أما وقد قلوظت السلطانية

صديقة اعتز بها أهدتنى تاج الجزيرة ...السلطانية ... حسبتها -لسذاجتى مليئة بالفلوزج المعروف لدى الناس بالجيلاتى - لكننى علمت بعد وصولى حاملا ملعقة كبيرة من بتوع الشوربة ...انها سلطانية مرزوق الشهيرة فى الصورة الإذاعية التى تبدا بعبارة ...ياترى انت فين يا مرزوق ....وتنتهى بالكورس يردد... الدنيا أرزاق قسمها الخلاق ...سبحان الرزاق سبحانه ولما كان لزاما على من قلوظت له السلاطين أن يجاوب فهاأنذا ابدأ بما لم اعهده سلفا

أولا مجموعة الأسئلة التحقيقشخصية فى النيابة الكلية :

1 اسمك بالكامل : عادل المهدى ولكنه مركب يعنى محمد عادل محمد المهدى

المحقق: اتعدل وقول اللى فى البطاقة موش عاوزين ملاوعة من أولها ...اكتب يابلوجاوى الاسم الكامل عشان المحضر يبقى قانونى ( بلوجاوى ده اسم كاتب الجلسة

2 المشهور بيه بين صحابك؟

بين أصدقائى المقربين وزملاء الدراسة اسمى" ماكس "....لكن مع أصدقاء البلاليج وموقع الدفعة على النت : "ماكس بتاع زمان "

3 سنك ؟

59 سنة وده واضح من لون شعرى ودى مكتوبة فى أول سطر فى البروفيل

4 مجال دراستك

الهندسة الميكانيكية ..تخصص سيارات ... اكتب يابلوجاوى

5 اسم مدونتك إيه ؟؟ وعلى الله تكدب احنا عارفين كل حاجة !!

اسمها على اسمى يابيه ...ماكس بتاع زمان ...واشمعنى يعنى؟؟ ....عشان باتكلم عن ذكريات زمان

6 معنى صورة المدونة

فى الحقيقة دى صورتى مع أختى التى تكبرنى وقت طفولتنا التقطها خالى الذى كان يهوى التصوير ..وأنا البس ساعته الجوفيال وأبرزها فى يدى المستنده على الشلته وكان أملى أن تطلع الساعة حتى لو لم يظهر وجهى لفرط سعادتى بوجودها فى معصمى لكن اذا كبرنا الصورة تظهر الساعة بوضوح

7 هل فكرت فى إغلاق المدونة ؟؟

أنا لم أفكر وانما ضاعت لى مدونة لوحدها لما فشلت فى الدخول ونسيت كلمة السر ...كان فيها 4 بوستات ولم يعلق فيها سوى 2...3 أصدقائى زى شريف وربما منعم ...بعد كده عملت دى ومستمرة من رمضان الماضى تقريبا

8 رد فعلك لو حد قل أدبه

لا أتوقع أن يحدث لى ذلك لأنى لا أحتد على أحد ...وأسمع أكثر مما أتكلم ..ولم أبادر أحدا بالهجوم ..ولو حدث سأرد ردا يخجل من يتعدى ولكن بكياسة اكسبتها لى السنين

9 أسوأ مدونة ..

هى التى أحس بخواء محتواها أو تلك التى تتعالى على القارىء فى الردود ..والنوعية التى تحوى جعاليص الكلام من نوع شرانق الوجود العدمى وسحابات الكنافة القرمزية وشآبيب الرياح اللا نهائية ...

10 مصير الميل بعد ماتموت

حاسيبه زى ماهوه ...لأنى لا أمسح حتى الميل القديم كل ما دخل أو خرج من الميل بوكس موجود من 2004 ..لأنى لا أرمى الماضى بسهولة

11 هل اعطيت البسوورد لحد ...

طبعا أولادى هم من أنشأوا لى الميل ...وصديقى شريف " شيرين الكردى " هو من أنشأ لى البلوج واختار معى كلمة السر وذكرنى بها لما نسيتها يعنى كلمة السر معاهم

12 السفر

متعة لما أكون فى غير العمل ...فسحة أو سياحة ...أما مع العمل فالواحد حتى لايكون مركزا مع الجمال ولا الطبيعة حينما يكون مشغولا ..وفى السفر أحب التجول وسط الناس فى أماكنهم العادية غير السياحية وأراهم على طبيعتهم

13 المود بتاعك ايه

انشراحى انبساطى مرح فى معظم الأحوال ...واكتئابى تقوقعى بصفة دورية موسمية لا أعرف لها سببا وأحمد الله انها لا تستمر طويلا

14 وقت الفراغ

لى العديد من الهوايات ..الزراعة ..صيد السمك ..الرياضة بس ده كان زمان..بقى منها تنس الطاولة الذى مازلت اقول فيه لو سنحت الفرصة ..والمشى ..والهوايات اليدوية واصلاح المعدات خاصتى( كهرباء ميكانيكا سباكة نجارة بياض محارة قيشانى لو حكمت) ..ثم الشعر والفنون ..وتتبع الجديد فى العلوم ...طبعا النت فتح لى أبواب المعرفة فوق ماكنت أتوقع ولى أصدقاء فى أركان العلم ..نشر لى حوالى 25 كتاب كلهم فى النواحى الفنية والقليل عن نواحى انسانية أو رياضية ..أشهر كتاب يعرفه كثيرون هو أول كتاب نشر لى وعنوانه ميكانيكا السيارة للهواة والمحترفين وكان أول طبعة له عام 1986 من دار ابن سينا للنشر بالقاهرة

15 أكلة مفضلة

المسقعة ...إذا وجدت زهدت فى باقى الأصناف حتى وان كان خروفا مشويا ...كانت لى قريبة ظريفة تقول : اننا نحب الباذنجان لأن عندنا نقص فى بتنجانات البوتاسيوم !!

16 صفات من والدى

كان رحمه الله يفيض رقة وحبا وحنانا كنت المح حبه لنا جميعا من عينيه ..أخذت منه حب المشى الطويل وحبه للغة العربية فقد كان استاذا للغة درس فى كلية دار العلوم ..كان يتكلم معنا بالفصحى فى المنزل .. أخذت منه أيضا الهدوء الأسرى لم نشهد خلافا واحدا بين الوالدين طول حياتهما

17 ومن الوالدة ؟

هى من علمتنى الشعر فكانت تكتب قصائد زجلية بسيطة غاية فى الرقة ..تكتب عن أخواتها ..عن البحر.. عن الشمس ..هى من علمنى الحرف والمهارات اليدوية كنت أراها تضبط ماكينة الخياطة لتصنع لنا البيجامات ...كانت قمة فى شغل التريكوو الكوريشيه

18 ست أشياء تكرهها

الحر- الطاولة - الزحام - الضوضاء - الكشك كطعام -نهايات الأشياء الجميلة (الأجازة -الصيف -رمضان...

19 وستة تحبهم ؟

البحر - الشروق - الأطفال - المشى - بيتى مكانى أدواتى أشيائى فبيننا عشرة وعلاقة خاصة كما لو كانت كائنات حية - وأحب الزرع

20 نوع الشخصية

خنفشارية عنقودية كلكوعية منبسطة

21 لماذا دخلت عالم التدوين

كنا وصديقى جدا- شريف- الذى أصبح (نجيب محفوظ) بعد كتابه الأخير ...كنا نحرر سويا مجلة من صفحة واحدة فى الكلية يقرأها زملاءنا نرسم ونكتب شعرا وننقد ماحولنا ...وبعد ماتخرجنا تباعدنا وكنا نكتب خطابات نتواصل بها كانت من أجمل مايمكن مسجوعة وشعرية فى بعض الأحيان وتحكى عن حالنا ...وكتبنا كتبا عند دار النشر ذاتها وبدأ هو التدوين ...ثم أرسل لى عنوان بلوجه قرأت وعلقت كمجهول ..وعرض على فكرة الكتابة فى مدونة لى وجاءنى هنا وعمل لى المدونة وتنبأ لى بالقبول ...هكذا بدأت التدوين وتعرفت على مدونات فيها من المحتوى ما أدهشنى من مواهب وفكر وإيجابية كنت أظنها غير موجودة

22 أحلى جملة قيلت فى مدونتك

من وجهة نظرى ماأكتبه من ردود شعرية فورية تأتى من وحى اللحظة فهى تعبير فورى عفوى ..تضحكنى وأنا أكتبها

أما ماقاله الآخرون فلا أذكر بالتحديد فالناس طبعهم الكرم فى التقدير والمجاملة لزوم الذوق

23 أحلى بوست كتبته

هما اثنين عبرت فيهما بالضبط عما أحسست به فعلا وقتها ,,,الأول كان بعنوان نجحت ياماما بمناسبة زفاف ابنى الأكبر ...والبوست الثانى كان بعنوان وحدى على شاطىء العجمى ..كانا فى بداية انشائى للمدونة

24 أفضل مدونة قرأتها

عدة مدونات الحقيقة أولها مدونة علقت فيها بعبارة واحدة " مدونة تشعر القارىء بالسلام النفسى "

ومنها مجموعة مدونات شعرية لشباب موهوبين فعلا ... ومدونة فيها سيناريو الشادر الانتخابى كانت ساخرة وممتعة ..وأعجبت بمدونة خالو أحمد الصباغ لطرافتها وتنوعها وأجد فى كل مدونة بوست معين اسعدنى جدا قراءته وهذا يجيب على رقم 25 ضمنيا

26 الشغل بالنسبة لى ؟

أحب عملى عندما يكون فيه تجديد وتفكير وأبغضه عندما يكون روتينيا مكررا وأكثر ما يغيظنى حاليا هو ألأيزو الذى جعلنا نعمل إحصاءات وورقيات تكبلنا وتجعلنى أميل للسيكوباتية التصفوية التقاعدية

27 النت ؟

نافذة فتحت لى طاقة من المعرفة والمعلومات والمادة العلمية التى تساعدنى كثيرا فى العمل كما سهلت اتصالى بأهلى وأصدقائى المقيمين بالخارج ..نتواصل بسرعة الضوء ونعرف الأخبار فى التو

28 لمن تمرر الطاسة ولمن تقلوظها ؟

أهدى وأمرر هذه السلطانية الى كل من

جنى Jana

صفاء

أحوال الهوى ... وقد ضبط القلاووظ على قد دماغهم بالضبط فلا هرب ...هاربا منى ولا هرب...جئت يا صاحبى وجاء معى ... تاج ان القلوظه تعب

أختراع أعجبنى

بينما أنا مستغرق فى قراءة البريد ..إذا بخطاب من صديقى المهاجر لكندا يدل عنوانه على اختراع مصرى وفكرة فريدة تجعل ركن السيارة بالمقدمة سهلا جدا ...وفى مكان على مقاسها بالضبط ومن المفترض أن يتم بعدة مناورات بالظهر قد تزيد على 10 محاولات نظرا لضيق المكان ...كما أن المبتكر الذى يستحق كل التقدير على فكرته جربها أيضا فى الخروج السلس من نفس المكان الضيق ...تحية منى لذلك المبتكر الذى لا أعرف اسمه ولكنى افهم بلا شك الجهد المبذول حتى تمام الوصول لهذه النتيجة والفكرة الرائعة فتفضلوا بمشاهدة الفيلم القصير المرفق والذى يوضح الفكرة ....من مثل هؤلاء تأتى أعظم الأفكار ..وأكثر ما أسعدنى صدوره من مصر

زجلو بلوج2

كان أن أنشأت بلوجا جديدا بدل الذي ضاع ...ولما فتحته!وفى كل مرة كنت أفتحه أجد مستطيلا يسألني أنا.. وكذا كل زائر عن تأكيد كلمة المرور وذلك ببعض الحروف المشخبطه والمعوجه والمشلفطة مما كان يرهقني وينرفزنى أنا وكل زائري البلوج ...وقد أهداني أحد المدونين طريقة محوه فتمكنت بعد العناء من إلقائه في البحر ونضفنا البلوج من هذا الكرسي المتعب ...وكانت الأبيات التالية تعبيرا عن الفرحة بإزالة هذا الكابوس والشكر لتيممى صاحب الطريقة :


