انه دكان للخردوات نبيع فيه الخواطر والذكريات.. ونشارك بالقصص ونقرأ من خلاله أفكار اهل الدكاكين المجاوره ونسمع منهم كما نحكى لهم - هو مكان لتواصل جيل أوشك على الرحيل مع جيل هو بطل المستقبل القريب ...

Thursday, April 16, 2009

أما وقد قلوظت السلطانية


صديقة اعتز بها أهدتنى تاج الجزيرة ...السلطانية ... حسبتها -لسذاجتى مليئة بالفلوزج المعروف لدى الناس بالجيلاتى - لكننى علمت بعد وصولى حاملا ملعقة كبيرة من بتوع الشوربة ...انها سلطانية مرزوق الشهيرة فى الصورة الإذاعية التى تبدا بعبارة ...ياترى انت فين يا مرزوق ....وتنتهى بالكورس يردد... الدنيا أرزاق قسمها الخلاق ...سبحان الرزاق سبحانه ولما كان لزاما على من قلوظت له السلاطين أن يجاوب فهاأنذا ابدأ بما لم اعهده سلفا




أولا مجموعة الأسئلة التحقيقشخصية فى النيابة الكلية :


1 اسمك بالكامل : عادل المهدى ولكنه مركب يعنى محمد عادل محمد المهدى


المحقق: اتعدل وقول اللى فى البطاقة موش عاوزين ملاوعة من أولها ...اكتب يابلوجاوى الاسم الكامل عشان المحضر يبقى قانونى ( بلوجاوى ده اسم كاتب الجلسة


2 المشهور بيه بين صحابك؟


بين أصدقائى المقربين وزملاء الدراسة اسمى" ماكس "....لكن مع أصدقاء البلاليج وموقع الدفعة على النت : "ماكس بتاع زمان "


3 سنك ؟


59 سنة وده واضح من لون شعرى ودى مكتوبة فى أول سطر فى البروفيل


4 مجال دراستك


الهندسة الميكانيكية ..تخصص سيارات ... اكتب يابلوجاوى


5 اسم مدونتك إيه ؟؟ وعلى الله تكدب احنا عارفين كل حاجة !!


اسمها على اسمى يابيه ...ماكس بتاع زمان ...واشمعنى يعنى؟؟ ....عشان باتكلم عن ذكريات زمان


6 معنى صورة المدونة


فى الحقيقة دى صورتى مع أختى التى تكبرنى وقت طفولتنا التقطها خالى الذى كان يهوى التصوير ..وأنا البس ساعته الجوفيال وأبرزها فى يدى المستنده على الشلته وكان أملى أن تطلع الساعة حتى لو لم يظهر وجهى لفرط سعادتى بوجودها فى معصمى لكن اذا كبرنا الصورة تظهر الساعة بوضوح


7 هل فكرت فى إغلاق المدونة ؟؟


أنا لم أفكر وانما ضاعت لى مدونة لوحدها لما فشلت فى الدخول ونسيت كلمة السر ...كان فيها 4 بوستات ولم يعلق فيها سوى 2...3 أصدقائى زى شريف وربما منعم ...بعد كده عملت دى ومستمرة من رمضان الماضى تقريبا


8 رد فعلك لو حد قل أدبه


لا أتوقع أن يحدث لى ذلك لأنى لا أحتد على أحد ...وأسمع أكثر مما أتكلم ..ولم أبادر أحدا بالهجوم ..ولو حدث سأرد ردا يخجل من يتعدى ولكن بكياسة اكسبتها لى السنين


9 أسوأ مدونة ..


هى التى أحس بخواء محتواها أو تلك التى تتعالى على القارىء فى الردود ..والنوعية التى تحوى جعاليص الكلام من نوع شرانق الوجود العدمى وسحابات الكنافة القرمزية وشآبيب الرياح اللا نهائية ...


10 مصير الميل بعد ماتموت


حاسيبه زى ماهوه ...لأنى لا أمسح حتى الميل القديم كل ما دخل أو خرج من الميل بوكس موجود من 2004 ..لأنى لا أرمى الماضى بسهولة


11 هل اعطيت البسوورد لحد ...


