جمعة الخلع

آبو أجنده والتنـــــــوح

واقف يخطب زى اللوح

سد ودانه قافل مــــــخه

عمر عقله ماكان مفتوح

عاوز يهرب فين حايروح

حايروح بره فيها مخاطره

لو بات فيها موش مسموح

برضه كمـــــان الغله تقيله

شوف هابرله كـــام لحلوح

والجيش قاعد جنبه وساكت

قــــــوم واتلحلح شيل اللوح

اخــــلع جدره شيل مساميره

شيل اللزقه كفــــــــانا نوح

شـــدله رجله شق له صدره

والا الخلع ده موش مسموح

دى موش طاعه ديه نطاعه

والجماهير صوتها مبحوح

اقلب ضــــــده إمزع كبده

اصل ده ديك فرفر مدبوح

شوف واقف يتكلم بارد

والتحرير هايج ماتروح

رفعوا الجزمه والكتانله

والتانى مصمم ..أنزوح

والطرشان سلكنا ودانهم

والأموات سابو تربتهم

وانا شايف سيدنا نوح

جاى بسفينه وبيقول اركب

لا حــــاتنفع تله ولا دوح

الكرسى -الورث

بمناسبة العند والزرجنه لقيت كام بيت كده عندى من زمان كتبتهم فى القطار أيضا ويظهر ان القطار ده وخصوصا الأسبانى ملهم .. أو يمكن لأن المسافر هناك يقعد على كرسى فخيم فيوحى الكرسى له بزخرف القول ....القصيده اسمها "الكرسى -الورث" وأظن أنى كتبتها عند بداية الكلام عن نية التوريث ...بس هى لها مناسبة الآن لأن فيه قوة جامده بتشد الجالس على هذا الكرسى الرئاسى ...أقول


كرسى الرياسة بمغنطيس جامد يشد المقعده

قاعد عليه حالف ماهو قــــايم ولو كره العدا

والمسندين متغريين فى الكوع بماده مقدده

والضهر ملزوق فى الكتاف وفى الضلوع بأمير....وده

عذره ماهو قاعد.. ماهوش قادر يقوم.. م البغدده

أصله بيدى اللى عليه العز والجاه .. موش كده؟

**************

كرسى الرياسة بيتورث م الأب لابنه لما يموت كمان

والجوقه تعزف لحن نصبه بالناى والعود والكمــــان

والنمل يهتف بالدموع شيلو الملك هاتو المليك والكل فان

أهوده عرفناه والسلام ..أحسن من المجهول .. ولو كان ألعوبان

طب ماحنا زى السورى زى الليبى زى المغربى والأمريكان

موش بوش كبير ..راح مًّدى كرسيه للولا البوش الجبان ؟

والأردنى قام من سرير الموت .. وجه ..قلوظ لأبنه الصولجان

والسورى عّدل في القانون ... والصبح بدري كان شاغل المكان

والمغربى شال نعش ابوه وقبل مايشيلو الصوان كان اسمه منقوش عالحيطان

عاش المليك... مات المليك... والزمبليك راكب حصان

والشعب بيعيط... ودمعه م الفرح الحزين يملا جفان

دا الشرع ... والقانون .. ودستور البلد والأمر باين للعيان

الواد بيورث ملك ابوه ..... ويورثـــــــه لابنـــــــه كمــــان

فيه حد بيسيب شقته لما يموت غير العويل والأهطلان ؟؟

والحكم زى الشقة .. بالقانون كده تتورث ....حكم الزمان

الكرسى والمال والشعوب ... دول للوريث ..صدر البيان

لكن شباب 25 يناير كان لهم رأيا مخالفا

قبيل الثورة بأيام

كنت مسافرا فى القطار لزيارة اولادى بالقاهرة ...كانت ثورة تونس طازجة وأحداثها تتوالى ...سرح خيالى فى نظرية الدومينو ..وتخيلت عدوى الثورة كيف ستكون إذا أصابتنا ؟...ومع تجبر النظام وإحكام قبضته على البلاد وتحجيمه لكل محاولات الاحتجاج ...تخيلت هذه الفانتازيا التى جاءت على خاطرى والتى حدث عكسها عندما ثار الشباب فكل الشخوص الذين ذكرتهم هم نفسهم الذين طردوا ماعدا واحد