وجدتها ..عملتها ..أزلتها ...مسحتها
ما أجمل الأساتيك

تمسح ....ولا تخليك

تزهق وتضرب بوز

كان عندي كرسي قعيد

جنبه حروف شخابيط

ولماكنت عبيط

ماعرفتش امسحهم

أوم شوفت واحد جار

عنده قلم... فرجار

أستيكه... سنها نار

شار لى... فعصت زرار

آم دوغرى ..ماسحهم

آللك سيتينج .كوممــنت

شو ورد ..نو..صممت

و ف ثانيه كان شالهم

فرحت انا وجريت

وفتحت باب البيت

عالبوسط انا بصيت

مالقيتشى ريحتهم

عقبال ماكل الناس

ماتشوفشى هذا الباس

دا زرار ماهوش كناس

نضف....... بلوجاتهم

..الموضوع التانى انى قد وصلتنى العديد من الدعوات من أصدقائى يدعونى كل منهم وهم كل من فى قائمة البريد عندى الى الانضمام لما يسمى"بالمالطيبلاى"..ولأنهم أصدقائى فأنا على التو بارحب وأقبل بس لقيت الأخ المالطى ده بيعمللى بروفايل وكلمة سر ..واروح انا مطاوعه وعامل كل شىء وكلمة سر رهيبه ..ولكن بعد 5 دقائق أكون نسيتها زى الجدع ..ألاقى واحد تانى باعتلى دعوة آجى أكتب له موافقة وكلمتين تحية ومحبه وترحاب لزوم الزوق يعنى يقوم المالطى سائلنى السؤال المحرج اياه ...سيادتك مين بالضبط ...أقوله المدعوق ماكس بتاع زفت ..يقوللى طب كلمة السر بتاعتك ايه يابطل ..فيزيد هرشى فى دماغى واتنح واقوله طب من الأول يامعلم ...يقوم عامللى بروفيل جديد وبكلمة سر أخرى ... بعد اسبوعين لقيت نفسى مستنسخ مرتين تلاته عند زملائى احاول اشيل واحد الاقى عفريته يطلع موش عارف منين ..وهكذا أصابنى الفصام المالطاوى فكتبت الاعتذار التالى

الشىء اللى محيرنى ومطيرنى ...

انى لقيت نفسى بوشين

...كل شويه الاقى صاحب

...جه يدعينى فاقول نعمين

....وكل شويه الاقى انى مطالب

....اعمل كلمة سر فاقول حسنين

...يجرى يقوم يعمللى بطاقه

....وألاقى نفسى بروحين

...واحد ماكس وواحد عادل

...والعادل يصبح عادلين

...امسح واحد يطلع واحد

.. زى أغانى الروح والعين

...تقبض روحه تفقع عينه

....يطلع برضه بروح وعينين

زى ماقالت ليلى مرادكو

... وانا محتاره بين لاتنين

التالته بقى كانت ردا على قصيدة شاعرنا الجميل أحوال الهوى الذى كتب قصيدة عن كلمة الحب التى تثقل على لسان الرجل مع انها سهلة وموش طويله ولكن تمحى من ذاكرة الرجل كما كلمة سر البلوج تماما فهو كتب قصيدة تصف لهفة المحبوبة على سماع الكلمة المعبرة عن الحب وكان ردى عليها بأبيات فيها حل آخر ولكنه فاشل

لو بصيت في عيونها و شفت نظره اسيرة

و كمان فيها بسمه و دمعه و فرحه و حيرة

عرف ان الحب ف بالها و مخليها ف حاله شريده

تسمع همس نفسهابيعلي و يعلي و كام تنهيده

و ان قلت لها باحبك مش ممكن تسمعها اكيده

هتقولك انا مش سامعه و هي بفرحه سعيده

و ان قلت لها باحبك تاني

هتشوف لمعة عينها شديده

تبقي ساعتها تكرر قولك
قولها باحبك

واناعارف دي اصعب كلمة ينطق بيها قلبك

تلقي الدنيا في صمت و سحر

قولها باحبك

تحضن نشوة نبضك كله في لحظة عمر

تلقى الكون بيحقق كل آمالك وكمان حلمك

وكانت السطور التاليه هى ردى على أحوال الهوى-الذى نرجو أن يعود للتغريد بالحب قريبا -وأن يكون المانع خيرا
ممكن نفس المعنى تقوله بورده

وتحسه الهانم فى الحال

وكمان بالعين لما بتنظر للعين

ودى برضه موش عاوزه سؤال

ياسلام لو خاتم ألماظ ومعاه

كام فستان وفوقيهم شال

أو عقدين وبروش وفورير

وما يمنعشى كمان خلخال

تبقى ولا الأخ فالنتينو

ويومها تتبدل أحوال

كل الهوى والنور والمايه

وكل اللى ما يتقال يتقال

لكن كل حيل آدم مفهومه

ماتعيشى المايه ف غربال

تعمل مهما تعمل تغمز تهمز تلمز

موش عاوزه الا الكلمه اياها

اللى العالم كله قراها واتهجاها

وصاحبنا محرم غناها

" قوللى باحبك قوللى "

عاوزه اسمعها تمللى

بترجع أيامى وباحس انى بقرب منك

لما تقوللى بحبك قول قول

موش حاعمللك طبق الفول

غير لما تقول

أحياء وأسماء كلها سكندرية

وجدت هذه المعلومات عن أحياء الإسكندرية >> أسماء لم أكن أعرف أصلها وطالماكنت أتساءل عن أصل هذه الأسماء فقد سعدت بوجود هذه المعلومات فى أحد الرسائل المرسلة لى من صديق .. وبذلك بطل العجب لما عرفنا السبب


لوران> > > > نسبه الي الخواجه لوران صاحب شركة سجاير في القرن ال19 ويشغل قصره الآن مدرسه ثانوية بنات. > > زيزينيا> > علي أسم الكونت زيزينيا وكان تاجراً للقطن.> > بولكلي وفلمنج وشوتس> > > > من مؤسسي مجلس إدارة ترام الرمل.> > سان استيفانو > > قصدت شركه ترام الرمل أطلاق هذا الاسم تخليداً لذكري أنتصار الصرب علي الأتراك بمساعده روسيا 1874في موقعه سان أستيفانو وقد أقامت هذه الشركة فندقها الكبيرهناكوالذى حل محله المول الجديد حاليا > جليمو نوبولو" جليم"> وهو يوناني وأحد أعضاء المجلس البلدي لمدينة الأسكندرية ,جاناكليس > > نسبه الي الخواجه جاناكليس صاحب مزارع العنب ومصانع التقطير, سابا باشا > نسبة لسابا باشا أول مدير مصري للبوسته الخديويه ثم عين وزيراًللمالية سموحه (وأنا أسكن هناك): في سنه 1924 جففت بحيرة الحضرة> > والتي كان أسمها أصلا ملاحة> رجب باشا جد السفير حسن رجب وقام بتجفيفها جوزيف سموحه وهو يهودي عراقي وقد وفد إلي مصر ليتاجر في الأقمشة الأزاريطة> > وهو أسم مشتق من الكلمة> الإيطالية> > لازاريطة -أى- الكارنتينا حيث كانت مقامة تلك المنطقة للحجر الصحي للقادمين من الشرق.> > > سوتر > > ومعناها ( المنقذ) وقد أطلقته جزيرة رودس على بطليموس الأول جزاء مساعدته لها ضد الحصار الذي قام به الملك ديمتيريوس لمده 15 شهراً.> >> السلسله > > كانت هناك سلسلة تمنع عبور الناس إلي حاجز الأمواج! وهناك تصور أخر لأصل هذا الأسم وهو وجود سلسلة من الجزر الصغيرة في هذه المنطقة.> المنشية > وهو أصطلاح يطلق علي المكان الرئيسى بالمدينة أو القرية أو المركز التجارى بها وقد أطلق هذا الأسم علي هذا الحى حيث كان مركز النشاط التجاري ,ولوجود مقار القنصليات علي جانبي الميدان الشهير,< كوم الشقافة > > والشقافه من شقفات الفخار المكسورة والتي كانت منتشرة علي هذا التل وهي مكان قرية راكوتس اصل الاسكندرية.> الورديان نظراً لأن الجمارك كانت في أيدي الأنجليز فقد كانوا يطلقون علي المخازن وارد وتطورت إلي ورديان.> محرم بك > نسبة الي محرم بك زوج تفيدة هانم أبنة محمد علي وكان حاكما للجيزة ثم الأسكندرية ثم قائدا للأسطول المصري سنه 1826 م > المكس > > من المكوس أي الجمارك وكانت تٌحصل في هذه المنطقة للبضائع> الواردة من الغرب.> > باكوس > نسبة إلي باخوس أله الخمر وهناك رأي أخر أن الاسم منسوب الي احد الأجانب وأسمه باكوس وكان سمسارا في تجارة القطن.> الحضرة >الرواية الأولى أنها منطقه للهو والمتعه وتقام فيها المسابقات كل 5 سنوات واستمر هذا التقليد حتي أيام العرب فأطلق عليها اسمالحضرة ومعناها باللغة العربية مكان الحضور والأجتماع والروايه الثانية أنها أطلقت علي أسم الأمبراطور هادريان منذ زيارته للأسكندرية وكانت مكانا لمعسكر جنوده.> رأس التين> بداية لحقول التين والتي يشتهر الساحل الشمالي بزراعته.> > العجمي > > نسبه الي الشيخ محمد العجمي. > المندرة > > عندما اشتري الخديو عباس حلمي الثاني منطقه قصر المندرة أقام في مندرة أي حجرة عالية عن سطح الارض للأشراف علي أصلاحها وتمهيدها.> > فيكتوريــا > نسبة الي انها كانت موقعا> لفيكتوريا كوليدج علما بإن هذه الكليه بنيت أساسا في الأزاريطة سنة 1901م في عهد الملكة فيكتوريا ثم انتقلت إلي موقعها الحالي عام> 1904> > أبو قير >> نسبة إلي الأب كير وهو قديس مسيحي ولد بالأسكندريه في النصف الاخيرمن القرن الثالث الميلادى وأستشهد في عصر دقلديانوس ودفن فيها> ولها أسم أخر فرعوني وهو كانوب ثم تطور إلي كانوبوس وهو الذي عرفت به أيام البطالسه والرومان.> كما توجد بعض المناطق >
بالاسكندرية مسماه باسماء شيوخ فما أصل التسميه :> > القباري > وتنتسب القباري الي الشيخ الزاهد أبي القاسم القباري المالكي السكندري والمعاصر للدولتين الأيوبية والمملوكية وقد نشأ بالإسكندرية وعاش بها زاهداً متقشفاً وعرف بالقباري نسبة إلي ثمار القبار وهو نوع من العنب التي كان يزرعهافي بستان ورثه عن أبيه وقد توفي عام662 \وقد قام الخديوي سعيد باشا ببناء مسجد حول ضريحه عام 1860
هذا ولم يذكر الباحث أو نسى ذكر: كرموز وغيط العنب والهانوفيل وابويوسف وحجر النواتيه والسيوف شماعة وسيدى بشر والعصافرة والعوايد والشاطبى وكامب شيزار وزيزينيا وسيدى جابر والرمل الميرى واسبورتينج التى تبدو أسماء حديثة بعض الشىء

مهد الحفيد

عدت من رحلة عمل طويلة نوعا ما فى الغردقة استغرقت أسبوعين كاملين كنت خلالها أحس أننى أعيش فى بطرسبرج أو فى باكو ذلك أن الفندق كله يعج بالروس والجمهوريات المستقلة واللغة السائده فى المكان هى الروسى حتى العاملين فى الفندق اصبحوا روس اللسان من المطبخ حتى الروم سيرفيس ...الرحلة بالباص تأخذ من اسكندرية لهناك 10 -11 ساعة ..