طبعا أولادى هم من أنشأوا لى الميل ...وصديقى شريف " شيرين الكردى " هو من أنشأ لى البلوج واختار معى كلمة السر وذكرنى بها لما نسيتها يعنى كلمة السر معاهم


12 السفر


متعة لما أكون فى غير العمل ...فسحة أو سياحة ...أما مع العمل فالواحد حتى لايكون مركزا مع الجمال ولا الطبيعة حينما يكون مشغولا ..وفى السفر أحب التجول وسط الناس فى أماكنهم العادية غير السياحية وأراهم على طبيعتهم


13 المود بتاعك ايه


انشراحى انبساطى مرح فى معظم الأحوال ...واكتئابى تقوقعى بصفة دورية موسمية لا أعرف لها سببا وأحمد الله انها لا تستمر طويلا


14 وقت الفراغ


لى العديد من الهوايات ..الزراعة ..صيد السمك ..الرياضة بس ده كان زمان..بقى منها تنس الطاولة الذى مازلت اقول فيه لو سنحت الفرصة ..والمشى ..والهوايات اليدوية واصلاح المعدات خاصتى( كهرباء ميكانيكا سباكة نجارة بياض محارة قيشانى لو حكمت) ..ثم الشعر والفنون ..وتتبع الجديد فى العلوم ...طبعا النت فتح لى أبواب المعرفة فوق ماكنت أتوقع ولى أصدقاء فى أركان العلم ..نشر لى حوالى 25 كتاب كلهم فى النواحى الفنية والقليل عن نواحى انسانية أو رياضية ..أشهر كتاب يعرفه كثيرون هو أول كتاب نشر لى وعنوانه ميكانيكا السيارة للهواة والمحترفين وكان أول طبعة له عام 1986 من دار ابن سينا للنشر بالقاهرة


15 أكلة مفضلة


المسقعة ...إذا وجدت زهدت فى باقى الأصناف حتى وان كان خروفا مشويا ...كانت لى قريبة ظريفة تقول : اننا نحب الباذنجان لأن عندنا نقص فى بتنجانات البوتاسيوم !!


16 صفات من والدى


كان رحمه الله يفيض رقة وحبا وحنانا كنت المح حبه لنا جميعا من عينيه ..أخذت منه حب المشى الطويل وحبه للغة العربية فقد كان استاذا للغة درس فى كلية دار العلوم ..كان يتكلم معنا بالفصحى فى المنزل .. أخذت منه أيضا الهدوء الأسرى لم نشهد خلافا واحدا بين الوالدين طول حياتهما


17 ومن الوالدة ؟


هى من علمتنى الشعر فكانت تكتب قصائد زجلية بسيطة غاية فى الرقة ..تكتب عن أخواتها ..عن البحر.. عن الشمس ..هى من علمنى الحرف والمهارات اليدوية كنت أراها تضبط ماكينة الخياطة لتصنع لنا البيجامات ...كانت قمة فى شغل التريكوو الكوريشيه


18 ست أشياء تكرهها


الحر- الطاولة - الزحام - الضوضاء - الكشك كطعام -نهايات الأشياء الجميلة (الأجازة -الصيف -رمضان...


19 وستة تحبهم ؟


البحر - الشروق - الأطفال - المشى - بيتى مكانى أدواتى أشيائى فبيننا عشرة وعلاقة خاصة كما لو كانت كائنات حية - وأحب الزرع


20 نوع الشخصية


خنفشارية عنقودية كلكوعية منبسطة


21 لماذا دخلت عالم التدوين


كنا وصديقى جدا- شريف- الذى أصبح (نجيب محفوظ) بعد كتابه الأخير ...كنا نحرر سويا مجلة من صفحة واحدة فى الكلية يقرأها زملاءنا نرسم ونكتب شعرا وننقد ماحولنا ...وبعد ماتخرجنا تباعدنا وكنا نكتب خطابات نتواصل بها كانت من أجمل مايمكن مسجوعة وشعرية فى بعض الأحيان وتحكى عن حالنا ...وكتبنا كتبا عند دار النشر ذاتها وبدأ هو التدوين ...ثم أرسل لى عنوان بلوجه قرأت وعلقت كمجهول ..وعرض على فكرة الكتابة فى مدونة لى وجاءنى هنا وعمل لى المدونة وتنبأ لى بالقبول ...هكذا بدأت التدوين وتعرفت على مدونات فيها من المحتوى ما أدهشنى من مواهب وفكر وإيجابية كنت أظنها غير موجودة


22 أحلى جملة قيلت فى مدونتك


من وجهة نظرى ماأكتبه من ردود شعرية فورية تأتى من وحى اللحظة فهى تعبير فورى عفوى ..تضحكنى وأنا أكتبها


أما ماقاله الآخرون فلا أذكر بالتحديد فالناس طبعهم الكرم فى التقدير والمجاملة لزوم الذوق


23 أحلى بوست كتبته


هما اثنين عبرت فيهما بالضبط عما أحسست به فعلا وقتها ,,,الأول كان بعنوان نجحت ياماما بمناسبة زفاف ابنى الأكبر ...والبوست الثانى كان بعنوان وحدى على شاطىء العجمى ..كانا فى بداية انشائى للمدونة


24 أفضل مدونة قرأتها


عدة مدونات الحقيقة أولها مدونة علقت فيها بعبارة واحدة " مدونة تشعر القارىء بالسلام النفسى "


