انه دكان للخردوات نبيع فيه الخواطر والذكريات.. ونشارك بالقصص ونقرأ من خلاله أفكار اهل الدكاكين المجاوره ونسمع منهم كما نحكى لهم - هو مكان لتواصل جيل أوشك على الرحيل مع جيل هو بطل المستقبل القريب ...

Friday, February 11, 2011

جمعة الخلع



آبو أجنده والتنـــــــوح


واقف يخطب زى اللوح


سد ودانه قافل مــــــخه


عمر عقله ماكان مفتوح


عاوز يهرب فين حايروح


حايروح بره فيها مخاطره


لو بات فيها موش مسموح


برضه كمـــــان الغله تقيله


شوف هابرله كـــام لحلوح


والجيش قاعد جنبه وساكت


قــــــوم واتلحلح شيل اللوح


اخــــلع جدره شيل مساميره


شيل اللزقه كفــــــــانا نوح


شـــدله رجله شق له صدره


والا الخلع ده موش مسموح


دى موش طاعه ديه نطاعه


والجماهير صوتها مبحوح


اقلب ضــــــده إمزع كبده


اصل ده ديك فرفر مدبوح


شوف واقف يتكلم بارد


والتحرير هايج ماتروح


رفعوا الجزمه والكتانله


والتانى مصمم ..أنزوح


والطرشان سلكنا ودانهم


والأموات سابو تربتهم


وانا شايف سيدنا نوح


جاى بسفينه وبيقول اركب


لا حــــاتنفع تله ولا دوح

5 comments:

!!! عارفة ... مش عارف ليه said...

"شوف واقف يتكلم بارد
والتحرير هايج ماتروح"

---------------

صدقت والله

واضح إنه مأخدش بالله
غير لما راحوا له من التحرير

الف مبروك
طعم الحرية جميل

maxbeta3zaman said...

ايها العارفه وعامله انك موش عارفه
مبروك لمصر يشبابها وفتياتها أولى العزم والهمه ...الحقيقه انا غاظنى جدا تناحة المخلوع وبروده وكأن الزئير ده كله موش ليه والملايين دى كلها موش موجوده ...بوركت كل قدم زحفت وكل حنجرة هتفت وكل شهيد سقط بشرف

سمراء said...

مبروك خلع اللوح
ويارب بكرة يكون احلي
طول ما في شعب ليه صوت

مبروك
سمراء

maxbeta3zaman said...

سمراء التى هى حلم الطفوله
تحقق حلم جيلين بأسرهما بخلع ذلك اللوح الأبلكاش المغطى بقشرة مجلده من البلاده وانعدام الحس بالناس كل هخذه الصرخات لم تصل لأذنه كل هذه الملايين التى فهم مرادها الطير والنمل والفئران والسمك ...إلا هذاالشخص وتابعيه ومطبليه فعلا سهرت ليلة الخميس الحمعة حتى الفجر اكتب فى هذه السطور الغاضبه ولما انزاح ليلا غبض غيظى وبردت نفسى

norahaty said...

دى موش طاعه ديه نطاعه


والجماهير صوتها مبحوح


اقلب ضــــــده إمزع كبده


اصل ده ديك فرفر مدبوح

اهوة اتشال وربنا ييسر ويسهل الناس خليهم يلتفتوا للى جاى واللى كامنن وهاسس لما يلاقى الفرصة لأجل يرجع تانى

About Me

My photo
أحب الثقافة والفنون والشعر وتبادل الأفكار النافعة والهوايات المتعددة والمصنوعات اليدوية والرسم والمسرح والأغانى القديمة ذات المعانى الراقية والأفلام الكوميدية اتقن الكثير من الأعمال اليدوية (اصنع بنفسك )واهوى أصلاح أى معدة تتلف : حته جديده بقى أنا الماكس فى أحشائه الضحك كامن فهل ساءلوا بلوجاتى عن طرفاتى