المدينة تغيرت جدا فقد كانت آخر مرة زرتها سائحا من عشرسنوات تغيرت للأحسن طبعا ..لكنها تعانى من الركود هذا العام أصحاب المحلات الخالية من الزبائن " المريشين" يشاهدون التليفيزيون فى محلاتهم لأن الزبائن غير موجودين ...هل علينا فى الأسبوع الماضى وفود المصاريه لزوم أجازة نصف العام فجعلونى أحس أننى مازلت هنا فى ميدان رمسيس بالتحديد ...المهم خروجا عن

العنوان وتحديثا للأمور كما يفعل أهل البلاليج كتبت شيئا عما حدث وابدأ به

غضبة بلاد الترك ويا فنزويلا

خلت رقابينا مايبنهم موش طويله

لما وقف راجل وإسمه أردوغان

قدام شيمون الصهاينه ابو ألف حيله

أظهر له ظرابين التراكوه آم نفخ

أوداج دى عثمانلى ..وعثمانلى أصيله

حمر له وشه واتنفض ..شاور بجد

فقع العيون الكسيره والنفس الذليله

وقال كفايه الكدب يكفى قوم بقى

لم الورق ساب المكان شتم الحضور

هل كانو دول مننا .. أو وسطنا ؟؟

لكنه دم الحر.... لما يثور يفور

مافيش له ريس فى الحقوق غير ربنا

ينفع كده ياخوانا.... لما ينتفض

بدل العروبة الترك ... واحنا فى البليله

نعود لموضوعنا الأساسى بعد هذا التحديث والتهييس.. فقد أخذتنى مأمورية الغردقة من عمل كنت أقوم به فى ورشتى المتواضعة فى العجمى كنت اصنع سريرا هزازا لأول حفيد لى ..ومنهمكا فيه ...كنت قد صنعت واحدا لأبنى الأصغر فى الثمانينات ولا أدرى أين استقر فقد اقترضه الأقارب لما كبر ابنى وتنقل من بيت لبيت وطبعا أخذ طريقه للروبابيكيا ..أنا وزوجتى بمجرد أن علمنا بنبأ مايسمى "إذا كان حايبان " الشهير بدأنا فى الاستعداد هى بالتريكو والبطاطين المنسوجه والطواقى والشرابات وأنا بالسرير والمرجيحة ..نزلت واشتريت الخشب بالمقاسات والتخانات المطلوبه ووقفت فى ورشة المنشار أقطع وامسح الأخشاب كأى نجار محترف وحملت كل شىء للعجمى مقر العدة والشواكيش والمناشير وانهيت الأجناب والموله التى هى "على العريس" عادة وكنت فى مرحلة تصميم وتنفيذ الحامل الذى سيتأرجح المهد عليه حين اضطررت للسفر ... ,والصورة المرفقة لمهد ولدى الصغير زياد وهو نائم داخله ...ويتمرجح أما الصورة الأخرى زيادالطفل عندما كبر قليلا .. والآن هو مهندس معمارى مشهود له ..مازال أمامى شهرين ونصف تقريبا يمكن انهاء المهد خلالهما ..

ضمن هواياتى العديدة النجارة وصنعت لبيتى العديد من القطع النافعة ..ومن علمنى النجارة وفنونها هو عم احمد الذى صنع لنا أثاث منزلنا فى السبعينيات ..كانت ورشته فى منطقة الروضة بالقاهرة وكان عجوزا ونحيفا ..وكلما رفع قطعة خشب صاح قائلا " ياقوة الله.." كانت تلك لزمته ...لما رأى منى حبا فى النجارة قال تعالى معايا يوميا وانا أشطب فى عفشك وانا أعلمك ما عندى من أصول ومهارات ...وقد كان ..كنت فى دورة تدريبية طويله فى القاهرة تسمى فى الجيش" فرقة" فكنت أذهب إليه ظهرا وأعمل معه فى عفش بيتى يوميا وهو من شجعنى على الاستمرار فى هذه الهوايه

بدأت بعمل مكتبه أو" بابلوتيكا "متحديا نجارا فى اسكندرية أخذ يماطلنى فى عملها ومن زهقى أخذت الخشب وعملتها بنفسى ...لست أدرى سبب السعادة هكذا بالأحفاد ..أهى الرغبة فى البقاء ؟؟ واستمرار الاسم ؟؟ أم هو حب عام للأطفال؟؟ ..أنا شخصيا لى ممن هم فى منزلة الأحفاد عشرات فأخوتى ماشاء الله عشرة وأنا فى المنتصف تماما خمسة فوقى وخمسة بعدى وكلهم لهم أولاد وأحفاد وأحبهم جميعا وأسعد أوقاتى هى التى أمضيها فى مشاغبتهم واختراع ألعاب تبهرهم ومراقبة الدهشة على وجوههم .. فى أحد المناسبات قمت بمشاغبة حفيدة أختى الصغرى واسمها عندى" فريده الجديده" زى مصر الجديده كده قلت لها : اسمعى أنا دلوقتى معنديش بنات عندى اتنين صبيان وانتو اتنين بنات ..فإيه رأيك أدى مامتك قرشين كده يعنى عشرين اتنين وعشرين جنيه وابدلك بابنى الصغير زياد وانتى تيجى تعيشى معانا وهويروح بدالك عند مامتك وباباكى ويبقى كل واحد عنده من الصنفين ولد وبنت ...البنت اتسعت حدقتاها وأخذت تكيل لى الأعذار : أصل السرير بتاعى ماينفعشى اسيبه ..وبعدين الكراسات والكتب والشنطة لالا.. واروح الحضانه ازاى وأنا أفند لها كل الحجج بوجود البدائل ...البنت جرت على والدها الذى جاء متأخرا وقالت له: الحق عمو ده عاوز يشترينى بعشرين جنيه ...ومن يومها وفريده الجديده تأخذمنى موقفا كلما رأتنى ...لا انسى أبدا كلمة عامل مصعد فى أحد العمارات بالقاهرة وكنت أصعد مع أطفالى وكان صغيرهم يبكى ...كان الرجل نوبيا أسمر بعمامة بيضاء ولما رأى بكاء الطفل قال بابتسامة كشفت عن أسنانه بالغة البياض : لماذا يبكى البيمبو ...إن الشمس لا تطلع الا من أجل هؤلاء الأطفال ...قالها حكمة ..وأنا معه.. فالشمس لا تشرق إلا من أجل هذه الوجوه البريئة

حالنا فى الحالتين

عدت من سفر فوجدت العدوان على غزة على أشده وجدت الموت والدم والصراخ ...ومصر صامته ...صوتها خافت ..دورها باهت ..جلست أياما أمام الشاشة اتابع الأخبار واستمع للتحليلات والشتائم والمظاهرات ...واتهامات خاصة لمصر ...تأملت احوالنا وحاولت أن أكتب شيئا عما أرى وأسمع لكنى عجزت ...أكثر ما آلمنى عجز أهلنا فى غزة عن فعل شىء لوقف العدوان ..وآلمنى أكثر عجز أمتنا عن التحرك والاكتفاء بالفرجة على المذابح ...وعن مصر خاصة ضعف موقفها وصمتها المطبق ...تداعت على الفور ذكريات حرب لبنان الأخيرة ...نفس الصمت ...ونفس الموقف ...وجدت فى دفاترى قصيدة لعبد الرحمن الأبنودى أفضل مليون مرة من أى كلام يمكنى قوله ..وأصدق تعبيرا عن حالنا المتردى ...القصيدة اسمها أنا المصرى ...كتبها عن حالنا أثناء العدوان على لبنان ...وسترون أنه نسخة من حالنا الآن نفس التخاذل ونفس الصمت ونفس الفرجه ....فلو قرأت معى هذه القصيدة ...واستبدلت كل كلمة " لبنان " بكلمة "غزه" وكلمة "حزب الله" بكلمة" حماس" لما تغيرت القصيدة وصارت صالحة للتعبير عن نفس حالتنا اليوم أترككم لقراءة قصيدة الأبنودى المعبرة بلسان الحاضر مع انها كتبت فى الماضى

قصيده الابنودى الاخيرة الممنوعة انا المصرى

انا المصرى....كريم العنصرين

سليل المخلصين ... المؤمنين

وحامى الامه فى وقت الشدايد

وشقاق السكك للواردين

ودمى ملك ليكم اجمعين

انا المصرى كريم العنصرين

انا المصرى كريم العنصرين

فقدت العقل والصوت والايدين
وبعد ما كنت نجده وروح ووقفه

مانيش عارف نسيت دا كله فين

مين اللى سلبنى اسمى يبقى مين؟؟

انا المصرى كريم العنصرين

وكنت اصرخ اطفى النار بصوتى

ويحيى أمتى فى الشده ..... موتى

فمين اللى كتب عارى ف جبينى

ومين اللى سرق شعله سكوتى

وانا اللى غنايا صحى العالمين

انا المصرى كريم العنصرين

انا متباع ...ماهيش عادتك يا وطنى

عدو..لعدو .. مين ماقبض شتمنى

صبى البقال يتاجر فى الضماير

واحلا عمرى ضاع مستنى زمنى

بقينا بصمتنا الموت متكتفين

انا المصرى كريم العنصرين

كان الوحل..شد الرجل منى

انوح ابكى وانا قاصد اغنى

وواقفين ع الشطوط بايادى سودا

محال هيغرقونى غصب عنى

ولو نصبوا فى قلبى ميت كمين

انا المصرى كريم العنصرين

بنيتها من الهرم للسد .. يدى

بنتها كلها ف لحظه تحدى

وكنت زعيم نبيل ما بين جفارا
وتيتو وكاسترو ونهرو وغاندى

ومش محتاج اقول انا كنت مين؟؟

انا المصرى كريم العنصرين

وكان يخطب تصيب الدنيا ربكه

ومن لبنان يعود اسطول اميركا

ولينا فى الوجود كلمه ومكانه

واخوة فى الامل ....دمعه وضحكه

ورقابينا الابيه...مرفوعين

انا المصرى كريم العنصرين

وجونا اللى رمونا...للمهالك

تقول"لاه:يقولولها وانتى مالك؟؟

تقول لبنان..احبابنا الاعزه

يقولوا يغوروا ...وتغوروا كذلك

نسيت من همى ابقى ازاى حزين

أنا المصرى كريم العنصرين

وبعنا كل شىء ينباع ...بدقه

بشفافيه ومن غير اى سرقه

ونظرنا لعلم النهب صرنا

بننهب كل شىء .. لكن برقه

بقينا دكاتره وسط النشالين

انا المصرى كريم العنصرين

زمان كان فيه ملك فاحت روايحه

وثوار جيش بروحهم يومها .. ضحوا

وكان لينا شأن حتى فى الهزيمه

وطن..كان يعجبك جمعه وطرحه

علينا عين..وباقى الامه عين

انا المصرى كريم العنصرين

وعاد تانى الملك يحكم بلاده..