عدوى الثورة
أوحى إلى خبر طريف أو نكتة أرسلها أحد الزملاء تقول النكتة ان الدولة أمرت بتجهيز طائرات شركة الطيران الوطنيه فى حالة رحيل الشعب وطلبه للمغادره الفوريه حركت هذه النكتة الفانتازيا التاليه داخل خيالى وتخيلت ان عدوى الثورة التونسية قد سرت عندنا ولكن على طريقتنا نحن فمجرد ان ذاعت اخبار ثورة تونس وفرار رئيسها جوا انتقلت رياح الثورة للحكومة عندنا واستدعت الحكومة الحزب والوزراء لاجتماع عاجل وترأس الاجتماع اعضاء لجنة السياسات وجلسوا متحفزين على المنصة والقاعة تعج بأعضاء الحكومة والحزب والمحافظين ....افتتح الجلسة ثعلب لجنة السياسات وأخذ يخبط على الميكروفون ويهمس ...تسسست تسسسست واحد اتنين تلاته عشره ...السادة أعضاء الحزب كلنا شاهدنا وسمعنا احداث ثورة جمهورية مطوبس الخضراء لقد ثار الناس على الحاكم لأنه لم يعلمهم الأدب وترك لهم الحبل على الغارب فهبوا ضده ...لو كان وزير الداخلية المطوبسى دكر ماكانش طلع واحد منهم من عتبة بيته ....مقاطعه من وزير العربات الخضراء والعصى الغليظه : الكلام ده موش عندنا ياباشا احنا محزمين البلد كويس ومحدش يقدر يعمل هنا كده فيرد التعلب: احنا موش مطوبس ..وموش حانستنى اما يهجمو علينا ...احنا اللى حانهجم عليهم ونعمل الثوره المضاده ونطردهم كلهم بره ....لازم ننتفض ....لازم نثور ...لازم يكون عندنا زمام المبادره بدل ما يتغدو بينا نتعشى بيهم أصوات مستنكره :العكس العكس ياتعلب.. اسكتو اسكتو انا عارف باقول إبه أنا قصدى إذا كانو ناووين يتغدوا بينا النهارده نتعشى بيهم احنا امبارح يعنى مايصبحشى عليهم النهارده من أصله تصفيق حاد وهتاف من الحضور وكلمات جانبيه الراجل ده بيتكلم صح هى كده الثوره الاستباقية ....ايوه خدهم على مشمهم ومنخليهومش يلحقو يعملو حاجه ...يطلب وزير التضامن الكلمه ياسعادة التعلب الناس دى لازم تخرج م البلد ده انا تعبت معاهم مهما اديهم مابيشبعوش الدعم فلسنا والعيش قرفنى والبوتاجاز طلع عينى دول شعب جاحد تصيح مجموعة هتيفة الحزب الثوره الثوره الثوره الثوره الشعب ده لازم يطلع بره وترج الهتافات القاعه يقف وزير الفلوس والضرايب متحدثا :الناس دى لازم تتأدب بعد كل اللى عملته لهم ومع كل اللى لهفته منهم موش عاجبهم وبيشنعو عليا وبينقوا على قصرى دى ناس جاحده يالا نثور عليهم كفايه استغلال كفايه فساد احنا صبرنا عليهم كتير آن وقت الثوره على الرعاع مصاصين الدماء ينهض الرجل الفل الذى يعلوه البياض فى هامته وشاربه من فرط حكمته وهو من فرط طوله دوى صوته مجلجلا فى القاعة وقال أظن محدش قاسى من ظلم الشعب ده للحكومة قدى الناس دى لو ولعت لهم صوابعك العشره شمع برضه موش حايرضى وحايفضل يشتكى هما الفاسدين وهما الكسالى هما أعداء الأمه موش احنا ...