمه "البوسطجى" وده كان بيرد على القراء بس كان كده ساعات بيغلس فكتبت له الآتى
يا بوسطجى يابو شنطة جلد
ياللى كلامك كله عند
رد كويس عالمخاليق
دا ابن آدم أصله قرد
فيظهر ان الردود المنظومة داء قديم عندى ...كل عام وانتم بخير

صفـــــــاء said...

انا جايه وصايه
يعنى حد باعتنى اتفرج على الحب اللى لا قبله ولا بعدة
وطبعا كما هو واضح فانت بتحب واحدة كانت شغاله فى الباطنيه قبل ما تتندب اعارة فى المدبح
وواضح انها بتتمتع بهوايه البلطجه فى اوقات فراغها
كما انها تتميز بالالعاب البهلوانيه وتفوقت بأستخدام السلاح من أيام عملها كمرتزقه بحرب تحرير الصومال
طبعا لا معرض هنا للتعليق على الشعر بتاع د. طارق
لأنه واخد خط ملوش دعوة بخط فتوات الحسنيه اللى انت ان شاء الله هتناسبهم بالاخت الفاضله باتعه رزقك الله وأياها زنزانه حلوة فى سجن الحضرة
وتجيبولنا كام عيل سوابق يسرحو على كورنيش سيدى جابر
أهنيئك بالعيد السعيد
وبالجوازة الغبرة
.

maxbeta3zaman said...

صفاء
انت فهمت الموضوع غلط ...الموضوع انى شوفت القصيدة الأصلية فيها خط نارى ويطلب من المحبة أن تزلزله وتبخ النار عليه وتقيده بدون مواساه...فمن باب المداعبة والمزاح ليس إلا.. كتبت لطارق هذه المزحة متصورا شخصية وهمية اسمها باتعة ...فهذه الباتعة ليست لى وليست حياة البراكين حياتى ...أنا حياتى باربيكان على رأى الإعلان ...واضح أنك شاعرية واستفزك الزجل اللى كله فظائع ده ...واللى غشك صاحب "الوصايه" كان مفروض يقول ان دى حب فكاهى ..دعابه.. موش يصدمك بواحد من المدبح ؟؟ وعلى فكرة انا بعثتها لطارق أول واحد والراجل ضحك وكان رده اللطيف :"بس انت ولعتها جامد قوى" ولم يغضب ؟؟..وبعدين بتدعى عليا ياصفاء فى العيد!! الله يسامحك
وكل سنة وانت طيبة

صفـــــــاء said...

.
سيدى الفاضل هى مش صدمه قد ما هى اعجاب شديد بفكرتك وأسلوبك
وأى نعم شريف بيه هو اللى باعتنى ...روح خد حقك منه انا مليش دعوة
بجد انا عجبنى جدا زجلك وتعليقى عليه كان من باب الفكاهه
بالنسبه للخطأ الكتابى هو مش خطأ قد ما هو مراعاة لمن يقرأ
لأنى لما راعيت اللغه وصلتنى تعليقات ان فيه لخبطه ومش فاهمين مين بيحب مين
فكان لازم أضطر أسفه انى أذبح اللغه مراعاة لبعض من يقرأ لكن ولانك أوضحت يبقى لا موجب لأستمرارى فى قتلها وسيتم التصحيح حالا
أسعدنى الزجل والرد والتعليق
كل سنه وحضرتك طيب
.

Bannoura said...

عمو ماكس
كل سنة وحضرتك منورنا يا رب
جروب الفاجومي باسم الفاجومي
مشتركة معانا فيه نوارة نجم طبعا
جروب راقي جدا
ومحترم
تحياتي للإبداع الرائع
: ))))))))))))

ماما أمولة said...

maxzbta3zaman

كل عام وحضرتك بخير يارب

ويكفيك شر باتعة وحبها اللي يودي ورا الشمس

هو دا برضه زمن الحب الجميل

هههههههههههههههه

عيد سعيد عليك وعلى كل احبابك

موجة فى بحر الحياة said...

تحفه بجد
الاتنين اروع من بعض

تسلم الايادى

م/ الحسيني لزومي said...