ومن بعد السنين دى ...زاد فساده

وكنا ساده فوق ارض الكنانه

واصبحنا عبيده .....او عباده

وضاع فى الزحمه مشوار السنين

انا المصرى كريم العنصرين

وتانى يا فقير عاد من يخونك

وتتهان فى بلادك عينى عينك

ولا الدين مكتفى من مص دمك

ولا عارف ديونهم من ديونك

وجيت للحق؟؟,,كله سلف ودين

انا المصرى كريم العنصرين

وده يسلم لده والعصر فاجر

وتاجر حنت..سلمنا لتاجر

وام الامه مصر الانسانيه

بتتامر..وبتدارى الخناجر

وكنت النجده واستنجد بمين

انا المصرى كريم العنصرين

وكنت اصرخ ..وكان الكل يسمع

وامد الايد ..عدو الامه يرجع

وجانى النطع يامرنى ويشخط

وخلانى بقيت فى الحق انطع

انا الى كنت اصحى الغفلانين

انا المصرى كريم العنصرين

وكانوا يقولو"مصر"الشمس تطلع

وتعلا رقابنا فوق..وعيوننا تلمع

وكنا نشيل قلوبنا فوق كفوفنا

ويصدرونا نواجه أى مدفع

فمين ساعدنا ع الوضع المهين..؟

انا المصرى كريم العنصرين

وازاى النهارده الدم.عومى

مقلقل صحوتى وساكن فى نومى

دمانا بتشتعل فى ارض غزه

ولبنان نارها ماسكه فى هدومى

وانا اللى فى الأسى واقف ما بين

انا المصرى كريم العنصرين

ولولا الانظمه العريبه لامت

وفى صفوف العدو حتكون وكانت

ما كان الموت عرف "صيدا" و"بعبدا

ولاكانت قيامه الغدر قامت

ولا قلب العرب بيت حزين

انا المصرى كريم العنصرين

وشوف لبنان بترحل من جنوبها

ونوم الليل.. ما بيعرف جنوبها

سطور النمل زاحفه للملاجىء

وريح الخونه ما هدت هبوبها

الوف راحلين فى قلبى مذعورين

انا المصرى كريم العنصرين

فيا لبنان انا..م اللى خانوك

يا حزب الله حكامنا باعوك

يا صاحبى..ماعدنا نملك غير هتافنا

هتافنا.مر مالى رقابنا شوك

وعلنى..بنفس الفعل المشين

انا المصرى كريم العنصرين

يا نصر الله ده..زمن البياعين

وانت طلعت للأمه منين؟؟

تفكرنا بكل اللى نسيناه

اظنه صعب يصحوا الميتين

وخليتنا الجميع متفرجين

انا المصرى كريم العنصرين

مازال العدو نفس الخبيث

ابونا مات وسابهو لنا وريث

ومهما يلف ويدور ..راح يغور

واسال عندنا بيوت السويس

حلاوة روح..وحياه الحسين

انا المصرى كريم العنصرين

بقت رايتك خلاص رمز لجهادك

بقت رمزالمقاومه فى بلادك

ولبنان كلها بايته فى ضميرك

خلاص صبح الجهاد ماءك وزادك

لغير المسلمين والمسلمين

انا المصرى....كريم العنصرين

بلاد الا مريكان احنا وصهاينه

وصمتى ع اللى حاصل...كله معنى

مازال الحلم لم فارق دمايا

على رغم اللى عاشه طعنه ..طعنه

يا لبنان الكرامه ....لا تلين

انا المصرى كريم العنصرين

ويا لبنان ما تطفيش نار نضالك

رجالك..حتى لو ماحناش رجالك

بحور الدم ماتغرق حقوقك

ولا تكسر مجاديف احتمالك

حبيبك..بس مش قادر اعين

انا المصرى كريم العنصرين

حب...ونهج الحب

انا من قراء مجموعة د.طارق فاروق على الياهو وهى مجموعة محترمة يكتب فيها كثيرون وتصلنى رسائل المجموعة اسبوعيا وأنا من المعجبين بالفكر الراقى والموضوعات المفيده التى ترد من هذه المجموعة المتميزه ..وصلتنى اليوم قصيدة حب جميله من كتابات د. طارق قرأتها فتعجبت لكمية الثورة والنيران والبراكين بل والسجن والقيد وأين؟؟ فى قصيدة حب ملتهبة ...على الفور قفز شيطان الفكاهة عندى ورددت على القصيدة بأخرى تنتقد الأمور التى رأيت أنها غريبة على الحب ...ولربما كان هذا هو الحب العصرى الذى لا أعرفه لأنى من جيل قديم ..فكتبت قصيدتى العاميه وسميتها نهج الطارق والسطور التاليه تحوى القصيدة الأصلية أحبينى وتليها مباشرة قصيدتى "نهج الطارق" ...أو "فى حب باتعه " وعشمى ألا يزعل طارق منى فأنا لا أقصد أى تجريح أو تهكم ..فقط أكتب نقدا بقصيده

بحبّــك..أحبّينــي

إهداء إلى من علّمتني الغرام...قبل الفطام..إلى من أهدتني السلام..دون الخصام..إلى من أسكنتني قلبها..وسقتني من حنان صوتهاشهد المدام..
أهديها كلماتي

بحـــبك.. أحبيني

أيا من عشت أهواكىـ

بقلب صامت باكـي

أحبينـي.. لكى تنساب أفكاري

وألحانـي وأشعاري

وكي تحيا دواوينـي

أحبينـي.. وقولـي أنني الأول

ولا شيء يضاهينـي

أحبينـي.. كما أهواكِ بل نصفـي

وذا يكفـي..ونصف النصف يكفينـي

أحبينـي.. وقولـي أنّكِ ناري

وكونـي أنتِ سجّانـي وسجينـي

أحبينـي.. وزيدي جمر أشواقـي

وكونـي أنت إحراقـي

فكم أشتاق ياشمسـي

لتلك الشمس تكوينـي

أحبينـي.. وزيدينـي

بنور منكِ.. من عينيكِ.. زيدينـي

أحبينـي.. أطيحـي كل آمالـي

لتحيا كل آمالـي ..وكونـي أنتِ زلزالـي

أحبينـي.. وكوني أنتِ بركانـي

وألقينـي.. بنارٍ ملء كفيكِ

ففـي كفيكِ ياعشقـي

أحلى براكينـى أرى

أحبينـي.. وكونـي أنتِ إعصاري

وثوري.. هَدّمـي داري

ولن أحتاج عنوانا

فكفاكـي عناوينـي

*******أحبينـي.. وكونـي أجمل الزهرات

فى أجمل بساتينـي

أحبينـي.. أسيرا بين أسراك

وشدي قيدك الدامـي على روحـي وأحلامـي

فذاك الأسر يرضيني

*******أحبينـي.. وكونـي أنتِ مولاتـي

وزيدي فى جراحاتـي

وأدمينـي..أحبينـي

.. بسوطٍ فاتكٍ قاس

وزيدي جَلد إحساسـي

وعذراً.. لا تواسينـي

أحبينـي.. كطوفان يؤرّقنـي

كنيران ستحرقنـي

كسيّاف يمزقنـي

كجرّاح يداوينـي

أحبّينـي.. أحبّينـي

وكانت قصيدتى

نهج الطارق"

أو قل (فى حب باتعه

أحبينى ..يابت يابتعة حبينى
ولــــو حتى بماية نار
ياحلوة ابقى رشينى
ولو عندك وابور فيه جاز
ماتنسيش رشه فى عينى
ولو نارك آدت فيٌه
بطشت المايه طفينى
واجيب انا برضه بلدوزر
واهد البيت ..فساعدينى
حاهــــــد بيتنا فى الأول
وبيتكو بعده ..على عينى
ونبنى حبــــــــــنا الدايم
بلا سفره ..بلا صينى
أنا م الحب راح اولع
فى نفسى لو هجرتينى
معاك باحس بالطاقة
حاتضرب من شرايينى
وانا جنبك فشر شمشون
ولا ميه...... يزقونى
لكن انت ياحلوة انت
راح اغرق... لو تزقينى
فى بحر عنيك ورموشك
وقلب ابيض كما الصينى
وسونامى ما سونامى
روحى نامى ...وغطينى
دى أمواج هايفه موش عاليه
نعومها.... لو تساعدينى
واقوللك إيه على البراكين
لهيبها ......هوه دا أنينى
فيه واحد يوم قرالى الكف
وقال باتعة حا تــــــرمينى
تاكل لحمى وترمى العضم
وبالمــــــكوه... حا تكوينى
وانا اللى اديت لها الفكرة
وقلت ياطيطه حاورينى
ماكنتش اعرف ان الحب
مع الباتعه حا "يردينى"
عملت جدع وقلت يانار
ف نارها جت ..وجه دخانها فى عينى
فحبينى ..بلا موجه بلا بركان
بلاش ..العنف هاودينى
وخلينا فى حب زمان
كما فاتن معاها عماد
ورا الشجرة وخبينى
اقولك بخ واجرى وانط
واقول ياباتعة غمينى
واعد لحد مايليل
علينا الليل وتنسينى
واقول باتعة تاهت ياولاد
واغنيلك أغانى حليم
واقول يمكن تواسينى
وبرضه أجرى بالبدله
واقول يمكن توافينى

قصيدة عظيمة ..لشاعر عظيم

هذه قصيدة للشاعر العربى أحمد مطر أعجبتنى معنى ونظما فشاركونى قراءتها

شعر: أحمد مطر

مِن أوباما..

لِجَميعِ الأَعرابِ شُعوباً أو حُكّاما:

قَرْعُ طناجِرِكُمْ في بابي

أرهَقَني وَأَطارَ صَوابي..

افعَلْ هذا يا أوباما..

اترُكْ هذا يا أوباما..

أَمطِرْنا بَرْداً وسَلاما

يا أوباما.

وَفِّرْ لِلعُريانِ حِزاما!

يا أوباما.

خَصِّصْ لِلطّاسَةِ حَمّاما!

يا أوباما.

فَصِّلْ لِلنّملَةِ (بيجاما)

يا أوباما..

قَرقَعَةٌ تَعلِكُ أَحلاماً

وَتَقِيءُ صَداها أوهاما.

وَسُعارُ الضَّجّةِ مِن حَوْلي

لا يَخبو حتّى يتنامى.

وَأنا رَجُلٌ عِندي شُغْلٌ

أكثَرُ مِن وَقتِ بَطالَتِكُمْ

أطوَلُ مِن حُكْمِ جَلالَتِكُمْ

فَدَعوني أُنذركُمْ بَدءاً

كَي أَحظى بالعُذْرِ ختاما:

لَستُ بِخادِمِ مَن خَلَّفَكُمْ

لأُساطَ قُعوداً وَقِياما.

لَستُ أخاكُمْ حَتّى أُهْجى

إنْ أَنَا لَمْ أَصِلِ الأَرحاما.

لَستُ أباكُمْ حَتّى أُرجى

لأَِكونَ عَلَيْكُمْ قَوّاما.

وَعُروبَتُكُمْ لَمْ تَختَرْني

وَأنا ما اختَرتُ الإسلاما!

فَدَعوا غَيري يَتَبَنّاكُمْ

أو ظَلُّوا أَبَداً أيتاما!

أنَا أُمثولَةُ (شَعْبٍ) يأبى

أن يَحكُمَهُ أحَدٌ غَصبْا..

و(نِظامٍ) يَحتَرِمُ الشَّعبا.

وَأَنا لَهُما لا غَيرِهِما

سأُقَطِّرُ قَلبي أَنغاما

حَتّى لَو نَزَلَتْ أَنغامي

فَوقَ مَسامِعِكُمْ.. أَلغاما!

فامتَثِلوا.. نُظُماً وَشُعوباً

وَاتَّخِذوا مَثَلي إلهاما.

أَمّا إن شِئتُمْ أن تَبقوا

في هذي الدُّنيا أَنعاما

تَتَسوَّلُ أَمْنَاً وَطَعاما

فَأُصارِحُكُمْ.. أنّي رَجُلٌ

في كُلِّ مَحَطّاتِ حَياتي

لَمْ أُدخِلْ ضِمْنَ حِساباتي

أَن أَرعى، يوماً، أغناما!