ومنها مجموعة مدونات شعرية لشباب موهوبين فعلا ... ومدونة فيها سيناريو الشادر الانتخابى كانت ساخرة وممتعة ..وأعجبت بمدونة خالو أحمد الصباغ لطرافتها وتنوعها وأجد فى كل مدونة بوست معين اسعدنى جدا قراءته وهذا يجيب على رقم 25 ضمنيا


26 الشغل بالنسبة لى ؟


أحب عملى عندما يكون فيه تجديد وتفكير وأبغضه عندما يكون روتينيا مكررا وأكثر ما يغيظنى حاليا هو ألأيزو الذى جعلنا نعمل إحصاءات وورقيات تكبلنا وتجعلنى أميل للسيكوباتية التصفوية التقاعدية


27 النت ؟


نافذة فتحت لى طاقة من المعرفة والمعلومات والمادة العلمية التى تساعدنى كثيرا فى العمل كما سهلت اتصالى بأهلى وأصدقائى المقيمين بالخارج ..نتواصل بسرعة الضوء ونعرف الأخبار فى التو


28 لمن تمرر الطاسة ولمن تقلوظها ؟


أهدى وأمرر هذه السلطانية الى كل من


جنى Jana


صفاء


أحوال الهوى ... وقد ضبط القلاووظ على قد دماغهم بالضبط فلا هرب ...هاربا منى ولا هرب...جئت يا صاحبى وجاء معى ... تاج ان القلوظه تعب









68 comments:

Unknown said...

السلام عليكم ورحمة
الله تعالى وبركاته
وصباااااااح الفل
من الجيزة اللى بتحييى
ماكس بتاع زمان
ودلوقتى وبكرة كمان
مش مصدقة نفسى اول تعليق؟
يعنى الالفة؟
طيب اشوف كده:(

Unknown said...

اه بصحيح :)
اول تعليق بجد
لولوىىىىىىىىى

Unknown said...

معلش بقى الفرحة مش سايعانى
ربنا يخليك يارب ويخليلك اولادك
ويفرحك بيهم كمان وكمان وتشوف
احفادك واحفاد احفاد(كبيرة دى)مفيش
حاجة كبيرة على ربنا سبحانه وتعالى
ربنا يرزقنا الصحة والعافية والرضا بما قسم لنا ....اميييييييييييييييين

Unknown said...

طيب اعمل ايه؟
معلش بقى :)استحملنى
اصل نسيت اقولك ان انا
جيت هنا النهاردة محولة من
عند عم جوجل لما كنت بسأله عن
حاجة لقيته جاوبنى وطلع لىّ
العنوان بتاعك والبوست بعنوان
(مريض بمستشفى احمد كمال بتاريخ15-9-2008)ماتتصور فرحت اد ايه؟
ياعم جوجل انت قصدك على مااااااكس بتاع زمان صديقنا ؟جيت اتأكد من كلام جوجل لقيته صح وكمان لقيتك جاوبت على التاج
واللى منه عرفنا
حاجات كتير اوى
واهم حاجة
انك بتحب المسقعة
واللى هى من (الصوانى التى اجيد صنعها جداً بشهادة اللى اكلوها)وكل
ما اتزنق فى عزومة للاصدقاء او الزملاء اعملها هى وصينية البطاطس
واتفضلوا بالهنا والشفا
احتراماتى ودعواتى
فى هذا الصباح الجميل
صباح يوم الجمعة خير يوم
طلعت فيه الشمس

Anonymous said...

هذه من أروع وأجمل التاجات التى قرأتها

جميلة وتلقائية كما أنت .. ولاتخلو من سخرية لذيذة تهون علينا الحال كثيرا

لا ادرى .. ولكنى احس بين السطور كأننى أنظر فى المرآة .. أو الى نفسى فى اطار آخر .. فهى إن لم أبالغ نفس صفات من لايريدون أن يروا الحياة الا من خلال منظار وردى دائما .. ويرفضون أن يحطوا على الأرض لأنهم متأكدون من أن الطيران أفضل

وهكذا .. لو طالبنى أحد بهذا التاج لأجبت ردا واحدا

اذهبوا الى ماكس

خالص تحياتى

ملحوظة .. لو زرتنى وانا عارف مشاغلك كتير .. ستجد شيئا جميلا

شمس النهار said...

الاجابات جميله ولطيفه مكتوبه بطريقه مبتكره
ادام الله عليك روحك المرحه

قوس قزح said...

غريبة
كأنى بسمع شريف و هو بيجاوب على التاج

واضح انكم اصحاب اوى

و فى حاجات كتير مشتركة بينكم

بس هبقى اساله على المسقعة و الكشك



اجاباتك قريبة من القلب و بعيدة عن التجمل

تحياتى

سمراء said...

اهديت تاج ذات مرة الا انني لم ارغب في الكتابه عنه حيث انني وجدتني بين سطوري وليس هناك داع لتعريف نفسي بشكل مباشر
ولم استمتع ابدا بقراءة المقالات الخاصة بالتاجات
انما بهرت بالسلطانية خاصة اجابات الأسئلة 10 و13 و20

تحياتي
سمراء

Kiara said...