تقبل الله منا ومنكم
وكل عام وانتم بخير

maxbeta3zaman said...

صفاء
إذا فهو مدح بما يشسبه الذم نمشيها كده عشان خاطر القصائد التى قراتها عندك وهى المميزه صورا وتعبيرا ...وبعدين لايمكن أن يعجب كل الناس بكل الكلام من الجائز جدا الاختلاف فى الرؤى...ونرجو أن تخيطى رقبة اللغة التى ذبحتيها مضطرة وذلك فى قصيدة" تناقض" فالتساؤل المتكرر فى أول كل بيت به ألف زائده والأسلم أن تقولى "لم" بكسر اللام وفتح الميم ولست أذكر القاعدة اللغوية ولكن أقيس على بيت لناجى:
لم عدنا أو لم نطوى الغرام
وانتهينا لحنين كالعدم
======================
بنورة
وانت طيبة وبالخير واللحمة متمتعة ...طب ابعتيلى عنوان أو رابط المجموعة وهل هى على الياهو؟؟ أو الجى ميل ..أم ماذا وانا اطالعها ونرى مافيها ...وشكرا لك
=======================
ماما أموله
باتعة دى شخصية كرتونية زى على بابا كده ...وزمن الحب الجميل هو زمن فاتن حمامه وعماد حمدى وقت أن كان المحب يدخل على أمه منتشيا بعد لقاء المحبوبة فى الأتوبيس ...فيقول :
مصاء الخير يا نينا ...أنا فرحان قوى لأنى شوفت فاتن على المحطة ...ويدخل مسهما لغرفته يحلم بها طول الليل ..وكان البطل لايتنازل عن البدله والكرافت فى كل لقاء يتم فى حديقة الأندلس الشهيرة
==========================
موجة فى بحر الحياه
مادامت كذلك فسأحفرها على قطعة من حجر جيرى وأرسلها لفاروق حسنى ليضعها فى متحف الحضاره أو ياخدها معاه وهو رايح اليونسكو ..وتسلم الخطاوى التى جعلتك تشرفينا بالزيارة
===========================
الحسينى لزومى
كل عام وأنت طيب وأهلا بك دائما

Bannoura said...

http://groups.yahoo.com/group/fagoumi/
ده الليـنك
: ))
أتمنى أشوف حضرتك هناك كمان
: )

Dr Ibrahim samaha said...

حب إيه اللى انتا جاى تقول عليه:)

قصيدة حضرتك جميلة فكاهية بما يغلب عليها من طابع العامية

ولكن لا أعلم هل دكتور طارق فاروق كتب الأولى
؟؟

د إبراهيم

maxbeta3zaman said...

د.ابراهيم سماحة
نعم نعم ..الأولى بتوقيع د. طارق وكانت منشوره فى مجموعته والثانيه كانت رد فورى عليها reply يعنى وكان كل قلقى انه يزعل أو يفتكرنى لا سمح الله اتهكم ...لكنه طلع فى غاية الذوق وضحك على الفكرة ولم يغضب ..ولو عندك ميل بوكس ممكن ابعت لك القصيدتين ورد د. فاروق على ردى وتعليقه على زجلى
وأهلا بك دائما

اقصوصه said...

كل عام وانتم بخير :)

Dr Ibrahim samaha said...

لا ولا أى حاجة
انا متابع مجموعة الدكتور طارق

لانى عندى مجموعة بريدية

بس انا كنت بسال القصيدة هو فعلا اللى كاتبها!!

أحمد سعيد بسيوني said...

جاااااامدة جدا والله

تحس ان انت كنت بتكتبها وانت جاعد على المسطبة
هههههه
باهزر معاك طبعا

دمتم مبدعين

maxbeta3zaman said...