وحشية مفرطة

ضابط يقود سيارته ليلا فى القاهرة وبسرعة جنونية ...فيكاد يدهس طالب بكلية الهندسة اسمه "م" فينزل الضابط الهمام لينهال ضربا فى رأس الطالب فيهشم عظام جمجمته ويكسر أنفه ويجرحه جرحا قطعيا فى الوجه ... الطالب الصغير والضعيف يستنكر الضرب المبرح الذى انهال عليه وأسقطه أرضا فيسأل الجانى : أنت ناوى تموتنى يامجنون انت ؟ ... فيسب الجانى ابا الطالب" م.".. مزمجرا أنا الرائد" و" يابن ال.....وينهال عليه بمجموعة تاليه من اللكمات تهشم ما بقى من عظام وجهه وتزيد من نزيف الجروح كل هذا و.".م".. ملقى على الأرض لايستطيع حراكا .... ولما أحس الجانى بان "م " قد يموت من الجروح والكسور التي أصابت جمجمته . وأنفه.. جرجره كما يفعل اليهود في الفلسطينيين وألقاه في (صيدلية ) ويتصل يأبوه قائلا : ابنك مجروح في الصيدلية تعالى شيله . ويحرض المصاب على الكذب على أبوه قائلا : لما ابوك ييجى قول له انك وقعت على وجهك ..ويهدده!! (عاوزها تعدى سلمى والا نقلبها عافيه) ؟؟؟.ومضى مبتعدا عن المكان ..لم ينقله لمستشفى خوفا من المسئولية مع انه الجاني والمعتدى بوحشية...وواصل ضربه وهو طريح على الأرض ...واستعان بشلة من عصابته من محترفي الضرب والعراك كان قد استدعاهم بالموبايل ليمنع تدخل أي من المارة أو زملاء" م " ...وكذلك لافتعال معركة متعددة الأطراف يضيع فيها شخص الجاني وتتوه معالم الجناية, ولكن زملاء" م " الذين حضروا على صوت الارتطام ومنظر الفتى الصريع لم يتعاركوا مع عصابة الفتوات الذين جاءوا مسرعين ..الطالب المصاب وهو بالمناسبة ضئيل الحجم جدا ....ولم يكن صرعه يحتاج " للبونيه الحديد" التي جاء بها الجاني من سيارته ......الموضوع حدث أمام كلية هندسة جامعة مصر الدولية بالدقي وكان" م" الطالب في إعدادي هندسة يعبر الشارع لشراء عصير من محل على الناحية الأخرى من مبنى الكلية حينما حدثت الجناية وكانت غلطته الوحيدة عندما قفز مذعورا من أمام السيارة المسرعة التي كادت أن تقتله ...أنه عاتب الجاني بقوله " حاسب يا مجنون كنت حاتموتنا " .... تم عمل جراحة عظام لوجه "م" فى القصر العينى ...وهو يرقد الآن فى فراشه تحت المهدئات محروما من دخول امتحانات الفصل التي تبدأ الأسبوع القادم ....هل يرضى هذا الحادث الوحشي أحدا ؟؟ هل تصدقون أن هذا التصرف الوحشي يصدر من ضابط ...المفروض انه من حماة الوطن وليس من ضاربى أبناء الوطن . الضحية ابن شقيقة زوجتى وبنت خالي في الوقت نفسه ...طبعا أنا هنا فى إسكندرية باغلى من الغضب ... ونصحتهم بعمل شكوى في الجاني في النيابة العسكرية لأن هذا الشخص لا يصلح لأن يكون ضابطا في الجيش .. فهو أقرب للعصبجيه منه للناس المحترمين ... الآن حالا جاءني تليفون بأن الجاني حول لمحكمة عسكرية فورية وهو فى المحكمة الآن ... وجاء معه محام لقنه بأن يقول... أنها كانت خناقه بين أولاد في الشارع وكان هو يفضها ويهش الولاد عن بعض ؟؟؟؟ حسبنا الله ونعم الوكيل

زجلو بلوج

هذه بعض من المختارات الزجلو بلوج مما كتبت سابقا منها ماهو فى بوستات قديمه ومنها ماكان تعليقا على بوست فى بلوج قرأته ..فهيا بنا نقرأ.....الأولى لما عاند البلوج معى فى دخولى !حتى للبلوج خاصتى وحتى عند صديقى العزيز شريف كلما حاولت الدخول أشار لى بالمنع وبأنى على خطأ فكتبت
طردنى البلوجاوى من صفحات التعليق خصوصا صفحة صديق العمر: شريف اتغظت فكتبت فيه:-
سألنى على اسمى فقلت لامانع ..
. وكلمةمرورى لامانع لامانع
..ولجل تحاشى كلام الشوارع ..
.سكت وكتمت فى قلبى المواجع ..
. لكن الحمار اللى إسمه البلوج ..
.وطبعا حصاوى وكاتون ودوج.
..رفض لى الدخول والولوج والكلام ..
.كأنى عزول مش صديق للأنـــــــام
...فنرفزلى حالى ونفر عروقى ..
وخلى اللى تحتى بقى دوغرى فوقى
...فرحت مصور صحيفة الكلام
.عشان تبقى شاهد ياعبد السلام.
... وعلقتهالو فى آخررسالة
.. عشان مايسوقشى على الهبالة
ويشهد عليه الأفاضل صحابنا
.. ....يشوف الجميع المصاب اللى صابنا
...فمين اللى فينا مريض بالزهايمر
أناواللا هو اللى مخــــه مدمـــــــــر
.... ..دانا يعنى لسه حافظ له الوداد
وقلت بلاش الأباحـــــــــــــــه ياواد

. يقوم هوه يرفض ويرفص كمان...
ويكرشنى بره كــــواد العبـــــــان.
..وانا واد مسالم معنديش مطاوى ..
.وبامشى أزك واعد الخطـــــاوى
ولسه يادوب فى البلوج باسمى
...... واقول للصغير ياباباوياعمى
....صحابى بتسأل وفين تعليقاتك ؟
.أقول البقية ف حياتى وحياتك.
مانعنى البتاع إنى أدخل عليكم..
.واقول كلمتين هم سلام عليكم .
ختام الكلام دوغرى حابعت عريظه
. .... لبطرس وكوفى عنان اللى راح
...واقول له تعالى وشوف الحريقه
...دىوالعه ف قلوبنا دى هى الحقيقه
أما التاليه فكانت تعليقا على فيلم تسجيلى عن جزيره سياحيه جميله اسمها بورا بورا وعن جمالها كتبت :
لما شوفت بورا بورا
قلت يمكن عينى عوره
اصلى عمرى يوم ما شوفت
زى دى تبقى جزيره؟؟
نخله خضره.. مايه صافيه
رمله بيضا..ناسها قله.. موش كتيره
شلالاتها نازله فوره
والحريم م الفرحة يرقص
زى عاكف ..أو شكيره
بس لابسين فوق دماغهم
طوق ورود فوق كل قوره
والكاسات فيها مايه زرقا
هى مايه؟؟ والا بيره؟؟
احنا نعرف مايه بيضاأو لمونى
بس زرقه؟ ..لأ كتيره!!
والنابوليا حلوه جدا
والسرير ....زى الفطيره
لأ كمان فيها جاكوزى
ميته زرقه ...وخطيره
والسما ألوانها فاتحه
والغيوم ماهيش كتيره
بين شجر نايم مأنتخ
عنجريب نزل ضفيره
والهنا باين عليهم
ماحلا بورا من جزيره
فوق بساط الريح نشوفها
حتى نركب فوقه طـوره.....(الطوره =4)
بورا بورا بورا بورا
ياللا نحلم بورابورا
أما الثالثة والأخيره فكانت ردا على صديق الطفولة والصبا د.عبد الحليم الأستاذ الجامعى المهاجر لكندا والذىأرسل ليضمنى لمجموعة بريديه خاصة ويطلب منى قبول الدعوه كتبت له:
ياألف مرحب بعبــــــحليم
لو اعرف افرش ميت كليم
يكون جديد موش م القديم
ولونهم احمر موش قتيـــم
هو الحنش عاوز تقـــــديم؟
بس احنا برضه نقف زنهار
ونزغرطولـــو ..ليل ونـــهار
اصل احنا أهله ...موش زوار
وهو أيضا خـــل........ قديـــم
ماننسى أبدا لمـــــتنا
فى بيتكو أو ف جنينتنا
وفى الكور ياما شوطنا
وكلنا رز ولحمة وتيــــــــن
ونكتفى بهذا القدر حتى لا يزهق منا القارئ

فى بيــــــــــــتنا... حـــــــــنش

ppppp

عاد الحنش للذاكرة ...فقد نادى الجيران على زوجة ابنى وقالو لها ....ماتنزليش الجنينه إلا بعصايه فى إيدك ...ولا تقطفيش نعناع م الجنينه لحسن فيه "حنش " ولما كانت زوجة ابنى قاهرية فلم تفهم المقصود وقالت لهم : يعنى إيه حنش؟؟ ..راحو قايلين لها "ثُوعبانون" كده بالمفتشر...طبعا هى كانت تشتكى لى مر الشكوى لمجرد ظهور 3-4 برص غلبان عند باب البيت وكانت تخاف منهم موت ..وعملت لهم خطة مكافحة (شبشبيه -شيحيه)..لكن الحنش وظهوره للجيران ..أدى لنزوح العروسين من العجمى ..والإقامه معنا .. وأصبحنا بهم سعداء ... ذهبت لهناك لأستطلع الأمر سيما وأننى أقمت هناك شهرا أنظف الحديقه وأقص الزرع ..وأشرب الشاى بالنعناع..وأنا غاوى زرع وعندى نباتات كثيره ..غولت لما تركتها مده ..لكنى كلما سنحت الفرصة أروح واشتغل فيها شويه كمان أنا عامل نظام رى أوتوماتيكى بتايمر يروى الحديقة طول العام ببرنامج آلى يتكرر كل 24 ساعة وأعدله صيفا وشتاء حسب المطر والبروده ...المهم الجيران شافونى فى الجنينه كرروا على التحذير ,, وأشارت أم احمد جارتنا الغربيه بأن الحنش صعد وتربع على بلكونة الجيران وعمل دائرة خلزونيه قطرها "كده يا أستاذ ماكس" وأشارت بما يقارب صينية البطاطس بالفرن كده ...طبعا أنا أصبحت أكثر حرصا فى مشييى وتجولى خصوصا منطقة الورشه المليئة بالكراكيب والعدد ...ولكن هذا ليس أول عهدى بالثعابين ..فقد قتلت منهم خمسا .. أثنين فى مصر وثلاثة فى السعوديه