اجاباتك جميله اوي

فيها روح جميله

كل عام وانت بخير

maxbeta3zaman said...

نورهاتى التى جاءت بالقلوظاتى
لأ صدقى فالمثل الشعبى يقول: من يلقى بالسلطانية ...يكن أول المتفقدين للقتيل ...تحت البلكونة..لكنى حقيقة سعدت بالموضوع فى مجمله

maxbeta3zaman said...

ونورهاتى أيضا
الله يكرمك بمثل مادعوت به وأكثر ..ويرزقنا جميعا نعمة الرضا فهى فى رأيى أعلى مراتب الإيمان ..وياليت أن يتبعها رضى من الله علينا فذلك هو الفوز العظيم
تحياتى لك

maxbeta3zaman said...

نورهاتى
هو جوجل مابيفوتشى عليه حاجة ...ده قاعد بقمره بيصورنا ليل ونهار ..كمان بيدخل البلاليج ؟؟ ووصلت له حكاية الكمومبيوتر المتفرمط .....وما دمت ممن يجيدون المسقعة ..فيوم ما سوف نأكل طبق عندكم ولربما نجح العلماء فى نقل عينات منها عبر الشبكة أو فى كابلات الألياف الضوئية ..
أسعد الله صباحك بالخير دائما

maxbeta3zaman said...

شريف
والله ياخويا أنا لما جانى الخبر حسيت انى داخل جهاز الأشعة المقطعية حاتصور عضم ولحم وفشة وقلب ويمكن مخ كمان ..بس انتم جميعا أحبائى ..وموش عارف ليه ياأخى المنظار معايا كحلى اليومين دول موش بمبى ..وموش عارف ارفرف خالص لأن جناحاتى وجعانى وعمال البس فى عواميد النور والشجر وانا باحلق فوق الأرض ..عندكشى مروحة هليكوبتر استعمال خارج اركبها على ضهرى تعلينى شوية واعرف اعمل زى مابتقول كده أما أنت ياصديقى فلك عندى مكانة و ود أحسبك تعرفهم وأحمد الله الذى جمعنا لنصبح هكذا أصدقاء وأخوة ...

maxbeta3zaman said...

شمس النهار
الله يكرمك.. أنا فاكر أن أول مرة أجاوب على سؤال عن سبب تسمية المدونة كان عندك وفى مدونتك ..وربنا يديم السرور علينا جميعا يارب

maxbeta3zaman said...

قوس قزح
أهلا بك ..أنا فاكر انك أول من بادرنى بالدعاء فى أول مرة تدخلى مدونتى ...فعلا أنا وشريف أصدقاء جدا وهو أقرب أصدقائى لى على الإطلاق التقينا وتزاملنا منذ زمن طويل ونتشابه فى كثير من الأوجه أما عن إجاباتى ففعلا هى قريبة من القلب لأنها صادرة من منطقة تتوسط المسافة مابين القلب والكبد و تسمى الفشة التى يقال انها مصدر الإجابة عن التاجات خصوصا فى المدونات
أهلا بك قوسا أخجلنا بكرمه ...

maxbeta3zaman said...

سمراء التى هى حلم الطفولة
السلطانية تكليف موش تشريف ..يشعر المرء خلاله أنه فى الغرفة أم مراية سحرية ...والبلوجاوى عمال يسأله وهو بيرد وعارف ان المرايه وراها ناس محللين بيرصدوا كل نفس ..الحمد لله ان فيه 3 إجابات كانوا مقنعين وهو ماجاء على خاطرى تلقائيا فى كل ماقلت
مرحبا بسمراء وشكرا لك

maxbeta3zaman said...

كيارا دليل الحيارى
ذلك فقط لفرط كرمك ..كما اننى أرى روحا ودودة فى كتاباتك عن المذكرات اليومية ...وعرضا مشوقا للتاريخ فى جزء الحضارة
أهلا بك كيارا

Mostafa Safwat said...

هي دي الاجابات ال 100 100
ربنا يديك الصحة

maxbeta3zaman said...

Bondok المختفى خلف الجيتار
أين أنت ايها المختفى الأزلى ...انا مثلك عندى حالة تقوقع ..معدوم الانبساط ..لكنها تفرج من حيث لا ندرى ربما مع انفراج ألأزمة المالية العالمية وانقشاع انفلونزا ال....زير
وانت الذى ميه ميه موش أنا

بـراااح said...

الاستاذ ماكس
استمتعت بكلماتك البسيطة العفوية و تنقلت من سؤال الى اخر بمنتهي السلاسة فانتهت الاجابات سريعا كاللحظات السعيدة
تحياتي

Anonymous said...