تهدر هتافات مجموعة الهتيفه نضف نضف يانظيف واطرد الفساد والزيف تصفيق حاد وزغاريد من من بعض النسوة الجالسات فى الخلف يقوم وزير التخطيط ليدلى بكلمته وسط الحضور فيقول ياجماعه احنا عاوزين نظام ثورتنا على الشعب موش همجية لازم نكون منظمين انا عاوز نقسم نفسنا مجموعات مجموعة القناه وسينا تكسح الناس الموجودين هناك وتطاردهم بالطوب والنبابيت حتى حدود العراق ومايسبهومش الا وهما جوه المجموعة التانيه مجموعة الساحل الشمالى من بورسعيد لحد السلوم دى بقى عليها تطارد وتكرش الناس بتوع الدلتا والبدو وتدفعهم للهروب من البحر المجموعة التالته عليها بغرب النيل تكسح الناس بتوع الصحرا الغربيه ادامهم لغاية ليبيا المجموعة الرابعه بقى عليها بالصعيد طفشوهم للسودان وكينيا والمجموعه الخامسه والأخيره البحر الأحمر زقوهم ناحية البحر وياخدوها عوم بقى للسعوديه والابالمراكب ملناش دعوه كده يبقى الكل انكشح من هنا ومشى وتكون ثورتنا البيضاء نجحت تصفيق حاد وهتاف من القاعه بالنظام والنبوت وموش عاوزين حد يموت يقوم ثعلب السياسات ومدير الجلسه هدوء من فضلكم ياللا انطلقوا اتعشوا بيهم الليله والعربيات بتاعة الطوب والنبابيت جاهزه بره ومحمله طوب وشوم وفيه زلط للى عاوز كمان شركات الحديد عندها اوامر بعمل اسياخ حديد ليكو وحرفها حامى السيخ مقصوص اتنين متر كل واحد له نص طن اسياخ بس ماحدش يعور حد خوفوهم بيها وزقوهم قدامكو من غير ماتغزو حد ياللا كلنا ايدينا فى ايدين بعض والنصر للحزب والكوادر يصيح وزير الصناعة والتجاره ياجماعه فكرو شويه طب لو كل الناس هربت مين اللى حايدور البلد الصناعه والزراعه يتدحل وزير العربات الخضراء والنبابيت وحاملى العصى ولا يهمك قوات الضرب المركزى جاهزه وهى معانا فى الثوره الحكوميه دى وعددهم بالملايين وبعد جلاء الشعب الفاسد كله يبقوا دول هم القوة المنتجه زراعه وصناعه وكمان يضربو بعض لما اى واحد منهم يخالف القانون كده يبقى الضرب منه فيه ....تصفيق حاد وهتافات من باقى الحضور
المشهد الثانى ...الثورة ....انتفاضة الحكومة ضد الشعب
ينطلق جحافل الحزب وكوادره وأعضاء الحكومة والمحليات الغاضبين كل فى مجموعته المحدده له ..ويبدأوا فى محاصرة الناس فى بيوتهم ويهتفون فى غضب ...ياللا بره بره عاوزين شعوب حره ويفاجا الناس الجالسين ليلا امام الشاشة فى البيوت بالأصوات الهادرة تصم آذانهم وينقطع لفيلم العربى الذى تعرضه القناة الأولى ويخرج المذيع خيرى حسن ليعلن فى صوت رخيم اليكم هذا النبأ العاجل لقد انتفضت جحافل الحكومة والحزب الغاضبة فى انتفاضة حكومية شاملة تعلن رغبتها فى التغيير تغيير الشعب الفاسد المستبد ووضع حد لممارساته المستبدة والمستفزة على مر السنوات والعقود العشر الماضيه انها انتفاضة تلقائية عفوية جاءت نتاجا لما عانته الحكومة من عنت وظلم وابتزاز على مدى أعوام متعاقيه ...وهاهم كوادر الحزب مع الحكومة والمحليات هبوا جميعا فى ثورة حكومية عارمه لن تترك الشعب الفاسد الا بعد ان يجلوا عن البلاد وبدون رجعه هنا القاطره مارشات عسكريه وأناشيد وطنيه بصوت فايده كامل ومحمد فوزى ويخرج الناس للشرفات لمشاهدة مايجرى فيفاجأ الجميع بأنه محاصر من جحافل الحزب والحكومة ويهرب الناس امامهم مذعورين من الصيحات والهتافات الغاضبه ويأتى صوت المنادى فى الميكروفون محدش ياخد حاجه اكتر من بطانيه وخمس ارغفه وحتتين جبنه نستو أجهزه كهربية لأ تليفونات محموله لأ ثم ينهال الطوب والزلط تجاه الناس المذعورين وتبدأ المطاردات عبر الشوارع الى الطرق التى حددها المخطط الثورى
المشهد الثالث