أول حنش صادفته كان فى نفس حديقة العجمى وكان بيدى فأس زراعة ثقيل ..وتسلق الحنش سور البيت ببطء فهويت على دماغه عدل بضربة واحدة ..فمات فورا كان ذلك فى أواخر الثمانينات ...الحنش الثانى كان فى منطقة الباحة بالسعوديه وهى جبال وعره تعيش فيها الثعابين والقرود والذئاب عيشة طبيعيه ..ونحن بنى البشر من طرأنا عليهم وشاركناهم المكان ...كان يوم عرفه ..وكنت صائما ..وكان الجو حارا يومها ..أنهيت عملى فى الرابعة عصرا وتوجهت لمكان الإقامة (وهو سكن صغير على قمة جبل 2000 متر فوق سطح البحر ) ..من شدة الظمأ دخلت فاستلقيت على سريرى مع استبقاء قدماى على الأرض ...وبينما أنا كذلك فى حالة استرخاء ...إذا بكوبرا زرقاء اللون طولها يقارب المترين تزخف بهمة من الصالة تجاهى عدل آى والله تجاهى مباشرة ...وليس بيدى أى شيء وهى بينى وبين المطبخ مستودع الآلات الحاده الوحيد ...فما كان منى الا أن قفزت لأقف فوق السرير لأستكشف الزائر القادم من غير عزومه ..واترك فسحة للتفكير من هول المفاجأة ...وببركة الصوم وحده أخافت هذه الحركة الكوبرا ..التى قالت لنفسها " ده طلع كبير قوى وواصل للسقف " وانا فى ذعر لايعلمه إلا الله ..خافت الأفعى وعرجت يمين لتدخل خلف الثلاجه الموجودة فى الصاله "كانت ويستنجهوس" ..طبعا ده إدانى فرصة للتحرك للشباك والنداء على العمال الهنود المخلصين " ياسانكوى ..يايوسف خان .. ياراماشاندران."..الحقو تعبان دخل عندى..وقى لحظات وجدت 12 هندى بالهراوات يجرون تجاهى ويقولون بالانجليزى المكسر " مانيدجار...اسنيك " ودخلو فى الصالة.. فين ...هنا ورا التلاجه وبسرعه عملو نصف دائرة حول الثلاجه ..وأخذو يتمتمون بكلام هندى لا أفهمه ويصرخون ويهزون التلاجه ..فظهرت الحيه فانقضوا عليها بالعصى حتى هدأت حركتها وجاءوا بها لى وهى تتلوى ..كان رفاقى الهنود هم أبطال تلك الواقعه ..وكان دورى الوحيد هو تقمص شخصية المارد الخارج من القمقم بثا للرعب فى عقل الأفعى ...وقد كنت أنا المرعوب الحقيقي ..الحنش التالى هو حرامى الأرانب ...كان أحد السعوديين قد أهدانى زوج من الأرانب لأربيهم فى حديقة سكنى الجبلى ..وعملت لهم عشة من السلك وتكاثروا ووصلوا ل19 أرنب وكنت سعيد بهم جدا أطل عليهم يوميا وأطعمهم ناتج قص نجيلة ملعب كرة القدم فى الاستاد هناك ..فى اليوم الموعود لاحظت اختفاء كل الأرانب فى الحفر ..ووجدت شيئا مكوما فى ركن العشه ولا يتحرك ...كان كوبرا أخرى ضخمه ...كنت بالخارج فناديت على مزارعى الملعب وكان منهم مصريين ..جاءوه من أعلى وضربوه على رأسه فلم يقوم كان قد التهم لتوه أرنبا بالكامل ...ولما فردوه وجدنا انتفاخا فى بطنه.. شقها العمال ..فاستخرجوا أرنبا كبيرا ممددا ..كما لو كان بصدد ضرب غطس فى حمام سباحة ..حتى أننا صورنا هذا الحنش وأرسلنا الصورة لإدارة الشركة كى يغيروا لنا مكان السكن الجبلى الموحش هذا ...ولم يحدث ...الحنش التالى جاء من النافذه ربما للبحث عن فقيديه السابقين ..ولما رأيته قادما وناديت على ٌحماتى الهنود توارى بين الصخور ووجدوه وقتلوه هو الآخر ..كان من الكوبرا أيضا ...أما الخامس والأخير فكان وطنيا سكندريا أيضا وكنت أنا قاتله ..فقد كنت وشقيقى الأصغر نقص نبات ست الحسن الذى ملأ الحديقة وتسلق كل شىء ..وبينما نحن كذلك لفت نظرى شىء ساكن تحت أوراق الموز الجافة يشبه الخرطوم ولكنه منقط ومزركش زركشة لا تخطؤها عين واحد سوابق أحناش مثلى أنا ..هوه ميت ولا حى؟؟ تساءلنا ؟؟ قلت له ناولنى السيف (سيف نقلم به الأشجار)..ناولنى فناولته ضربة غاص معها السيف فى طين الحديقة شبرا ...وتحرك الحنش متلويا وقد قسمته نصفين ..واحترت كيف آحذه للخارج ونصفه العلوى مازال حيا ..كان الحل فى مقص الشجر الذى قبضت به على دماغه ففيص ..وهكذا كنت أنا الشجيع مرتين... والمبلغ والمستنجد 3 مرات والملاحظ ..ان الظاهرالواحد مننا بيبقى شجاع فى بلده بس أما فى الخارج فتقل الشجاعة عنده ويستنجد... فتحية منى لمنقذى الهنود الذين كنت أحبهم جدا وهم كذلك ,أناليوم لتوى قد اشتريت الشيح وأعد العده لهجوم جديد عل حنش جديد ..ففى بيتنا حنش

عاد المريض ...والعود أحمد

يبدوأن دعوات التراويح وبالذات فى ليلة القدر قد اخترقت الحجب وواصلت طريقها إلى طبقة الأيونوسفير حيث انعكست وعاد صداها المنعكس على صدر وقلب وعقل محمد كمال صديقى العزيز فملأته حماسا وعطفا ...فكان أن تناول حاسوبنا العليل ... المفرمط هارده والممسوح سيهه ودسك طوبه ..وأعمل فيه المفك الصليبه ... وبدل فيشه المرهقة وباوره المنهك بآخر استعمال خارج ولربما استعمال طبيب ... وأدخل كل المعاميع المبعثره والرامات المنخفضة السعه ..وهز المازر بورد ..باختصار " فيش الهوامش" على رأى محمود عبد العزيز فى "العار"_ وهو بالفعل جارنا سكنا فى اسكندريه_ وقال لى خده وجربه فى أجازة العيد ... وهاأنذا أكتب هذا البوسط من على كى بورده ...وأقراه من على شاشته...(فهذه بضاعتنا ردت إلينا) ... فشكرا على من واسانى فى حاسوبى ..ومن أرسل يطلب السلامة لهارده ..والصحة لراماته ... وعذرا لصديقى محمد كمال الذى وصل صيته الآفاق وهجاه من هجاه .. وفعلا الحاسوب تاج على الترابيزه لا يحس به إلا المتفرمط والمتمرمط .. وقد زاد من حدة الأزمه مرض شقيقه المكتبى بحرق من الدرجة الثالثه فى باوره مما عجزنى تماما .. ولولا الحاسوب الحجرى..بكسر الحاء وسكون الجيم "اللابطوب" والذى كان عكازى ومهمازى خلال تلك الفتره لكنت كمنت فى بيات صيفى داخل الورق ولعدت أدراجى لعالم التلغراف والمورس وعلب الزبادى ذات الخيوط المشدوده بين أذن وأذن ...لقد أضحى هذا الجهاز وسيلة التواصل ألأولى بين البشر ...كنت فى دراسة فى أمربكا عام 83 وأخذونا ألى قاعة يتوسطها جهاز بدائى بى سى ( PC )

من النوع ذو الحروف المضيئة الخضراء وقالو لنا -وقتها - إن هذا الجهاز الشخصى الصغير سيغزو كل مكان وسيكون حديث الدنيا كلها فى الأعوام القادمه ..كان استشرافهم للمستقبل حقيقي وتوقعهم فى محله

مريض بمستشفى محمد كمال

عطل جهازنا المنزلى ...فذهبنا به الى صديقنا محمد كمال خبير الكومبيوتر (باطنه وجراحة وتخدير معا) فجاب كرشه وفرمط هارده ..وغير كابله ..ولكنه لم يفق من البنج بعد الجراحة وظل قابعا عنده من أول رمضان وحتى تاريخه كتبت له هذه الأبيات لعله يحن علينا ----------
أتانى أبيت اللعن أن مريضنا
بأنبوب السوائل والدواء معلق
فلو أن الدواء بديل هارد
فداوينى بهارد فالمريض هزيل
وإن فاد الدعاء دعونا فجرا
وفى التراويح يتبعه العويل
ألا ابن الكمال وعدت ماكسا
بتصليح ..فهل مات العليل
فإن فلسع ..فهات إلى القرافه
فندفنه سويا ...ياجميــــل

ألعاب سكندريه قديمه 2

النشان

وكان النشان هو اللعبة الثانيه من العاب القصب وهو أيضا نوعين نوع متحرك وخايب الى حد ما ولست أذكر تسميته بالضبط وسط الغلمان فى الحى ...انما أذكر ولا شك كيف كان يجرى ...يبدأ النزال بالفره "التوس" وملك والا كتابه والفائز يلعب أولا ...طبعا قد تم اختيار قطعة القصب بطول نصف متر تقريبا ولازم تكون سرحه غير معوجه الفتى الأول يبدا بدحرجة المليم النحاسى على الأرض ويجرى وراءه ثم يهوى بالقصبة عليه وهو يتدحرج لينغمس المليم داخل فطعة القصب ولا يظهرمنه شيئا كده يبقى واحد.. ويعيد الكره ...وينتقل اللعب للخصم إذا جللى اللاعب أو جاءت ضربته معوجه فينام المليم ولا يرشق فى القصبة التى هوت عليه بطريقة خاطئه أو قاد الحظ العاثر المليم الى زلطه أو حصوة تسقطه على وجهه دون إصابة ...هنا يبدا اللاعب المنافس فى أخذ الزمام ويوسع القصبة خبطا فى المليم المتدحرج ...الفوره من 10 والذى ينجح فى عشر ضربات ناجحات متتاليات تكن له الغلبة.... والقصبة.. وتهانى المتفرجين ...كانت العملات المعدنيه وقتها تبدا من نصف مليم آى والله انا أمسكت بيدى هاتين نصف المليم والمليم والنكله والتعريفه والقرش صاغ والنصف فرنك ...وهذا الأخير يعنى قرشين ...لأن سعر الفرنك الفرنسى وقتها كان أربعة قروش مصرية ...كان النصف فرنك هذا شكله مسدس ولونه فضى وعليه صورة الملك فؤاد أو فاروق كان المصروف اليومى المدرسى تعريفه اى خمس مليمات ...ولن أحكى لكم على قدرة التعريفه الشرائية فقد كنت أقف فى دكان عم محسن وأقول له هات من دى ...ومن دى ..وكمان 2 من دى ...إشارة لبرطمانات البنبون واللبان والتوفى والباستيليا ...كل هذه الإشارات والطلبات ولم أكن قد تجاوزت المليمات الخمس ...ربما بعد تدويخ الراجل وفتح كل ماعنده من أوعيه زجاجيه يتبقى لى مليم أو مليمين أصرفهم فى طريق العوده ...اذن المليم هذا كان له شنه ورنه كان من النحاس الخالص لونه أحمر نحاسى داكن وكان حينما يبلط أو يعوج من كثرة الارتطام بالأرض وتصبح حافته غليظه لاتخترق القصب ...نجرى به على قضيب الترام الذى يمر بالقرب من منزلنا وننتظر خلو القضيب من الترام ثم نضع المليم المضعضع على القضيب انتظارا لمرور ترام رقم 6 أو 4 أو حتى 1 وكلهم يمروا من شارع محرم بك ..تمر الترام فتهرس المليم تماما وتصنع له حافة حاده فنلتقطه فى سعاده ...فلدينا الآن سلاحا لا يخطىء هدفه ...كنت موهوبا فى النشان اليدوى بدرجة مذهله بينما يوحى وجهى الوسيم - وقتها-وشعرى المرتب بأننى ولد فرفور غير مخربش ويسهل هزيمته أو الضحك عليه ..فكان الغلمان يتحدوننى أملا فى هزيمة مؤكده ولكن سرعان ما يتضح لهم سوء التقدير بالمظهر ...ولا يتلم أى منهم على فرصة امساك المليم مرة واحده كنت أنهى المباراه بالقاضيه 10 -صفر فكيف هى مباراة النشان؟ ... توضع القصبة على الأرض وتجرى القرعه الفائز عليه أن يصيب القصبه ب 8 مطاطى و2 واقف ..المطاطى معناها أن يباعد بين قدميه قليلا ويمسك المليم بين أنامله موجها حافته لمنتصف القصبه تماما ويهوي بلمليم تجاهها ان رشق فتعد واحد وحتى ثمانيه ثم يأتى دور الواقف وهى أن يقف اللاعب وساقيه مفرودتان تماما موازيا للفصبه ويهوى بالمليم من جانب كتفه الأيمن دون ثنى الركبة فإن رشق أكمل العاشرة وان جللى فى أى مرحلة انتقل اللعب للخصم.. لم أجللى ولا مرة واحده فى هذه اللعبه وكنت اتقن لعب دور الضحية أمام الولاد المخربشين لاستفزازهم لمنازلتى ...وكنت أعود لأمى محملا بقطع القصب المليئة بآثار المليم الذى لم يخطىء أبدا هدفه