عزيزى ماكس

عاتب عليك انك لم تزرنى .. ربما وجدت شيئا اعجبك

carol 2002 said...

اول مرة تقريبا أقرأ تاجا للآخر
لأننى لم أقتنع بالفكرة
ولكننى قرأته وانا لا أستطيع أن احول نظرى لباقى المدونه لقراءة ما بها من ماضيع أخرى
و أيضا لا استطيع ان اكف عن الضحك
تحياتى على روحك الجميلة
و مفرداتك الكوميديه الرائعه

أتمنى لك التوفيق دائما
:)

maxbeta3zaman said...

براح
شكرا لك على المرور ...جعل الله لك براحا وأودية مديدة من السعادة دائما
جزيل الشكر لك

maxbeta3zaman said...

شريف الشهير
ذهبت وأسعدنى اللقاء التلفيزيونى والحفل الودود ..دائما تأتى لمساتك مدهشة ومتنوعة ...زدتنا سعادة وفخرا بأنا من أصدقائك

maxbeta3zaman said...

carol 2002
أهلا بك فى دكاننا المتواضع ..وشكرا لك على مجاملتك الرقيقة ..وندعو الله أن يعيد علينا الابتسام وسط هذه الظروف والأحوال الصعبة

صفــــاء said...

أهآآآآآ
يعنى انا متقلوظ لى السلطانيه وانا ولا عندى فكرة
طب حتى كنت كح والا شاور والا قولى أى حاجه اعرف بيها ان سيادتك بتدبر لى المقلب دة
عموما خفه دمك مش محتاجه شهادة منا
والأجابات كلها متميزة جداااا
ويا رب المحقق يصدر لك أمر أعتقال على حب الأذى اللى انت عاوز تعمله فيا دة
ميرسى جداااا على تاج الجزيرة
يا ترى انت فين يا مرزوق
وخدى بالك مالعيال يا باتعه
بس أعذرنى فى الاجابه عليه وخصوصا ان سلوى صاحبتى لسه مقلوظه ليا عما من قريب ... كما وأننا صعيدى الأصل والمنبع والعمم المتقلوظه عندنا على قفا من يشيل
عافاك الله من الأكتئاب وحاله الكمون دى تبقى مؤقته وترجع تانى تتحفنا بالأزجال على على وزن أسامينا
شكرا للهديه
وسلامى لك

زقطـوطـة said...

إزي حضرتك ؟
اشتقت جدل لقراءة بوستاتك
وسامحني على الغيبة و التقصير
والعودة باسم مستعار جديد
: )
بس أتمنى لو تعرفني من غير ما أقوللك : )))
حبيت إجابات حضرتك على التاج
لأني لقيت نفسي في معظم الأجوبة
: )))
واستغربت..إني طالعالك يا عمو
: )))))))))))

تحياتي القلبية : )

Jana said...

فى البداية عذرا للتأخير سيدى
قرأت التدوينة من فترة ولم أستطع التعليق عليها وقتها لسوء حظى
وها انا جيت
:)

اجابات حضرتك لطيفة جدا وطريفة واسلوب الاجابة على التاج جاءت جديدة مما جعل التاج مبهجا بحق
وقت قرأته فى المرة الأولى رتبت تعليقا فى ذهنى كان مفاده انى أشاركك فى بعض الاجابات
لكن حين وصلت للنهاية ووجدت انى ممن "اتقلوظوا"بسلطانية التاج قررت الاحتفاظ به حتى اجابته
خاصة وانه "اتقلوظ"لى مرة ثانية من يومين..فأصبح سلطانية وصاية..بمكسرات اضافية ولا سلطانية الشيخ وفيق فى بحرى
:)

اتمنى اقرأ أشعار حضرتك .أتخيلها من الروائع
وانوى بإذن الله أن أبحر قريبا فى مدونة حضرتك وأبحث عن كل ما فاتنى

أدام الله صداقتكما الجميلة حضرتك وباشمهندس شريف مكسب لنا فى عالم التدوين

دعواتك يا فندم لانى "متقلوظة"فى امتحانات الاولاد" وأحلم بعمل الكثير والكثير فى الاجازة بإذن الرحمن
وسأجيب ان شاء الله عن التاج فى أول فرصة أتنفس فيها الصعداء او اجلس فيها القرفصاء أيهما أقرب
:)))

Unknown said...

السلام عليكم ورحمة
الله تعالى وبركاته
وصباح الخيرات.

☼♫♪ عمــاد الدين يــوسف ☼♫♪ said...

عموم ماكس الحبيب
التاج ده أظهر شخصيتك المرحة اكتر واكتر واثبت ان فعلا مفيش فجوة لا ثقافية ولا زمانية زي ما بيحاول كتير انهم يتهموا بيها الجيل الجميل بتاع حضرتك
تحياتي

Unknown said...

