من الفيس بوك الى البلوج ياقلبى لا تحزن

الفيس بووك مكان جديد نكتب فيه على الفور ولكن المشكله انه كالجريده تأتى عليه مئات الكتابات من الأصدقاء فتردم ما دونته فيه فى دقائق وتصبح القصيدة او المقالة او الفكرة .....ذكرى لذلك احب تسجيل بعض السطور المهمه والطريفة هنا بين الحين والآخر
السطور دى ارسلتها من امريكا للقاهرة ليقرأها زميل لىفى مناسبة احتفال الزملاء بذكرى الرعيل الأول وذكرى منشىء الكلي الفنية العسكريه الفريق محمد ابراهيم سليم مديرها فترة وجودنا فيها فى الستينات ...فكتبت عنه

فى ذكرى أب راحل ...ومعلم وقائد

أبدأ بقول شوقى ...وقول شوقى امير الشعر

هو الدهر ميلاد فشغل فمأتم :: فذكر كما أبقى الصدى ذاهب الصوتِ

***********

من ضمن ماجاد الزمان بيه على البلد دى انها
موعوده برجالها اللى بيفنوا عمرهم فى حبها
موش بس بجهودهم بيبنوا طوبه واحده ويكتفوا
لكن بيبنوا  ع المدى من بعدهم اجيال بتحفظ عهدها
وتشارك اللى يمد ايده بالوفا وبتقطع اليد اللى الحلال فى قطعها
ووالدنا كان قائد وكان اسمه محمد و ابراهيم وكان شديد
بس الصرامه كان وراها حب بيلين له الحديد
وكان كأنه فى سباق مع الزمن عاوز يطلّع جيل جديد
ويكون شعاره العلم والإيمان وجَد.. زى رجالة الصعيد

وكنا فى بدايتنا صبيان شباب عاوزين اجازه وسيما وحاجات زى دى
لكن ماكنش فكرنا كده زيهم  او زى والد لما بيبص ل بعيد
لما كبرنا وشوفنا وعركنا الحياه عرفنا قيمة الجتر والقايش وطابور التمام
والورشه والمعمل والكنترول تست والشفوى و....تلبخ تعيد

كان الفريق لما يمر على الفرق فى جوف  الليل تحس انه بيحبك اكيد
وانه حريص على نجاحك وعاوزك تبقى لبلادك مفيد    

ِ وان زمجرته وشخطه وزغرته ..قناع وراه أبوّه وحرص زى حرصك ع الوليد
ماانساش فى يوم لما فى مدرج لمنا كده  كلنا ينصح كما الوالد يقوللك خبرته
وقال لنا ان التقدم راح يكون فى الكهربا والميكنه والكنترول وكان كلامه صح الله يرحمه
رنت فى ودنى الكلمه دى وانا كهل وعجوز ولما شوفت الدنيا قلت تانى الله يرحمه

وارجع لصورته لما كان بيمر  و يشوف شغل الخواجه الأجنبى
ويبص على ورقك فى نص الامتحان والمسطرة الحاسبه ولوحة الرسم واللى بترسمه
دلوقتى وانا عاللاب توب واللوحة بادوس ودوستى ع الزرار تجيبلى عالم كان بعيد بدى افهمه  
لو خليت الدنيا من الناس اللى تفكر وبالعزيمه  عندهم إصرار ماكنا شوفنا ف كل لحظه شىء جديد  

لكن يظل كل من وضع الأساس وكان بقلبه بيشتغل وعينه ع الوطن العظيم ..له مننا كل احترام ومن تانى نقول الله يرحمه
********