ألعاب سكندريه قديمه

لعب القصب
كنا صغارا لما وجدنا فى الحى (محرم بك) محلات وبائعين للقصب ...ليس بغرض العصير ولكن التنافس واللعب ...وكان القصب وقتها لونه أحمر ومخطط بخطوط رفيعه صفراء وكان غليظا تبدو الصحة على عيدانه الغضه.. فى شارع بوالينو كان المحل الذى يفرد عقل القصب العود يقطع لثلاث أو أربع قطع أحلاها ما اقترب من الجدر.. وأطراها وأقلها حلاوة الزعزوعة وما جاورها ..لعب القصب نوعين هما :- الكسر ...والنشان ...أما الكسر فيعنى أن يقوم المتنافسان بعرض الطرق التى يكسر بها كل منهم عود أو قطعة القصب من عند العقل طبعا الى قطع طول كل منها عقلة واحده يختار المتنافسان العود ويقول الأول : افصل ...يعنى ادينى عرضك لتقطيع العود بالكامل ... وطرق الكسر عديده مقسمه بالعرف لطرق تتدرج تنازليا فى القوة أو الصعوبة فى الأداء فمثلا..( هوا )..هى أقوى الطرق التكسيرية للقصب وتليها القوره والكلوة والتنفيده والسمانة والنزلة وسيف اليد وشلوط عالطاير وشلوط مسك ...كل واحدة من هذه الطرق تحتاج شرح لمن لا يعرفها أما من كان سكندريا قديما بعض الشىء فسيفهم معنى ما ذكرت ..فعلى سبيل المثال الهوا ...يعنى أن يمسك اللاعب بطرف العود ويجذبه للأمام ثم للخلف بسرعة مستغلا القصور الذاتى ليكسر العقلة الأولى ولما كان الكسر يتم فى الهوا فقد سميت باسمه..أما الكلوة فهى أن يمسك اللاعب بالقصبة ويضربها بقوة على كلوة يده لتنكسر ...أما التنفيده فهى أن يمسك اللاعب بالقصبة خلف ساقه اليسرى الموضوعة فوق الرصيف ويجذبها بقوة للأمام لتنكسر على وتر الساق اليسرى فيما فوق القدم مباشرة ..أما السمانة فتعنى الكسر على جاب الساق بجوار الركبة مباشرة ...أما النزلة فهى أن يهوى بالقصبة على ركبته المنثنيه والمستنده على حرف الرصيف ...والنزلة نوعين نزله بالجوز ..ونزله فردانى الفردانى تعنى النزول بقصبه مفرده ..بالجوز تعنى النزول بقطعتى القصب معا وكسرهما معا فى نزلة واحده ...أما سيف اليد فهو واضح بأن يهوى على القصبه التى يمسكها له فردين بسيف يده ليكسرها ...الشلوط عالطاير يعنى أن يشوط القصبه كما عصام الحضرى بقدمه لتنكسر من قوة الشوطة فى الجو ...بعكس الحال فى الشلوط مسك فهنا يمسك فردين بطرف القصبة ويدخل أخينا على القصبة كما الداخل على ضربة الجزاء الترجيحية ليشوط القصبة بوش الفدم كاسرا إياها ...وعند الفصال وعرض الطرق المقترحة يرسو المزاد على من يعرض عرضا أقوى مثلا 3 هوا و2 تنفيده ونزلة بالجوز وشلوط عالطاير ويكون البائع هو الحكم ...ويفوز اللاعب بالقصبة إذا نفذ وعده وكسر العود بالضبط كما قال ...ويدفع المنافس ثمن العود ...أما إذا "مصت" منه عقلة واحده فتنقلب الآيه ويدفع هو ثمن العود ولا يطول منه ولا عقله ...وكلمة "مصت" العقله تعنى ان تنثنى العقلة وينزل منها عصير دون أن تنكسر فعلا ...وكان الأطفال المنتظرين والمشاهدين يصيحون عند حدوث ذلك ماااصت ماااااصت ويجرون للفوز ببعض العقل التى يوزعها الفائز عليهم ...كان لعب القصب مجالا لإظهار الفتونه وقوة الشكيمة عند الشباب ...كان ذلك فى خمسينات القرن الماضى .... أما النشان فتلك قصة أخرى

استكمالا لخناقتى مع البلوج

لما طردنى البلوجاوى من صفحات التعليق خصوصا صفحة صديق العمر شريف اتغظت فكتبت فيه القصيدة التاليه:-
طهقت من التعليق ...وجالى ف دماغى إنبيق ...فقد رفض البلوجاوى تعليقى...وكأنى نمساوى موش أفريقى..
سألنى على اسمى فقلت لامانع ... وكلمةمرورى لامانع لامانع ..ولجل تحاشى كلام الشوارع ...سكت وكتمت فى قلبى المواجع ... لكن الحمار اللى إسمه البلوج ...وطبعا حصاوى وكاتون ودوج...رفض لى الدخول والولوج والكلام ....كأنى عزول مش صديق للأنام...فنرفزلى حالى ونفر عروقى ...وخلى اللى تحتى بقى دوغرى فوقى ...فرحت مصور صحيفة الكلام ...عشان تبقى شاهد ياعبد السلام ... وعلقتهالو فى آخررسالة ..عشان مايسوقشى على الهبالة ... ويشهد عليه الأفاضل صحابنا ...يشوف الجميع المصاب اللى صابنا ...فمين اللى فينا مريض بالزهايمر ...أناواللا هو اللى مخه مدمر ...دانا يعنى لسه حافظ له الوداد ... وقلت بلاش الأباحه ياواد... يقوم هوه يرفض ويرفص كمان ... ويكرشنى بره كواد العبان...وانا واد مسالم معنديش مطاوى ...وبامشى أزك واعد الخطاوى ...ولسه يادوب فى البلوج باسمى ... واقول للصغير ياباباوياعمى ....صحابى بتسأل وفين تعليقاتك ؟ ...أقول البقية ف حياتى وحياتك ... مانعنى البتاع إنى أدخل عليكم...واقول كلمتين هم سلام عليكم ...ختام الكلام دوغرى حابعت عريظه... لبطرس وكوفى عنان اللى راح...واقول له تعالى وشوف الحريقه...دىوالعه ف قلوبنا دى هى الحقيقه

أنا والبلوج والزمن طويل

هذا مادأب عليه البلوج بتاع شريف بالذات ...أكتب التعليق واجى أنشره يقوللى انت مين ...أقول المدعو ماكس وتقريبا فرد م العيله يعنى ... يقول لى هأأأأأأو وكمان هأأأأأو فين كلمة السر ...اروح راصص له الكلمتين اللى حافظهم ....يقول بكل بجاحة ...غااااااااااالالالالالالاططططط...طب يمكن نسيت ادوس كويس على المفاتيح .... طب خد عندك دى كلمة السر السرية جدا ( هى هى ..بس دايس جامد عالمفاتيح )....ويأتينى نفس الرد السابق الذى يبعث اليأس فى النفس غغااااالالالالالاط برضه ...اتفرست قولت اشهد الناس على الراجل الغلس بتاع البلوجات ده اللى مستقصدنى ومانعنى اكتب لصحابى فى دكانهم ...وتقولولى مابتعلقشى ليه ماهو م البلاوى دى ...وادينى صورت الصفحة كلها وفيها التعليق بتاعى ورد عمنا أبو البلوجات على بأن كلمة السر غلط ...ازاى وانا اللى مألفها وملحنها ...بأمارة ما قاللى ياسلام كلمتك قويه با ولا ...مين فينا بقى اللى عنده زهايمر .... واللى موش باين له الصورة كويس يكبرها ويشوف .....شريف (عابدين) حاعلق لك بينى وبينك على الميل بوكس بتاعك ياعم الواد البلوجاوى ده موش ناوى يجيبها البر معايا

أقصر قصة قصيرة كتبتها

ضمن مخزون الذاكرة التى محى معظمها بفعل الزمن وجدت فى ركن بعيد منها ذكرى عن قصة فى سطرين كتبتها فى مجلة عين الحسود التى كنت أكتب فيها مشاركا صديقى المعروف لديكم باسم شريف ولدى بعبدين كانت المجلة من ورقة واحدة وتصدر بعون الله فى أى وقت وقرائها هم طلبة سيارات 2 فقط وسيارات 1 الكحيته يمتنعون ..فهم الذين لايعرفون الكوميديا ولا الفن ولاالهزار العلم ديدنهم والكتاب صديقهم الوحيد ..لذلك كنا نحرر المجلة أثناء المحاضرات شريف عليه الكريكاتير والعبد لله عليه المقالات والفوازير وبعض الزجل ....كان شعار المجله 4 ابيات زجليه هى مونولوج لشكوكو لكن لظرفه اخترناه شعارا لمجلتنا تقول الأبيات
عين الحسود فيها عود وكمنجه
أنا الترماى .. وانت السنجه
قربك منجه ..وبعدك رنجه
وعين الحسود فيها عود وكمنجه
لاأدرى لماذا استقر الرأى على تلك الأبيات ولكنه استمر شعارا يكتب فى الركن العلوى الأيمن للمجله - وكانت تدون بالقلم الرصاص - كانت رسوم عابدين الكاريكاتوريه آية فى الظرف والطرافة وكان يرسم كل واحد بشكله المميز ...أذكر اننى كتبت هذه القصة المتناهية القصر فى أحد أعداد المجله كتبت :-
كان الوقت عصرا والعيد نصرا .. وقفت الجموع تهتف على جانبى الطريق بصوت جهورى ..عاش عاش عاش عباس ... كلهم يهتفون بحرقه إلا واحد فقط وقف صامتا لا يهتف ولا ينطق ببنت شفه ... اقترب أحد المخبرين المعروفين بالضخامة والرخامه ... سأل الشخص الصامت سؤالا واحدا ... هو الأخ ما بيهتفشى ليه زى الناس دى كلها ... وإلى الآن لم يظهر الشخص الصامت للعيان مرة أخرى ...انتهت القصة ... من ضمن ماكتبت أيضا فزورة فى كلمتين تقول الفزوره :- معظمه نشاء ويعلوه غشاء ..كنت اعنى بها طبق المهلبيه الذى كان يقدم لنا يوميا فى وجبة العشاء ...كان الطبق كبيرا ...لستة أفراد كان الطبق معدنيا قطره 40-50سم لكنه مفلطح وكانت طبقة من النشاء تطفو على سطح المهلبيه.. وكان على أحدث طالب موجود على الطاوله تقسيم الطعام على 6 فكان عليه أن يرسم بالسكين 3 خطوط بزاويه 60 درجة بينهما ليشكل 6 مثلثات يأكل كل واحد سدسا ... لكن المهلبيه كات طريه جدا من تحت ولا يمكن الغرف منها فى الأطباق الفرعيه ... فكان المتبع أن يبدأ من انهى طعامه المالح أولا بالتحلية ملتزما بالخطوط المنقوشه على سطح الغشاء البلورى للمهلبيه ...كان اللئام وأنا منهم يأكلون بسرعة فظيعه دون مضغ حتى يحل دورهم بدرى فى المهلبيه كنا نأكل من تحت الغشاء فتنساب المهلبيه المجاوره لتحل محل ما استهلك وبذلك تحل البركه فى سدسك ولا ينتهى أبدا بينما تهبط المثلثات الخمس الأخرىرويدا رويدا حتى تلامس القاع ويفوز أول الآكلين للطبق بالغنيمة وحده ولا يجد الباقين سوى غلالات رقيقة جدا من الغشاء السطحى مقسمة بالعدل لكن البئر من تحتها قد جف ..كان يغلبنى الضحك وأنا ألتهم بطريقة التجريف السفلى للمهلبيه مع ترك الغشاء كما هو دون مساس ... لذلك أوردته فى الفزورة .. تعظيما لفائدته العظيمة فى الإغداق علينا بكامل أو معظم المهلبيه فى العشاء ...كان ذلك كله فى ستينات وسبعينات القرن الماضى