البنورة
ذهبت وسجلت بس للآن لم يصادقوا على كعضو ..ولم يسمح لى بعد بقراءة المقالات الموجودة فى المجموعة ...هى المجموعة دى كمان حاتعمللى زى البلوج اما زرجن معايا ولغالى المدونة القديمة اللى عملهالى شريف ..لما نشوف
=======================
أقصوصة
كل عام وأنت فى أحسن حال وأروق بال
========================
د. ابراهيم العضو الرئيسى فى حلقات "scrubs" the famous TV series
فعلا دكتور طارق هو كاتب القصيدة الفصحى بعنوان بحبك - وهو قسم لأنه مضموم الباء -أحبينى
يعنى بيستحلفها بحق حبها .. أن تحبه
وهى قصيدة جميلة ورقيقة فى نصفها الأول ..ولكنه زلزل المواضيع وولع النار وطلع عدة التشريح من الدولاب فى نصفها الثانى فكانت الفكرة التى جعلتنى أكتب البتاعة العاميه دى وقد كتبتها فورا وعلى نفس الميل كرد ...وانا ارسلت لك الأصل مع رد طارق علىريبلاى على بريدك المكتوب فى البروفايل بتاعك لعله يكون وصلك
============================
أحمد سعيد بسيونى
لا أنا كتبتها وانا قاعد على الكىبورد
وقدامى كوب من الشاى وكنت أضحك بصوت عالى مع كل فكرة تجينى هكذا أنا ..تضحكنى سطورى قبل ان أخطها على الورق ..وأهلا بك دائما

salma mohamed said...

السلام عليكم
كل سنة وحضرتك طيب
القصيدة الاولى خيالية زيادة عن اللازم ومش ممكن ربع كلامها يتحقق
والقصيدة الثانية فكاهية
عموما الحب مش ممكن يكون بالشكل الموجود في القصيدتين,ولكن الشعر في كتير من الاحيان بيكون مش مواقعي
علشان كده محدش ينقد كلام القصيدتين,لكن ان كنا هنتكلم عن الحب في موضوع فده هيكون له وضع تاني

Desert cat said...

وانا اقرأ كلماتك كأنى استمع الى كاظم احبينى بلا عقد
مودتى

Dr Ibrahim samaha said...

لا مش انا اللى فى المسلسل:)

☼♫♪ عمــاد الدين يــوسف ☼♫♪ said...

ههههههههههههههههههههههه

بجد روعه ، باتعه ديه مش سهله خلي بالك منها
ههههههههههههههههههههههههه
تسلم يعمو

م/ الحسيني لزومي said...

من اجل مصر
شارك في الحملة الشعبية للقيد بالجداول الانتخابية وادعو غيرك
ضع بنر الحملة علي مدونتك
البنر موجود علي مدونتي
اذا كنت ترغب في وضعه علي مدونتك ارسل ميلك كي ارسل لك كود البنر
ارجو المعذرة للدخول بلا مقدمات لأني ادخل علي مئات المدونات يوميا
م/ الحسيني لزومي
مدونة /مواطنون ضد الشعب

م/ الحسيني لزومي said...

من اجل مصر
شارك في الحملة الشعبية للقيد بالجداول الانتخابية وادعو غيرك
ضع بنر الحملة علي مدونتك
البنر موجود علي مدونتي
اذا كنت ترغب في وضعه علي مدونتك ارسل ميلك كي ارسل لك كود البنر
ارجو المعذرة للدخول بلا مقدمات لأني ادخل علي مئات المدونات يوميا
م/ الحسيني لزومي
مدونة /مواطنون ضد الشعب

Beram ElMasry said...

السلام عليكم ورحمة الله
لا اكراه فى الصداقة والود ولكنى تمنيت ان اعرف اى خطا ارتكبت لتكون هذه القطيعة

maxbeta3zaman said...

سلمى
صدقت فيما قلت ياست البنات انت....هذا ليس من الحب فى شىء ..انه الخيال حين يصيبه الشطط والفكاهة عندما يصيبها العبط...والموضوع كان فقط - من جانبى - مزاح ورد فورى على استغرابى للكلام ..وأنا موافق تماما لما جاء فى تعليقك موافقة المجلس لفتحى سرور عندما يقول بصوته الجهورى :
موافقــــــــــة

maxbeta3zaman said...

