حوارات شعريه ثوريه

‫الى الزميل يحيى عواره ...عبر المحيط

ايها المصلح دايما والملقب بالعواره
كنت من يوم ما عرفتك
فى طريق قصر الدوباره
رافض الإفساد ومصلح
دى السفاره فى العماره
...والصهاينه فى الزمان ده
من ورا ركن الستاره
يمسكو زى العرايس
جوز خيوط خشبه ودوباره
والشخوص مسرح عرايس
يلعبوا من غير مايدروا
دور سخيف ناقصه المهاره
والمهم ان العرايس
واقفه بتقول وبجساره
شوفوا لون الجلابيه
خط ابيض خط احمر
ناقصك ايه... ايه العباره
قلت له كده موش ملاحظ
ان روس كل العرايس
باصه فى الأرض وقفاها
فى السما ملعلع وباصص
موش شايف لها اى معنى
غير واحد راخى الدوباره‬


وقد رد على صديقى نبل البواب بالرد التالى
12:37pm Mar 19

‫الجميل فى الأمر إنك
شفت فين آخر الدوبارة
وف إيدين مين اللى خلى
وضعنا آخر مرارة
بس إحنا بكل جرأة
حطينا فى ...... الخيارة‬

ومن توابع الثورة ايضا

:هناك مجموعه اسمها حافظوا على بريق الإنسان المصرى ولهم قلت

بريق المصرى زغللنا
غلبنا ياناس نلمع فيه
فى شله بدها يجنزر
بيرمو ليه زباله عليه
كنسنا طريق دهنا رصيف
بيصبح طب مطوس ليه
بقايا زفاره فى الطاسه
رمينا كيس بيريل عليه
نجرب دعك بالرمله ؟؟
طلع مارد وقال شوبيك
فقلنا المصرى موش لامع
ما عندكشى تيفال بومبيه
ورق الومونيا ميت روله
وتكسى الشعب من رجليه
ضحك شمهورش ابو قرنين
وقال والدمع مالى عينيه
وقال دى اللمعه من جوه
بتنضح ع الوجوه لو إيه
سلوكنا يتعدل دوغرى
ونبرق كالنجوم فى عينيه

وادى واحده بعد الاستفتاء

وعندما رأيت صورة الصبى ذو الأصبع الملون قلت
تعا شوف صباعى ياعمى تعا شوف صباعى ياخال
...صدق اللى قال ثورتك مين فجروها رجال
....والبوهيه دى ع الصباع ...رمز لدماغ شغال
...ماتقولشى صوتى عدم ....الصوت يهد الجبال
...موش لما مات الزعيم... قولنا الوداع ياجمال
ولما نخ التقيل ...قولنا ده هم وزال
شوفت الطابور طوله كام ...ستات شيوخ والعيال
...حلفوا يحطو صباعهم ...فى الحبر حتى ان ما زال
...بعدين يحطوه فى عينهم... مين هددونا البغال
....حسرة بتوع المطاوى ...حسرة بتوع الجمال
...واقفين يبصوا بمراره ...معقوله يصبح ده حال