وحدى على شاطىء زهراء العجمى

اليوم هوالجمعة الأولى فى شهر رمضان

الجو حار فنحن فى بدايات سبتمبر ... كان لى مشوار للعجمى فذهبت مبكرا ..الشوارع خالية ..الناس مازالو نائمين ..وصلت لصومعتى -منزلى المتواضع هناك- ...هو ليس منزل ..هو ورشة على هيئة منزل فيه كل عدتى (نجارة وحدادة وميكانيكا وكهرباء وزراعة ونظم رى آليه.. ومعدات البناء والمحارة والسباكة والحبال)...كل العده هناك ... زوجتى لا تطيقها فى الشقه برغم أنها أول من يصرخ ..الحق !!!حوض المطبخ مسدود ..حوش الغسالة طلعت نار من تحت وريحتها شياط ... والعبد لله هو المسئول عن التأمين الفنى لجميع أجهزة وآليات ومركبات المنزل ...ليس منزلنا فقط بل جميع منازل الأقارب والأحبة ...كلما زرت قريبا وجدته يحضر لى لفة كده وهو يبتسم ...الخلاط مزرجن ...الكبه موش بتدور..العربيه جابت بيلات ...وكأننى فؤاد المهندس بتاع أيها الناس ...المكنه طلعت قماش ... وأنا لا يضايقنى هذا فأنا غاوى مشاكل وهم يعرفون اننى لما احط شىء من دول فى دماغى ...موش حاسيبه الا لما يتصلح ويرجع يقول زى ماكان ....المهم وصلت العجمى لقيت الجو كده ينادى على الموجودين هيا على البحر غطس واحد يبدد الحرارة غير الرمضانيه دى ...اخذت الشورت والفوطة وياللا بينا عالزهراء -أقرب شاطىء للبيت - وصلت هناك ..على البوابة شاب ممدد ساقه ...كل سنة وانت طيب اتفضل .. طب موش حاترفع الشادوف شويه انا حاسس ان سقف العربيه حا يخبط الشادوف ...لالا عدى عدى بعيد ... ببطء شديد عديت وأنا أنتظر صوت الارتطام فى أى لحظة ...احسست أنى أرقص رقصة الليمبو بتاعة حسن يوسف فى أفلام الشقاوه بتاعته زمان ...طبعا أكيد الكل عارفها ...بس أنا كنت بارقص اوتومبلاوى موش بجسمى .... ركنت فى أول ظله ولفعت الفوطة متوجها نحو البحر ... الرائحة رائحة سبتمبر ...الشاطىء خالى تماما من المصطافين ... لافته تقول شمسيه وكراسى سبعة جنيه !! لكن عدد الشاسى المنصوبه =صفر هناك اثنين ماسكين مكن صيد وبوص تسالى رمضان ...ام تمشى مع طفلها على الرمال بعيدا عن الماء ...أنا الزبون الوحيد اللى طالب إيد المايه ... المياه لونها مخضر موش زى زمان ..كانت مياه العجمى زمان بلوريه بلون لازوردى ساحر ... والآن فيها من الخضار ما يقرب لون الملوخيه.. طب حاجى ومانزلشى ؟ سؤال زن فى نفسى ...والله لانزل .. القيت بنفسى بين الأمواج ..كل تركيزى عدم دخول الماء لفمى ... تأملت السماء ...السحب المتفرقة ابتدت تظهر خلو الشاطىء بعث فى نفسى ذكريات الشباب والطفولة ...كنت أحب الصيف جدا لأنه يعنى العوم ولعب الراكيت -كنت ممن يتقنون هذه الرياضة الشاطئية جدا_كنا إذا اقتربت امتحانات آخر العام نفكر فيما بعدها ...تجهيز المضارب من عند عصفور وكور من نادى اسبورتينج -خرج ملاعب تنس -وكانت بيضاء زمان لكن الآن بقت أخضر فوسفورى ..كمان ..الكوره الشراب المكسوة بالأوتكس وهى مادة لاصقة تحمى خيوط الكرة من التآكل السريع وكنا نشتريها من محلات لوازم الأحذية ...كان هناك أيضا تجديد الاشتراك فى نادى ناصر للمصارعة وكمال الأجسام ...جيم يعنى بس شعبى وكل معداته يدوى موش لميع زى بتاعة اليومين دول ..كان فى هذا النادى مصارعين على مستوى الجمهورية وأبطال على مستوى فنى عالى جدا يتدربون فى البساط الذى يحتل أحد غرف الشقة التى هى النادى كنت كمعظم شباب جيلى وقتها نحب أن نكون مثل شمشون واسبارتاكوس واستيف ريفز وعبد الحميد الجندى بطل العالم فى كمال الأجسام كان البطل النموذجى هو الواد المفتول العضلات الذى يركب العجلة الحربية الرومانيه ويهش الأعداء هشا بيديه التى لم يكن بحاجة معها للسيف ولا للحربة ...وكان عادة ما يهد الدنيا كله على دماغ عدوه بكلتا يديه فى نهاية الفيلم لم تكن رياضة الكونج فو ولا الكاراتيه قد ظهرت فى وقت سنين مراهقتنا لذلك كان اسبارتاكوس بجونلته الجلديه وعضلاته المدهونة بزيت الخروع هى أمل كل مراهق فكان نادى السويدىوشيل الحديد الشعبى فى النبى دانيال هو الملاذ..كان فى النادى فراش ..أو ادارى اسمه عم فرج .. كان عم فرج لعيب بنج بونج جامد جدا يركن الكور شمال ويمين فيهد حيل اجدع شاب ..كان إذاأعجبته أخلاق أودقة مواعيد أحد الأعضاء أعطاه لقب بريطانى كان شديد الإعجاب بالبريطانيين فى دقة مواعيدهم ونظامهم وبالمقابل أطلق عليه كل أعضاء النادى لقب فرج البريطانى كان يحضر الحلبة والسحلب للمصارعين ومريدى كمال الأجسام ...وكان أن أهدانى لقب البريطانى لالتزامى ولإجادتى لعبة تنس الطاولة فقدهزمته ذات مره...كنت ابتهج لقدوم الصيف ...وكانت تعترينى نوبة من الضيق كلما بدأت السحب الرماديه فى الظهور وكلما رأيت سيارات المصيفين تحمل متاع الصيف وتتجه نحو الطريق إلى القاهرة والمحافظات ..تخلو الشواطىء وتقل الضوضاء ...تظهر الجوافه فى الأسواق ...اليوم نهاره يقصر ...انها نهاية الصيف كنت أحزن جدا عند ظهور هذه المظاهر وأنا بعد فى سنين المراهقة ...كنت أنادى على المسافرين فى سرى ..انتظروا قليلا مازال فى الصيف بضعة أيام لا ترحلوا هكذا مبكرين وأكلم السحب الرماديه ...ألا تتأخرين قليلا..لسة أسبوع عالدراسة !! هذا مامر بذهنى وأنا فى الماء وحدى يوم الجمعة ...نفس الحنين إلى امتداد الصيف ولو لبضعة أيام ا -  

مشمش يتحدث عن نفسه

كنت أبلبط فى قرية كرير ذات صباح وفجأة تزاحمت هذه الأبيات فى رأسى بدرجة .. جعلتنى أخرج من الماء مسرعا وأفرغها على أى ورقة وجدتها حولى ......وأسميتها مشمش يتحدث عن نفسه علىنهج قصيدة مصر تتحدث عن نفسها للشاعر العظيم حافظ إبراهيم (مع الفارق الهائل فى القيمة والمقام) أقول:

أنا الحاكم :. أنا الباكم
أنا هتلر :. أنا عنتر
أنا القانون أنا الدستور
أحط واشيل واميل واقدر
وأنتو الشعب أنتو النمل
وانا سليمان أدوس واطمر
أنا اللى بضربه من إيدى يموت ميه
يطير ميه وافعص ميه أو أكتر
أنا الحامى أنا النامى
أنا القاضى وانا العسكر
أنا اللى بقول حضر رمضان
وفات شعبان واقول للصايم اتسحر
ولما يطول صيام رمضان دا شهر طويل
كفايه عشرين وموش أكتر
هلاله بشوفه وبعينى ولا الفلكى يبارينى
بشوفه ف وسط ميت نجمه وبأماره بلون احمر
أنا اللى بقول على المواعيد واجيب العيد
واحط واشيل شيخ الأزهر
وهى دى الشفافيه كنوز جوايا مخفيه
بشوف الغيب وكف الإيد لكن عمرى مابتمنظر
أنا اللى باحمى كل الناس وكل المال
ولو واحد ضرب جاره مخليش حد يتعور
أنا اللى لو ف يوم قال لى واحد مهياص
كلام معسول أدوخ واسكر
واصدق كل كلمة مدح حلوه ودح
بحكمه أو فى صورة نصح ومين عالنعمه يتبتر
وشوف يابنى الشباب شغال ايديه عماله مش بطال
عيال حريفه فى الدومينو فى قرص الزهر بقو سكر
شباب لو خش فى بطوله ودوليه ف كوتشينه
يجيب الكاس بلا منازع عيال سهرانه فى التمرين
وخبره جامده ست سنين بيتمرن وبيعفر
مافيش واحد ملوش شغله يسوق ترماى يسوق بغله
ولو سوق الحمير يغلا يكون حََََمًار ومين اشطر؟
أنا اللى بحكمتى وّقَعت كام طياره زرع بصل
واخللى القطر يضرب قطر على نفس القضيب لاْغْبَر
وماله...... يتحرق ألفين دا تعداد البلد ملايين
طالع دينّا فى سد الدين سيبونا نقص ...ونقشر
ولو واحد يغرّق "بوط" ملان بالناس (بوط=boat (
ياخد كباس يسافر ....بس راح يحضر
باخللى المقترض يهرب ودوغرى يفوت
يروح بره يدبر قوت بدل ما ف مصر يتعثر
حبايبى ..فلوس بسلفهم واكيسهم
واقول ياللا على اليونان وبكره الأمر يتدبر
أنا اللى باحب كل الناس تسقف لى
تشجعنى وتهتف لى ولو منظــــر
أنا اللى بقول لهم حكمه بتنفعهم وتوجعهم
كما الحقنه...تشكشك بس فى السنتر
وانا اللى بحوش زكام عنكو واحصنكو
لصحتكو... بابيد الطير لأمراض الطيور تكتر!!
عشانكو بازود الأسعار بنص دولار
تزيد كام سلعه ..ولا حاجه جيوبكو بالفلوس تعمر
كمان شوفو مشاريعى شتا ربيعى
وغاز بقلل من الميه صحارى مزرّعه أخضر
وخطه كمان خماسيه سداسيه سباعيه
محدش قال عشاريه؟؟ تعالى حاسبنى لو تقدر
أصيغ ليكو قوانينكو كما مزاجى
ولو حتى قانون للفول يفوت دوغرى ويتمرر
كمان دوستورنا عدلتو وضبطو وهندستو
عشان يبقى التنافس حر ويحكمكو شيوخ منصر
أنا اللى لما افوت فى الحى تقف طوابير كتير م الخلق
وتهتفلى بعمق الحلق كلام بصعوبه يتفسر
لكن معرفشى ياخوان ليه بلاقى قزازعرابيتى
عليه ميه كتير م الجنب بتطلع من شفايف الناس
دى واللا الدنيا بتمطر؟؟
أنا اللى بالسلام خليت جيوشنا تخش جوه البيت
بقت منظر بقت بوكليت بقى اللى يشوفها يتحسر
على الجدعان ..على الشبان بقى وحدات للاستعراض
وبهلوانات..تنط..تفط غنا وهتاف لشاهبندر
وأكبر ميزه فى شعبى حبيب قلبى
ده إنه للبلا نساى ولا بيقرا ..ولا يفكر
وهو ده رهانى عليه أقول له كلام ..عدل.. بومبيه
يقول أوكـــــــــــيه ويصبح ناسى ....ناس سكر!!
عشان كده ناوى فيها اقعد أقوم وارقد
لحد ماييجى ملك الموت أقول له : "ليه كده مبدّر"
دانا لسه يادوب تسعين ..ماجبت ميتين
ونوح عاش م العقود تسعين.. ف سيبنى كمان انا أكتر