قطة صحراء مصر الغربية ومحلها المختار بعد الرست هاوس بشويه
كاظم ؟؟ يبقى قصدك على الجزء الأول بتاع كاتب القصيدة الأولى .. الفصحى " أحبينى " ممكن يكون ...لكن أنا بقى ...وكأنى وأنا أكتب باتعة " الزجل العامى " اترسم خطى شعبولا وهو يغنى .. الفرخة لما تعيا ..دوغرى بيبان عليها
بتلاقى ريشها ينفش ...وتحمرلك عينيها هيييييه
وعلى فكرة انت أوحيتى لى بفكرة قصيدة تانية سأكتبها حالا وسأسميها اسما مشتقا مماذكرت وغالبا سيكون
أحبينى بلا عقد ..ولا شراشيب
بس اما اسمع قصيدة كاظم أولا لأنى غير متأكد أننى سمعتها

maxbeta3zaman said...

عماد الناظر بالجانب مع ابتسامة خفيفة
لا روع الله لك قلما ..انت الذى فينك من زمان يا رجل يا بو الأعمدة الصحفية والمقالات الجورنالية
طبعا سنقرأ لك.. يابو البلوج الملعلع بألسنة النار البرتقالية
أهلا بك

maxbeta3zaman said...

د.ابراهيم سماحة
أنت يا ابراهيم وماتحاولش تنكر الأفرول الأخضرانى والسماعة اللى على الرقبة دول هم بتوع التمثيلية وانت متصور "متلبس" بيهم ومخبى وشك عشان التمويه ...ولو قربت الصورة شوية حاتلاقى البتاع اللى بيجيبوه فى مقدمة المسلسل ويكتبوا عليه اسكرابس

maxbeta3zaman said...

أخى البيرم
لا قطيعة ولا تلفيعة الموضوع ان أهل السودان نادونى من تانى وعمال احضر فى المواضيع اللى حاقولها هناك ...كى لا يصيبنى أحد الحاضرين بشىء مما ناله البوش فى العراق إذا لم يعجبه كلامى ..أرأيت!! بعض الأحذية تدخل التاريخ لندرة موديلها أو لغلو خامتها ...وبعضها يدخل التاريخ لصدق تعبيرها عن رأى أمة فى شخص غبى كذب طول الوقت وصدق نفسه
إلى بلد الزولات غدا أذهب ان شاء الله وبعد أسبوع واحد نعود ونلقاكم على الخير والود

شمس النهار said...

ايه ده كله هو حب والا هدت حيل انتو لتنين والا اللي بيحبوا في فيلم رعب
يجعل كلامنا خفيف عليكم
لما اطلع من هنا قبل مااخد سيف والا ماء نار

maxbeta3zaman said...

شمس النهار
حج مبرور وعودا حميدا
لا هى فعلا هدة حيل على حرب أطاليا على حلق حوش ...استعملت فيها كل الأسلحة الممنوعة ...وهو ما يسميه الساسة الردع الكلامى بالوعيد والتهديد ...
عدت من الحجاز ...لقيت الدنيا والعة بالجاز ؟؟؟
حمدا لله على السلامة

norahaty said...

السلام عليكم ورحمة
الله تعالى وبركاته
ياااااامكس يبتاع زمان انت وحشتنى
فين الجديد معقول كل الاحداث اللى حوالينا دى ما أوحتش لك بجديد منتظرينك :)

maxbeta3zaman said...

الى النور اللى بيهاتى وبالخير بيواتى
والله أنا كنت خارج موطنى فى الأسبوعين الماضيين وتلقيت الأخبار تليفيزيونيا وما حدث فى غزة حدث وأنا فى الجو عائدا لمصر من السودان.. وفوجئت به عند وصولى المنزل ..وما زلت فى مرحلة المتابعة والهضم..بس أخونا بيرم كتب فى الحذاء الوجهى البوشوى كلاما جميلا ..وانا بالصدفة لسة سايب عندك تعليق وميل كمان

About Me

My photo
أحب الثقافة والفنون والشعر وتبادل الأفكار النافعة والهوايات المتعددة والمصنوعات اليدوية والرسم والمسرح والأغانى القديمة ذات المعانى الراقية والأفلام الكوميدية اتقن الكثير من الأعمال اليدوية (اصنع بنفسك )واهوى أصلاح أى معدة تتلف : حته جديده بقى أنا الماكس فى أحشائه الضحك كامن فهل ساءلوا بلوجاتى عن طرفاتى