طولت الغيبة ياباشمهندس
ارجو من الله ان تكون بخير
وكذلك احبائك جميعا
ويارب يكون الحفيد
وصل بالسلامة
وسرير الحفيد
اتعمل
كمان
احتراماتى ياماكس بتاع
زمان ودلوقتى وبكرة كمان

فشكووول said...

العزيز ماكس بتاع زمان
برضه فشكول من بتاتيع زمان
تحياتى
احسن حاجه فى اجاباتك القلوظه اللى باينه فيها وكمان الشخصيه
خنفشارية عنقودية كلكوعية منبسطة انبساط المياه على سطح البسيطه
تحياتى

salma mohamed said...

حضرتك فين ياباشمهندس؟
ليه الغيبة؟
ان شاء الله تكون بخير.

salma mohamed said...

الباشمهندس ماكس
شفا الله حفيدكم وعافاه من كل سوء
وصبر والديه على محنتهم
وساتوجه له سبحانه بالدعاء له فهو قادر وحده على ازالة مابه ومعافاته
كما ان الدعاء يتصارع في السماء مع القدر

فشكووول said...

واحشنى يا عم ماكس
انت فين من زمان

أحــوال الهـوي said...

استاذنا ماكس بتاع كل زمان

كنت غايب عن التدوين ثم رجعت و لقيتك غبت

و شكرا علي التاح اللي سعادتك افتكرتني بيه

يارب تكون بخير و نويت ما اجوبش علي التاج الا في وجودك

تحياتي

Unknown said...

السلام عليكم ورحمة
الله تعالى وبركاته
انا بصبح واسلم
وابتهال بالدعاء لله
عز وجل بالشفاء
الى كل مريض
آمين يارب
العالمين.

maxbeta3zaman said...

فشكول
شكرا على السؤال ...والله ما حجبنى سوى الظروف الصعبة التى أخذتنى تماما
تحياتى لكل أحبتى ودعواتكم للصغير آدم

maxbeta3zaman said...

زقطوطة
أعتقد أنك ممن اختفوا فجأة كما حدث معى ..وحدثى يقول ربما البنورة اللميع ربما ..وربما آخر ...عموما عودا حميدا وخالص الأمنيات

maxbeta3zaman said...

صفاء
دعواتك للصغير ياصفاء ..ونسال الله أن يجرى شفاءه على يد من يشاء من جنده لآدم الصغير الذى شغلتنا حالته الصحية منذ مولده فى مايو الماضى
تحياتى لك

maxbeta3zaman said...

عماد
أهلا بك عماد وأرجو أن تكون الصحافة ماشية تمام ...أهلا بالفتى الهمام

maxbeta3zaman said...

جنى
ربنا يخلى ويرعى وينجح الأولاد ..فهم النعمة الكبرى التى يمحنا الله اياها ..وانشاء الله يكونوا نحجوا وزاد نجاحهم من سروركم ...

maxbeta3zaman said...

بنيتى سلمى
شكرا على السؤال ...ونسأل الله لك مثوبة أجره على دعاءك بالخير لآدم الصغير ..وقاكم الله وطأة الامتحان فيمن تحبون ...والهمنا جميعا فضيلة الصبر عند الشدة والامتثال الفورى لحكمه وقضائه

maxbeta3zaman said...

نورهاتى
صباح الخير وشكرا على السؤال والعون والتضامن ...جعلكم الله دائما سايقين فى الخيرات ..نسأل الله السلامة والعافية وموفور الأجر لك ولمن تحبين
وصبحك الله بالخير والإسعاد

www.tadwina.com said...

مرحباً
لقد قام أحد المعجبين بمدونتك بإضافتها إلى تدوينة دوت كوم، بيت المدونات العربية.
قام فريق المحررين بمراجعة مدونتك و تصنيفها و تحرير بياناتها، حتى يتمكن زوار الموقع و محركات البحث من إيجادها و متابعتها.
يمكنك متابعة مدونتك على الرابط التالى:
http://www.tadwina.com/feed/1339
يمكنك متابعة باقى مدونات تدوينة دوت كوم على الرابط التالى:
http://www.tadwina.com
لعمل أى تغييرات فى بيانات مدونتك أو لإقتراح مدونات أخرى لا تتردد فى الإتصال بنا من خلال الموقع.
ملحوظة: حتى يتمكن القراء في مصر والدول العربية بالاطلاع على تدويناتك المستحدثة برجاء مراسلتنا على الايميل:
Tadwina@gmail.com
لوضع البانر الخاص بنا على الصفحة الرئيسية لمدونتك.

و لكم جزيل الشكر،
فريق عمل تدوينة دوت كوم.
http://www.tadwina.com

Jana said...

الف سلامة يا فندم على حفيدكم
وعذرا لأنى لم اتابع لفترة طويلة ولم اعرف مسبقا
شفاه الله وعافاه من كل سوء
أسأل الله العظيم رب العرش العظيم أن يشفيه ان شاء الله

Laura Tattoo said...