مجموعه مذعوره من الشعب تجرى تجاه النيل فى منطقة مصر القديمه ويقذفون بأنفسهم فى النهر والطوب يتساقط من حولهم كالمطر ...يهمس أحدهم حانروح فين ...انا سامع اننا مفروض نهرب للسودان ....بس دى مسافة جامده حانخدها عوم والا إيه ...يهمس جاره طب ماناخد الأتوبيس النهرى والا ناخد فلوكه ...يشاور الجميع لأحدى وحدات الأتوبيس النهرى المملوءه على آخرها بهاربين من حى الزمالك والمهندسين فيقول السائق لهم مافيش مكان الباص كومبليه خليكو عايمين لحد ما أودى دول اسيوط وارجع لكم
المشهد الرابع
سكان الصحراء الغربيه يهرولون على الجمال ومعهم أغنامهم والبطاطين المسموح بها ووراءهم جحافل الحزب بالطوب وأسياخ الحديد تدفعهم نحو الحدود الغربية بكامل طولها والصيحات ترن فى آذانهم ...ياللا على قرايبكو اللى هناك مالكوش عيشه هنا خلاص
المشهد الخامس
سكان الدلتا يهرعون مذعورين أمام جحافل المطاردين وقاذفى الطوب والزلط والهتافات تصم آذانهم ...ياشعب يا هجاص الثوره قامت خلاص ...ياللا بره ع اليونان ....ياشعب جشع جعان بالطوب بالأمر حانزق الشعب البحر تصيح إحدى السيدات المذعورات فى جارتها : هوه فيه إيه ياختى ؟ أصل الحكومه فاض بيها ياختى وعملت ثوره زى بتاعة مطوبس ...بس ياختى دى مطوبس هى اللى كرشت الحكومه والراجل بتاعهم ....اصلهم بيقولوياختى انها ثوره مضاده بقسماطيه باين يعنى ايه كده يام احمد ...يعنى كل النمل قبل مايكلك مضاده بقسماطيه !! طب ياللا بينا ياختى قبل مايفعصونا اجرى يا ام احمد اجرى
وبعد 5 أيام لم تنطفىء خلالها ثورة الحكومه على الشعب الفاسد الذى كبل الحكومة لعقود طويله تنجح الثوره الاستباقيه البيضاء فى طرد الشعب بالكامل الى البلاد المجاوره دون اراقة الدماء ويخرج خيرى حسن فى نشرة التاسعة ليعلن البيان الأول للثورة ..ثورة الحكومة
بيان واحد جاءنا البيان التالى من قيادة ثورة التطفيش البيضاء
نجحت ثورة الحكومة البيضاء فى إقصاء الشعب الغاصب عن تراب الوطن وتمكنت جموع الحكومه الحاشده الغاضبه باتحادها مع كوادر الحزب الواعيه مدعومين بقوات الضرب المركزى درع الأمة الواقى وسندها فى الملمات نجحوا سويا فى فى فرض ارادة الحكومة على الشعب الفاسد الغاصب والمستبد لقد طالت سنوات القهر قهر الشعب الحكومة وسلب مواردها أولا باول فى شكل مرتبات ومعاشات ودعم للطعام والوقود وعلاج وتعليم وطرق ومواصلات ..عملت الحكومة تحت سخرة الشعب الغاصب الذى كتم حريتها ففاض بها الكيل ( بحوالى اتنين قدح ونص ) فانفجرت الحكومة غاضبة فى غضبة حكومية غير مسبوقه وغير دموية ..ونزلت الى الشارع معلنة غضبها فأجبرت الشعب الذى كبل حريات الحكومة والحزب ومنعهما من من كل ما تنص عليه القوانين من حريات أجبرته على الرحيل والهرب خارج البلاد تاركا واءه كل أموال وممتلكات الأمة
تحيا الثوره .......عاشت كوادر الحزب الواعيه
موسيقى عسكرية ......اناشيد حماسية انا حزب وأمانى وثوره وغد يصنع للإنسان فجره ....يخرج الرواد فيه من كل ثغره ....وستبقى بلدى حره بلدى حررررره .....دع سمائى فسمائى محرقه دع مياهى فمياهى مغرقه واحذر الأرض فأرضى صاعقة دع سمائى دع سمائى دع سمائى فسمائى محرقه
وتعرض الشاشة صورا لجلاء آخر فوج من الشعب الهارب بحرا
ثم صوره لعلم كبير يرفرف على ميدان خال تماما من الماره
انتهت