Saw your name on an old post of mine and wondered how you are doing. how are you? i am off to france for three months next week; am very excited and crazy with preparations, but i am not complaining! hope you are well. ~laura tattoo xoxoxo

فشكووول said...

السلام عليكم


تحياتى


عيد سعيد عليكم وعلى عائلتكم

كل عام وانتم بخير

يعيده الله عليكم بالخير واليمن والبركات

نونو said...

كل سنة وانت طيب
بس اجابات حضرتك فعلا بتجذب جدا انا قريت البوست كلة

maxbeta3zaman said...

جنى
شكرا لك على المرور والدعوات
حفظكم الله وكل من تحبون من كل سوء

maxbeta3zaman said...

أخى الببرم المصرى
كل عام وأنت بخير ...ثقلت يدى فى الكتابة ...وصرت كمن جثم على صدره حجر ثقيل جدا ...والله نسأل أن يفرج عنا كل كرب ...ونعود كما كنا نبتسم ونتحاور ..ونقرأ السطور

maxbeta3zaman said...

أخى الفشكول
كل عام وانت والأسرة بموفور الصحة والعافية والبهجة والسرور

maxbeta3zaman said...

النونو
أهلا بك ...والحمد لله انك قد لحقت بآخر شىء مرح كتبته وانكفأت بعده فى جب من التقوقع والهروب للداخل ...ويارب فرج كل هم

mahasen saber said...

ياه ازى حضرتك يا استاذنا انا افتكرت حضرتك سيبت التدوين لانى كنت بحاول ادخل المدونه القديمه ولسه عندى فى الريدر بس طبعا مبتفتحش


من حسن حظى النهارده انى عرفت ادخل من التعليقات وانى جيت فى تاج واتعرفت على شخصية حضرتك الرائعه اكتر

والجميل كمان انى عرفت ان حضرتك واستاذ شرين اصحاب

فعلا الرائعيين المبدعيين بيكونوا فى الاصل اصحاب بعض

تحياتى لحضرتك وكل سنه وحضرتك طيب وايام مباركه على الاسره
ان شاء الله

زقطـوطـة said...

عموووووووووووووووو
أيوة أنا يا عموووووو
ههههههههههههههههه
فرحااااانة ان حضرتك عرفتني
أوووووووووووي
فينك بس مختفي و مش بتكتبلنا ؟؟؟
مشتاقين والله
:)))))
يلا في انتظار بوست جميل من حضرتك قريب جدا
هدية رجوعي بقى
:))))))))))))))

همس الحنين said...

اجابه جميله والشخصيه اجمل دمت بالف خير

maxbeta3zaman said...

محاسن صابر
أهلا بك ..فتحت البلوج فى ساعة صفا فوجدت العديد من الأصدقاء قد مر وأنا مغمى على لمدة 7 شهور لم ادخل على المدونات ربما أكتب عن ذلك قريبا
كل عام وانت بخير يا أم بيرو

maxbeta3zaman said...

زقطوطة -البنورة اللميع سابقا
الظاهر ان كلنا يأتيه دور فى البيات الشتوى أو الصيفى وأنا بياتى كان صيفيا طويلا جدا ...لظروف شدتنى ولم استطع معها فكاكا والحمد لله اننى مازلت نبيها بعض الشىء ولم يصبنى زهايمر بعد ..وأهلا بك

زقطـوطـة said...

هههههههههههههههههههه
يا عمووووووو
مش قلت لحضرتك استر علياااا
بلاش الاسم القديم ده
انا عليااا طاااار
وبشكر حضرتك ع التعليق
رأيك يهمني فعلاااا
ودي غنوة لمنير اسمها : الحب زي الطيور

صفــــاء said...

مستر ماكس عاد لنا
يا مرحبا يا مرحبا

أخبار الصغير أدم ايه يا جنرال ؟
بالنسبه لتعليقك عندى
انا مش بفكر ولا برتب
هى بتكون شويه خواطر وبكتبهم زى ما هم كدة وخلاص
طبعاً رأيك جميل بس مينفعش اعيد الكتابه او أصلح فيها لأن هو دة اللى خطر على بالى

عوداً حميداً سيدى العزيز
وكل سنه وانت طيب وينعاد عليك بكل خير

زقطـوطـة said...

إزي حضرتك يا عمو ؟؟
ليه مش باين ؟
خير ان شاء الله ؟
مش كتبت جديد بقالك مده طويلة جدا
مشتاقين عمو :)

واحد من البلد دى said...

يا عم الحاج ابوس إيدك
كفاية تذل ف عبيدك
مانيش قادر على نفاقك
وتبجيلك وتمجيدك
-
يا مش سامع نصيحة لحد
وخليتنا لطمنا الخد
ومش عارفين آخرها معاك
ماهوانت يا تتهدى يا تتهد
-
وبتسلمنا جيل ورا جيل
إيشى لعاطف وايشى لخليل
وجبتلنا المرض أنواع
من الزرع اللى بالمحاليل
-
ومن أيام جدود جدى
عايش تاخد ما يوم تدى
ف عيد شرطة ف عيد عمال
تقول أحلى العهود عهدى
-
ف عهدك طبعا الصحة
مافيش بقى داعى نفضحها
وزير الصحة ذات نفسه
بقى عنده البعيد كحة
-
مجارى وصرف ع الترعة
وعلة وأوبئة ترعى
وييجى المصل مجانا
ويتباع لى كما السلعة
-
وأنفلونزا جت للطير
ومن بعديها للخنازير
ده من أيام أفندينا
إلهى يصبحه بالخير
-
ماكنا نشوف مرض ولا داء
ولا نخاف نبتلى بوباء
لا كان فيه فيفى ولا دينا
ولا نانسى ولا هيفاء
-
أنافقك وبأمارة إيه؟؟
من العيش اللى بالأبونيه
وبعد ما اجيبه بالضالين
أكل نصه ونصه ارميه
-
وسرقة ونهب بالزوفة
وألف حكاية معروفة
ومين هرب ومين خرب
ولكح زى شلوفة
-
ديوننا متلتلة بالكوم
وراسك ناشفة زى الدوم
ضرايبنا فارضها حبوب
تسد النفس قبل النوم
-
وميت إعلان عن الترشيد
وعصمت زيه زى رشيد
رقيب قاعد..مافيش حسنات
وتعبان م الكتابة عتيد
-
تصدق..كنت انا حالف
لايوم اشجب ولا اخالف
وقلت زيادة ف التأكيد
أقص لسانى لو زالف
-
وقلت ايديا أقصرها
وع الماضى أحسرها
قالولى العلة ف دماغك
ويستحسن تكسرها
-
ولو حتى ح اكون مرحوم
حتفضل برضه روحى تحوم
على المجلس فوق القبة
واشوف من سقفها المخروم
-
وتبعت حد يندهلى
واقول يا روحى تستاهلى
لكن أرجوك تسيبلى يومين
أسلم فيها على أهلى

maxbeta3zaman said...

صفاء
ماشى.. واللى ييجى على الخاطر تلقائيا يكون عادة هو الأقرب للنفس لكونه وليد اللحظة ..أما عن آدم الوليد الصغير فقد أتم شهره السابع وأصبح شقيا جدا ويزأر فى وجهنا بكلمة واحدة " اووووووووه" هى كل مايعرف وتطربه غنوة دينية فيها مقطع يقول "من مكة أصبحت قريبا" يسمعها فى قناة الكرتون فيطرق سمعه ويسهم لصوت التكبيرات للحج ...يبدو أنه سيصبح حاجا

maxbeta3zaman said...

ياواحدا والأحاد قليل
سطورك فيها موهبة شعرية واضحة وجرس ونظم جميل جدا
فاجاتنى القصيدة وما أحلى الجمال ان فاجأنا ..كل التحية لك
...عدت عندك للوراء جدا وازددت إعجابا بقصيدة المولد ...
هل تعرف فنانا تشكيليا راحلا اسمه عبد الهادى الجزار ؟ لقد قال رسما بلوحاته الزيتية نفس ماقلته انت فى قصيدتك "المولد" ...كان ذلك فى خمسينات وستينات القرن الماضى
كل تحياتى لك

Kiara said...

بابا

موجهالك دعوه عندي يابابا

maxbeta3zaman said...
This comment has been removed by the author.
maxbeta3zaman said...

كيارا دليل الحيارى
بالخطوة السريعة المهرولة ذهبنا ملبين

قرأنا وبصمنا بإيدنا اليمين
فــــرقنا بغربالنا غث وسمين
حـــلفنا مانقفل ولو مفلسين
ما نقطعها عروة ..وحبل متين
ونفضل ندوس بالصباع ع الزراير
ولو تانى يوم راح نكون ميتين

أحــوال الهـوي said...

واحشني يا باشمهندس

يارب يكون حفيدك بخير
يارب تكون احوالك سعيده يارب يكتب لي اقابلك
يارب اطمئن عليك

ايميلي eallam@isam.com.sa
ياريت تطمني

تحياتي

About Me

My photo
أحب الثقافة والفنون والشعر وتبادل الأفكار النافعة والهوايات المتعددة والمصنوعات اليدوية والرسم والمسرح والأغانى القديمة ذات المعانى الراقية والأفلام الكوميدية اتقن الكثير من الأعمال اليدوية (اصنع بنفسك )واهوى أصلاح أى معدة تتلف : حته جديده بقى أنا الماكس فى أحشائه الضحك كامن فهل ساءلوا بلوجاتى عن طرفاتى